مياديــــــن

كاريكاتير : الخلافة .. تكفير الفنانين ...الخ

2011-11-17T13:23:00.010+01:00

اطلقوا سراح معتقلي القصبة 3

2011-07-16T11:00:00.003+01:00

نـضم صوتي لصوت باقي المدونين و الناشطين و الحقوقيين و نطالب باطلاق سراح المعتقلين على خلفية المشاركة في اعتصام القصبة 3 رغم اختلاف وجهة نظري مع منظّميه في العديد من النقاط اللي نأجّل النقاش فيها الى وقت لاحق

كما اندّد و أدين مواصلة حكومة السبسي انتهاج سلوك قمع المظاهرات السلمية ، و منع الصحفيين و الاعلاميين من ممارسة مهنتهم في كامل الحرية ، اللي فيهم اعتداء صارخ على حق اساسي من حقوق الانسان

الــتـّبلعيط .. أنــواع

2011-05-11T18:53:00.008+01:00

كلام معقول .. في بعض جوانبو .. لكن كيما تعرف انّو جدليا تنجّم تكون الفكرة معقولة و موش معقوله في الآن نفسو : مثلا التضامن مع الراجحي كيما ينجّم يستبطن نوع من الرغبة الجمعية اللاواعية لدى البعض في البحث عن زعيم جديد نهتف باسمه و نصطفّ وراءه كما تعوّدنا دائما و ابدا ، و كان الحياة السياسية بلا زعيم لا تستقيم . لكن زادا ينجّم يستبطن ملامح وعي سياسي و قانوني متطوّر مفادو انّها العباد اصبحت تعرف تفرّق بين محاكمة عادية و محاكمه ملفّقة و ذات محتوى سياسي مغطّي بالمدني ، الناس اصبحت تفرّق مابين بث الفتنة ( وهي التهمة اللي موجّهتهالو السلطة و من وراءها و من لفّ لفّها) و ما بين حرية التعبير ، و حرية الدردشه مع الاصدقاء و افشاء الهواجس و الخواطر و التكهنات و التوقعات و الانطباعات و القراءات الشخصية للوقائع و للاحداث

حكاية انّو حـْـصـُـل في الفيديو ثانوية جدا قدّام رغبة و ارادة سياسية قويّة في تتبّعو .. اراده سياسية كنا نتمنّاو نلمسوها في مسائل و ملفات اهم من تتبّع ثرثرة وزير سابق "لامسؤول" و "موش في وعيو" و "يمكن سكران" .. كيما قالت الحكومه

انا ضدّ اهمال المضامين و التنصيص و اللهث وراء الشكليات ، و ضدّ استئصال اردأ مقاطع الفيديو اللي ذات صلة بالثورة ، و ذات صلة بالاعتصامات ، و ذات صلة بوقفات التضامن و الاحتجاج ، و سحبها على الحركة الكل بشكل يشوّه و و يتجنّى و يمسّ من عدالة و جدية و صدق القضية المتحرّك من اجلها

في ارقى المجتمعات ، لا تخلو الحركات الاحتجاجية من الاستثناءات على مستوى الاداء و الاشكال المتبعه و درجة الاندفاع و الحماس و التهوّر الخ ...

احيانا تكون القضية عادلة ، و طريقة التعبير عليها لا تخلو من المبالغات من طرف البعض (مثلا : اعتصامات القصبة) و احيانا تكون القضية بيدونه و ذات محتويات رجعية ، و يضفي عليها اهلها الكثير من الطقوس المتحضّرة و الهدوء الكاذب (مثلا : اعتصام المنزه)

هو في الحقيقة احنا بكلنا في هالبلاد ، و ما شابهنا من البلاد الاخرى ، بمثقفينا ، باشباه مثقفينا ، بما عطانا المولى ، تربّينا على صورة نموذجية لرجل السياسة على اساس يلزمو يكون كلبه بن كلب (موش حتى كلب بن كلب ، لا ، كلبـَـه بن كلب) ، الرحمة لا ، لا عهد لا ميثاق لا مبدأ ، و كانّو المناورة و التكمبين و التكتيك (اللي هوما صفات مطلوبين و محمودين بل ضروريين في السياسة ) هوما مرادفين للسقوط و الكذب و الدّوره و الخداع و الانقلاب و التآمر و قلة المعروف

نقول الكلام هاذا بالطبيعه بعد ما ولّى كل من هب و دب يملك الصلوحية باش يقول هاذا يجي على مزاجي باش يجي رجل سياسة و هاذا ما يجيش على مزاجي باش يجي ، و هاذا ما يجيش رئيس حزب على خاطر مراياتو قديمه ، و هاذا على خاطر شلاغمو كبار و غيرها من السفاسف

القضية موش قضية هل انو الراجحي يجي رجل سياسة و الا لا

القضية هو انّو البعض تحت عنوان الموضوعية و الحياد (و لو انّو ثمّه حياد باسل و ماسط) اصبح ما يدّخرش ادنى جهد لتشويه النضالات و تتفيهها و الصاق صفات الـ"فوضى" و الـ"لامسؤولية" بيها ، مهما كان مصدرها و شكلها و محتواها و محرّكيها ، سواء كان زبال و الا قاضي (و المثال هنا موش تفاضلي)

قال شنوّة عيب انّو القاضي يهبط في الشارع و يعيّط بالشعارات

شنوّة اللي موش عيب ؟ انّها كمشه متاع شلايك ، مسيّبة الثعابين اللي مازالت متكعوكه على رقابنا و تعمل على الرجوع بينا لتالي ، و هابطة للشارع قال شنوة : اتحاد الشغل ديقاج

تباركالله

هاذيكه هي التحركات الفاضلة و النبيله و العادلة و المستجيبة فعلا للقضايا الكبرى للثورة !!!!!! ـ

انا برغم انّي احرص منك على نظافة الاتحاد ، و ضرورة تخليصو من قيادة سلبية متواطئه ، نسألك سؤال وحيد : وينك انت و امثالك من جماعة "اتحاد ديقاج" وقت اللي المناضلين النقابيين النظاف يقاومو في العفن اللي انت توّ برك وين شفتو ؟؟؟؟ لا يا سيدي ، ماكش بطل ، المناضلين النقابيين الصحاح لقاوها قبلك ، و صنّفوا القيادة النقابية و موقعوها و عملولها ستراتيجيا للتصدي ليها و فضحها و فضح تواطؤها عند القواعد ، منذ عقود ، وين كنت وقتها ؟؟؟ صحّه النوم !!!!

توّ عاد ؟؟؟؟؟

توّ ؟ وقت اللي من المفروض انّها تتوحّد الجهود الكل ضدّ عدوّ واحد: الدكتاتورية (موش فقط الدكتاتور يا فايقلها)

توّ ؟؟ وقت اللي من المفروض تتوسّع جبهة الاصدقاء (بالمعنى السياسي) ما امكن ، معقول نتلفّتو تو لبعضنا و ننهشو بعضنا ؟؟؟؟

شعار "اتحاد ديقاج" في المطلق هكاكة هو شعار غاية في التخلف و البهامه ، هاي البهامه الليييكس

اولا منظمة في عراقة اتحاد الشغل ، اللي ماكانتش فاعلة فقط في توحيد العمال ورص صفوفهم من اجل تحقيق مطالبهم المشروعه في تحسين ظروف العمل و حمايتهم ما أمكن من استغلال و جشع ارباب العمل ، بل ايضا في النضال الوطني ضد المستعمر ، بالتالي تاريخ اتحاد الشغل ما ينجّم كان يأدّي للمزيد من الافتخار بيه و المحافظة عليه و النضال داخل هياكلو ، حتى و ان اختلفت التوجهات و الخطوط داخلو ، فإنّو الفرز الديمقراطي الشفاف هو المحكّ لاسقاط زيد او عمر من قياداتو الفاسدة ، بالتالي لا يمكن وضع ايّ محاولة لضرب اتحاد الشغل الا في سياق ضرب منظمة جماهيرية مناضلة تمهيدا لتشتيت نضالات الطبقة العامله و تهميشها

ثانيا ، شراسة هجمة رأس المال المالي المعولم (المسمّى تلطيفا بـ"العولمه") تقتضي و تحتّم على الشعوب المطالبة بالتصدّي ليها انّها توحّد نضالاتها تنظيمًا و هياكلَ و اليات ٍ، موش تشتّتتها

اللهم اذا كان مازال ثمّه شكون لتوّ ، و حتى بعد اللي وقع و مازال ياقع ، مازال يعتبر مفاهيم "الثورة" و "الامبريالية" و "الرجعية" و "النضال" هي مفاهيم "تجاوزها الزمن" و "محنّطه" و "حشو متاع خطابات" و "شعارات" ـ

لا يا سيدي

الثورة علم .. علم التحرّر

القضية في مدى مصداقية و نزاهة المقياس اللي وقع اعتمادو من طرف بعض البلاعط الجدد (اللي اتضح انو، و مع الاسف ، عداءهم للبلعوط بهتان الخسيّس كان من قبيل الغيرة على حيازة لقب بلعوط لا اكثر لا اقل) في منح صفة رجل سياسة للراجحي ، و هل انّو هو الوحيد اللي يلزمنا نرجّعو نحطّوه في الميزان و نشوفو مدى قابليتو لان يكون رجل سياسة فقط لانّو خمّم بصوت عالي مع ناس معينين كان يتصور انّو بصدد الدردشة معاهم بشكل حميمي

القضاة اللي تظاهرو في الشارع ، عيب عليهم !! و ما يواتيهمش و تسييس للقضاء!!! اما التحضير لمحاكمة سياسية للراجحي عبر تجريدو من الحصانة ، على خلفية دردشة شخصية ، موش عيب و موش تسييس للقضاء ؟؟؟؟؟

و للتذكير فانّهم قبل ما يلتجؤوا للشكل هاذاكه اصدرو بيانات و ندّدو و بيّنو و وضّحو و تفاوضو .. من غير حتى صدى في ظل حكومة اعادة انتاج البورقيبية

اذا فقنا من النوم توّ و ولينا يلزمنا نحلّلو هل انّهم رجالاتنا اهل للسياسة ام لا ، ماو نبداو باكثرهم خطورة

و اكثرهم انقلاب على الشعارات و المهمات الرئيسية اللي قامت من اجلها الثورة ، و وفاء للعهد القديم

و اكثرهم تشبّها بالدكتاتور الفار

و اكثرهم مواراة و محاباة لرموز الفساد

و اكثرهم تلكّؤا و تباطؤا في تحمّل مسؤولية محاسبة الفاسدين

و اكثرهم انفرادا بالراي

و اكثرهم عملا على استنساخ فكر بورقيبه الاستبدادي في الممارسة السياسية اللي ماعادش تسمح بيه المتغيرات تو ّ

و اكثرهم غموض و اتّهام لاحزاب سياسية عريقة في نضالها ضد الدكتاتور المخلوع ،بالضلوع في اعمال العنف (سليانه منذ قرابة شهر و اتهام عناصر من الوطد + و تونس العاصمة في الاسبوع الاخير و اتهام البوكت )

و احرصهم على استعمال العنف الهمجي موش فقط ضد المتظاهرين السلميين المطالبين بأداء حكومي اكثر شفافية و وضوح في خصوص محاسبة أكلة اموال الشعب و قاتلي و معذّبي ابنائه ، بل تعدّاه الى الصحافيين و مقرات اتحاد الشغل

و اوّلهم ضلوعا او تغافلا ، على سيناريوات الانفلات الامني المبرمج ، اللي تعاودت بنفس السيناري و الشخوص و الاخراج و الديكور يومي 14 و 15 جانفي ، و يومي 25 و 26 فيفري و مؤخرا في سليانه و باجة و العاصمة

المسؤولين المورّطين سواء بالمشاركة او بالتخطيط سواء بالامر او بالتنفيذ او بالسكوت هوما اللي اولى باش نتساءلو هل انّهم يجو رجال سياسة و الا لا

هاذومه اللي يجو رجال سياسة نموذجيين ؟؟؟؟

هاذومه اللي يقبلهم مزاجك ؟؟؟؟

يمكنشي حكاية شلاغم كبيرة و صغيرة .. و مرايات قديمه و جديدة

فعلا .. انا بديت نقتنع انّو الثورة متباطئه في تحقيق اهدافها بسبب تواصل وجود ناس مازالت تفكّر بمثل هالاسلوب

من الخطير استبلاه الناس عبر تضييق و حصر المشهد في اتجاهين فقط : اما انّك تعمل في الفتنة و يمانيبيلي فيك الراجحي ، و اما ان تكون ضد الفتنه و تدخل تحت جناح بابا عزيزك السبسي

لا يا سيدي ، ثمّه منزلة ثالثة ، و هي الاهم : و هي منزلة التساؤل الشرعي عن مدى توافق و تلاؤم انجازات و اداء الحكومه المؤقته مع ما رفعته الثورة من شعارات الحرية و محاربة ؤالفساد و محاسبة الفاسدين ، فاسدين موش فقط في المال ، بل ايضا في السياسة و الاعلام و القضاء و الامن .. و مدى جدّيتها و حرصها و تقدّمها في ذلك

و يظهرلي التساؤل على ذلك و نقد اداء الحكومه اللامقنع حاجة مشروعه جدا ، على خاطر ماهياش لعبه

الدمومات اللي سالت ماهيش لعبه ، و ماهوش قواش و بانتييير و تنتورة متاع سينما راهو ... لا ... هاذاكه راهو دم حقيقي .. عائلات دُمّرت ، نساء ترمّلت ، اطفال تيتّمت ، امهات تثكّلت ، موارد رزق تسكّرت ، و فوق كل هاذا : حياة بشر و كانت هنا

السؤال الاول هنا هو : علاش ؟

الاجابه نعرفوها الكل : الحرية من قبضة الدكتاتورية و الاستبداد و الفساد

من المشروع جدا ان نقول : لم يقع تحقيق اشياء تذكر مما سالت من اجله هذه الدماء

هاذا هو العنوان الكبييير اللي يمكن ، و بشكل او بأخر، تنجّم تنضوي تحتو مسألة الراجحي كمسألة ثانوية جدا

تصريحات الراجحي كانت فقط بمثابة القشة التي قصمت ظهر البعير ، فقط لما له من "قــْـبول" لدى عامة الناس اولا ثم نظرا لقربه من دوائر الحكم مما اعطى الكثير من الفيابيليتي لتصريحاتو ، بخلاف هاذا ، الشي اللي جا بيه في عمومو ماهوش جديد ، و موش اوّل مرة يتقال ، سواء من اطراف زادا قراب من دوائر الحكم ، او من عامة الناس في القهاوي .. من الحوات .. للزبال .. و بالمناسبة تحية للزبّال في اضرابو .. خلّي البلاد و هي ناتنه ناتنه .. تنتن ماديا و حسّيّا زادا .. مع نتونتها السياسية .. . و كما تكونون .. يولّى عليكم

تحيين مفاهيمـــي

2011-01-30T18:38:00.001+01:00

تحيين مفاهيمي : باعتبار ما وقع في القصبة ، و اللي اصبح القاصي و الداني يعرف حيثياتو ، و باعتبار بعض ردود الافعال الغبية اللي انطلت عليها سيناريوات التشويه اللي تحاكت ضد المعتصمين ، بالتنسيق مع بقايا التجمع الحقيرة و وسائل الاعلام اللي ماهيش مستعدّة للتوبه النصوح ، فإنّو وقع تحيين مفهوم التجوبير ، و كلمة جبري ما عادش تعني : القلّيل اللي ما يعرفش ينسّق لبستو و ماكلتو و مشيتو و لهجتو ... و انما اصبحت كلمة جبري تعني : الدّعيّ الغبيّ ، اللي عندو بوردال في مخّو ، و اللي وقت الرسمي يبدا طالس كي الجريبع ، و بعد ما تفوت الغارة ، و يحلّ الرخاء الامني ، يطلّ بعويناتو العـمياء ، و يبدا ينبّر

حــِـياديـّــة الـموتــى

2011-01-29T09:52:00.007+01:00

شعبنا المبدع اللي عمّال يسترجع في ثيقتو في روحو اكثر و اكثر .. كيما فيه أذكياء و طاقات عظيمه .. فيه زاده كعيبات (نقول كعيبات خاطر بالحق من حسن خظّنا انهم شويّة في البلاد) مازالو للاسف يفكّرو بالطّــــــــريقة المــْـــعفــّـطه هاذي : ـ

لا َنــــِي مع المعتصمين ، لا َنـــِـي مع الغنوشي (خاطر المعتصمين ينجّم يكون من بينهم يسار و الا يمين مطّرف اما الحكومه لا... دونك يولّي الاعتداء الهمجي متاع القصبة اسمو استعمال مشروع للقوة العامة ضد مجموعات تتعمّد "تعطيل المرافق العامة" )

لا َنــــي مع اتحاد الشغل ، لا َنــــي مع التّجمع (خاطر بعض النقابات القطاعية في اتحاد الشغل شادّينها عناصر يسارية و مساندتي للاتحاد ينجّم يوقّفني في صفّ واحد معاهم !!!!!)

لا َنــــي مع اسرائيل ، لا َنــــي مع المقاومه (خاطر المقاومه مسيطرة عليها حماس ، و وقوفي ضد اسرائيل ينجّم يوقّفني في صفّ واحد مع حماس !!!!!)

لا َنــــي مع الامريكان ، لا َنــــي مع التنديد و استنكار زيارة جيفري فيلتمان(خاطر زعمه زعمه فايقلها و ما نحبّش نطيح في نظرية المؤامرة ، و زيد خاطر المعتصمين ندّدوا بالزيارة هاذي ، دونك يولّي وقوفي ضدّ زيارة رمز من رموز الاستعمار ينجّم يوقّفني في صفّ واحج مع احمدي نجاد !!!!!)

