caricature : المواطن التونسي و مصباح علاء الديـــــن

كلــيـمــتـيـــن حــول : الحجاب و الجنـس

الحجاب ديمه يـتـْــذْكــَــر في سياق انّو الداعين ليه ، سواء كانو آلهه أو بشر ، يحبّو يفرضوه على المرا باش ، كيما يقولو هوما، تحافظ بيه على "عـفـّـتها"...ـ
و كلمة العـفـّـة هنا كي نقــشـّـروها .. و نزيدو نقــشّروها .. ونزيدو نقــشّروها .. نوصلو لجوهرها اللي هو : الجنس
هيّا مّاله نجبدو الحديث حول علاقة الحجاب بالجنس .. باش نخرجو شويّة على السياقات النمطية متاع النقاش في الموضوع هاذا ، و اللي هي ، يا إمـّا سياقات متاع" كفار" و "مؤمنين" ، و الا سياقات سياسية متاع "طائفية" و احداث تميّز ،حتى على مستوى اللباس ، و الاّ سياقات تجارية متاع فضائيات بوكشطة البتروليــّــه
و رجاء من غير تنرفيز .. ونذكّر انّو كل حد حرّ في تفكيرو .. رغم انّو موجود بيناتنا شكون راكب على حرية التفكيرو يحب من خلالها يوصل باش يمنع غيرو من انهم يفكّرو كيما يحبّو
و زادا راني مانيش نتحدث من وجهة نظر "فيمينيست" .. و رغم انّو"الفيمينيزم" هو رد فعل على قهر آخر الا اني نرفضو ، لانّو يختزل الحكاية في معركه ابدية بين الراجل و المرا ، الشي اللي ماهوش صحيح ..ـ
و زادا ، حتى كان طوّلتها شوي ، انا راني مع انّو كل حد يلبس اش يحب ، الجـِـشـّـه جـِــشـّــتـك غـطّـيها بشكارة و الا

بالاحبال .. دبّر راسك ..اللي انا ضدّو : وقت اللي واحد يجي لواحد آخر يقـــلّو :البس هكّه ، و ما تلبسش هكّه

في موروثـنا التقليدي .. وحتى الديني .. المرا مطالبه اكثر من الراجل بـ : "التعـفـّـف" هاذايا ، يعني بإنامة .. او إماتة الجنس فيها .. وكل ما كان عندها القدرة باش ما تحكيش على رغباتها... الجنسية بالخصوص .. ما تعبـّرش عليهم .. ما تفدلكش بالجنس .. ما تبيّــنش انوثتها حتى لروحها هيّ .. كل ما اصبحت جديرة بلقب "عفيفه" ... و هاذا يرجع لعدة اسباب .. أعمق ببرشة .. و أبعد في التاريخ من السبب السطحي متاع ( المرا الصالحة هي عماد الاسرة ، و لذلك هي معنية اكثر من الراجل باش تكون اخلاقها حسنة ) ـ
على خاطر انّجّمو نبقــو ايّامات و نحنا نحدّدو في اش معناها "مرا صالحة" .. واش معناها "أسرة" .. و اش معناها "اخلاق حسنه" ... ـ
للمسالة علاقة بالوعي الذكوري /القضيبي اللي نشأ مع تقسيم العمل اجتماعيا و جنسيا ، و بعد ما تحوّلت المرا من مشارك في الانتاج ، الى جزء من الممتلكات ، يعني كيفها كيف العـْــلـِـــيلـْــشات و الدّجَـيـّـجات و أواني الطبخ ... اللي لاهيه بيهم في الدار و الا في القبيلة والا اللي هوّ .....و بالتالي ولّات خاضعة لانساق اخلاقية و قيميّة تفرض عليها باش تعمل هاذي و ما تعملش هاذي .. تحكي مع هاذا و ما تحكيش مع هاذا .. تـتـكلم في الموضوع هاذا و ما تتكلمش في هاذاكه .. و زادا .. تلبس هكّه و ما تلبسش هكّه

