samedi 31 mai 2008

عـُـمـّال بلا مناجم .. لمناجم بلا عُـمـّــال!!!!ـ

في الحقيقه، الملامح العامة متاع التدوينه هاذي عندها مديده مهرّجتلي مخّي .. و هي تتلخص اساسا في السؤال هاذا : اللي وقع و ياقع في الرديف و غيرها من منطقة الحوض المنجمي ..اش نّجّمو نسمـّـوه ؟؟ انتفاضة شعبية متاع فقراء و بطّاله .. وصل الامر بواحد منهم انّو، كي ما نجّمش يعيش عزيز .. مات كريم .. امّا المرة هاذي موش "بين طعن القنا و خفق البنود" ..كيما اشترطها المتنبي .. و انما.. بين تصرقيعة متاع ندرا قداش من الف فولت.. و شماتة رئيس ... الشعبة ؟؟ـ
والا هي هَـبـّـه جهويّه قبليه متاع شويّه قفاصه .. ما لقو ما يعملو .. قالو هيّا نكرهو المـْــلل الاخرى ؟؟؟ـ
انا من الناس اللي يكرهو المبالغه .. وتحميل الامور أكثر ملّي تتحمّـلو .. و زادا من الناس اللي يكرهوالتسفيه المجاني والتحقير اللامسؤول من قضايا مصيريّة

من خلال حديثي مع برشة اصدقاء.. في الدنيا و في الآخره (الآخرة نقصد بيها العالم الافتراضي :) ...)..ومن خلال بعض الهـْـرَجْ و الخزعبلات اللي وقعت اخيرا حول المقارنة بين ستاراكاديمي و نجمها .. و بين تبديت و قتيلها ... لا نحب نقول شهيدها .. اينعم .. شهيدها

هالمقارنه ما عملتهاش .. مابعد الشي على بعضو .. اما حبيت نزيد نبيّن لاوطنية و لا شفافيّة اجهزة الاعلام الرسمي ..من خلال تــكريزة وقعـتــلي في الخدمه .. بحيث زملائي في العمل بالغو في الاهتمام بالموضوع هاذاكه..و في اعتبار انّو التصويت لنادر واجب وطني .. مما اثارني الحقيقه .. و خطبت عليهم خطبه عصماء .. :) و عطيتهم المثال متاع هشام ..و قضيتو .. و اهلو .. كشاب .. تونسي .. زادا..و هو نموذج لشريحة كاملة شبيهه بيه ..لا اكثر لا أقل..اما التعتيم اللي وقع عليه .. خلانا ما نجموش نخرجو من البوتقه اللي حطّنا فيها ..ـ
قلت، من خلال هاذا الكل .. استنتجت انّو كيما ثمه اللي تحمّس برشه .. لدرجة انّو اقترح على المدونين القيام بإضراب .. و مهما كانت ردة الفعل هاذي انفعالية .. فهي محترمه
و ثمه اشكون اكتفى بتلقي المعلومات و التعليق عليها .. و ما حـْـبَـسْـشْ غادي
و ثمّه .. يا سيدي يا بن سيدي .. اللي قالك انا خاطيني .. الشي هاذا ماعندناش في سِــبْـرْنا .. يا وخي .. و هوما علاش يوصلو يجوعو .. حتّى يخرجو للشارع و يصيحو: رانا جواعى ؟؟؟ انا مدوّنتي سـِلـْـمـِـيـّــِـــه..و ما بْحب إسـْــمَــعْ هالحَــكِــي.. و مـَـافـِـينـِــي إتـْــحـَــمّـَـالْ هالــمـَـشــِــيـهـِـد تـَبـَعْ العـِــنـِـفْ
و ثمه شكون عطى جرد تاريخي هام للمنطقه هاذيكه .. و زادا اللي خذا وقتو و فكر و كتب من منطلق رزين و حاول يبعد على الاندفاعات العاطفية اللي تحجب الحقائق في اغلب الاحيان ..و شاف للمسالة من زوايا متعددة
من بين الانتقادات اللي توجّهت للحركه الاحتجاجية هي:مضمونها الجهوي .. و ثمّه اشكون سمّاها عروشية و قبلية ..هو راهو ثمه فرق .. الجهويّة متفقين فيها مربوطه بحدود الولايات .. و مرّات تولّي مربوطة بالـ:أنديكاتيف متاع التاليفونات الفيكس :) ـ
و العروشية راهي حاجه اخرى
ينجمو يكونو زوز في ولايه وحده .. انديكاتيف تيليفونيك واحد :) معتمديّة وحده .. حومه وحده .. و هوما بيناتهم عداوه عروشية .. و كل حدّ يورّث فيه لولدو ..
و تبقى هالنعرة العروشية .. و هالعصبية ..نوع من انواع الشوفينيزم .. كشعور جماعي ضيّق ، بالاشتراك مع أخرين في الانتماء الى لقب واحد .. او الى جد واحد .. او الى قـَــبر واحد.. يمكن يكون مدفون تحتو حـلـّوف