لا َنـــِـي مع الثورة لا َنـــِـي ضدّها (خاطر وقوفي معاها للاخّر ينجّم يطيّحني في "الشعبوية" عفانا و عفاكم الله )

لا َنــــي مع ثورة الشعب المصري المضطهد بشكل غير مسبوق ، لا َنــــي ضدّها (خاطر المظاهرات اتعملت نهار الجمعه و ينجّمو يكونو الاخوانجية عندهم فيها يد و انّجّم نكون في وقوفي معاها وقوف في نفس الصّف مع الخوانجية )

ايّ شكون زاد

ملاحظات في توصيف ما حدث بالشّعبويّة

2011-01-28T14:47:00.003+01:00

منذ انطلاقة الثورة ، توجدت العديد من حلقات النقاش ، هنا و هناك ..من مدونات الى صفحات الفايسبوك ... حول مسائل سياسية و قانونية .. لعلّ اهمّها دور النخبة السياسية في الحركة الاحتجاجية ، غيابها من حضورها ، حضورها الايجابي من السلبي ، تجاوز وتيرة الشارع لاستيعاب النخبة السياسية ، تأخّرها في صياغة البرامج و المواقف و تحديد المهمات ...الخ

دارت كذلك بعض النقاشات حول مسائل قانونية ، خاصة ليامات لخّرة في خصوص الفصل 42 المنقّح اللي ينصّ على تمتــّـــــع الرئيس بحصانة قضائية خلال و بعد مدّته ، على خلفية بطاقة الجلب الدولية اللي صدرت في "زين العابثين بن علي" كيما كان يحلو لوالدي يرحمو انّو يسمّـــيه

في وسط هاذا الكل .. لاحظت ثمّة استهلاك مجاني و غير دقيق لمصطلح معيـّن في توصيف بعض المواقف مما حدث ، هو مصطلح "الشعـبـــويّة" ـ

انا رجعت للمفهوم هاذا ، في دلالاتو الاصطلاحية و السياسية و التاريخية ، و الحق ما لقـيـتــــش ضرورة لاستعمالو في توصيف ما وقع في بلادنا في مراحلو الكل ، سواء منذ اندلاع الحركة الاحتجاجية ، سواء بعد تناميها و تحوّلها الى مدّ ثوري ، سواء في الحركة الاعتصامية متاع ما بعـد 14 جانفي

توصيف الدعوة الى اسقاط الحكومه الحالية ، عبر تخلّى رموز النظام القديم فيها على حقائبهم ، و الدعوة الى حل المنظمة الارهابية اللي إسمها : "التجمّع الدستوري الديمقراطي" .. توصيف هاذا الكل بالـ"دعاوي الشعبوية" أمر ما يستقيمش في تصوّري ، خاصة وقت اللي يصدر من ناس مشهودلها بالقدرة على التحليل و القراءة الموضوعية للاحداث و للوقائع ، و اللي يبدو انّهم في حاجة لمراجعه مفهوم "الثورة" و خطوط تــمـَايزو مع مفاهيم اخرى مجاورة ليه : "انتفاضة" ، "انقلاب" .. و من ثمّ .. وضع ما حصل في بلادنا في الخانه الصحيحة ، بما يستدعيه ذلك من استكمال مهام الثورة هاذي ، سواء في العزل و الفصل الكامل للهياكل و الاسس و المؤسسات اللي كان النظام القديم يقوم عليهم .. سواء في استرجاع حياديّة مؤسسات اخرى ، وقع توظيفها لصالح النظام القديم ، عبر ضرب استقلاليتها

المهام هاذي ما يجسّدهاش انقلاب فوقي في اعلى هرم السلطة ، و ما تجسّدهاش انتفاضة او هبّة شعبية من اجل بعض الاصلاحات الجزئية

يعني هنا ضروري التفريق بين خطاب يهدف الى استكمال مهام ثورة على قاب قوسين او ادنى من الغدر ، بكامل مطالبها و محتوياتها السياسية ، و بين الخطاب الشــّـعـبوي

انا نعتبر انّو الخطاب الشعبوي هو هاك الخطاب اللي مأسس على مشاعر شعبية متأجّجه .. يحكمها غضب عرضي وقتي ، او نخوة انتماء عرقي او ديني ، دون ان يستوعبها و يوجّهها و ينقــّـيها من شوائب الوجدانيات و الرومانسيات و يرتقي بها الى مرتبة التأسيس النظري

و هو الخطاب اللي يقدّم للجماهير ما تودّ هذه الاخيرة سماعه ، و ليس ما يحدث على ارض الواقع

و هو الخطاب الذي يلغي قدرة الجماهير على الفعل عبر تضخــيم سلبيتها و انّها "مظلومه" و"مفعول بها "

ننطلقو من الناحية المفهوميّة

مصطلح "الشعبوية" (populisme) في اللغه .. في المنجد .. يتعلّق - فيما يتعلّق- بتوجّه روائي يـُـعـْـنى بالاهتمام بوصف الحياة اليومية للشعب و الاحتفال بوصف تفاصيلها .. و من ثمّ .. توسّع المفهوم و خذا منحى سياسي عام ، اللي هو: التوجّه الى الشعب في الخطاب و في البرامج

نتوقــّــفـو لهنا شويّ ، و نسجّـلو حاجة بسيطه ، انّو - موضوعيا- و انطلاقا من الدلالة الاصطلاحية هاذي لهالمفهوم ، ما ثمّاش ما ينمّ على انّو يشتمل على حاجة من قبيل "الذم" او "القدح" ـ

نرجعو نتعمّقو شويّة في تداعيات المفهوم هاذا السياسية ، و نبحثو على هويّة "الناعت" و "المنعوت" بهذه "السّبّه" ان جاز لنا تسميتها كذلك

في السياق العربي ، مثلا ، يـُـنعَت بالـ "شعبوي" من يقوم بمغازلة الجماهير بخطاب يدغدغ وجدانها المتحمّس بنوع من التملّق.

ثمة زوز كلمات مفاتيح هنا :

1) خطاب

2) الجماهير

يعني ثمّه معطى اساسي هنا ، هو "ذات معينه" تتولـّى تقديم "خطاب" الى "جماهير" ـ

قد يكون الخطاب هاذا حماسي و عاطفي ، يغذّي بعض النعرات العرقية ، و مبني على الشعارات دون برنامج عملي دقيق و واضح

كيما زادا ، قد يكون خطاب موجّه للجماهير ، مستمدّ منها و من قضاياها ، يحتوي على نظرة متبصّرة،جادة،عقلانية ،منسجمه مع الواقع ، و غير قافزة عليه ، وفق برنامج عملي واضح المعالم و قابل للانجاز

دونك ،طبيعي باش الواحد يتسائل : شكوني أقرب جهة يمكن ان تكون لها مصلحة في اطلاق هذا النعت على المجموعات او النخب اللي توجّه "خطابها" للـ "جماهير" ؟ اليست السلطة السياسية الحاكمه ؟ باعتبار التناقض الموضوعي و الحتمي لمصالحها مع الجماهير ، و بالتالي معاداة ايّ خطاب و أي برنامج يقوم على تأكيد و دعم مصلحة الجماهير الاساسية ، و اللي هي : الحرية

ثمّ سخرية السلطة السياسية من "الشعبوية" ، لصالح أش ؟ هل لصالح خطاب آخر اكثر تجذّرا و اكثر نجاعه ، في إسقاطها ؟؟؟ ام انّ كل خطاب موجّه ضدّها ، هو خطاب شعبوي بالضرورة .. إن كان متملّقا للجماهير ، أو مرتقيا بوعيها ؟ ـ

بالتالي مصطلح "الشعبوية" هو مصطلح ملغوم ، يستبطن استعلاء على الجماهير ، و احتقار و تتفيه لاحتجاجاتها و لتجربتها ، على اساس انّها شعوب "محدودة الوعي" و "غير مضمونه" و "لا يجدي معها خطاب التودّد" ، و هنا بالضّبط يجي دور ابواق الدعاية للسلطة الحاكمه

يعني ، و بين قوسين ، ماهوش فقط من قبيل السبّ الاخلاقي وقت اللي نقولو انّو واحد كيما برهان بسيّس هو "بوق دعاية" أو "قلم مأجور" ... و موش من قبيل الصدفه انّو في آخر لقاء ليه على قناة الجزيرة ، استعمل برهان مصطلح "الشعبوية" اكثر من مرّة .. في توصيفــو للاحتجاجات اللي وقتها بدات تخرج على السيطرة ، و بدا هو يفقد معاها في السيطرة على اعصابو ، و ظهر وقتها متوتّر برشه .. اللي هو شي طبيعي ، عبارة على واحد قالولو هزّ ماعون الصنّعه متاعك الكل و برّا روّح .. ماعادش عندك ما تخدم هنا .. و من بين ماعون الصّنعه متاعو : مصطلح "الشعبوية" اللي وقتها نعت بيه الاحتجاجات

كذلك ثمّة خطأ فادح هو اختزال الخطاب الشعبوي في اليسار .. بل وصل الامر بالبعض الى اعتبار الحركة اليسارية ، بتفريعاتها المختلفة هي حركة شعبوية

و الحال انّو الامثلة على عكس الادّعاء هاذا عديدة سواء في التاريخ (الخطاب النازي كان خطابا موغلا في الشعبوية) و في الحاضر (الروح الشعبوية لخطاب التيارات اليمينية المتطرفة الاروبيه .. هولانده ابرز مثال )

لكن السياق الاهم - تاريخيا- (في تصوّري) اللي وقع فيه استعمال مصطلح "الشعبوية" هو الصراع اللي دارت رحاه داخل الحركة الشيوعية العالمية ، في الخمسينات اساسا ، ما بين الستالينية و الماويّة ، إذ ْ فيما كانت الماوية تتهم في الستالينية بالـ"تحريفية" ، كانت هذه الاخيرة تتهم في الماوية بالـ"شعبوية" .. و الامر هاذا يتعلّق بمسائل جزئية و فرعية و بالمواقف من "الحزب الثوري" و "من هي القوى الاساسية في الثورة" ؟ العمال ام الفلاحون ؟" و "تقديس العفوية" و "تقديس الحركة على حساب النظرية" ... الى غيرها من الجزئيات .. و منها .. توصيف حركات التحرر اللاتينية بالشعبوية .. نظرا لمرجعياتها الماوية

و مهما يكن من أمر ، و باعتبار انّو موش هاذا المقصود بنعت الـ"شعبوية" اللي يتردد هالنهارين في سياق بعض المواقف من قضايا الثورة التونسية

و باعتبار كذلك انّو كيما تم توضيح انّو المطالبه باسقاط رموز النظام القديم هو من قبيل استكمال لمهام ثورة مهددة بالسرقة ، و موش انقياد و انصياع لمطالب شعبيه غير ناضجة .. يبقى توصيف الحركة الاعتصامية لما بعد 14 جانفي بالـ"شعبوية" .. توصيف فيه الكثير من المغالاة وعدم الدّقــّـــه

شعب كيف شعبنا العظيم و الذكي ، عينيه محلوله عالدنيا الكل ، وقع حرمانو لعـقود من اساليب التعبير البديهية و الطبيعية ، من الشرعي انّو وقت اللي يسترجع الحق هاذا .. و يفتكّو افتكاكا ، باش يستعملو للاخر .. و موش باش يتقسّط فيه .. شي طبيعي .. اللي على وشك الموت عطشا في الصحرا .. و تتمدّلو دبوزة ما .. وقتها ما يفكّرش طبــّــيـّــًـا في انّو يبدا يبلّ في فمو و لسانو بالطّريّف بالطــّريـّف قبل ما يشرب دفعة وحدة .. لا .. يفكـر غريزيا في حاجة وحدة : الارتواء = الحياة

طفل .. يكتب فوق جدار

2011-01-17T13:49:00.004+01:00

لجنة تنسيق التجمع بالقصرين

جرح و حرف

2010-12-30T12:48:00.005+01:00

في عزل المعزول

عـُــزّل العـْـــزاوات .. مـَـزلـُـوعـيـن و ملســوعين

ماهيش حادثة معزوله

في السّعد االمكبوب

من بـِـكـْــري بكـْـري .. بارْكــين بـَركه كبيرة .. و مكـْـــروبين كربة اكبر

ماهوش ركوب احداث

في القيل و القال

اش قولك في هـــالقلالّة لـّي قالـــولكم قــيلــُـــونا .. قيييـــــلـــــوونـــــااااا.. و قالوها تلقائيــّا...و ما قاللهم حد قولوها

ماهيش اقلّية

في الضـّرر الظـّاهر

مـْـرَضـْرْضـيـــن.. مضـْـــرورين .. مـْــضحّــين .. لا محظوظين .. لا ضاوين .. عالضحضاح

ماهـُـمـش محرّضيـــن فــوضويّـــيــــن

في الكــشّه و النــّـــشـّــه

شو كيفاش كثرت شكاويهم .. و كشـْـكـْـشت كـْــشاكـشْــهم .. بَالــكـْـــشي شاكــّــين و شامّــِـــين شـكـــــشوكه قاعــدة تـتـْــشكـْــشـك ..و هوما نارها

ماهيش كـَــمْـشــة ْ مـُـشـَـكــّــــكـِـين

احتجاج و تضامن

2010-12-28T12:25:00.006+01:00

متضامن مع التحركات الاحتجاجية اللي شهدتها وتشهدها ولاية سيدي بوزيد و كامل مناطق البلاد .. ضد التفقير و و التهميش و الفساد و المعالجة القمعية لاحتجاجات الناس

. خاصة و انّها احتجاجات عفوية .. لم يكن وراءها ايّ طرف سياسي .. و هاذا اهمّ عامل يأكّد صدق المعاناة و عمقها و مسّانها للناس في العظم كيما نقولو

و نعبّر زاده على استيائي و استنكاري لحجب تن بلوغ

.. مجمع المدونات التونسية

هالممارسة الي زيادة على كونها متخلفة و اقصائية و منافية لابسط حقوق الانسان في التعبير

فهي ايضا ممارسه غبية .. خاصة في الظروف الحالية اللي انقلب فيها السحر على الساحر و اصبحت المشاهد متاع المظاهرات السلمية المتحضّرة الراقية تتشاف من طرف .. الطّفوله .. و الشيب و الشبيبه .. اللي اصبحو يتندّرو على سياسة النعامة اللي تسلك فيها الاجهزة الاعلامية الرسمية

سـِـيـدي .. نحب نقرا .. و ما عنديش باش نتبرّع

2010-11-27T13:55:00.009+01:00

احيانا الواقع يعطينا كفوف باهين .. يفيّقو

عندي مدّة شاغلتني فكرة مركّز مطالعاتي عليها : ملخّص الفكرة انّو امام الرداءة الفنية اللي قاعدين اطفالنا يتربّو في وسطها و ينشؤو عليها ، و تشكّللهم في ذوقهم الفني تبعا لمداخيل شركات الانتاج ، و موش تبعا لذائقة فنية و جمالية سليمه ،علاش ما يتعمّقش الاهتمام اكثر بفن المسرح الغنائي لـلاطفال .. موش فقط كأوبيرات تقدّم في المناسبات ، و انما كستراتيجيا ثقافية مكثّفة .. احداث مهرجانات متخصصة فيها .. رصد مسابقات و جوائز هامه للمتفوقين فيها .. تخصيص ميزانيات هامه لانتاجها..إدراجها في البرامج التعليمية

المسرح الغنائي يجمع اساسا زوز من اهمّ الفنون و اقدرها على تشكيل متذوقين جيّدين للجمال : المسرح و الموسيقى

المسرح ، بكل ما فيه من حركة .. مواجهة .. تواصل مباشر مع المتلقّي .. تدريب على التحكم في الصوت .. صدق في الاداء .. اختبار الصدق من خلال المعاينة الحينية لتفاعل المتفرّج ، و الموسيقى بكل ما فيها مـن نصّ ، ايقاع ، صور ، لغة ، احساس ،

يعني المسرح الغنائي ، يظهرلي ،هو انظف اتموسفار ممكن تتربى فيه اذن و عين الطفل .. و بالتالي ذهنيتو العامه ..

هاذي النقاط العامة متاع الفكرة .. و اكيد تو نرجعلها بالتفصيل و بالأمثلة اللي شفتهم و زادو حبّبوني في الفكرة ..

لكن كيما قلت الفوق .. احيانا الشارع يكون هو الركح الجاهز و الخطير و الصادم و المستفزّ و "الصادق الأمين" اللي يوفّر عليك اشواط كبيرة من البحوث و الاوراق و التنظيرات و المقارنات و الاستنتاجات ... ما ثماش ما أقدر من الشّارع على كشف العورات

من ساعة لساعة .. الشارع يــألّف و يخرج و يبسط روحو ركح لمسرحية مختصرة و موجزه .. لكن بليغة .. و بلاغتها تنسّيك حتّى باش تصفّقلو في الاخير .. و يكتّف ايديه و يتبسّملك تبسيمه ساخرة .. و يبقى يستنّى فيك اش باش تعمل

المشهد اللي شفتو آمس ، كان مشهد متاع دقيقة والا دقيقتين بالكثير .. اما مدمّر و ملخّص للهموم الكل

الابطال: طفل ما يتجاوزش السبعه

سنين ، و أمّو ، و المعلّم

اللي كان عندهم حضور فعلي و طاغي على الركح هوما الام و الطفل

المعلّم : ماكانش حاضر فعليا ، كان موجود في الخلفية .. كان حاضر كقيمه .. كسلطة قاهرة خصّاءة .. كمنظومة أخلاقية مخيفة و منفّرة .. حضورو ، مع الاسف ، كان رديء ياسر ، و ما يليقش بدورو الطليعي ، إذ من المفروض يكون وعيو متقدّم نسبيا

الدّيكور : شارع مّسّــخ .. حاوية متاع البلدية طايحة .. و خارجة منها ساشيات متاع زبلة عندها نهارات ما تلمّتش .. تبربش فيها قطاطس منسّلة (!) مطرّده من الفضاءات النظيفة (!) فأدمنت جـِـيفة المزابل قوتـًـا لها (!) ... باب كبير محلول متاع مدرسة ابتدائية .. يستقبل في عدد قليل من التلامذة اللي جو مّخّر .. و من حين لآخر تسمع واحد من الصغيّرات ينبّه في خوه و الا في صاحبو و يستحثـّــو للاسراع في الخطى بعبارة : "فيسع .. رام دخلو"

و على بعد امتار من مدخل المدرسه ، امّ تحب تدخل للمدرسة هي و ولدها اللي كان يبكي و ممتنع على الدخول .. بقوّة و باصرار عجيب

و كيما يعرف العديد منكم انّي قرّيت في التعليم الابتدائي ، لكن طوال المدة اللي قرّيتها ، بعمري ما شفت اصرار على عدم الدخول للمدرسة من أكثر التلاميذ كسلا و لامبالاة ، كيما اللي شفتو آمس

و حتى اذا يتمّ امتناع ، فإنّو ياقع حـَـسمو في البيت ، إما بطريحة من الأب ، او بمقايضة من نوع هاك فلوس و الا شكلاطه .. و امشي للمدرسه

الوليّد هاذا امّو تكركر فيه بقوّتها الكل .. و هو يتخبّط .. يجبد في روحو خارج المدرسة .. و هي شادّتلو الكرطابله بيد ، و باليد الاخرى تجبد فيه لداخل

المشهد ما كانش عادي ، و كان مثير للتساؤل و للحيرة ، شنوّة اللي يجفــّــــل تلميذ من المدرسة للدرجة هاذي .. (و يجفّل هنا خوذوها بالمعاني الكل ، سواء يجفّل بمعنى ينفــّــر .. و الا يجفــّــل بمعنى يغطّسو في الجفــّال باش يقضيلو على لونو /روحو)ـ

الوليّد في اللحظه هاذيكه عندو سبب يمنعو من الدخول موش فقط للقسم .. و انما للمدرسه اصلا .. يا للكارثه .. و من الاكيد انّو السبب هاذا كان أقوى من سيطرة أمّو و بوه عليه ، و معلّمينو و مديرو و طاقم المدرسة الكل ،

اقوى من احتمال تعرّضو لاستهزاء اصحابو منّو وقت اللي ما يجيبش عدد باهي بسبب غيابو هاذا .. و اقوى من عقوبات العالم الكل اللي باش تنجر على هالغياب و هالامتناع على الدخول

الحوار اللي كان داير بين الأم و ولدها كان يتلخّص في غمغمات مفهومه ،الى حد ما ،من طرفها هي .. غير مفهومه من طرفو هو ، من نوع : عيّش ولدي .. ما تخافش .. هاني باش ندخل معاك .. راو ما يعملّك شي .. تو نكلّمو نا

و هو ، كان بكاه و بحّة صويّتو غالبين على كلامو اللي ما كانش مفهوم .. تعرفو مليح الصغير المقهور كيفاش يبدا يبكي و يتكلّم في نفس الوقت ، و الشهقة تهزّ فيه و تنفض .. هكاكه بالضّبط

قربت منهم شويّ .. مدفوع بالفضول .. و مدفوع بالطّفل اللي مازال يسكنّي .. و اللي كثيرا ما يلقى روحو ، لحد هاذي لحظه ، لغدوه ، في مواقف شبيهة ياسر بالموقف هاذا .. و قلتلها : أختي ، بربّي شبيه لوليــّد ؟

قالتلي : " هاك تشوف .. ما يحبّش يدخل يقرا .. خايف من المعلّم و حاشم من صحابو لا يضحكو عليه .. خاطر قاللهم اللي ما يجيبش فلوس التبرّع 26/26 ما يجيش .. و بــّــيّو مشّو هنا .. و ... " و تخنقت المرا بالبكا .. و ما نجّمتش تكمّل جملتها .. لكن ما كنتش في حاجة لبقية كلامها باش نفهم حالتها .. على خاطر ملابسها و تجاعيدها المبكرة و بشرتها و صوتها كانت كافية باش تـُـسعفها ، و تنطق في بلاصتها ، و تكمللها الجمله اللي ما نجّمتش تكمّلها هي بالغصّة

كانت هي تحكي .. او تحاول تحكي .. و انا نسمع فيها و نتأمــّــل في وجه الوليّد .. و في المرارة المرسومه على وجهو .. و في الاحباط اللي في خزرة عينيه اللي فايضة دموع .. و في صبّاطو المغبّر .. من جرّاء الفــْـراع مع امّو .. منديلتو اللي كــُـمّّ مشمــّر و كـُـــمّ هابط