طبعا ما سـْــرتـْـش نفس القوانين ، على كل المجتمعات ، و بنفس الاشكال ، و في نفس الازمنه ،.. لكن الحضارة الانسانية متشابهة في ملامحها التاريخية العامة

و هالعِـفــّــه هاذيّه ، هي من اهم مقاصد فرض ارتداء الحجاب .. يعني باش المرا ما تـهـيّـــــجــش الراجل بمفاتـنها .. يعني لتفادي انّو الراجل ينـقـّـز مثلا على زميلتو في الخدمة .. في البيرو .. في القيشي .. في الستاندار .. و الا مثلا هي تمدلو تقرير باش يصحح فيه و هو يقوم يلعـبلها على شعرها .. تصوّرو واحد ماشي يخلّص في فاتورة الما .. ياخي بـْـدا على الموظفة متاع الكنتوار .. بعد اللي المرا جايّة للخدمه و شعرها عريان ... تِاللّاو منـّو المتّـاخذ .. ،
ولاّش لازمنا صحور متاع جنس ؟؟ يعني ، كيما ، بالنسبة للي يصيمو ، يلزمهم يتصحّرو باش ما يجوعوش يعني قبل ما تمشي للخدمة ، يلزمك تعمل تكويرة باهية :) باش ما تنقزش على زميلتك
باهي ...ـ
و كي المرا يلزمها تـتـغـطى بالشكل هذا باش ما تــشهّـــيــش عمّـــك الراجل .. ياخــي هــيّ ما تـشـتـْــهــــاش ؟؟؟؟ ما يثيرهاش وحيّد بوقوس .. بديّن .. قدّ مقدود :).. ذريّعات و زنود امـّـسـْـكـْـلين .. صديّـــرو مكبوس.. من تحت بودي :)... ثمه اللي تحب الشلاغم .. ثمّه اللي لا .. اللي تحب لحيه هايجه .. سوفاج ..ولخرى تحب زيرو خفيف .. اللي تحب صدر الراجل قازونـّـي ..و اللي لا .. الحاصيلو .. في بالي ما جبتش جديد كي نقول انّو كيما احنا معشر الرجال عندنا فانتازماتنا .. هوما زادا معشر النسا عندهم فانتازماتهم .. لكن السؤال هنا .. شبيها رغـبات المرا و شهاويها .ما تأدّ يـــش الى فــرض الحجــاب على الراجل في حضــور مرا غريبه عليه .. ؟؟؟؟؟
حاجتيـــــن : يا إمـّـــا المرا مجرّد موضوع للشهوه ، يعني تـشـَــهـّــي الراجل فقط ..امـّـا هيّ ما تشتهيش الراجل .. هاذاكه علاش يلزمها هيّ اللي تغطّي روحها باش هو ّ ما يشتهيهاش .. و هاذا غالط