حسيت روحي قدّام انسان كبير .. و شـَـريف .. انسان محترم يحبّ يوفي بوعدو اللي التزم بيه قدّام معلّمو .. رغم اللي الالتزام هاذا ماكانش صريح .. كان ضمني و صامت .. اكيد انّو وقت اللي المعلّم قاللهم "اللي ما يجيبش فلوس 26/26 ما يجيش ".. اكيد راهو الوليّد هاذا حبّ يقلّو : "سيدي انا مانيش متأكّد انّي انّجم نجيب .. بابا موش هنا و امّي ما عندهاش .. على الاقل توّ .. يحبّلها وقيّت باش تتسلّف و الا ادّبّر امورها في انتظار انّو بابا يجي .. اما يا سيدي راني نحبّ نقرا .. نحب نجي .. ما نحبّش نغيب .. و تفوتني الدروس و نتعاقب و صحابي يضحكو عليّ"ـ

التلميذ هاذا بينو بين روحو .. يقلّك مادام انا سمعت الشّرط متاع المعلّم و سكتّ .. معناها وافقت عليه .. اذن .. زايد باش ندخل توّ للقسم و انا مانيش موفّي بوعودي

التمرّد اللي قام بيه الطفل هاذا .. نتصوّر عندو اسس عميقة في وجدانو .. على خاطر كيما قلتلكم الحالة الرثّة اللي عليها هو و أمّو .. و خاصّة امّو .. تبيّن مليح منين جاي .. يعني نتصوّر اللي الوليّد هاذا كان في داخلو مستهجن فكرة التبرّع هاذي لسبب بسيط ، و هو انّو هو بيدو في حاجة للتبرّع .. كيفاش يولّي هو مطالب بيه .. و مهدد بالعقاب اذا امتنع عن ذلك

و من فكرة لفكرة .. تداخلت في ذهني الادوار .. و ماعادش عارف شكون المعلّم و شكون التلميذ

شكون الكبير و شكون الصغير

شكون الحكيم و شكون البائس

و جا لبالي المشهد السّريالي التالي : تخيّلت المعلّم قاعد على المقعد المدرسي الصغير الضّيّق متاع التلميذ هاذا .. و مغصور .. و ساقيه ملمومين و حالتو حليله .. و التلميذ هاذا .. الصغير القامه .. حاطّ كرسي فوق لـِـسـْـتـراد ، معلّي بيه باش ينجّم يوصل للسبّورة .. و شادد قطعة طباشير و يكتب في عنوان الدّرس

و المعلّم هو اللي يتلقّى في الدّرس و ينقّل فيه في دفتر إعداد الدروس متاعو .. اللي ماعادش "جورنال دو كلاس" .. بل ولّى كراسة فارغة .. يلزم تتكتب فيها دروس اخرى

أبجد هـــوّز حطــّي كلمن

إفتح صفحه .. إمسك قــَلـَمـُن

عنوان الدّرس : التبرّع

التبرّع عملية اختيارية .. حرّة .. إذا مورست بشكل قسري إجباري ..تتحوّل الى نوع من الإغتصاب المقنّن

انتهى الدّرس يا غبي

ما عـــيـّدتـــش على عمّــــك !؟ ـ

2010-11-25T12:50:00.003+01:00

مزاجيّ الطباع يا أنت .. في كل شي تقريبا .. ليس سرا انك غالبــًـا ما تحمل هذه المزاجية اللعينه محمل الطبع السيّئ .. فلكـَـم تسببت لك في احراجات و إزعاجات مع الأهل و الأصحاب .. خاصة عندما يتعلّق الامر بسلوك يفرضه عليك عـُـرف عائليّ .. أو "عــَـرف" في العمل ... أو ما إاليه من تفرّعات النفاق الاجتماعي

الـ"عـُــرف" … و الـ"عــَــرف" …

ما الذي يمكن ان يجمع هذين الاصطلاحين.. فضلا عن اشتراكهما في نفس المادة ( ع. ر. ف) ؟ قد يكونان فرعين لجذر واحد هو المعرفة وهمـًـا و سلطــــةً .. دون المعرفة علمـًـا و حرّيةً... فالقائلون بالعـُـرف ، و العاملون به ، و المدافعون عنه التائقون إلى تأبيده و ترسيخه في سلوكنا ، إنّما هم يتوهّمون أنّّهم يفوقون معشر الكافرين به معرفةً به و غوصــًـا في بنوده و فروعه التشريعية . فلا يدّخرون لذلك جهدا في إثنائك عن طريقك إن أنت حـِـدت عن هذا العـُـرف ، أو أبديت شيئـًـا من التململ في الانصياع له و الالتزام به ، فترى ملامح جادّة و مخيفة سريعــًـا ما ترتسم على وجوههم ، و تمطرك نظرات لومهم و استنكارهم التي يعلوها جبينهم المقطّب و هم يسألونك بنبرة تحــقيقية استنطاقيّة : " ما عـيــّــدتـش على عمــّــك ؟" ..

أتذكر خطواتك المتثاقلة و أنت متـّجها نحو عمّك لتأدية واجب التهنئة بالعيد هذا .. و تلك الأسئلة الشيطانية التي ألفتــَــها تعتمل بين جوانحك الغضّة ؟

"الا يكفي ابي ؟

الا تكفي واجباتي نحوه ، حتى تضاف إليها واجبات أخرى تجاه هذا الشّخص الذي لا يربطني به أيّ جسر من جسور الودّ سوى انّه أخ لأبي ؟

كيف لي الآن .. و أنا امشي في اتّجاه هذا العمّ لتقبيله .. أن اُنشئَ توليفة بين القبلة التي تعوّتـُــها من أحبّتي الآخرين كتعبير عن التقارب الجسدي الودّي الحميمي الذي لا يمكن ان يكون مصحوبا بسوىالحبّ أو الشوق .. و بين هذه القبلة الغريبة الباهتة ، التي انا بصددها الآن ، هذه التي أنا مطالــَــب بتأديتها كما يؤدّى الواجب العسكريّ ، بكل جفاف و انصياع خاليين من رغبة أو ميل

كان أبي ، مدفوعا بحاجته إلى أخيه الذي يفوقه يسرا ، يأمرني بأن أحبّ عمّي .. أملا أن يزيد مقدارُ حبّي لعمّي من مقدار الهبات التي كان يغدق بها عليه في المناسبات و الأعياد تخفيفا لضغط المصاريف

يا لغباء أبي !! هل يؤمـَـر بشرٌ بالحب ؟

هل الحبّ إلا نور لست ادري من يقذفه في صدورنا و عقولنا فتغفو بضع ثانية لتجد نفسها تتخبّط في شراك لذيذ ؟؟

هل الحب الا لعنة مجهولة المأتى تصيب الروح فتنزف بردا و غراما ؟؟

كان أبي لا ينقطع يتلو على مسمعي مزايا هذا العمّ .. و غالبا ما كان لتلاوته تلك مفعولا عكسيا .. فكل ما يعدّه أبي حسناتٍ من هذا العمّ .. كانت تزيدني نفورا منه و إعراضا

كان ، مثلا ، لا يفوّت فرصة حتى يذكّرني بإحسان عمّي له .. فأزداد نفورا حين اتساءل "لماذا لا يحدث العكس فيـُــحسن ابي لعمّي ؟ .. و ما الذي يجعل من عمّي رجلا ميسورا .. و من ابي رجلا مقهورا ؟ "

كم كنت تلتـــــذ ّ باسئلتك الشيطانية تلك . كنت كتسلــّى بها و معها ، و بشكل سرّي حين تخلو بنفسك و حين تتاكّد ان جميع ما يمكن ان يصلك بالعالم الآخر قد انقطعت .. كانت لاسئلتك الشيطانية لذّة لم تضاهها سوى لذّة اكتشاف العادة السرية الأخرى .. و ليس غريبا ان يشترك الاثنان في اكثر من موضع : فكلاهما سرّي و لذيذ و محبب الى نفسك ، لكنّه مكروه من الآخر/الجحيم

"كان ابي يذكّرني انّه من دواعي فخره.. بل و فخري .. ان يكون لي عمّ شاعر .. و هو ناظمُ اشهر انشودة اطفال في البلد .. و ما من مدرّس الا و لقّنها لتلاميذه .. و ما من تلميذ الا و ردّدها في القسم و في البيت و في الشارع .. حتى كادت هذه الانشودة تتحوّل الى نشيد رسمي للطفولة في البلد .

غير انّ الذكرى اللعينه التي كانت تجمعني بتلك الانشودة ، و الصفعات المباغتة التي أغارت على وجهي ذات صباح شتائي ، من مدرّسي حين تفطّن الى انني لم أحفظها..قد حسمت الامر و اكّدت لي انّه لا يمكن لي ان احبّ هذا العم

هكذا .. في الوقت الذي كانت تلك الانشودة مفخرة ابي .. كانت مجلب نفوري من ناظمها .. العمّ الميسور

لقد خانتني اسئلتي الشيطانية هذه المرّة .. و تمرّدت ْ على انحباسها فتكاثرت ، في غير أوانها و مكانها ، و تواترت و تسابقت في رأسي حتى أنستني الاهتداء إلى إيقاع خطواتي

العمّ الميسور .. و الشاعر المنفور .. ينتصب أمامي كالتمثال / الوثن المستعدّ لتلقــّي القربان و ابتلاعه

الأب المقهور يختبر حسن أدائي و إتقاني لأداء واجب التهنئة .. ليقيس به مقدار المساعدات المتوقّــَـــعه

ارتعشت ساقاي .. ثم فقدت الاحساس بهما فلم تعودا قادرتين على حمل جسمي و رأسي الذي اثقلته الاسئله الخائنه

تلقّفتني ذراعا أمّي و أنا أهمّ بالسقوط أمام التمثال .. كأنّها كانت تدرك مابي تحديدا .. كم كان حضنها عظيما و هي تـُــخرجني من باحة المذبح

...

و لم "أعيــّد" على عمّي

حروف (كتابة ثانية)ـ

2010-11-21T19:27:00.006+01:00

قصيد "لذيذ" لعبد الجبار العش .. حبــّيت ننفض بيه شوية غبار عالمدونه في انتظار العودة اليها .. باللي كتّب ربّي

حروف (كتابة ثانية)

قاف .. شــين .. فاء

باستطاعتي

ان اجعل اللام تستوي واقفة

على رجلها ثمّ اتخذ منها عكازا

يسند شيخوختي الزاحفة

اعلّق قبعة السّعف

كالهمزة على مشجب الالف

او اضع الالف في حجر اللام

و اشهرهما في وجه الضّاد و الذّال

ثم امسك الرّاء كالعصا

و اجلد ظهر الحاء و الجيم و العين و الغين و الخاء

الى ان تستقيم ظهورها

في استطاعتي

ان اجعل النقطة خالا

على ذقن الباء

في سهولها ..ازرع الخروب و الرّمان

اجمعه في قفة النون

و انضّده في طبق الثاء

ارسم الفتحة حاجبا فوق العين

و اعلّق السّكون خرصا

في اذن الدّال

او اضع الشّدة شـَـعرا

على صلعة الميم

افتضّ .. أفتح التاء المغلقة بذيل الراء

احرّض حرف الزّاي على الهاء

ثم افكّ وثاقها

كي تركض في البراري

و في زواج الالف بالانسة واو

ادعو الدو و الري و المي و الفا و الصول و اللا و السي

للرقص و الغناء

نمضي الى النهر

ندفع الطاء زورقا

و نجدّف براءين

نصطاد الـ ـــاء

بصنارة الـ ـــاء

و نلقي التحية على الياء

وهي تسبح كالبجعة

و إذ ينقضّ النوء

نغادر النهر

و نلوذ بجبال الكاف

ثرثـــرة معلــّـــم قديم ... 6

2010-03-03T16:36:00.010+01:00

نفس الربيع هاذاكه .. اللي شيّخ الناس و الحيوانات بالخضوريـّـه و الخيرات و الحشيش و الهواء الفرشك .. و خلاهم يشربو و يسكرو على نخب حب الحياة .. كان يخبّي لعنات شنيعة .. اوّل من تصاب بيها : محبوبه .. هاك الزهرة اللي بــتفتـّحها قبل وقتها ، أربكت و أزعجت و أحرجت كل ما كان يحيط بيها/ يحاصرها.. من اكداس الرمال الجافة ، و طبقات الغبار الخانق ، و مزيج الجهل و العقد و الوهم و الخرافة .. اللي كانت معشّشه في الجماجم البدائية المتعفّنه ، بنوعيها الحقيقي و الافتراضي.ـ
باعتبار انّي نقرّي نهار الاثنين السّبعه و نص متاع الصّباح ، كنت ديمه عشية الأحد ناخذ " نقل ريفي" ، ونروّح للمدرسة ، باش ناخذ وقتي في تحضير خدمة غدوة بتمارينها و مذكّراتها ، كرّاسات القسم تتصلّح .. الخ
بين عصر و مغرب ، عقاب مارس ، عشيّتها جت مطر بشكل فجئي، اما قويّة برشه
جدّايتي يرحمها ، كان عندها وصف بليغ جدا للمطر القويّة ، كانت تقول : "السّما تقطّعت"، و الا : "السّما تنقبت" .ـ
المطر من النوع هاذاكه تتسمّى باللغة التقليدية "عارض" .. و سي الـ"عارض" هاذا يتميّز بحاجتين : المفاجأة/المباغتة من جيهة ، و القوّة/الغزارة من جيهة اخرى.ـ
نتصوّر ما ثمّاش اشدّ و أخطر من حاجة تجمع بين القوّة و المباغته ، حاجة تـُـربْـكّــِكْ ، من غيرلا مقدّمات و لا مؤشرات باش تتهيّألها نفسيا و ماديا .ـ
العارض ، في مفعولو ، يشبــّه " للــمُـغـِـــيراتِ صـُـبـْـحًا" ههه
لكن وقت اللي نتحدّثو على خطر "العارض" مثلا على السلامة المرورية ، فانّو سياق حديثنا هو المدن ، وين الاكتظاظ و الشوارع الضيقة و التوتّر اللي يعاون على الارتباك ، و بالتالي فقدان السيطرة على الوضع و حدوث الكارثة.
اما وقت اللي نقوللكم اللي العارض هاذا ، كان سبب في وفاة كهل في حادث مرور في ريف ... اينعم .. حادث مرور في ريف .. ريف واااااااسع ... شااااااسع .. محلول .. مسيّب .. عالرابع شيرة
واحد على موبيلات ، و لاخر على دركتور
مولى الموبيلات ، كان يسوق في الاتجاه المعاكس لاتجاه الـ"عارض" يعني "امـْـغـَـنْـبزْ" روحو مليح : شاش ، نظارات هاك اللي يلبسوها الغوّاصين ، كان ديمه يلبسهم حماية لعينيه من الرّيح ، بالطبيعه النظارات مدغدشين و مجرّحين ، بسبب كثرة الاستعمال مع انعدام الصيانة ، مما يحجب عليه الرؤية ، و مفلّس يحب يروّح فيسع قبل ما تزيد تقوى المطرة
مولى الدّركتور ، و بالاضافة لشّاش / اللـّــحـْفه ، زاد كبّ طربوشة القشّابية على راسو ، و مع تقربيع الريموركه القويّ ، ما عادش لا يشوف لا يسمع في شي ، لا قدّامو و لا وراه ، متهنّي انّها البلاد ريف مسيّب ، و ارض ربّي واسعه
يعنى الزوز حواسّ الهامين و اللازمين في السياقة ، و اللي هوما : النظر و السّمع ، و قع الاستغناء عليهم لصالح: الشّاش ، اللّحفه ، طربوشة القشّابية ، الكاسكه ، مرايات الغوّاص المضبّبه .. و غيرها من مبطلات السّمع و البصر
و مع حسّ موتور كل واحد فيهم ، مع حسّ المطر و السّماء اللي باش تطيح منها لقشه
مع الصّدفة اللي جعلت من تقاطعهم الزوز ، ضروري ، مع قلة الانتباه اللي خلات كل واحد فيهم يتصوّر انّو وحدو في البيست هاذيكه
نسمع في العياط ، عياط ماهوش عادي ، و بصوت رجالي ، وقت اللي خرجت باش نشوف اش ثمّة ، و على بعد ثلاثين/اربعين ميترو من الدّار
هنا بالضّبط

نشوف في دركتور حابس ، موبيلات مطيّشه ، جسد ملقى على الارض ، و راجل يستغيث ، و يضرب في روحو بالكف ، و ينقــّز و يتخبّط ... و نتذكّر انّو كان يعاود في كلمة وحده ، في البداية ما ميّزتهاش ، اما كي قربت ، عرفتو يقول : "علاش ؟ " .. "علاش ؟ " ... بصوت مبحوح .. و عينين طايشين .. و وجه شاحب اصفر .. و توتّر و غضب كبير
من غير ما نشعر ، جريت في اتّجاه مكان الحادث ، كنت انا واياه وحّدنا واقفين ، بمعية الجثّة الملقاة ، وقت اللي شافني ماشيلو ، تعرّضني ، و كانّو كان يبحث على شكون يتقاسم معاه الصّدمه .ـ
التوتّر اللي كان عليه ، و العنف اللي كان يميّز حركاتو و نظراتو و صيحاتو ، هوما اللي دفعوه باش يكبس عليّ بعنف اوّل ما وصلتلو ، و يصيح في وجهي نفس كلمتو اللي هول الحادث خلاه يتذكّرها كان هي ّ من الكلام الكل : "علاش ؟" .. "علاش ؟ " . ـ
انا ذهلت من المشهد
احتضنتو بقوّة ، رغم حذري من هيجانو و توتّرو اللي كانو ينجّمو يقودوه لايّ ردّ فعل ، و مع ايّ كان ، و سرّبتلو كليمتين حبيت نخفّفلو بيهم حالة الهستيريا : " نشالة لاباس ، نشالة لاباس ، لعلّ راهو دايخ بركه ، اهدا و وسّع بالك".ـ
و اتّجهت نحو الجثّة المطيــّـشه
المشهد كان فظيع ، عينيه نص محلولين ، اما طافين و مستصـْـفرين ، الفم مفتوح في حياد مدمّر ، قرّبت من وجهو باش نتأكّد منّو يتنفّس و الا لا . ما استحقّيتش باش نتأكّد من انفاسو ، على خاطر مخّو كان يطلّ و يلمّع من تحت التهشيمه اللي في جمجمتو . اش مازال فيها من يتنفس
كانت هاذيكه المرة الثانية اللي نشوف فيها ميت "مقتول" ، المرة الاولى كانت في احداث الخبز في جانفي 1984 ، وقت اللي الجيش "الوطني" تلقّى اوامر باطلاق النار على المتظاهرين ، و ارداهم قتلى
محلاه درويش وقت اللي ينطق على لسان الشهداء وقت اللي يقول : "أنا أوّل القتلى و آخر من يموت"ـ
و الثانية هي هاذي
وجه القتيل ، على عكس ما يـُـتـَـصوّر ، و رغم حياديّة انفعالاته ، اشدّ عمقا من وجوهنا ، ملامحه العامة مزيج من بقايا تعابير الالم مع ابتسانة خفيّة و غامضة ، قد تكون ناتجة عن انّه تذكّر- لحظتها- من يحبّ
انا كنت نظنّ اللي السيد اللي كان يصيح و هايج ، هو سائق الدّركتور ، لكن من بعد عرفت اللي سائق الدركتور لاذ بالفرار ، و هو سلوك طبيعي و حكيــم في الحالات اللي كيما هاذي ، على خاطر اهل القتيل ربما يكون ردّ فعلهم الأني انتقامي و عنيف ، و حتى القانون (في فترة زمنية محددة اثر وقوع الجريمه)ما يحاسبش على ردة الفعل العنيفة ، على ما اظن
تنصبت الخيام ، جات الفنارات و البريميسات ، شعلت النار و طاب العشا ، و فاحت ريحة الكسكسي واللحم المفوّح ، مع ريحة التراب المبلول ، اللي بعد شوي باش يحتضن هالجثّة .. محورهذا اللقاء الليلي الحزيـــــن

المطر لا قصّت ، و لا زادت ، و لا نقصت .. في لامبالاة رهيبة بما حدث و ما سيحدث . بالنسبة ليها ، اش يعني بشر مقتول امام ملايين اليرقات اللي ما صمدتش امام غزارتها و امام قوّة العاصفة المرافقه ليها ، و تحلّت قبل وقتها
ياخي موش موت هاذاكه؟؟؟ بالنسبة للمطر : كيف كيف
اش يعني سقوط بشر امام مليارات النمّال اللي ثلاثة و الا اربعة قطرات منها ، كافية باش ادّمرلهم ديارهم و مونتــْـهم و بيضهم ، و تطيّح عشوش الطيور من على الاغصان و تكسّر مئات العظام اللي ما زالت ما فقّستش ، و الا تقتل ، ببردها، مئات الفروخ اللي مازالو ما عملوش الريش
المطر كانت لامبالية بالنادبات النائحات ، اللي ليله كاملة و هوما ينوحوا على فقيدهم ، باصواتهم اللي رغم كانت مبحوحه و محشرجه ، ما منعهاش هذاكه من التسلل لوذني ، عبر شقايق البرسيان متاع بيتي ، باش تتغلّب على صوت الراديو الصغير اللي كنت ملصّقــو في وذني ، ثماش ما ننسى شويّ صوت النواح و نرقد .
و زيد الديار اللي بانيتهم الدولة للمعلمين في المدارس الريفية ، كانوا اشبه بالعشوش متاع بعض القبائل الاستوائية ، ما خير منهم و ادفا منهم كان
l'igloo
متاع الاسكيمو
طريقة بنيهم و الفينيسيون متاعهم ، الخشب متاع الشبابك و البيبان و الزهازات اللي تترنّخ و ما عادش تسكّر باقل ملامسة ليها مع الماء ، لنستالــّاسيون متاع دورة المياه ، السّطوحات اللي تقطر ، لا وسائل تدفئه ...الخ ...الخ ... الكلّو تعطيك انطباع كبير على شحنات الحب و العطف المتدفّقة من لدن وزارة التربية و التعليم لهالناس اللي من المفروض بعثتهم لاداء اقدس و انبل مهمة في اقسى و اردإ الظروف
يعني من كثر ماهو بـَـنْي راشي ، تقول كان جا ممكن يبنوهم بالقوفرات ، و الا باللــّوقـو ، راهم عملوها
ليلتها كانت الغلبة للحزن ، الحزن كان سيّد الموقف ، خيمة الخيام ، جناح الاجنحه .. الحزن ليلتها كان محتفل ، كنت نشوفلة ينقّز بين سطح الدار ، و سطح المدرسه ، و الساحة / الجنازة .. و يرقص مزهوّا بامتلاكه لتلك الليله بما و من فيها ، و كنت وقت اللي نزيد نلصّق الراديو لوذني باش ما نسمعش اصوات العويل ، نسمعو يقلّي : " دعك من الراديو... الليله ... لا صوت يعلو فوق صوتي"ـ
مـَـوْحشها هاك الليله ، ورغم هاذاكه نسيت كيفاش تعدّت .. نسيت رقدت و الا لا .. نسيت الخيام وقتاش تلمّت .. نسيت وقتاش دفنوه .. الحدث كان مذهل برشه
اما المفاجأة الاخرى اللي كانت في انتظاري يــُـومة غدوه في المدرسة كانت ما تقلّش ثقــل على جنازة البارح
التلامذة كانوا اشدّ ذهول منّي ، باعتبار انهم ينتموا من قريب او من بعيد إمّا الى عائلة المقتول او الى عائلة الـ"قاتل" .. كان للحدث على قلوبهم الصغيرة مفعول الـ"عارص" على الطبيعة الآمنه
لاحظت زوز تلامذة غايبين
وقت اللي سألت عليهم اصحابهم
عرفت اللي هوما : واحد ابن القتيل ... و ... واحد ... ابن الـ " قاتل"ـ
باختصار ، و نتصوّركم تتوقّعو مليح حساسية موقف كيف هاذا ، كانت مهمّتنا ، باقي زملائي و انا ، صعيبه برشه في اعادة بناء ما كان موجود بين الزوز تليمذات هاذومه من جسور الصداقة و المودّة و الانسجام الطفولي ، هالزوز تلامذه اللي ماعادش يجمعهم فقط قسم واحد ، و ربّما مقعد دراسي واحد ، بل بدات تجمع بيناتهم زادا بذرات الحزن و الحقد و الخوف و الحرج ، و اللي لثنين ، ما كانوش ينجحو في تخبيتو اثناء تنافسهم الدراسي ، و الا حتى اثناء اللعـب

عمار ... و الظلال الصينية ...2...(الحــلّ)ـ

2010-02-25T12:07:00.006+01:00

ما نطوّلش عليكم ، هاذا حلّ سؤال التدوينه السابقة

عندما يصبح المقص نافذتنا الوحيدة ، نظاراتنا الوحيدة ، اسلوبنا الوحيد في التعامل مع الآخر

يتحوّل بلد الفرح الدّائم الى غابة

و يتحوّل صاحب النظارات/المقص

القابع بكل جبن خلف الستار

الى حيوان

عمّار ... و الظلال الصينية

2010-02-25T10:29:00.008+01:00

l'ombre chinoise

او' مسرح الظلال' من اجمل و أقدم و أعرق الفنون ، خاصة في ميدان فن العرائس و غيرها من اساليب التنشيط المسرحي للاطفال

و اللي يتمثّل في اعتماد الشكل اللي يعطيه انعكاس تشبيك الايادي و الاصابع بطريقة معينه على ستار ابيض ، مع اضاءة بيضاء خلف ذلك الستار ، قصد الحصول على اشكال اخرى .. حيوانات .. شخصيات غريبه .. ذات احجام و اشكال مضحكة ، الخ ... كيما تنجّمو تشوفو في الصورة هاذي

و هاذي

حبيت اليوم ، و مانيش باش نخرج على موضوع الحجب ، نقترح عليكم ظلّ اسود ، و لكم ان تتخيّلوا الشكل الحقيقي اللي يقبع وراء الستار

الظلّ هو هاذا

لينا .. إلى إطلالـــــة أخــرى

2010-02-25T08:11:00.006+01:00

تحية كبيرة للمدونه لينا بن مهني ، اللي اكّدت انّها بنيّة تونسية بالحق ّ في برشه مناسبات ، و خاصّة المدّة الاخيرة ، وقت اللي كانت سباقة في التعريف بقضية الطلبة المسجونين ، من متابعة يومية ، لنشر حوارات معاهم ، و مع محامييهم ، الى المساهنة في بعث مدونه مختصّة في كل ما يتكتب حول القضية هاذيكه

و تحية كذلك لمقص عمار ، اللي كلّ يوم يزيد يأكّد انّو مقصّ حافي ، و حافي برشه زاده ، على خاطر موش معقول باش مقصّ 'ماضي' يكون خوّاف لهالدّرجة هاذي ، و مناش ؟ من مجرّد مدوّنه

لينا .. نحن في انتظار إطلالة أخرى

في ذكرى اغتيال الظلاميين للمفكّر اللبناني حسين مروّه

2010-02-23T11:02:00.008+01:00

تمرّ في الايام هاذي الذكرى الثالثه و العشرون لاغتيال المفكّر اللبناني الدكتور حسين مروّة

اللي ما كانش فقط احد ابرز علامات التفكير العلماني التنويري في الثقافة العربية الحديثة ، بل كانتلو ايضا مساهمات و اضافات عديدة و هامة في مجال النقد الادبي و الشعري ، اللي ضمّنها في كتب و مقالات ، كتاب : "قضايا ادبية" و كتاب "دراسات نقدية في ضوء النهج الواقعي" و في مجموعة مقالاتو النقدية الادبية في مجلة "الثقافة الوطنية" اللي كان من اهم مؤسسيها
و في الكتب و المقالات هاذي نقد و نـْـقـَض نظرية "الفن للفن" اللي كانت سايدة في الساحات الادبية ، و اللي كانت تسعى الى عزل الفنون في برج عاجي و فصلها عن اليومي و الاجتماعي و السياسي
من اقوالو في الاتجاه هاذا : النقد المنهجي هو ما يكون مؤسّساً على نظرية نقدية تعتمد أصولاً معينة في فهم الأدب, وفي اكتشاف القيم الجمالية والنفسية والفكرية والاجتماعية في العمل الأدبي. واعتماد هذه الأصول يقتضي من الناقد ان يتجهز كذلك بقدر من المعرفة تتصل بشؤون النفس الإنسانية وقوانين تطور المجتمع وطبيعة العلاقة بين هذه وتلك

السيرة الذاتية لحسين مروة تتلخّص في انّو تولد سنة 1910 في عائلة محافظة ، و كان بوه يأمل انّو يطلّعو رجل دين بعثو للنجف بالعراق باش يقرا في الحوزة العلمية ، لكن اثر تعرّفو على محمد الشبيبي ،عضو المكتب السياسي للحزب الشيوعي العراقي ألذي أُعدم في العهد الملكي ، و من خلالو تعرّف الى ادبيات الفكر الشيوعي ، و اصبح من اهم المفكّرين و الناشطين الشيوعيين في العراق ، الشي اللي ادّى الى ابعادو من العراق بعد حرمانو من ايّ نشاط سياسي و من الجنسية العراقية من طرف نوري السعيد

رجع للبنان ، و واصل سلسلة مقالاتو اللي سماها (مع القافلة) في جريدة "الحياة" البيروتية و اللي كان يتابع فيها بعين ناقدة و ثاقبة الاحداث و القضايا اليومية المطروحة
نادى بنبذ الانغلاق الطائفي ، و كرّس معارفو و انتاجاتو و كتاباتو لبناء نموذج لبناني ديمقراطي متعالي على الانقسامات الدينية و الطائفية
كان معروف بانّو يسمّي بيروت باسم "بيروت الوطنية" في إشارة للقطع مع الانقسامات الطائفية و الفئوية و المذهبية و الانغلاق الديني اللي ديمه مهدّدة بيهم بيروت
في كتاب النزعات المادية في الفلسفة العربية الاسلامية ، تناول التراث العربي الاسلامي من المنظور المادي/التاريخي ، اللي ينظر للتاريخ بوصفو سلسلة من الصراعات و التناحرات بين قوى و عناصر تقدّمية ناشئة و قوى رجعية متقهقرة و تعتبر مقاربه رايدة في المجال هاذا ، مجال "النظر و التحقيق في باطن التاريخ" على حد قول ابن خلدون بعيدا على الرؤية المثالية الميتافيزيقية اللي تفصل قوانين التفكير على قوانين عملية سير الواقع الموضوعي ، و تنظر للتاريخ بعين ثابته احادية و ساكنة ، في عبارة واحدة : لا تاريخية

توِّجت المسيرة المضيئه لشيخنا حسين مروة ، سواء في الفلسفة و الادب و السياسة ، برصاصة الجـُـبن التي اصابته في منزله ، نهار 18 فيفري 1987 بكاتم صوت ، تمسكه يد عفنة ملطّخة بدماء السيوف المنهالة على الرؤوس فجرا ، كاتم صوت لم ينجح في كتم صوت التفكير النيّر ، المضيء ، الحديث ، و إذا بدماء حسين مروّة تزهر العديد و العديد من المفكّرين النيّرين الذين يعملون على نفض الغبار على تاريخنا ، و تعريته و كشفه وفضحه

بطبيعة الحال ، اصابع الاتهام بقات موجّهة لحزب الله (اللي ما زال وقتها ما قذفش الله في صدرو نور تحرير الجنوب) و لحركة أمل الشيعية اللي كانت أداة عسكرية في يد من يدفع اكثر من المتنافسين على كسب المواقع في الحرب الاهلية اللبنانية إبانها

و بطبيعة الحال ، لا يمكن ان يكون مستفيدا من اغتيال مفكّرين تقدّميين وطنيين ديمقراطيين سوى العاملين لصالح اجندات سياسية تقوم على اساس طائفي/ديني/انغلاقي ضيق على خاطر وقتها سلسلة الاغتيالات الحقيرة هاذي ما اكتفتش بحسين مروة ، بل تعدّتها لرموز اخرين ابرزهم : حسن حمدان المعروف باسم مهدي عامل
احداث كيما هاذي ، نتصوّر انّها ما تهمّش فقط لبنان ، و تاريخ لبنان ، بل تهمّ كل رقعة في الارض ممكن تطأها اقدام الجهل و الظلام و الحقد و التكفير

احداث كيما هاذي ، ماهيش محرجة فقط لدعاة التفكير الظلامي المعادي اصلا لايّ نفس تنويري عقلاني وضّاء ، بل محرجة اكثر لبعض الاطراف الـ"يسراوية المتحذلقة" ا لمتواجدة في الساحة النقابية التونسية ، و معروفة بولائها المطلق لمثل هالتيارات و باستماتتها في الدفاع عليها

غــمزة بلا مجاملــة .. لـــبرنامـــج "بلا مجامـــــلة"ـ

2010-02-18T10:39:00.011+01:00

منذ ما يقارب الشهر تفرّجت في برنامج في قناة حنبعل اسمو "بلا مجاملة" و كيفو كيف اغلب برامجنا ، وقت اللي تسمع العنوان تقول" لقد وجدت ضالتي" لكن ... كي تتفرّج تلقى ما هو اخطر من المجامله :السّكوت على ما يجب الافصاح عنّو و اضاءتو و تسليط الضوء عليه من الرّداءة بمختلف اوجهها ثقافية كانت ام سياسية

مانيش باش نحوّل التدوينه الى تعريف بالبرنامج هاذا ، ونقد ليه ، لسبب وحيد هو انّو الاكتفاء بنقد التلفزة دون نقد (و نقض) للسيستام الكل ، الثقافي و من وراه السياسي ، ما عندو حتى معنى ، يعني بعبارة اخرى ، ما يـُسمح بتمريره في التلافز ، هو بالضبط ما يراد تمريره ، طالما هو متماهي مع الاوضاع السايدة ، و على مقاسها ، و ما ينقدهاش و ما يزعجش امنها ، و ما يفقعش دمّالها ، و ما يرشّش الملح على جروحها. فقط نحبّ نتوجّهلهم بكليمه خفيفة مفادها انّو مادام رداءكم قصير، ما تمدّوش ساقيكم ياسر
يعني
مادام مجالات نقدكم و تعبيركم و "عدم مجاملتكم" محدودة و محدودة جدا ، كمواكبة بعــــض العروض الفنية وتقييـــــمها و "نقدها" هكــذا بشكل سطحي دون التطرّق الى الاعماق و دون الاشارة الى انّ الرداءة الثقافية ، في العديد من جوانبها ، يمكن ان تكون خيارا سياسيا مدروسا ، ابقوا في الحدود هاذيكه ، و ما تسمحوش لاياديكم ان تطاول هامات و قامات ثقافية و ادبية و فكرية محترمه
في بالي خذيتو الدّرس من نـــــــــهارة اللي جـــــاكم الموســـيقار الكبـــير محمد القرفي (المعروف باللامجاملة الحقيقية موش متاع البلا بلا بلا ) و أحرجكم و بيّنلكم بالحجج و البراهين ، و باسلوب حضاري ، انّكم ما قاعدين كان "تقطّعو و تريّشو" هاذا من بعد ما هدّدكم عن طريق عدل منفّذ انّو يرفع امركم للقضاء ، وقتها سكتّو ، و بلعتو السّكينه بدمّها ، و عرفتو مليح اللي التمقعير على محمد القرفي موش كيما التمقعير على فاطمة بوساحه

نحب هنا نذكّر القرّاء اللي يمكن ما تبعوكمش وقتها ، في حكايتكم مع القرفي : باختصار بعد ما منع محمد القرفي مبعوثيكم من التسلل الى كواليسه اثناء عرضه بكرتاج ، ثارت ثائرتكم ، و كاّني بيكم تعتبرو اللي من حقّ هـــــــالة الـــذوادي "مبعوثتكم صاحبة الدّم الثقيل" انّها تتكشّف على العازفين و المغنين و هوما يبرّفو في الكواليس ، يبرّفو و يعدّلو في آلاتهم و الا حتى يبدّلو في حوايجهم ، من وقتها ولّى "شكونو هو محمد القرفي ؟؟" و "اش باش يولّي محمد القرفي؟؟ " .. و "محمد القرفي متكبّر و متعالي" ..اما كي هدّدتكم برفع امركم للقضاء بتهمة استغلال منبر اعلامي للتقطيع و الترييش و الثلب و الشتيمه ، وليتو استدعيتوه و جابلكم مؤلفاتو في الموسيقى (سواء كتاباتو الموسيقية من تأليفات و توزيعات الخ ..و الا كتابات نظرية في تاريخ و علم الموسيقى ) وقتها اعتذرتولو، بعد ما عطاكم درس كبير ، و قاللكم اللي انتوما ما عندكمش حتى اهلية بـــــاش تنـــــقدوه و تنقدو اعــــــمالو على خـــــاطر ما فيـــــكم حتى واحـــــد مختـــــص في النــــقد الفني و الموسيقي بالتــــــــــــــحديد ، بما فيـــــكم مبعوثتـــــكم هالة الذوادي(صاحبة الدّم الثقيل)ـ

كنت نتصوّر انّو وقت اللي يزوركم فنان في حجم محمد القرفي و يجيبلكم هو بيدو كتبو و مؤلّفاتو ، باش يصيبكم خجل كبير ، على خاطر التعريف بالفن الجميل ، المتقن ، الراقي مهمّتكم انتوما قبل ما تكون مهمّتو هو
الفنان يبدع
و الاعلامي يذيع و يعرّف و يمارس دورو في الربط و الوصل بين المبدع و الناس
لكن وقت اللي الاعلامي بيدو يتنكّر للمبدع الجيّد ، و يحبّ يحرمو من حقّو في سرّيّة كواليس عرضو .. هاذي تولّي مصيبه

حتى حدّ ما يشكك في القيمه الفنية و الثقافية متاع محمد القرفي ، و الاهم و الاجمل في مسيرتو ، هوّ انّو كلّــْـما الهوّة و المسافة تزيد توساع بينو و بين الهياكل الرسمية المسؤولة على الثقافة في البلاد ، كل ماهو يزيد يتمسّك بالخط المحترم اللي رسمو لروحو ، و لفنو . ديمه و هو كولها كولها هو و يّاهم ، عمركمشي ريتو محمد القرفي مادد وجهو في التلفزة يبارك و يهلل و يناشد و يثمّن ويشكر..و...و...و...نتصوّر اللي هاذيكه هي اهمّ صفة ينجّم يتمتّع بيها فنان : الكرامة و الحرية .ـ

حبيت نلقي الضوء على الجوانب هاذي في مسيرة فنان كيما هكاكه ، باش نزيد نظهــّر هشاشة تحاملكم عليه ، و نزيد نذكّركم انّكم إذا ما كرّمتوهش و ما عرّفتوش بيه ، على الاقل اسكتو ، و خليووه يخدم على روحو رايض

ما عليناش

يقول القايل شبيه قلبك خايب ، حكاية من الصّيف ، اش مجبّدنا فيها توّ ؟؟

لا يا سيدي .. مجبّدنا فيها و نص ، على خاطر يبدو انّكم ما فهمتوش الدرس ، بل زادت جات لعبتكم مع شكون ؟ مع سميح القاسم ، اثر تصريحو (هنا) و (هنا) لصحيفة الشروق الجزائرية انّ "المثقفين العرب قطيع من المرتزقه و المأجورين ، و ان الدول العربية عبارة على حضائر سايكس بيكو" ما نعرفش اشنوّ اللي وقع استفزازو فيكم و قت اللي هو يصرّح بتصريح كيما هكاكه ، حتى هبلتو عليه الهبله هاذيكه ، و ثارت ثائرتكم و تطاولتم عليه بتلك الفصحى السقيمه التي ندا لها جبيني

ياخي تعتبرو في رواحكم انتوما استثناء على حالة المثقف العربي (الرسمي التقليدي بالطبيعه و هو المقصود بتصريح سميح القاسم) لانّ المثقفين الحقيقيين اللامأجورين ، لا يـُسمح لهم بالتعبير و الابداع ، و حتى و إن سـُمح لهم بذلك تحت بعض الضغوط حينا ، و تحت يافطة تزويق المشهد الثقافي بديكورات الاختلاف حينا اخر .. تماما كما يقع تزويق المشهد السياسي بديكورات التعددية الحزبية في فترات الدعاية الانتخابية ، اقول حتى و ان سـُـمح لهم بذلك ، تكون مجالات ابداعهم محدوده و مشروطه بما حدّدته لهم وزارات و اصطبلات الثقافه في بلدانهم