أو أنـّــو.. اللي فرض الحجاب.. قرا بحساب شهوة الراجل في المرا و ما قراش بحساب شهوتها هيّ فيه .. و هاذي نظرة غالطة ، لانها احاديّـــة
ثمّاش حاجه ثالثه ؟؟؟ـ
هاني تذكّرت حاجه .. يقول القايل راهي ماهيـــش كان المرا بدنها عوره و يلزمها تغطّيـــه بكلّو ، راهو حتى الراجل عندو عورتو اللي يلزمو يغــطيها : واللي هيّ من تحت الـسـّــُـــرّه .. لركايبو ..ـ
ياخي اش بقى ؟؟؟
يعني الراجل ينجّم يمشي للخدمة في فوطه و ما عليهش حتى إثم ..خاصّة في المناطق السخونة .. و الا في الصيف .. و يتسمّى هاذاكه "الزي الصيفي للعمل" ـ
و هنا تصوّرو معايا بيرو فيه خمسه و الا ستّه رجال .. موظّــفين .. مـتـْـفـَــوّطــينْ ..اكاهو.. و معاهم بنيّه .. شابّه .. و نوّارها مفتّح جديـــد ....و بقطع النظر على اشكون ينجم ينقّز على اشكون هنا.. المشهد يظهرلي كاريكاتيري
و حاجة اخرى
ديمه في اطار علاقة الحجاب بالجنس
بالنسبة للمثليين الجنسيين ..اش نعملو معاهم ؟؟ خاصة و انها الظاهرة ماشية و تقرب للعاديه .. و ما عادتش مخــبّـيَه ياسر .. و زاده ، على ما نشوف ، يبدو انّو على كلّ مثلي واحد مـُـعـْـلـَـن ، ثمّه مجموعه مثليين متخبّين .. نعملوشي زادا حجاب خاص بالرجال اللي يخدمو معاهم مثـلـيّـين ؟؟ حماية ً :) لهم من التنقيز :).. و تفاديا لاثارة الغرائز:)...ـ
مّاله ، عالحساب هاذا ، يلزم الحجاب يتفرض حتى في البيت السخونه متاع حمام النسا ... على خاطر ثمّه ليزبيانات ينجّمو ينقّزو زادا ..ـ
نزيدو نفترضو هنا، بيرو في اداره، يخدمو فيه ثلاثة موظّفين .. مـْــرا و زوز مثـليـّـــين ..اشكون اللي يلزم يلبس حجاب لهنا ؟؟؟ هيّ ؟؟؟ و الا هوما ؟؟؟
هيّ ؟؟؟؟ ما ظاهرليش ، على خاطربكل بساطه ، حتى كي هيّ تـنحّي حوايجها الكل ، بدنها ما يعنيلهمش حتى شي .. اما تخاف لا هوما الزوز ينقـّزو على بعضهم ..ـ
دونك ، عليهم و على الحجاب ..مادامو احسن دوا ضد التــّــنـقـيـــز ..ـ

للرديّف ان تـفـخـــر بهــذا الطفــل/البــطـل

أين/ مـتى تـدرّبـت على هــــذا أيّــها البطـــل الـــصّـغيــر؟ ـ

فـــي غـــزّه ؟؟؟ ـ

أم ... فــي فقـــرك الـيـــومـيّ ؟؟ ـ

...

سِـيــــَـان

...