راهو ثمّه فرق كبير بين مثقف و الا شاعر و الا فنان جاي من غبار المعارك و القتل و الاقتتال و الحروب و المنافي و الخيبات و الملاجيء و المخيمات و التشرّد ، حتى و إن لم يـــــــــعد يعشها ، فهو آت منها و أقرب منّا جمــــــــيعا اليها ، و بين "مثقفين" آمنين ، عايشين في رخاء أمني ، خدودهم ناعمة و طريّة من تأثير نعومة و طراوة الـ"فرح الدّائم" .. الفرق راهو كبير

غرامشي حكى مليح في المسألة هاذي ، منذ العشرينات

انتوما الخمسه ، كي تلمّو بعضكم ، مع فريقكم التقني ، ومع مبعوثيكم و خاصة هالة الذوادي(صاحبة الدم الثقيل) ما تنجّموش تقولو ربع بل ثمن اللي قالو هو ، رغم اللي موش من الضروري باش نلتزمو بآراؤو الكل ، لكن جرءتها لا تخفى على احد وجديرة بالاحترام ، قد نختلف معه في بعض المواقف ، لكن حذاري ، هاذا ماهوش متاح للناس الكل، يعني اذا انت واقف على يمينو ، ما نتصوّركش تملك الحق في المزايده عليه و الا حتى نقد مواقفو

هل كان اجدى بكم نصب هذه المحكمة لسميح القاسم على خاطرو حطّ صبعو على جرح كبير ، ام نصبها لاشباه المثقفين الموظفين لدى السلطات ، من البحر الى البحر ، المصابين بالخرس إزاء انتهاكات حقوق الانسان ، و إزاء عبث العصابات و المافيات بثروات الشعوب ، و بالمال العام ، و إزاء المتاجرة بقضايا و مصائر الشعوب ، و إزاء التفنن في مصادرة الحريات و ممارسة الوصاية على الأخر المختلف سياسيا و ثقافيا

هل كان اجدى بكم نصب هالمحكمة لسميح القاسم على خاطرو بكلمة بسيطه جدا ، اسقط ورقة التوت عن مثقفي القصور و البلاطات و لعق الدماء من أدوات الجريمه ، لتبييض وجوه حكامهم ، أم نصبها لشيوخ الافتاء ، اللي وقت اللي اطفال غزّة قاعدين يتفحّمو تحت قنابل الفسفور الابيض ، هوما يصدرو في الفتاوي اللي تحرّم المظاهرات السلمية الاحتجاجية والتضامنية ، لانّ المظاهرات ... ههه تلهي عن ذكر الله

الامثلة عديدة لمن هم أولى من سميح القاسم بنصب مثل هذه المحاكم ، لكن لا فائدة في تذكيركم بها ، لانّكم (بصفتكم الاعلامية) اقرب منا جميعا ، الى كل مستنقعات العفن ، الذي انتم به عارفون و عنه صامتون
بما فيكم .. مبعوثتكم .. هالة الذوادي .. صاحبة الدم الثقيل

فـكــّـر ... و ... أنــجـز

2010-02-16T14:54:00.011+01:00

فــكـّــــر

و ... أنـــجـِـز

رواية "المـِشرط" لكمال الرياحي : من يـُـحـْـــــِرجْ ، يـُـجـْـرَحْ

2010-02-12T11:34:00.007+01:00

دعانا المـــــدوّن/الصـــديق دوفيتـــش مشـــكور لـــــقراءة رواية للاديب الشـــاب كمال الريــاحي(موقعوهنا)اسمـــها المـِشرط(رابط تحميلها هنا) رغم اني ننصحكم بشراءها من جهة حفاظا على عويناتكم :) و من جهة اخرى تشجيعا للادباء الشبان الجيدين
وفعلا ، انا واحد من الناس ـ لقيت روحي إزاء واحدة من أجود و أطرف و أجرأ ما قريت في الرواية التونسية

برشه افكار تزاحمت في مخي اثناء و بعد قراءتي ليها ، حبيت نلخّصهم هنا و نشارككم معايا فيهم ، و ندعوكم باش تطّلعوا عليها

اجمل ما في هذا النص ، استقاؤه من اسلوب حكي و سرد الاسطورة ، في ثورته على الاسطورة و وعي الاسطورة نفسها

يستهلّه صاحبه بارهاصات اولية للقطع مع الوعي الاسطوري (في تمرّد الطفل على تقديس شجرة الخرّوب) رغم ما كبّده ذلك من لعنة / الم كبير في "جلدته الطريّة" ـ

للاسطورة خيالها و جمالها و سلاستها و استجابتها للطفل الساكن فينا .. و لكن للاسطورة ايضا لعنتها المريرة و جُرحها إن انت القيت بحجر تزعج به ما ركد من ماء غديرها الآسن، أو تسرّبت ذراعك المزعجة الى هدوء جحرحا الرّطب

لعنة الخرافة في ان تجعل من بيتك جـُحـْرا للثعبان /الولي الصالح .. الى ان تموت مجروحــا ملسوعا ازرق

النص ينهل كثيرا من معجم الجـُرح/الحَرج/الحـَجـَر/الجـُحـْـر .. و القانون واضح هنا : من يُــحْـــِرجْ ، يـُـجـْـرَجْ

ينهل من معجم الجرح مــِشرطــَـه ... ما فعلته السّحابة بالجلدة الطريّة ... ما رسمه شورّب على وجه / قلب النيقرو... قعقعة الجماجم تحت فكيّ المخّاخ ...الاجساد الملسوعة المزرقّــّـة : لعينة الثعبان/الوليّ ... اشلاء المراة التي تحمل من المخاخ .. الوصل و الربط بين شكل و لون الجرح و بين فم امرأة القطار الملطّخ بالاحمر ... جرح الختان المنحوت هنالك

و من ثمّ ، من الم الجرح الصغير في الجلدة الطريّة .. ينعطف بنا الى تلك الجراح الكثيرة في ذلك المكان الخفي من اجسادنا

جراح العذراوات المغلقات المتعففات علنا ، المخدوعات بهالة من غبار الشرف الكاذب ، الباكيات المتألمات الثائرات سرّا
ُجراح المومسات المترهلات .. يلملمن ما بقي في اشلاء الجسد/الخُرج ، من ذكرى الانسان الذي كـُـنّـَـه

جراح كثيرة في هذا السياق .. سياق الجسد المنهك بأغلال الوهم و الجهل

الجرح ليس فقط ذلك الخرق الاحمر المفتوح في ركن ما من الجسد ، هناك جراح اخرى .. لا تـُرى .. لا تـُلمس .. لا لون لها و لا شكل .. لكنها موغلة أضافرها بوحشية في ثنايا الروح

في الـ"بـَـحّ" و الــ"بـَحـّيـــزمْ" ـ

2010-02-11T17:46:00.004+01:00

البارح قالق و فادد و ما عيني باش نتفرّج في حتى شى
لقيت عادل امام ، فيلم قديم اما ما نعرفوش ، اسمو : النوم في العسل يحكي باختصار على بلاد اصيب كل رجالها بالعجز الجنسي ، عفانا و عفاكم و عفاكنّ الله ، وكثرت عمليات انتحار العرسان اللي لقاو رواحهم "بـَحّ" في اوّل ليلة ليهم مع زوجاتهم ، و كثرت الخصومات الزوجية و الاعتداءات العنيفة سواء الناتجة على تعبير الزوجات على عدم استعدادهم لمواصلة العيش مع ازواجهم و هوما "بـَـحّ" و الا الناتجة على اعتداء الازواج على زوجاتهم كتأكيد للرجولة اللي هي اصبحت "بـَحّ" و كثرت جرائم قتل الازواج لزوجاتهم باش ما يخرّجوش السّر ... الخ
اللي شدّني اكثر من الحكاية ، زيادة على رمزيّتها المزيانه ، هو هزلية المواقف ، و القريماسّ الذّكيــّين متاع عادل امام اللي يضحّكوني رغم انّو مسّطها برشه في مناسبات عديدة .. اش علينا
اكثر مشهد ضحكت عليه هو مشهد شخص مهم : مدير جريدة مشهورة ، اللي يقوم بدورو عبد الرحمان ابو زهرة ، و بين قوسين ، راهو يسخّفني برشه الممثّل هاذاكه ، يسخّفني لسبب شخصي جدا ، وهو انّي انا ملّي صغير نتخيّل الشيطان الرجيم ، ابليس النّزيس ، على صورة الممثل هاذاكه ، على خاطر وانا صغير تفرّجت في مسلسل "على هامش السيرة" متاع طه حسين ، تفرّجت فيه وقتها بقلب و ربّ ، و هو وقتها يمثّل في دور ابليس النّزيس و أبدع فيه لدرجة
انّو ايّ واحد يلعن ابليس تجي في بالي تصويرة عبد الرحمان ابو زهرة.ـ

سي عبد الرحمان ابو زهرة مدير الجريدة هاذا (و اللي كيفو كيف رجال البلاد هاذيكه الكل كان "بحّ" ) وقت اللي سمع اللي حكاية العجز هاذي حالة عامة ما تخصّوش هو برك ، فرح برشه ، و انبسطت اساريرو، و رجعتلو ثيقتو في روحو ، ثيقة بمعنى انّو صحيح "بـَحّ" اما موش وحدو

و اكثر من هاذا ، من حينو طلب المرا متاعو بالتاليفون باش يخفّف عليها آلامها و أحزانها و يبشّرها انّو ... ههه ... موش الوحيد في حالتو ، و بانّها حالة الـ"بـَـحّـيزم" هي حالة عامة

الحقيقة نسيت شنوة اللي لهاني و ما كمّلتش الفيلم ، و تلهيت في حاجات اخرين و نسيتو من بالي جمله

قلّي وقتاش عاودت تذكّرتو الفيلم ؟ و بالتحديد وقتاش جا لبالي وجه و ملامح عبد الرحمان ابو زهرة (عمّي الشيطان) وهو منبسط الاسارير و يبشّر في المريّه متاعو بالخبر السعيد : الا وهو شيوع و استفحال حالة العجز على الجميع .. ههه.. و عدم انفرادو بيها ؟ـ
وقت اللي اليوم عملت طلة على تن بلوغ و نلقى صدى "للبـحّيزم" في التدوينه اللي اكيد قريتوها الكل اليوم

هاذي (ما نحبّش نعمللها رابط خاطر اولا تغلي بالفيروس ، ثانيا ، محتواها تنجّمو تسمعوه في الجزء الاول من نشرة اخبار الثمنية متاع تونس سبعة ..عالاقل كيف يجي من مذيعة مزيانه و صوتها حلو ، تكونو ربحتو حاجة)ـ

هاك اللي مولاها عمل فيها مـَـنـْـدبه ، و ندبهم مالدّ ُر للـّحية على سجن الطلبة ... امّا وين ؟؟؟ في الولايات المتحدة الامريكية

اما يبطى شويّة .. راهي ماهيش مندبه مندبه رغم ما ينجّم يوحي بيه ظاهرها .. بل انّو باطنها : فرحة ..و فرحة كبيرة برشه زادا ، ما تشبهها كان فرحة عمّي الشيطان ابو زهرة بحالتو .. فرحة الاشتراك و التشابه مع الاخرين .. في العجز.. و الخصاء
موش الشّي من بعضو بربّي ؟؟؟ ـ
ايّ ليلتكم زينه

حجب آخر .. تخلّف أخر .. تقهقر أخر .. على درب الحداثة والرقيّ

2010-02-05T16:05:00.007+01:00

يتواصل المسلسل المقرف و المتخلّف و الماسط متاع حجب المدونات على اساس آلأراء السياسية المختلفة متاع اصحابها
تقريبا في ظرف شهر من زمان ، انا شخصيا شهدت حجب خمسة مدونات جاكييز (إثر نشرو لرسالة سهام بن سدرين) سفيان الشورابي ، ارابيكا ، منجي الخضراوي إثر نشرو لأحد مقالات الراحل محمد قلبي

و توّة مازلت كي اكتشفت حجب مدونة "افكار ليلية"ـ

بكل ما يعني ذلك من استغباء و استبلاه للناس ، و كانّ مجرّد حجب مدوّنه كافي لاسكات صوت صاحبها ، و الا إثناؤو على التفكير بطريقتو هاذيكه ، و الا ، و حتى على مستوى تقني ، كافي لمنع الناس من الدخول ليها

نحبّ بالمناسبة نتوجّه بسؤال (للاسف لا فائدة ترجى من الاجابة عليه ) سؤال لمحترفي الكذب على الذّقون ، و اللي بكلّ برود (فريجيديتي)إزاء ما يحدث للمدونات الجادة و المختلفة ، ما يخجلوش من انّهم يتشدّقو علينا بالدروس في الديمقراطية
هنيئا لكم تبوّؤكم مكانة ريادية في هذا المجال : مجال إلجام و تكميم الافواه على درب الحداثة ... و الرّقي

شوية موزيــكا .. لآرابيـــكا

2010-01-26T09:32:00.008+01:00

و بطبيعة الحال .. الى كافة الاصدقاء .. الحاضرين .. بالغياب

tilidom.com

مرّة اخرى ... ودائما .. لا للحجب

2010-01-20T16:56:00.002+01:00

اسجّل احتجاجي و إدانتي لحجب مدوّنة المدوّن "جاكيييز" و اطالب بالكفّ عن مصادرة الحريات عبر حجب المواقع و المدونات

شوية تاريخ + الكلنا فرد كلمة : في "سنة الشباب" .. لا لسجن الطلاب

2010-01-15T15:49:00.008+01:00

مدفوعا بشيء من الحنين ، و على هامش الاحتجاجات على سجن مجموعة من الطلبة ، حبيت نستذكر بإيجاز شديد ، بعض الصفحات من مسيرة الاتحاد العام لطلبة تونس اللي يعتبر من أعرق و أقدم المنظمات الجماهيرية ، و من اكثر المنظمات اللي كانت فاعلة في اهمّ و ابرز المحطات التاريخية في البلاد
ما كانش دورو مقتصر فقط على المطلبيات ، بل كان يتميّز بتلازم النقابي بالسياسي نظرا للصفة الطلائعية لاي حركة طلابية ، بمعنى انّو الاطلاع على تجارب الشعوب ، و التوق الى مجتمع افضل ، و القدرة على صياغة بدائل و تصورات و برامج كل هذا يجعل من تحرّكات الطلاب تتراوح بين النقابي المطلبي الآني ، و السياسي البرامجي العام

تاريخ الاتحاد العام لطلبة تونس ثري جدا بشكل انّو لا يمكن جردو في تدوينه ، اما انّجّمو نقسّموه حسب تصوّري الى اربعة مراحل
الاولى منذ تاسيسو الى حدود بـُـعيـْـد "الاستقلال" و هي فترة تميّزت بهيمنة الحزب الحاكم (الدستوري) و تميّزت كذلك ، رغم انّو كان يضم حساسيات سياسية و ايديولوجية اخرى(قوميين /بعثيين/شيوعيين/آفاقيين...) بغياب ايّ محاولة للمناداة باستقلاليته عن الحزب الحاكم ، بحيث انّ الجميع وقتها كانو "مبتهجين" بالـ "استقلال الجديد" مما غيّب عليهم رفع شعار الاستقلالية.ـ

المرحلة الثانية منذ المؤتمر الخامس في اوت 57 ، حيث ارتفعت بعض الاصوات المنادية باستقلالية المنظمة الطلابية على الحزب الحاكم ، تفاديا لان يلاقي اتحاد الطلبة نفس مصير المنظمات و اجهزة الدولة الاخرى اللي هيمن عليها الحزب كليا ، و كان "ميثاق الطالب" هو الورقة الرسمية اللي التفّت حولها القوى اللي بدات ترفع في مطلب الاستقلالية.ـ

المرحلة الثالثة ، وهي الغنية جدا بالاحداث و اللي فيها دخل اتحاد الطلبة منعرجات حاسمه ، بحيث كانت عشريّة الستينات هي عشرية القطيعة الكاملة بين القيادات النقابية الطلابية اللي كانت اداة في يد الحزب و تتمتّع بالامتيازات و تحظى بالتبجيل من قبل السلطة ، مقابل قاعدة غاضبة نجح القطب المقابل : اليساري بالاساس في اسقطابها ، و كانت الستينات هي فترة التصعيد السياسي ، بواكير المظاهرات الاحتجاجية اللي تنزل للشارع ، موش فقط لاسباب مطلبية (رداءة المأكل و المسكن) بل أيضا ، و هاذا هام من زاوية اعطاء البعد السياسي للعمل النقابي ، لاسباب سياسية (مثلا : مظاهرات احتجاج على زيارة روجرز وزير الخارجية الامريكي وقتها لتونس سنة 68 ، و قبل ذلك ، مظاهرات احتجاج على "تواطؤ الرجعيات العربية مع الصهيونية و الامبريالية اللي أدّى الى هزيمة 67"ـ
في الفترة هاذيكه مثلا ، نسجّلو اولّ عمليّات الايقاف و المحاكمة والتجنيد للطلبة ، التجنيد اللي هو الاعتقال المقنّن ، على خلفية انتماءاتهم الايديولوجية و السياسية
وصل الصراع بين الدساترة المهيمنين و المستقوين بالسلطة و المتجاهلين لارادة القواعد ، و بين الشّق الديمقراطي المقابل اللي استمات في التمسّك بشعار الاستقلالية الى درجة مقاطعة اشغال المؤتمر 18 المنعقد بقربة وقتها اثر الانقلاب اللي مارسوه الدساترة على ارادة الاغلبية

المرحلة الرابعه في تقديري ، هي ما بعد انجاز المؤتمر 18 الى اليوم ، و اللي تتميّز بالصراعات الذّاتية و بغياب التصورات الجدّية و غياب النضّج السياسي و التنظيمي ، و هاذا بالطبيعة راجع لعدّة اسباب اهمّها التقهقر اللي شهداتو القوى التقدّمية الديمقراطية في البلاد و اللي هو احد تداعيات نفس التقهقر على مستوى عالمي ، ثمّ بشكل محلّي ، الى حالة التشرذم اللي تميّز تجربة اليسار في تونس بشكل عام

نحب بعد هذا الكل نربط مع الرّاهن ، و نأكّد على انّو اعتقال و محاكمة و سجن الطلبة بالرجوع و التفتيش في انماط تفكيرهم السياسي و الا بالرجوع الى تمسّكهم بحقوق نقابية معينة ، يعتبر انتهاك صارخ و صريح لحقّهم في ذلك ، و يعتبر سلوك متناقض مع ما يـُـرفع من شعارات سياسوية سطحية حول ما يسمّى بـ"سنة الشباب" ـ

فإذن

في سنة الشّباب ... لا ... لسجن الطــّلاب

لا ... لسجن الطلبة

2010-01-14T17:38:00.005+01:00

في تواصل مع التدوينه هاذي
حبيت نقول كليمتين بالقدر اللي تسمح بيه المعلومات اللي عندي
في الحقيقه رغم شحّ المعلومات عن الحركة الاحتجاجية اللي قاموا بيها طلبة كلية الآداب بمنوبه ،على خلفية المطالبة بحق زميلاتهم في التمتع بالمبيت الجامعي ، و اللي اسفرت على الحكم بالسجن على عدد من الطلبة .. قلت رغم شحّ المعلومات حول الموضوع هاذا ، فإنّو حتى شي ما يبرّر سجن ابناءنا الطّلبه
نتوجّه بدعوة للمدونين الطلبة انّهم يفيدونا بأكثر معلومات على القضية هاذي