مادمــت "...الآن حرّ .. وحرّ ... و حرّ ..."ـ

شـارعــْــــنـا

سـْــتـنـّــيـتك في شارعـْــنا

لّي من مــُــدّه ضَـــيـّـعْــــنا

و الشّـارع ما عرفـنـيـش

ما سـمـعـنـيـش

ما رحـمـنـيـش

هـالشّــارع ولّى قـاســـــي

و حـْــكايـِــتــْــنــا نــَـاســِي

تـْـلاقـو العـشّـاق اللـّـي يـسـْـتــنّـــو... وانتِ ما جـيـتــيــــــش

******

و كـإنـّــي صْــغـــير.. وضــايع

مــدّيــتْ اِيــــدِي للــــشــّـارع

حــبـّـيـــــتْ نـْــغـنّــي عـْــلــيــه

و الا نبكــِـي .. بـيــنْ ايــدِيـــه

وْ رَعــْـــشــِـــتْ إِدَيّ

وْ لـَــمْــعـِتْ عـِــنـَــيّ

تـْـفـَـكّـرْت حْـكايه حْــزيــنه .. صارت .. بيني وبينك فيــــــه

تساؤلات قديمة/متجدّدة ، حول "الاغنية الملتزمة" ...ـ

المبادرة اللي قاموا بيها مجموعة من طلبة المعهد الاعلى للتنشيط الشبابي الثقافي ببير الباي ، و المتمثّلة في اختيار "الاغنية الملتزمة في تونس " كموضوع لرسالة التخرج متاعهم ، مبادرة رايعة ويستحقّو عليها تحية كبيرة .. و تستحق التنويه و الدعاية ليها .. خاصة امام ما نشهدوه من انحطاط على كافة الاصعدة .. و منها .. بل اهمها .. الانحطاط الثقافي و الفني .. و شخصيا تأثرتلها و تحمستلها و اثارت فيّ العديد من مشاعر النوستالجيا الخاصة .. لاني ، و انا في الجامعة ، كنت قريب من برشة مجموعات موسيقية ملتزمة ، و نشطنا في اطار مجموعة ما تمكنتش باش تستمر لعدة اسباب .. و منهم اللي مازالت تربطني بيه علاقات صداقة
و في السياق هاذا .. اخشى ما اخشاه .. انّو يقوم واحد.. افكارو لا تاريخية و ناقصة إضاءه .. رغم رداء الحداثة الملفوفه بيه .. هالرّداء اللي لوكان تنحّيهولو .. تلقاه مخبّي تحتو سيف مصدّد عـُمـْرو مئات السنين .. و داخل علينا ببرنامج اسمو : إقامة الحدود.. و يقول لهالمجموعة المتنوّرة من الطلبة : ملّا ديناصورات ... ( و ما نعرفش عاد اشكون الديناصور هنا ؟؟؟؟؟) ياخي مازال وقت اغنية ملتزمة هوّ ؟؟؟ ... تـِــالاغنية الملتزمة راهي مشات مع جدار برلين
قلت ، و هالمبادرة القيّمة ، ما اثارتش فيّ فقط مشاعر النوستالجيا بصفة خاصة .. لكن زادا خلتني نطرح برشة تساؤلات .. في الحقيقة فيها القديم و فيها الجديد .. حول مفهوم "الاغنية الملتزمة" .. و تاريخيتها .. و جدواها

ياخي اشبينا فيسع نسينا اللي ثمة قصايد و اغاني و مقطوعات موسيقية في التاريخ .. كانت سبب في اندلاع مظاهرات .. بل كانت سبب في اغتيال اصحابها .. و سجنهم و التنكيل بيهم ؟؟ـ
و من جهة اخرى ، هل ان الاغنية الملتزمة تعني بالضرورة الاغنية السياسية .. و هل ان الاغنية الملتزمة هي ضرورةً الاغنية "الورعة" ..."التقيّة" ... " السامية"... اللي ما تتغناش بالجسد مثلا .. ياخي الجسد ماهوش من المحرّمات ؟ و هاذاكا حدّو الجسد ما كلى على راسو في ثقافتنا ؟؟ و ياخي موش من اهمّ مهمّات هالاتجاه الموسيقي : النفاذ الى المحرمات .. ؟؟ـ
ياخي هل انو التحرر الاجتماعي و الوطني حاجة ، و التحرر النفسي/ الجسدي/ العاطفي حاجة اخرى معزولة ؟؟؟؟ـ
ياخي غناية جورج براسنز اللي يحكي فيها على مرا فقيرة متشرّدة ترضـّــعْ في ولدها الجيعان على الرصيف .. بينما عـون الامن يخزرلها لصدرها العريان بطريقة شهوانيّة .. غنايه كيف هكه وين تتصنّف ؟؟ـ
علاش ما تستفيدش الاغنية الملتزمة من ارقى ما وصلتلو الموسيقى العالمية من تقنيات التوزيع و الهرمنة و الكتابة المتقنة عموما ؟؟؟... و تخرج من سجن الشعارات اللي اتحطّت فيه .. بحيث في برشه اعمال يصعب التفريق مابين غناية ومابين بيان سياسي؟؟ـ
ياخي مش عندنا حاجة اسمها الاركستر السنفوني التونسي ؟؟؟ كل شهر و هو يكرّم في باخ .. و موزار.. و شتراوس .. و تشايكوفسكي ... طيّب .. هاذاكه تراث عالمي انساني ...عالعين و الرّاس .. لكن زادا من المفروض انو هالاركستر ينفتح على تجارب محلية محترمه و جدية .. و انا نعرف برشه موسيقيين موهوبين في مجال التوزيع و حتى التاليف الاركسترالي مع امتلاكهم لوعي ثقافي و سياسي متطوّر .. لكنهم ساكنين البيران و مدوّرين بيهم خمسة و الا ستّــه "مـُـريـدِيــن" .. و يمارسو في الاستمناء الثقافي في حالة تراجيديّه من الاحباط
هل انو التغنّي بالثورات ..و بنضالات الشعوب .. ينفي الجماليّة .. و التقنية الجيّــدة ؟؟ـ
علاش ديمة الاغنية الملتزمة يرافقها فقر تقني .. و تواضع في المجهود الموسيقي المبذول ؟؟ـ
علاش ما نواجهوش عنف و شراسة العولمة ( في واجهتها الثقافية بطبيعة الحال).. بعنف و شراسة موسيقية ؟؟ و هنا، العنف و الشراسة الموسيقية.. تاخذ معنى القوة التقنية .. القوة الاخراجية .. يعني قوّة الارضية المادية للاغنية.
صحيح انو البلاتفورم السياسي يدّخّل هنا .. ومن حقّ ايّ واحد يقلّي : توّا انت في شكون قاعد تسأل ؟؟ـ
في المبدعين المغمورين اللي ما تتحـلـّــلْهـمش البيبان الا اذا انتجو في اطار الاحتفالات بالسابع من ندراشنوّه ؟؟؟ـ
في المسؤولين على الثقافة في البلاد ، اللي من الغباء اننا ننتظرو منهم انهم يكونو استثناء على غيرهم من المسؤولين في الميادين الاخرى .. ؟؟ـ
في التجار و المستثمرين في الميدان الثقافي ؟؟ هاك اللي مسرحية والا غناية بالنسبه ليهم كيفها كيف قاجـّــوات البطاطة و الطماطم بالنسبة للخضّار .. ما تحيلك الاّ على سؤال واحد : قدّاش ربحي ؟؟؟ـ
في الفنانين التقليديين اللي كل ساعة تقوم عليهم مو ضة الحماس الحـنّـيّــَة .. و تسْـخف قلوبهم على الشعوب .. و يتحفونا بتخلويضة ما اثقلش من دمّها .. مرّة يطلقو عليها اوبيريت الحلم العربي .. و مرّه ، الضمير العربي .. و هي ما عندها حاااااااتى علاقة بالاوبيريت كقالب موسيقي/مسرحي
مثلا
علاش الوضع السياسي اللامستقر و اللاآمن في لبنان .. انتجلنا تجارب موسيقية ذات مستوى عالي جدا من المهارة التقنية مع المضامين الانسانية .. المستحدثة .. الطريفة .. كيما الرحابنة اللي بدوا بوليسية .. و اصبْحو مجدّدين .. و مرسيل خليفة ..اللي بدا بعود .. و اصبحْ مؤلّف سنفوني ... و غيرهم .. و غيرهم .. بينما هنا .. وين كيما يقولوها : بالامن و الامان :) يحيا هنا الانسان :) .. يتبارى المنشطين و المنشطات على اشكون تاخذ السبق انها تعــدّّي في حصّتها أخـْـــيبْ مزاودي