ديمقراطية الصهاينه في عيون مدوّن امريكي

2010-01-12T10:48:00.011+01:00

و انا نفركس على كل ما يتعلّق بحرّية الصّحافة في بلدان العالم ، نطمبج في مدوّن امريكي محترم جدا اسمو دايفد ، متعدّد الاهتمامات ، روايه ، تصوير فوتوغرافي ... كيما تنجّمو تشوفو في البروفيل متاعو ... كاتب مقال عجبني برشه (هنا)ـ يتعرّض بالنقد الصريح لحكومة الكيان الصهيوني في ما يخصّ موقفها من حرّية الصحافة ، و تحديدا وقت الضّجّة اللي قامت ابّان اتهامات الصحف السويدية للكيان الصهيوني بالاتجار في اعضاء الاطفال الفلسطينيين (هنا) و يقول صاحب التدوينه اللي "اسرائيل" وقت اللي اقامت الدنيا و لم تقعدها حول المقال هاذا ، الى درجة الدعوة الى منع و توقيف الصحيفة ، و الى مقاطعة البضائع السويدية ، أكّدت انّها ما تقلّش ازدراء بحرية الصحافة و حرية التعبير من البعض من جيرانها العرب اللي هي ديمه حريصة على الظهور بمظهر البلد الديمقراطي النموذجي قدّامهم

ويتسائل صاحب التدوينه : كيفاش نطالبو السعودية بالمزيد من احترام الحريات السياسية و الحال انّو جارتها "اسرائيل" مليانة اكثر منها بالعفن اللي من النوع هاذا

و يأكّد دايفد انّو رغم انّو متعوّد على مهاجمة الحكومه الامريكية في مدوّنتو ، و رغم ادراكو جيدا اللي عمّار متاعهم

متقلّق ياسر من الحكاية هاذي ، لكن هاذا الكل ما يثنيهش على التعبير على آراؤو كيما يحبّ

و يختم بانّ على "اسرائيل " انّها تحاجج العالم ببرائتها من التهمة هاذي عوض هالنعيق اللي بلا معنى و عوض الالتجاء الى التهكّم على خصومها ، الشي اللي ما يجلبلهاش احترام الشعوب اللي انا منهم

***

كتعليق صغير مني على كلام السيد دايفد ، حبيت نقول انّو غريب و موش غريب في نفس الوقت انّك تلقى اصوات من ال "هـُـناك" تفوح منها روائح الحرّية ، في حين تعبق اصوات من الـ "هــُـنا" بروائح المغالطة و التمويه و التزييف

و بالمناسبة .. حبيت (في اطار الاستقواء بمدوّن اجنبي ههه) نزيد ننشر الرسم البياني اللي ناشرو صاحب التدوينه ، و اللي موجود منّو برشه على فكرة .. و على كل لون ياكريمه

هكّه

وهكّه

غنـــايتـــين

2010-01-06T17:13:00.013+01:00

الزوز غنايات هاذم يعجبوني برشه
موش فقط على خاطر يغنّو فيهم زوز من اعظم قمم الغناء الاروبي المعاصر

Edith Piaf

و الايطالي الرائع

Fabrizio de Andrè

بل كذلك لانّهم يتشابهو في للجرأة اللي تميّز مواضيعهم
الزوز غنايات هاذم يقدّمولنا شخصية "الـمومس" بعيد على إدانة الاديان و الاخلاق ليها
و بعيد على تنميطها و تصنيفها في خانة الشّر المطلق

في الزوز غنايات هاذم ، انّجّمو نتفطّنو الى الجوانب الدرامية الانسانية لشخصية المومس
تلك المدانة المشتهاة
تلك المقهقهة الحزينه
تلك الملــتذّة الباكية

في مفارقة كنفشيوسيّة مذهلة من اللذة والالم

تلك الشخصية اللي غالبا ما تكون غاية في التركيب

نسمعو الاولى .. متاع ايديت بياف ، اللي عنوانها

dans ma rue*

tilidom.com

هنا رابط نصّ كلماتها

نسمعو الثانية متاع

Fabrizio de Andrè

اللي اسمها

bocca di rosa
يعني : فم الورده

tilidom.com

هاذا نصّ كلماتها باللغه الايطالية

و هاذي محاولة متواضعة منّي لترجمتها ، وقابلة بالطبيعه لايّ تصليحات من الناطقين الجيّدين بالطليانية

كانوا يسمّونها" فم الوردة"ـ

كانت تضع الحب .. تضع الحبّ

كانوا يسمّونها فم الوردة

كانت تضع الحبّ

.. فوق كل شيء

ما إن وطئت قدماها محطة القطار
لقرية سان هيلاريو

حتى ادرك الجميع ، وبمجرّد نظرة

ان الامر لا يتعلّق بقدّيــسة

هناك من يمارسون الحب

مدفوعين بالضّجر

و هناك من يمتهنونه

"فم الوردة"ـ

لم تكن لا هذا و لا ذاك

!فقد كانت تمارسه مدفوعة فقط بالعشق

غير انّ العشق غالبا ما يحملنا

الى تلبية رغباتنا

دون ان نبحث في الشّريك

إن كان حرّا أو متزوجا

و هكذا .. من يوم الى آخر

ينهال على "فم الوردة"

الغضب الفضيع للكلبات

اللاتي افتكت منهنّ عظامهنّ

و بما انّ الناس عادة ما يسارعون الى

إسداء النصائح

كأنّهم المسيح في معبده

و بما ان الناس عادة ما يسارعون الى

إسداء النصائح

عندما يعجزون عن إسداء عكس ذلك

فها أنّ تلك العجوز البشعه التي تجاهلها الجميع

و فقدت جميع رغباتها

اعمتها نيران الغيرة

قد تصنّعت الرغبة في النّصح

و وسوست في النساء اللاتي يخونهنّ ازواجهنّ

انْ وجب تسليط اقسى عقاب

على "فم الوردة" التي ما انفكّت تسرق منّا عشاقنا

يتعالى صياحهنّ المنتقم في في ضابط التحقيق

ان هذه النذلة تفتكّ رجالنا

وتجلبهم اكثر ممـّا تجلبهم مخازن الغذاء

في الحين .. يأتي اربعة أعوان مدجّجون

بالاحذية و القبعات

في الحين .. يأتي اربعة أعوان مدجّجون

بالاحذية و القبعات

و بالاسلحة

نادرا ما ترى المخبرين و ضباط الامن

يتبادلون الانحناءات

لكن ،

انظر اليهم الآن ،

كيف ينفشون ريشهم تحت بدلاتهم

و هم يصطحبون " فم الوردة" الى أوّل قطار

في محطة القطار حضر الجميع

من الضّابط الى الــرّقيب

في محطة القطار حضر الجميع

بعيونهم المحمرّة و بقبعاتهم في ايديهم

ليقدّموا التّحيّة لتلك التي

في وقت وجيز

و دون ادنى تكلّف .. دون ادنى تكلّف

حملت الحبّ للمزارعين

رُفـِـعتْ لافتة صفراء

كـُتِب عليها بالأسود

وداعا "فم الوردة"

لقد رحل الربيع برحيلك

و هل يحتاج خبر بهذه الطرافه لايّ صحيفة حتى ينتشر؟ ـ

فقد كان انتشاره من فم لفم ، اشبه بسهم منطلق من قوس مشدود جيدا

و فاق عدد المنتظرين في المحطة الموالية

عدد المودّعــين في المحطة السابقة

هذا يرسل القبلات

ذاك يرميها زهورا

و الآخر يطلبها لساعتين من الزمان

وحتى القدّيس الذي لا يفرّق بين هذا و ذاك

ارادها ان تشاركه موكبه

الذي تتقدّمه العذراء

و تتوسّطه " فم الوردة" ـ

و هكذا

جاب الحبّ المقدّس المدينة جنبا الى جنب

بمعيّة العشق الشبقي

ّ.. كاريكاتيـــر : ديـمقــراطيــّة .. أم .. ديــ"ـمَاطـْـرَاكــِ"ــيـّة

2010-01-05T09:59:00.008+01:00

petit cadeau de "bonne année" aux "blogueurs frigides"
de la part d'un "blogueur excité"

بعد عام ... بعد عامين .. وجيل

2009-12-31T17:28:00.004+01:00

مغالطات تاريخية و لخبطة مفهومية

2009-12-30T11:49:00.013+01:00

استنادا الى اسطورة/رواية محاكمة سقراط ، كواحدة من اهم المحاكمات التاريخية للفكر المختلف ، فانّ تطابق الاهداف بين الكاهن و الجلاد ، يحتّم على واحد منهم ، في لحظة ما ، الانسحاب ، لتمكين الاخر من العمل على تحقيق نفس النتيجة : محاكمة و من ثمّ اعدام صاحب التفكير المختلف ، فقط باسلوب آخر
يعني ، التطابق بين (الجلاد) : مقصّ عمار ، و بين (الكاهن) : الاصوات اللي تبرّر المقصّ و تشرعنلو و تنظّرلو، و اقلّها ما تبديش حتى نزر قليل من الاحتجاج عليه ، بديهي انّو (هالتطابق في الهدف) ما ينسّيناش انّهم حاجة وحدة ، رغم الابتسامات العريضة السمجة اللي تعلو احيانا محيّا الكاهن (مقابل العبوس الاعتيادي للجلاد) ، ابتسامات تكشف عن انياب ما تقلّش لمعان عن لمعان المقصّ / اداة الجلاد

من المحاكمات التاريخية ، الى المغالطات التاريخية و اللخبطة المفاهيمية اللي وردت في التدوينه هاذي ، و اللي من الضروري تفكيكها.ـ
ابرز تمظهرات هالمغالطات و هاللخبطة تتلخّص حسب نظري في علاقة "الحزب الاشتراكي الدستوري" التاريخية بالتيار الاشتراكي العالمي
ثمّ موقع سليلو "التجمع" من بعض الاحداث اللي شهدتها البلاد في فترات تاريخية محدده.ـ

اوّل جملة اثارت استغرابي في التدوينه هي انّو : "الحزب الاشتراكي الدستوري تبنـّى الاشتراكية و الشيوعية" وقت اللي يقول في التدوينه
Le PSD a été socialiste (et même communiste à un moment)
يبدو لي من الضروري هنا نرجعو من جديد نقراو الابجديات و الادبيات الكلاسيكية متاع مفهوم الاقتصاد الاشتراكي و نحتكمولها باش نقيسو مدى اشتراكيّة الحزب الاشتراكي الدستوري
الاشتراكية ، و بعيدا على الشعاراتية العاطفية و على الديماغوجيا و البروباغندة السياسية ، هي أساسا مصطلح ذو دلالات اقتصادية . موش هكّه ؟ قد يحدث اننا نـُـوجدو تمظهرات للمفهوم هاذا ، حتى في مستوياتو التطبيقية في مراحل قديمه من التاريخ ، لكن في اعتقادي نتصوّر اللي مفهوم الاشتراكية خذا هيكلو و تشكّلو العام إبّان الثورة الصناعية كردّ فعل حتمي و تاريخي على سيطرة النظام الراسمالي
ياخي فمّة مفهوم آخر للاشتراكية سوى انّها نمط اقتصادي يقوم على الملكية الجماعية لوسائل الانتاج و هيمنة الدولة الاشتراكية على مصادر الثروة من اجل الحدّ من التمايز الطبقي ؟ هاذي بالطبيعة الملامح العامة متاع مفهوم الاشتراكية تبقى التدقيقات و التحديدات اللي تخصّ كيفية و شروط ارساء النظام هاذا موضوع نقاشات و اختلافات كبيرة و جوهرية احيانا
يعني هنا هالرّداء متاع "الاشتراكية" اللي لبسو "حزب الدستور" في بداية الستينات ما كانش يعني انّو ذو برنامج اقتصادي اشتراكي تحديدا ، بل كان في اطار مغازلات للحزب الاشتراكي الفرنسي ، و هاذا جانب آخر من الحديث. ـ
و من هنا يولّي غريب برشه انّو صاحب التدوينه في نفس الوقت يتباهى بانتماء "الحزب الاشتراكي الدستوري" ، حتى في مرحلة معينة من مسيرتو ، للـ"إشتراكية" بل ... اكثر من ذلك .. و يا للهول .. لـلــ"شيوعية"ـ

Une fois l’indépendance acquise en 1956, le Néo-Destour deviendra le Parti Socialiste Destourien (PSD ; Destour = Constitutionnel) et officialise sont appartenance à l’international socialiste.

و من بعد يستنكر على "حركة التجديد" ذات العلاقة القريبة بالـ"حزب الشيوعي التونسي " تضامنها و دعمها لكوبا و لكوريا الشمالية .. و اللي هو شي متماهي مع الحركة باعتبار البعد الاممي لاي حركة" شيوعية" كيما ورد في تعليقو هنا على تدوينة ماني الافريقي

contrairement aux idéaux d’Ettajdid qui appelle à soutenir Cuba et la Corée du Nord dans le programme de Brahim... ils sont dans l’air du temps quoi !!!).

و من هنا نجي للمغالطة الاخرى ، و هي ادّعاء صاحب التدوينه انتماء الحزب الاشتراكي الدستوري للشيوعية في وقت من الاوقات او تبنّيه لادبياتها و لبرنامجها
كيف كيف ، هنا يلزمنا نرجعو نحدّدو مفهوم "الشيوعية" من ادقّ مفاهيمها من داخل المنظومة الماركسية ، بما انّها تجسيد لبرنامج : "من كلّ حسب طاقته لكلّ حسب حاجته" الى اكثر مفاهيمها المشوّهة و هو : "الشيوعية هي الكفر و الاحاد ... و كفى" . باش ما نلقاوش حتّى ذرّه علاقة بين المفهومين هاذومه و ما بينهما ، وبين ادبيات و برامج "الحزب الاشتراكي الدستوري" مما يأدّي بينا لحاله عقيمه من الخلط المفاهيمي
يدلّل صاحب التدوينه على اشتراكية "الحزب الاشتراكي الدستوري" بانتماؤو " للاممية الاشتراكية الثانية" ، و لو نزيدو نتعمّقو اكثر في الحيثيات التاريخية /السياسية لمسألة الامميّات الاشتراكية الاربع ، تو نستنتجو انّو ما فمّاش إجماع حولهم ، مثلا من اكثر الامميات الاشتراكية المثيرة للجدل و السّخرية .. بل للتندّر داخل العائلة اليسارية الراديكالية ، هي الاممية الثانية ، (و اللي يفتخر صاحب التدوينه بانخراط "الحزب الاشتراكي الدستوري" فيها ) اللي اهمّ ما يميّز الموقف السلبي منها هو الموقف من الاتحاد السوفييتي ، ... الاتحاد السوفييتي ،" الاب" اللي" وفاتو" تشرّع و تبرّر التنكيل بالــ "يتامى" اللي خلاهم .. كيما باش نبيّن لوطه شويّة
يعني جملة كيما هاذي

Lui-même n’est pas monolithique et continue d’avoir plusieurs courants qui le tirent tantôt vers la droite, tantôt vers la gauche ,vers le peuple, vers la bourgeoisie

نتصوّر انّو رغم حالة الهلاميّة المفهومية اللي تطبع جملة كيف هاذي ، الا انّها غاية في الوفاء للتوجّه العام اللي يميّز التجمّع اللي اهم ما يميّز ممارستو هو سحب البساط من الجميع من اجل الانفراد بكل شيء .ـ
بمعنى آخر ، بعض الشعارات السياسوية اللي تعالج بشكل سطحي و جزئي و عقيم مسألة الفقر، كافي لنفي آخر سياسي يساري تحديدا معروف بانحيازو البرامجي و السياسي للفقراء
ارساء اذاعة اسلامية ، بنك اسلامي ، عدم مضايقة المتحجبات ، كفيل بنفي آخر سياسي اسلامي
الخ ...ـ

Sinon

ما فمّاش ما يفسّر و ما يبرّر انحياز حزب سياسي الى الفقراء و البرجوازية في نفس الوقت ، و الى اليسار و اليمين في نفس الوقت ، الا انّو يهدف الى نفي المتحدّثين باسم الفقراء ، ونفي المتحدثين باسم البرجوازية ، ونفي المتحدثين باسم اليسار ، ونفي المتحدّثين باسم اليمين ... و ذلك بتبنّيه لكل هاذا بشكل توتاليتاري شمولي
جمل من نوع "تصادم التجمع الدستوري الديمقراطي مع عنف الاسلاميين و مع عنف اليساريين يتامى الاتحاد "السوفياتي سابقا

l’ouverture démocratique initiée par Ben Ali s’est heurtée à la violence et à la démagogie des islamistes et des gauchistes orphelins de l’ex-URSS.

هنا ، نشوفو نوع من التبرير للاضطهاد و المضايقة اللي كان ضحيّتها موش فقط الاسلاميين ، بل ايضا انفاس اخرى ديمقراطية و يسارية ، و رغم انّي ما انّزّهش الحركة الاسلامية على العنف ، الا انّو ، و خاصّة امام تبرّأ الاسلاميين الرّسمي من احداث العنف المزمع القيام بيها في مطلع التسعينات ، نتصوّر اللي ايّ متفرّج محايد ، ضروري انّو ينزّل الحملة على الاسلاميين منزلتها الاقرب للصحّة و للمنطق ، و هي ، في قراءتي ، المميزات الموضوعية للمرحلة اللي كانت تمرّ بيها علاقة الاسلاميين بالسلطة ( مدى وفاء السلطة لوعودها معاهم ، مدى التزام الاسلاميين ببنود الميثاق الوطني اللي صحّحوه في 88 ، الاعداد للتوجّه التوتاليتاري من خلال التضييق على كل الانفاس المختلفة وقتها و نعطي كمثال القمع اللي تعرّضلو ''حزب العمال الشيوعي التونسي" )ـ
هاذا بالطبيعة مع التاكيد على انّو الدّارس المتمحّص المدقّق في تاريخ الحركة الشيوعية ، يدرك جيدا حاجتين هامّين : اولا اسبقية الحركة اليسارية على تاسيس الاتحاد السوفييتي ، مما يضفي لاستنتاج انّو الاتحاد السوفييت هو الابن الظال للحركة اليسارية ، موش اليساريين هوما "يتامى" الاتحاد السوفييتي
ثانيا ، انّو ما فمّاش إجماع داخل الحركة اليسارية العالمية على انّو الاتحاد السوفييتي يمثّلها ، بالتالي تبرير القمع اللي تعرّضتلو الحركات اليسارية في تونس في مطلع التسعينات بانّو" قمع شرعي" نتيجة لتصادم احلام السلطة السّمحاء ، الطيّبة ، الوردية مع "عنف" اليساريين باعتبارهم "يتامى الاتحاد السوفييتي" كيما ورد في التدوينه يكون تبرير غالط.ـ
يعني السؤال الشرعي هنا ، إذا قمع الاسلاميين جا نتيجة لــ "أعمال عنف" ، باهي ، قمع اليساريين و الديمقراطيين عموما ، جا نتيجة لآش ؟
هاو نعطيك انا محاوله متاع زوز إجابات ممكنه
جا نتيجة لتحرّك المنظمات اليسارية و الديمقراطية و الحقوقية في أطار الشرعية و الحرّية ، واللي ، رغم انّو اقرّها بيان 7 نوفمبر و حدّدها و"بشـّر" بيها ، الا انّها نتايجها قد تكون محرجة و مزعجة موش لنصّ البيان ، بل لما وراء البيان ، و ما وراء البيان هو ما نحن بصدده الآن .ـ
كذلك جا نتيجة لانّو الحراك اللي كان في اطار الشرعية و القانونية بدا يجيب في بعض النتائج الهامة رغم طابعها الجزئي المشرذم و القطاعي المحدود (نعطيك مثال هام جدا : الاتحاد العام لطلبة تونس ، بقيادة يسارية ، ينجز المؤتمر ثمنطاش متاعو ، المنقلب عليه من طرف الطلبة الدساترة سنة 72 ، و الصفحة هاذيكه فيها ما فيها من احراجات سياسية و تنظيمية للطلبة الدساترة )ـ

للحديث بقية

الحاج حميدات .. و حكايتو مع التّصــيورات

2009-12-26T08:41:00.005+01:00

بعد إذن الصديق ماني الافريقي .. حبيت نعمل مواصلة في شكل حلقة ثانية لتدوينتو: "الحاج حميدة و حكايتو مع الجريده" و اللي يظهرلي مازالت تستحقّ منكم حلقات ثالثة ... و رابعة... و... الخ

كمّلوش جماعة الشّعبة حكايتهم ، روّحشي الحاج حميدة لدويرتو .. و هو مروّح في الثــّنيّه ، يمشي دبّــَه دبّــَه ، و يدعي لربّي باش ما يزيدش سي علاله يتعرّضلو و يشدّ فيه باش يقلّو شكوني المرا و شكونهم الجماعة اللي يحكيو عليها بالخايب في الجريده .. و اناهيّ الجريدة .. و هوّ توّ ماهوش في صحنو باش يحكي في الموضوع هاذاكه. ـ
هو هكّاكه ، و يسمع في صوت ينادي عليه من المادّه لخرى
الهاشمي الحجّام : يا حاج .. يا حاج .. الله يعينك .. شبيك مروّح توّ .. تي هاو مازال بكري
الحاج حميده : واللّهِ تاعب شويّة يا هاشمي.. الفدّه عملت فيّ ... نحب نرتّح فخّار ربّي
الهاشمي الحجام : ايّ ايجا رتـّحو بحذايا شويّة .. و اشرب كويّس تاي عربي منعنع ..عندي ما نورّيك. ـ
الحاج حميدة متّجه نحو الحجام و يتمتم بينو بين روحو " اش باش يورّيني العزا زاده .. تمشيش راهي حكايتها خرجت في جرايد اخرين .. قلبي ما قايلّي خير " ـ
ثمّ بصوت مسموع : آه يا هاشمي .. ديما و انت بغرايبك .. اش عندك ما تورّيني .. نشالّه خير ؟؟
الهاشمي الحجّام : خير .. خير .. يا حاج ....الحكاية و ما فيها .. ثمّه تصيورات قاعدين يفرّقو فيهم في الحومه ، عجبوني .. يصلحو كواتروات باهين .. الحق قلت نورّيهملك و انت تختار منهم .. ماك تعرفني نعزّك برشه.. هاذاكه علاش ما حبّيتش نفوتك
الحاج حميدة : عندك هنا هوما ؟؟ ايّ هات نشوف
الهاشمي الحجام : ايّ شدّ عندك .. هاذي لـُـوله

الحاج حميدة سحنتو تقلبت ، و لفّت وجهو على جنب
الهاشمي الحجام : اه .. سامحني ياحاج .. نسيت اللي انت ما تقراش بالفراسويّة .. ثمّه اختها بالعربي .. تره .. شوف

الحاج حميدة : ...... ـ
الهاشمي الحجام : وهاذي .. ما عندك فيها ما تقول عاد

الهاشمي الحجام : زيد شوف هاذي

الحاج حميدة شدّو كريز متاع كحّه.. خرج وقف في الباب يلوّج في الهوا .. و الهاشمي لاحق عليه بالتّصاور
الهاشمي الحجام : يظهرلي هاذي تجي مع ذوقك

الهاشمي الحجام : هاذي باش تعجبك .. نعرفك ذوّاق ؟

الحاج حميدة يخزر للتصويرة بالسّرقة .. و يزيد يقوّي في الكحّه ـ

الهاشمي الحجّام : وهاذي ؟

و هاذي ؟؟

وهاذي

حتى هاذي شي ؟؟؟

و هاذي

الحاج حميدة .. (يكحـّح في روحو .. بنوع من التخلّص) : ووو يا سي الهاشمي .. فمّه برشه غبره في حانوتك ..و الا شـْـعـَـر .. و الا كوراندير و الا شنيّة .. و انا تعرفني عندي الفدّة .. ما عادش انّجّم .. خلّيني نمشي
و خرج ينفّض في برنوسو و يكحّ في كحّه متكلّفه .. و يتلفّت بالسّرقة على نْحَى .. باش يتأكّد اللي الهاشمي ماهوش وراه و يتمتم وحدو : قالّو كواتروات .. و هي الحاجّه تقبل تصويرة اخرى تتعلّق في الدّار بخلاف تصويرتها هيّ ؟؟؟ يحبّها تسحّتني مالدّار .. ملّا و الله ... ـ

تدوينه بيضاء .. من اجل حرية التعبير و التدوين

2009-12-25T09:54:00.002+01:00

الموسيقى في ثنائية الغالب و المغلوب

2009-12-24T15:46:00.008+01:00

من المفروض هاذا تعليق على تدوينة ارتيكيلي هاذي ، اللي هو تفاعل فيها مع مقال ولادة هاذا

اما خاطر الموضوع هاذا يروق لي برشه الحديث فيه ، حبيت نشرّك فيه باقي الاصدقاء

فكرة انّها "الموسيقى لغة عالمية" صحيحة اما فكرة ملغومه شويّة و تحلّ برشه اقواس اخرين

الموسيقى فيها موازين و مقامات و الات .. يعني في كلمة : تقنيات ، التقنيات هاذي اتّرجم مهارات معيّنه اكتسبتها مجموعة بشرية من خلال مراكمتها لتجربة ثقافية خاصة بيها

المهارات التقنية هاذي (اللي غالبا ما تكون ماشية بالتوازي مع مهارات اخرى : مهنية تخصّ العمل ، مهارات لغوية ، الخ...) متفاوته من حيث جودتها و الا "ابداعيّتها" ان صحّ التعبير ، و هالتفاوت هاذا هو اللي باش يطبع علاقة المجموعات البشرية هاذيكه بعضها ببعض ،

ما نّجّموش نطّرقو لموضوع ما يجمع الشعوب ببعضها ثقافيا دون المرور على ثنائيات الغالب و المغلوب/الفاتح و المفتوح/الفاعل و المفعول بيه/ المؤثّر و المتأثّر

يعني

صحيح انّو منشأ ألة الكمان هو الرّبابه ، و منشأ آلة القيتار هو العود ، و منشأ الة البيانو هو الهارب الفرعوني ، و منشأ السنفونية هو الموشّح (اللي يتشابهو في التركيبه الدّخلانية متاع كليهما)

لكن

ما يختلفوش اثنين في انّو اعلى و اقصى ما ينجّم البشر يوصلّو في المهارات التقنية الموسيقية هو : الاركستر السنفوني

قدّ ما تكون وصلات العزف المنفرد (الصّولو) عميقة و حميمه و قدّ ما تسمح بإبراز مهارات فردية لعازف واحد ، الا انّو الوقع و السّحر و التاثير اللي تحدثو غابة اركسترالية من الخشبيات و النفخيات و الايقاعيات و النحاسيات ، المتقنة التنظيم و التوزيع و الاخراج ، يعطي حسّ انساني و عمق درامي كبير برشه نابع من اكثر من مائة عازف .. مائة روح بشرية .. مائة حسّ .. مائة تعبير.. مائة مهارة .. مائة تجربة

و هنا نردّو بالنا

راهو كيف نمتدحو الموسيقى الاركسترالية اللي هي منسوبه "للغرب" ماناش بصدد تتفيه تختنا احنا مقابل تضخيم اركاسترهم هوما ، لا و انّما هو تعاطي ايجابي مع مهارات اخرى

و انا مع "سنفنة" الموسيقى العربية حسب ما تقتضية الحاجة..لم لا

مثلا احنا في تونس عندنا الاركستر السنفوني التونسي اللي مشرف عليه الاستاذ احمد عاشور يعمل في عرض شهري في المسرح البلدي ، و يعزفلنا في مقاطع لباخ و تشايكوفسكي و هايدن و روسّيني و...و...و

طيب يا اخي .. باهي .. و يعطيه الصّحة

اما علاش ما ينتجش حاجات خاصة بيه ، مع المحافظة على الطابع السنفوني متاعو بالطبيعه

يعني علاش ما ياخذش قطع من تراثنا الغنائي و الموسيقي و يعاود يكتبها سنفونيّا بشكل انّها تولّي قابله للاستماع عالميا

بالطبيعة الحاجات هاذي و خاصّة في ،ظل الانظمه التوتاليتارية ،لا يمكن لها ان تتحقّق الا بارادة سياسية ، يعني موش ممكن لـ" حـُـكومة" ما عندهاش هواجس ثقافية جادة ، انّها ترسي اسس متاع ثقافة وطنية حقيقية

انا سمعت حاجات في الاتجاه هاذا عملتهم مجموعة صغيرة اسمها 'مجموعة البحر الابيض المتوسط" كانت تجربة رايعة ،

شوف الرحابنة اش عملو بغنايات كيما "يا جارة الوادي" و "خايف اقول اللي ف قلبي" متاع محمد عبد الوهاب و الا "زروني كل سنه مرّه" متاع سيد درويش ، و عبد الوهاب نفسو في الخمسينات تأثّر بموجة الايقاعات اللاتينية متاع الصّالصا و الرّومبا و التانغو و السّامبا ، و عمل فيهم برشه حاجات (جفنه : رومبا ، سهرت منه الليالي: تانغو....الخ)ـ

عندنا هنا عم الهادي الجويني و الفلامنكو

بالطبيعة كيف نجبدو امثلة من مدارس عريقة في ميدان فنّي معيّن ما يعنيش انّا نقصيو تجارب اخرى معاصرة قد تكون مستحدثة اكثر ، و قد تكون مستفيدة اكثر من التقدّم العلمي ، بل فقط من باب الاستفادة من تجارب الاسبقين

علاش ما تتنظّمش مسابقات للهوّاة في الميدان هاذا ، للمتخرّجين من المعاهد العليا للموسيقى و المتخصّصين في التوزيع الاركسترالي ، و احسن كتابة سنفونية لقطعة من التراث ياقع تقديمها و عزفها من طرف الاركستر السنفوني التونسي

وهكّه تكون انطلقت من جذورك الثقافية ، صحيح ، لكن زادة مع الاستفادة من مهارات الآخرين

على خاطر صحيح انّو الكمنجة متاعهم اصلها الربابة متاعــنا

و القيتار متاعهم اصلها العود متاعنا

لكن شبيهم هوما استفادو من ربابتنا و عودنا و طوّروهم الى درجة الاركستر الفيلهارمونيك (114 عازف) و احنا لا ؟

فمّة تيار موسيقى انا نحبّو ياسر و ديمه نستشهد بيه ، اللي هو تيار : الموسيقى السنفونية الوطنية/القومية متاع ما يسمّة سابقا باروبا الشرقية ، و اللي انطلق من تراكيب موسيقية بسيطة جدا و شعبيه من ترانيم و اناشيد التزيقان و الغجر و ارتقى بيها لدرجة كتابة سنفونيات نافست الطلاين و الالمان اللي يعتبرو عريقين في ميدان الموسيقى السنفونية

المسأله متداخلة ، و السياسي فسّد كل شي ، و الثقافة فقدت "نقاءها" و لذّتها المعرفية التواصلية و اصبحت واجهة من واجهات الهيمنه السياسية و التكنولوجية بشكل ولينا : ياإمّا شادّين القارد اكثر من اللازم ، و الا ذايبين في الآخر سياسيا و ثقافيا بكل اغتراب و استلاب و انبتات

هاذي بعض النقاط العامة ، و الموضوع مازال يحلّ على اكثر من باب

أعـــــداد

2009-12-23T11:38:00.004+01:00

صحيح انّو التصويت في البلوغسفير نقصت فاعليتو بعد امتناع العديد من المدونين على مواصلة التصويت ، و هوما احرار، لكن هاذا ما يمنعش من انّو التصويت يبقى ديمه ،حبينا و الا كرهنا ، مؤشّر على التوجه العام متاع البلوغسفير خاصة في الشّأن الوطني
مثلا ، فمّة مدوّنات ذات بعد شخصي حميمي بحت ، و الا فمّه مدوّنات متخصّصة في الوصفات متاع الطبخ ، في التعريف بامراض معينة ، في الفوتوغرافي ، في الموسيقى .. يعني تخصّصها هاذاكه يخفّض من نسبة متابعتها ، و بالتالي كي تكون نسبة التصويت عليها منخفضة ، الامر عادي و عندو ما يفسّرو
اما فيما يتعلّق بالمدوّنات ذات الاهتمامات المتنوّعه ، نلقاو التصويت يتراوح بين درجات معقوله
لكن
و خلّينا ما نبعدوش على مجال التصويت و الارقام و الحمّى العددية
وقت اللي مدوّن مقدّم روحو على اساس انّو الناطق الرسمي باسم أعرق و أقدم حزب ، و ما يفلّتش حتى مناسبة باش يعتزّ و يفتخر بالقاعدة الــمليونية متاع هالحزب ، و بالنسبة الساحقة متاع الانتخابات .. هاذا فضلا على الانتصارات العددية اللي حقّقها في الفايسبوك بطريقة او بأخرى
و إذا اعتبرنا اللي البلوغسفير هو مراية عاكسة (بدرجة محترمة) للمشهد النخبوي في البلاد
لكن وقت اللي ، في المقابل ، نلقاو انفسنا امام الارقام التالية
لمدّة سنة تزيد (تحديدا من 20 نوفمبر 2008 الى 22 ديسمبر2009 )ـ
هبّط فيهم 160 تدوبنه (بالحساب) .. تحصّل فيهم (بالحساب) على 7 اصوات .. ما يعادل صوت واحد على 20.85 تدوينه
وقتها يولّي مشروعـلنا باش نجبدو الاقراص و الاعواد ، و نراجعو برشه حسابات "عـــَـدَدِيــّـّـّـّـّــــــه"ـ

مرة اخرى ... لا للحجب

2009-12-22T09:20:00.003+01:00

لا

لحجب مدونة

من أجل تونس ديمقراطية واجتماعية و متضامنه

حديث الرّصيف : على رصيف أحد شوارع 7 نوفمبر

2009-12-22T08:27:00.005+01:00

زيادرحبانيـّات

2009-12-17T17:26:00.005+01:00

tilidom.com

بما انّو العـِــيشـِــه سَــوْدَا .. ومش بـَـيـْـضَــهْ
اجـْــتـمعنا .. و قرّرنــا .. نِــسـْـلـُـق بَــيـْـضهْ

:)

التدوينه الموؤودة / قائمة المدوّنين الـ"خونه" ـ

2009-12-14T10:35:00.006+01:00

قائمة المدوّنين "الخونه" اللي وردت في تن بلوغ هاذي

اللي اتحفنا بيها المدوّن هاذا .. اختفت في ظروف غامضة .. هنا

بعد ما أرفقها بسلسلة متاع تهديدات و وعيد
مع استجلاب امثلة من التاريخ
و تاريخ فرانسا بالذّات
امثلة خاضعة لمفهومو هوّ للـ"وطنية" و للـ"خيانه" ـ
و في حقيقة الامر ، ماهيش المرة الاولى اللي ياقع فيها التخوين و تبرير الحجب
نذكّركم بالتدوينه هاذي

يظهرلي من حقّ ايّ مدوّن يستوضح على ظروف و حيثيّات هالقايمه اللي وُ ئــِـدت في مهدها
بأيادي مرتبكه

الــ"وطنيّون" الوثنيّون

2009-12-11T12:22:00.008+01:00

رغم اللي انّجّمو نلقوا برشه نقاط تقاطع و التقاء
عديدة و عديدة جدا
بين "المدوّنون الوطـــنيون" و "المدوّنون الوثـــنـيــّون" ـ
الا انّهم يختلفوا في نقطة جوهريّة
وهي
انّهم "الوثــنيّون" يؤمنوا بالتعددّية الالهي ة
و جماعتنا "الوطــنيون" .. لا
:)

عَــشانْ ما نِعْْلاَ وْ نِعْْلاَ وْ نِعْْلاَ.. لازم نـِطَاطِي نـْطَاطِي نـْطَاطِي

2009-12-10T16:38:00.024+01:00

عبّرت في اكثر من مرّة على اعجابي و عشقي و تأثّري و غرامي الكبير بمدرسة سيد درويش الموسيقية ، هاك الفنان الوطني اللي في ظرف سبعة سنين ، عمل ثورة في "الموسيقى العربية" ، و مات
و بين قوسين ، فضلا على إبداعاتو و إضافاتو في ميادين الطرب الكلاسيكية (ادوار ، موشحات ، اغاني شعبية ـ"طقاطيق" ) سيد درويش كان زادا يتميّز بصياغة الحان تعبيرية يترجم فيها حياة و معاناة طوائف و فئات المجتمع

موسيقيا
فمن لحن الشيّالين ، الى لحن الموظّفين الى لحن الصنايعيّة ، لحن القارسونات "القهاوجيّة" ، لحن العربجيّة ـ"الكرارطيّة" ، لحن الشيطان (لحن الشيطان بالرسمي موش تفدليك ، و توّ نسمّعهولكم في مرة من المرات) .ــ
اليوم نحبّ نقترح عليكم لحن صغير من الحانو ، اسمو "لحن الوصوليين" ، وهو مقتطف من اوبيرات غنائية من الحانو اسمها : "العـَشرة الطيبة" و اللي هي مقتبسة من اوبيرات فرنسويّة شهيرة عملها جاك اوفــّنباك
عام (1866) اسمها
Barbe bleue
ترجمها محمود تيمور ، و كتب ازجالها بديع خيري رفيق درب سيد درويش بعد ما طوّعوها للوضع السياسي/الاجتماعي العام هاك الوقت و اللي يتميّز بالانتفاضات ضدّ القصر الملكي و ضد الانقليز (الثورة العرابية ، ثورة 19 ... ـ)ـ
الاوبيرات مبنيّة على خرافة قديمة تدور احداثها في عصر المماليك ، و يتمحور خطّها العامّ حول السّخرية من الباشوات العثمانيين اللي كانوا عبارة على عايلات و سلالات مستحوذين على الملمّه و اللي ثمّه ، و كذلك في الاوبيريت دعوات مبطّنه و تحريض رمزي على الالتفاف حول الزعيم سعد زغلول رمز" الحركة الوطنية" وقتها
نسمعو القطعة كامله و اذا تحبّو تبّعو الكلام خاطر فيه برشه مفردات موغلة في الدارجة

tilidom.com

عشان ما نعلا ونعلا ونعلا … لازم نطاطى نطاطى نطاطى
بسلامته الوالي ابو زعيزع … مهجص باشا دقن تعيتع
وغرامه تمللي قال ايه … نترصص دايما حواليه
نروح واقفين زنهار … زي القط والفار
تلقاه دايما منفوخ نفشرله … طاخ طيخ طوخ
الرك على حبة بولوتيكه … وذمة كاوتشوك خربانة
ما دام الأمير ذمته أنتيكه … لازم الرعية تكون وحلانة
حزّر فزّر ياواد انت بعقلك … بعد الحنشصة دي اللى انت عليها
ياهل ترى الدنيا دي حتروقلك … وتشوف ماشاف قراقوش فيها
تعرفش المسألة ايه … عرنوس متعفرت ليه
بالحق سلامات سلامات … ايش حال الافوات
محاسيبك … يا خى سيبك
اول شرط نطاطي البصَـــلة … لسيدنا الوالي ونستعبط لـُه
مهما تسمَعوا تهجيص … اعملوا روحكم بلاليص
مهما نسمع تهجيص … نعمل روحنا بلاليص

بلاليص بلاليص بلاليص

بلاليص بلاليص بلاليص
عشان ما نعلا ونعلا ونعلا … لازم نطاطي نطاطى نطاطى

في اللحن هاذا ، حوار بين وزير الوالي من جهة ، و بين مجموعة من المنافقين اللي هو قاعد يحفّظ فيهم في "الدّرس" و يهيّأ فيهم لكيفية التقرّب من الوالي ، و كيفيّة نيل رضاه للحصول على الامتيازات و لتسلّق السّلّم الاجتماعي
اهمّ جملة موسيقية في اللحن هاذا ، و اللي تعتبر هي الجملة الأساس ، و العنوان الموسيقي الكبير للحن هي الجملة اللي يبدا و يوفى بيها ، و اللي تقول كلماتها : عشان ما نعلا و نعلا و نعلا .. لازم نطاطي نطاطي نطاطي

يكفي انّك تتفرّج في الجمله هاذي كيفاش شكل كتيبتها على السّلّم الموسيقي ، باش تفهم الرّوح التعبيرية القوية عند سيد درويش
نشوفو تصاعد النوتات و نزولهم ، في بلاغة موسيقية لا مثيل لها ، معبّرة على التزلّف و الانحناء و طأطأة الرؤوس و الموالاة و السّكوت و الخرس و النفاق و التدليس ، من أجل الـ"صعود" و التسلّق و الـ"وصول" الى المآرب الشخصية و المناصب و الجاه