الأخــْـــطـَـــبـِــلـْــــسي caricature

ثرثرة الشـّـــين

شُـفـتـو عـْـشـِـيـّــتـْـهــا يـمـشي و شَايـِـشْ

شاورتــلـو، و نـْــشـِــدْ تـُــو: يا شـَـباب ، ويــن ماشــي ؟...ـ

شافـْـــلي

و ْ وشـْــوشـْــلي : " شششششـــتْ...ماشـي انـّــاشد"...ـ

تـنـاشــــدْ ؟؟؟؟ ... شـِـدّ فاك الـْـمـْـــــشـدّ

وشـكون ناشد علــيك ؟؟؟؟؟؟ـ

تـِ شــوف رْشــيدْ ولد الشّـــادلي

ناشدْ شـْــويْ ؟؟؟؟؟.ـ

موش ناشد .. ناشد .. ناشد

لـِــينْ شـَــدّ شـــاوش .. ؟ـ

و عْــشـيـّـةْ اللي ما مـْــشاشْ مـعاهــم

لحفلة تــدشـيـن مـَــشْــيـخــةْ دَشــْــرَه من الـدّشـُـــرْ

ماهم شـدّوه .. و دشـّــشـُـــوهْ دْ شـِـيــشـَـهْ

من اجل ان تـتّـسع خيمة الرديـّف لكل المحرومين

بكلنا مطالبين باش نساندواهالينا في الرديف و المعتمديات المجاورة ليها ..في وقفتهم الصامدة ضد سياسة الكيل بمكيالين في التشغيل و في انتفاضتهم ضد سياسة التجويع و الحرمان و التوزيع اللاعادل و "الجهوي" للثروات .. و في حركتهم الاحتجاجية ضد اللامبالاة اللي قوبلت بيها مطالبهم المشروعة و اللي من اهمها و أقدسها : حق الشغل .. مع اننا ضد تكميم الافواه والمغالطة الاعلامية و حملات الاعتقال اللي طالت العديد من المساهمين في هالتحرك الشجاع و العظيم .. و خاصة الجريء .. لانو موش امر هيّن ياقع تحرك كيما هاذا .. و بالتواصلية هاذي .. و بالالتفاف الشعبي هاذا .. في وقت وقع فيه تلجيم و تدجين كل المنابر و المجالات اللي كانت تتنفس.. و تتمتع و لو بقدر ضئيل من حرية التعبير..فرضاتو فرضان بعد باااارشه تضحيات ومعارك ..
قلت انو هالاعتقالات شملت العديد من الناس .. سواء كانو مناضلين و كوادر نقابية محترمه .. والا حتى مواطنين "لا متسيسين" .. كل ذنبهم انهم قالو ياخي شبيها بلادنا غنيّة بالثروات ، و الفاقونات العام اثناش ن شهر وهيّ تحمّل في فسفاطنا و مشتقاتو .. و الاربعة و عشرين ساعة و نحنا نربشو في المناجم .. و فنينا اعمارنا فيها .. كيما فنوا اعمارهم الذين من قبلنا .. و الذين من بعدنا .. و بالرغم من هاذاكا نحن جواعى و بطالة .. و اولادنا ماكلتهم القهاوي و البيران و يزطلو تحت الحيوط .. من الفراغ و غموض الافاق و انسدادها
يمكن ذنبهم انهم المرّه هاذي قالو هالكلام بصوت مرتفع شويّة .. بالرجال .. بالنّسا .. النسا اللي تحت تاثير الفقر و التجويع ..ماعادتش اصواتهم عورة ..و بلهجة حادة و حاسمة و حازمة .. ماعادش توشويش.. الجوع راهو ما يحبّسو شي..و هاذاكا علاش تصدّعت برشة آذان ..هاك الآذان اللي- اللهم عافينا- ولّت كيما كلاب بافلوف .. معدّله سمعها على معجم واحد : معجم المناشدة و مشتقاتها
..و ما خالف المعجم هاذاكه ، نجنـّـدولو ما استطعنا من ترسانتنا "الامنية" ..اللي تحسدنا عليها الامم الاخرى
الكلام هذا بصراحة رغم اهميتوفي اضاءة هالتحرّك الباسل .. الا انو يبدولي متأخّر شوي على النسق اللي عرفاتو الاحداث اخيرا ..هاذاكه علاش نحب نتوجّه بدعوة لكافة المدوّنين الشرفاء.. انّهم..بالاضافة الى تكثيف التدوين في هالموضوع .. يكونو عمليين من مواقعهم .. و من مؤسساتهم اللي يشتغلو فيها .. و الا يدرسو فيها ..عايلاتهم .. اصدقاءهم .. جيرانهم ..عمليين بمعنى القاء المزيد من الضوء على هالاحداث بجبدانها و الحديث فيها ..و الخوض في اسبابها و نتائجها .. على خاطر كيما ثمّه اللي مواكبها و قريب منها مليح.. ثمّه زادا اللي عندو عليها مجرد معلومات غامضة بفضل صخافتنا البودورو.. و ثمّه زادا اللي ما في بالوش جمله
و زادا .. حاجه اخرى نشوفها هامه .. اللي قريب من ايّ فرع من فروع أي منظمة انسانية و الا هيكل نقابي.. يحاول يعدّي المعلومه .. و يحثّ على تطوير اشكال المساندة .. باش تخرج الحركة من حالة العزلة و المحاصرة اللي صاحبتها منذ اندلاعها

دير ياسين .. في الذاكرة

اتفق اغلب المؤرخين على ان مذبحة دير ياسين وقعت في الليلة الفاصلة بين التاسع و العاشر من افريل لسنة 1948

تقع قرية دير ياسين غربي القدس ، وقد قامت على انقاضها اليوم مستوطنة جفعات شاؤول
يقول الشهود ان عصابات شتيرن ،هاغاناه ،اتسل الصهيونية ... بقيادة كل من ديفيد بن غوريون.. مناحم بيغن ..اسحاق شامير وغيرهم من الشباب المتحمس وقتها .. والطامح الى "استعادة ارض الميعاد" .. قامت بمداهمة القرية .. تدمير البيوت و حرقها على سكانها .. وتجميع الاهالي و رميهم بنيران الرشاشات و الهاون بكل برودة دم

اما عن حصيلة المجزرة .. فيذكر ان المجرمين نجحوا في اخفاء العديد من الجثث و الاشلاء ..بالتخلص منها و اتلافها بعدة طرق .. بحرقها.. او برميها في الاودية و الآبار.. و رغم ذالك ، يُـتـّـفق على ان الضحايا لا يقل عددهم على الـثلاثمائة و ستين شهيدا .. كان معظمهم من الشيوخ و الاطفال و النساء..فضلا عن الجرحى و الذين هاجروا الى قرى مجاورة او شُــرِّدوا تماما.. و هوالسيناريو المعتاد على إثر كل مجزرة جماعية

بطاقة "إمتعاض" ... من شباب "مغتاظ"...ـ

Amsterdam : Jacques BREL

boomp3.com

Dans le port d'Amsterdam

Y a des marins qui chantent

Les rêves qui les hantent

Au large d'Amsterdam

Dans le port d'Amsterdam

Y a des marins qui dorment

Comme des oriflammes

Le long des berges mornes

Dans le port d'Amsterdam

Y a des marins qui meurent

Pleins de bière et de drames

Aux premières lueurs

Mais dans le port d'Amsterdam

Y a des marins qui naissent

Dans la chaleur épaisse

Des langueurs océanes

Dans le port d'Amsterdam

Y a des marins qui mangent

Sur des nappes trop blanches

Des poissons ruisselants

Ils vous montrent des dents

A croquer la fortune

A décroisser la lune

A bouffer des haubans

Et ça sent la morue

Jusque dans le cœur des frites

Que leurs grosses mains invitent

A revenir en plus

Puis se lèvent en riant

Dans un bruit de tempête

Referment leur braguette

Et sortent en rotant

Dans le port d'Amsterdam

Y a des marins qui dansent

En se frottant la panse

Sur la panse des femmes

Et ils tournent et ils dansent

Comme des soleils crachés

Dans le son déchiré

D'un accordéon rance

Ils se tordent le cou

Pour mieux s'entendre rire

Jusqu'à ce que tout à coup

L'accordéon expire

Alors le geste grave

Alors le regard fier

Ils ramènent leur batave

Jusqu'en pleine lumière

Dans le port d'Amsterdam

Y a des marins qui boivent

Et qui boivent et reboivent

Et qui reboivent encore

Ils boivent à la santé

Des putains d'Amsterdam

De Hambourg ou d'ailleurs

Enfin ils boivent aux dames

Qui leur donnent leur joli corps

Qui leur donnent leur vertu

Pour une pièce en or

Et quand ils ont bien bu

Se plantent le nez au ciel

Se mouchent dans les étoiles

Et ils pissent comme je pleure

Sur les femmes infidèles

Dans le port d'Amsterdam

Dans le port d'Amsterdam.

سؤال عابر

عندي سؤال بسيط
ياخي المدونة التونسية زادا فيها التسنسير ؟؟؟؟ على خاطر التدوينة هاذي (هنا) اختفت من القايمة ...

caricature بوكشطة يسـَــبـّــح...

la chanson abandonnée ...!

boomp3.com