نشوفو زادة الحركة القافزة متاع النوتات ، يعني بين الدرجة و الدرجة نلاحظو وجود فراغ ، ممّا يرمز لحالة اللّهفة اللي عليها هالمنافقين في وصوليّتهم ، و اللي تخلّيهم ما يتسلّقوش السلّم درجة درجة في شكل اوكتاف

octave

متأنـّي و بطيء و متهادي
دو - ري - مي - فا - صول -لا- سي – دو
بل بإحداث ما يسمّى بلغة الموسيقى : توافق

accord

و هو السّلّم اللي نصفّو فيه الدرجات الثانية و الرابعه و السادسة و السابعه
بالشكل هاذا

دو - (...) - مي - (....) - صول - (... )- (...) - دو

الثلاث نقاط و القاطع و مقطوع = فراغات)ـ)

هاذا بالطبيعه بالاضافة للعديد العديد من المواضع اللي ثوّر فيهم سيّد درويش التراكيب الموسيقية لجعلها تستجيب للتوجّه التعبيري اللي حبّ يأسّسلو

الانتهازيين هنا يستلموا مهامّهم الوصوليّة ، و يعبّرو على استعدادهم للنفخ في صورة الوالي و تضخيم الأنا متاعو ، و ذلك باختلاق البطولات الوهمية حولو، و نشوفو مليح هاك : "طاخ، طيخ ، طوخ" الملحّنه في نسق تصاعدي لاظهار التضخيم و المبالغه في النفخ في صورة الوالي

اوّل شرط : نطاطي البَصَله.. لسيدنا الوالي و نستعبطلو(نقولو احنا : نعطو للذّل كارو)ـ

مهما نسمع تهجيص … نعمل روحنا بلاليص ( بالاليص = أواني فخارية تـُـملأ بالماء و توضع جانبا : "أزيار متـكّية " بلغتنا )
و بترديد كلمة بلاليص بلاليص بلاليص .. كانّي بيهم يعملو في مونولوغ باطني يحبّو من خلالو يقنعو ارواحهم انّهم فعلا بلاليص بما تعنيه الكلمة من بهاليل .. دراويش

اللحن هاذا لحن مودارن و اممي و صالح لكل زمان ومكان :) فلكل سلطة مجموعة من المرتزقة المأجورين و هوما عبارة على رأس حربتها ، اللي يبداو مبثوثين في كل الميادين ، يردّدو و يصدّرو في الديماغوجيا العقيمة و البرباغنده الركيكه متاعها ، تحت ستار الوطنية ، اللي هي اقرب الى الوثنيّة
اللحن هاذا عبارة على كاريكاتير مضْـْخـــم برشه لكن بالموسيقى موش بالريشه ، و يتضمّن اهم شروط الكاريكاتير و هي التقنية البسيطة مقابل تكثيف المعاني ، يعني انّجمو نلاحظو بساطة اللحن و خــُـلـُـوّو من التعقيدات التطريبية و الانتقالات المقامية و النغميّة ، نلاحظو اللي هو لحن سهل الحفظ و الترديد ، مع المهارة الفائقة في استخدام تقنيات الموسيقى لإبراز الرّوح التكالبية و التسلّقيّة و الوصوليّة للانتهازيين

الكاريكاتير يبالغ ... لكن لا يكذب

2009-12-09T12:05:00.013+01:00

استفزّتني بعض التدوينات المتعلّطة على فنّ عظيم كيما فنّ الكاريكاتير ، حبيت نقول شوّية ملاحظات حسب ما تسمحلي بيه علاقتي و معرفتي بهالفنّ
اهمّ حاجة تميّز فن الكاريكاتير هي تكثيف الاحاسيس او المواقف او الانطباعات مع الاختصار في التقنية
يعني رسام الكاريكاتير الناجح هو اللي يستعمل اقلّ ما يمكن من الخطوط و الاشكال و الالوان لتبليغ اعمق و ابلغ و ادقّ الافكار او المشاعر
و عليه ، ضروري نفرّقو ما بين الرسوم الكارتونية و القصص المصوّرة اللي تستدعي تقنية مختلفة من التلوين و الحوارات ... و بين الكاريكاتير كفن قايم بذاتو
نشوفو مع بعضنا حنظلة ناجي العلي

النموذج هاذا قدّاش مختصر و مكثّف وجدانيا و ذهنيّا
الخطوط قليلة العدد و عديمة الالوان .. بعض الظلال البسيطة ، الكونتراست متاع ابيض اسود يحيل على عدة مفاهيم و عدة حالات : الوضوح/التنافر/الظلام/الضوء .. ـ
الحفاء.. اللي يحيل على الشعور بالمرض و الجروح و التشرّد.. العلاقة المباشرة بالارض .. التجذّر ...الخ
اللباس المرقــّع ..اللي يحيل على الفقر و البرد .. مما يجلب ، حتى بصفه لاواعية ، تعاطف الاغلبية البردانه و الفقيرة معاه
حركة اليدين المكتــّفه لتالي ..اللي تحيل على الاكتفاء بالتفرّج و التألّم نتيجة العجز على الفعل .. توحي بانّو حنظله في نوع من السجن الارادي
حنظلة ديمه متلفّت لغادي .. دلاله على رفضو و إعراضو عمّا يحصل
حنظله لا ملامح عمريّة له .. ليس طفلا و ليس كهلا و ليس عجوزا .. بل هو الطفل و الكهل و العجوز في نفس الان
يعني .. ممكن الابداع ، بحرفية و تقنيه بسيطة ، لكن مع إحساس و وعي عميق و صادق بالقضايا و المواضيع

و كيما انّجّمو نستقرووه من الكاريكاتير الآتي ، فقط بزوز قيم ضوئية (اسود و ابيض) و بخطوط بسيطة و بعض الدوائر، يمكن ان نقول انّ ارادة الحرية مهما كانت ضئيله ، فهي قادرة على تحطيم المشانق المنتصبة في ليل الدكتاتوريات

محلّ شاهدنا : كاريكاتير قزوردي كيما هاذا

اوّلا : يوجع في الرّاس من كمّ الالوان المستعمل فيه و بشكل سيّء مافيهش حتى فيانه
ثانيا : يفتقد لابسط شروط و مكونات كاريكاتير ناجح و هي الاختصار
ثالثا : رسم للوجوه كما هي .. بورتري .. الشّي اللي ما عندو حتى علاقة بالرسم الكاريكاتوري للوجوه ، و اللي يقوم على الانتباه الذّكي الفطن لبعض الملامح اللي تميّز الوجه هاذا على الاخر ، و تضخيمها كاريكاتوريّا

يعني التضخيم و المبالغة هي من تقنيات الكاريكاتير لاظهار شيء موجود بطبيعتو .. موش للكذب و لاختلاق اشياء وهمية
رابعا : كتابة اسماء الاشخاص قرب وجوههم مما يدلّ على عدم ثقة في اننا سنتعرّف عليهم فقط من خلال الرسوم
كل هذه الهنات و كل هذا الضعف التقني ما يمكنش يترجم الا ضعف المحتوى القايم على التحامل و التخوين و الاقصاء

حـْـكايات الحومه القديمه 2 : خلتي فاطمه الجــّـريديّة

2009-11-23T10:30:00.004+01:00

كنت ديمه نحسّ اللي ثمّه صِــلة ما بين روحها المبثوثه في جوّ الحومه ، و بين روبتها الاعتيادية اللي يبدو انّها ما ترتاح كان فيها هيّ . روبه بسيطه ، سهلة الملبس ، واسعه فيها برشه تـْـكامش ( بْـليـّات) من جهة الصّدر و تهبط منفتحه مرتاحة متداعية تزداد اتساعا كلّما تدلّت الى اسفل ، مــُـعلنة عن اتساع قلبها و رحابة صدرها و قابليتها لاحتواء الجميع.
ما نّجّمش نتخيّلها من غير ما نتخيّل عـْـصَابتها السوداء اللي كانت تكبسها على راسها و جبينها ، تاركة المجال لبعض طـْـعاطش الشيب المـْـحـَـنّــِـية المتحررة من تحت العـصابة من جهة نواظرها باش تشوف النور. و اللي تحتها يستدير وجه ضاحك يخفي ، رغم تجاعيدو ، جمال قديم
ريحتها ديمه مزيج من الحـِـنّة و الفلفل الشايح و السـّخاب و البخور و الحطب المحروق و القطران و العجين ، يعني انّجّمو نقولو اللي خالتي فاطمه الجّريديّة ، و ارتكازا فقط على ريحتها و ريحة روبتها و بيتها ، متصدّية و محتجّه على احد اهم اخطارالعولمة : التدجين والتنميط الثقافي اللي يحب يجعل من العالم الكل كعبة هامبورغر
يعني
خالتي فاطمة الجريدية ، كانت هي المزوّد متاع البخور في الحومه ، و موش ايّ بخور ، البخور الجريدي بالتحديد اللي معروف بريحتو العتيقة المستحبّة ، الوصفة و الدّوزاج و قدّاش يلزمو "صـِـرْغـِـين" و "قــْـمارِي" و "غـَـبرة ْ مـِسْـك" و "عــُـود قرنفل" و "حبّة مـِســْــتــْـكه" ... الخ ، بالطبيعة مع حاجات اخرى سرّية ما تعرفهم كان هيّ ، و هاك الاعواد و هاك الجزيئات النباتية المجفّفه هاذيكه الكل ، قدّاش يلزمها تبقى مرنّخه في نوع معيّن من العطر باش تـتـْـشـَـرّبـُـو مليح مليح بشكل انّو في حالة احتكاكو بالنار يخرّج هاك الدخان المعطّر : البخور.
بعد ما تكمّل الخلطة هاذيكة و تخلّيها تشيح (في الظّلّ و من المستحسن بعيد على الضّو كيما تأكّد هيّ) نتصوّر انّها تصلّي الظّهر و الا العصر ، و تعمل سويقــر.
قلت تعمل سويــقر ، علني موش سرّي ، على خاطر، في ثقافة الجـّريد القديمه ، ماكانش عيب على النساء المسنّات الجريديات انّهم يدخّنو ، و كان ثمّة اعتقاد في انّو سيقارو من ساعه لساعة ينحّي القاز ، (او كيما يقولو هوما : ،الهـَـوَا )و يخفّف من ضغط الدّم ، و ينحّي وجيعة الرّاس ، و بطبيعة الحال التعلّة الصحّية هاذي كانو يحبّو يتخفّو وراها باش ما ياقعش اتهامهم بالتشبّه بالرجال او بالتسيّب ، بل بالعكس ، كانو العزايز اللي يدخّنو يتصنّفو في خانة الـ ـ"رّ ُُقـّـِـي" ، و الـ"فينو" بالقياس مع لخرين اللي يستعملو في النـّــفـّه . و اللي كانو موضع تندّر و تقزّز من طرفهم .ـ
بعد السويقر ، تبدا في الخلطة الاخرى : الهريسه العربي ، و للهريسه العربي و الفلفل الشايح عند خالتي فاطمة حكاية .. حكاية تشكيل و تلوين .. حقيقةً ً حاجة اخرى.ـ
خالتي فاطمه الجريدية ، و برغم اللي دويرتها صغيرة و بابها ضيّق ، عكس روبتها و قلبها الواسعين ، الا انّو في موسم الفلفل الاحمر، تـُـدَقّ المسامر الكبار في اعالي الجدار الخارجي المقابل للشمس متاع دارها ، و عينك ما تشوف الا الفلفل الاحمر هابط عراجن عراجن .. شماريخ شماريخ .. أكاليل أكاليل ، كعبة بحذا اختها بالخلاف، من اعلى الجدار حتّاش لقريب الارض ، و كي تنعكس فيها اشعة الشمس تولّي تشعل شعلان .ـ
حيط دارها يولّــي بكلّو احمر ، محلاها التصويرة ، قداش فيها جهد بشري و تعب و صراع يومي و تمسّك بالحياة و رغبة في اسعاد الاخرين ، و قدّاش فيها زادة جماليه تشكيلية عفويّة.ـ
بالطبيعه الفلفل هاذاكه من بعد ما يتشرا ، يتغسل و تــتـْـنحّى منّو القرون الفاسدة و الخامجة و المعلوله ، و ياقع نظمو في خيط كيما العقد الكبير اللي تزيّن بيه رقبة دويرتها ، من بعد تتنحّى زرّيعتو و يترحى ، شي يتبسّس بالزيت و يتباع هكاكه ، و شي ما نعرفش اش تزيدو باش يولّي هريسه عربي.ـ
بحكم اللي دارها كانت مقابله دار الوالد القديمه ، الدهشة اللي انتابتني اوّل مرة نتفاجأ بهاك الجدار المـُـتْـرع بحمورية الفلفل ، تشبّه لدهشتي اوّل مرّة يصبّ فيها الثلج بكميات كبيرة في بلادنا ، وقت اللي حليت باب الدار ماشي للمكتب و نلقى الدنيا الكل بيضه.ـ
ها أنّ الجدران ، عند خالتي فاطمه ، تتّخذ طبائع اخرى غـير تلك التي خـَــَبـِـرناها عنها من صّمت و خرس و جمود و موت ، ها أنّها تحمرّ خجلا او سـُـكـْرًا أو غضبا أو حـُـبـّـاً، ها أنّها تنزف دمـًـا ، و من حين لآخر ، و مع كلّ هبّة ريح خفيفة ، تتحرّك تلك الشماريخ ، محدثة خشخشة لطيفة المسمع إثر احتكاكها بطوب الجدار العتيق ، فتبدو كأنّها شعاب من المرجان المتموّجة .ـ
جاش وقيّت ضربان الملسوقه ؟
الملسوقة متاع خالتك فاطمه ماخذة صيت كبير على خاطر مازالت تعمل فيها بالطريقة الزّمنيّة يعني على الكانون و الجّمر ، من غير ما ننسوا كعبة القارص اللي ديمه محطوطه بشكل متجدّد في الكانون للوقاية من الزنزانه
كانت زاده من امهر صانعات السـّـخاب ، و للي ما يعرفوش السّخاب ، هو عجين من عدّة نباتات طبيعية فوّاحة تـُرحي و تمزج بنوع خاص من العطورات و تشكّل في شكل مثلثات صغيرة يقع ثقبها من الوسط و تجفيفها و نظمها بشكل متناسق و تناظري مع الخرز البلّوري الملوّن و بعض الاشكال الصغيرة من الفضّة و المرجان ، للحصول على عقد ملوّن و فوّاح ، و كان للسخاب دور مزدوج ، التزيين بوصفو يتلبس في الرقبة ، و التعطير بحكم انّو قدّ ما يشيح قدّ ما تولّي ريحتو مقبوله اكثر .ـ
بالنسبة لصنع السخاب ، السنين الاخيرة نْـقـُـص صـُـنعْـها ليه على خاطر ما عادش مطلوب برشه كوسيلة زينه للنساء ، لكن هاذا ما يمنعش اللي مشهد خالتي فاطمة و هي بصدد اعداد و عجن خلطة السخاب ، من المشاهد المنقوشه في ذاكرة طفولتي ـ على خاطر كنت نحير في هاك البارادوكس متاع العجين الاسود اللي يشبّه للـغـْـرَمْ (الحمأ المسنون) لكنّ في المقابل ريحتو فوّاحة واكثر من هاذا ، هو معدّ للزينه ، البارادوكس هاذا هو اللي كان محيّرني شويّة ، و هو اللي خلّى المشهد ما ماتش فيّ.ـ
وقت اللي كانت تجبد القربه

المتحجّرة و المتصلّبة طيلة مخبئها الشتوي الجاف ، و ترنّخها في الما باش تـَـطـْـرا ، و تصبّلها كمّية محدّدة من القطران في داخلها ، وقتها نشمّـو ريحة الصـّيف... و كأنّو الصّيف كان متخبّي مع القربه هاذيكة في نفس المخبأ الشتوي.
حضور خالتي فاطمة في الحومه ماكانش فقط لتأمين الاكتفاء الذّاتي في البخور و الفلفل ... الخ ... بل كانت مأمن اسرار الجميع ، و تلعب احيانا دور الخاطبة ، او مجرّد لفت نظر شاب من شباب الحومه الى فتاة معينه بايعاز من امّ الفتاة او احيانا بإيعاز من الفتاة نفسها ، كانت هي مرسال الجارات المتخاصمات لبعضهن البعض ، و كانت رسولة الصلح بيناتهم ، رغم انّها احيانا ما تنجحش في التحلّي بالحياد اللازم لمثل هالمهمـّات ، و تتورّط في انحيازات معينه ، و وقت اللي يغصروها ، تـُـقـْـسم لا عاد تدخل هالمداخل ، و بطبيعة الحال ، ما تنجّمش تكون في مستوى قـَـسـَـمْـها ، على خاطر الكفّ على لعب هالادوار بالنسبة ليها ، يعـني الموت
انتشار روح خالتي فاطمة في الحومه كان يسمحلها بصفه حصريّة انّها تسألنا نحن الاطفال اسئلة فضولية غير مكترثة بتذمّرنا منها و استنكارنا ليها ، : شنوّة فطوركم اليوم ؟ شكون هاك الجماعه اللي جوكم البارح ؟ باباك عندي مدّة ما نيش نشوف فيه ، ماو لاباس ؟ وين مشى ؟ طلــّش بحذاكم عمّك فلان ؟ و خالتك فلتانه علاش جتكم هاك النّهار ؟ وش جابتلكم في هاك القفّة ؟ الخ ...ـ
و كانت هي الوحيدة اللي نتعاملو مع اسألتها الفضولية هاذيكه بأريحيّة ، كانت تسألنا الاسألة هاذيكه بصوت مرتفع ، و مرتفع جدّا ، ما كنّاش نحسّو في اسألتها حتّى طابع سرّي و الا استنطاقي خبيث ، من نوع التلصّص و الا التنسنيس ، و حتى كيف نتذمّرو احيانا من اصرارها بكل ثقه على انتزاع الإجابات منّا ، كنّا نتذمّرو بشكل سرّي ، وما نلقوش تأييد عائلي لتذمّرنا هاذاكه من امهاتنا ، يمكن على خاطر الكلّهم كانو يتقرّبولها نظرا لطاقتها الخـَـدَمـَـاتيّة ، فيلزمنا احنا زاده نكونو مطيعين ليها ، و ما نتذمّروش من اسألتها الفضوليّة

و بطبيعة الحال ، الاستنتاج هاذا استنتجتو كيف كبرت ، و عرفت اللي خالتي فاطمة كانت تستمدّ في شرعية اسئلتها الفضولية جدا ، من احساسها باللي الحومه الكل بما و من فيها ، متاعها ، ملكها ، الكلهم بناتها و اولادها و اخواتها الصغار
الكلّهم ماكلين من فلفلها المخدوم و المشيّح و المرحي بغناية و بنظافة فايقة
الكلّهم رمضانهم ما عندوش طعمه من غير ملسوقتها المخدومه عالجمر و عالكانون الطّين
الكلّهم رجالهم ما ينفحوش فيهم و ما تشعلش فيهم الشهوة الّا ما يكونو مبخّرين بالبخور الجريدي اللي هيّ عاملاهولهم
شرارات الحياة اللي كانت تبثّ فيها المرا العظيمه هاذيكه في الناس و في القلوب و في هوا الحومه ، انطفأت منذ ايّام
تاركة مكانها سيطرة رائحة الغبار و الكهرباء و دخان السيارات و السرفاسار و البلاستيك على جو الحومه
و اهمّ و اجمل حاجة باش نتحرمو منها الى الابد ، بعد رحيل هاك الروح اللي كانت منتشرة بشكل انساني لا مثيل له في الحومه ، هي منظر/ لـَـوحة اكاليل و عراجين الفلفل الاحمر، المرجاننيّ المتموّج ، المنظوم المتدلّي على جدران منزلها النازف.. الخجول… الثّمل.. العاشق .. تحتضنه شمس الخريف .ـ
سوف لن يندهش طفل آخر لذلك المشهد الجميل ، و تمتزج في مسامّ انفه رائحة الفلفل برائحة البخور و الليمون

المحترق في كانون الجمر ، محدثة سنفونية رهيبه ، نابضة لا بالاصوات ، بل بالروائح و بالألوان

******

لمن يريد الاطلاع على "حكايات الحومه القديمة 1 " اضغط ( هنا )ـ