اما احيانا .... حبينا و الا كرهنا .. هالنعرة هاذي تساهم في إذكاء التحركات .. و تساهم، في بعض البلايص، في تحديد التحالفات و الاتتخابات .. سواء في الشعبه و الا حتى في النقابة ...و باش ما نبعدوش .. و نبقوا في انتفاضة الحوض المنجمي ..نّجّمو نقولو، و حسب المعلومات اللي عندي ، اللي العروشية كان عندها دور على زوز مستويات

لولاني ، باعتبارها كانت نوعا ما "حافز" .. و كانت عنصر تحريك معنوي و نفساني .. لاثارة منافسة الاهالي لبعضهم .. من نوع (على سبيل المثال) : ياخي شبيهم كان اولاد بويحيى يخرجوا في المظاهرات .. وينهم اولاد عبيد ؟ارجو اني ما نتفهمش هنا نشجّع على تغذية هالمشاعر المتخلفة .. بل انا بصدد الحديث على اش وقع؟؟ـ

المستوى الثاني اللي دخلت فيه "النعرة العروشية " كان من الطرف المقابل ..حيث تم الالتجاء للـرّوس(موش اللي من روسيا:)...)نقصدالـرّؤّوس الكبيرة متاع اولاد سيدي فلان و اولاد بو فلتان ... باش يستعملو سلطتهم الادبية و المعنويّة .. المقدّسه احيانا .. و المعتمدة على قوة الفلوس احيانا اخرى .. لإسكات اصوات هالـ : "اقليـّة المشاغبة" .. هالياجوج و ماجوج اللي ندرى منين خرجو

و بالتالي ،اللي وقع ماهوش مجرّد هبّة متاع تفرقة جهويّة .. و باش زادا نكونو موضوعيين .. الناحية هاذي حتى حد ما ينفيها من دوافع و عوامل هالتحرك .. و حتى كان توجدت ، ماهيش من فراغ .. لكن نتصوّر انها ثانويّة جدا .. امام الاسباب الموضوعية الكبيرة

ياخي النسا الكبار اللي شفناهم في الفيديوات .. اش خرّجهم من ديارهم. . من كوجيناتهم ؟؟؟ و الحال انّو المجتمع الجنوبي متسمّي على المحافظة .. زعمه هكاكه .. نفحتلهم باش يتقابلو و يعملو عشويّه يعبّرو فيها على كرههم الجهوي للسواحلية .. مثلا ..؟؟ و الا للجنادبة و الا للقراوى ؟؟؟

و الا على خاطر فدّو من المماطلات و من الكلام اللي ماعادش تردد فيه السلطة فقط .. بل غير السلطة مما يسمّى الـ:"اصوات المعتدلة" ... "الواقعية" ... "الرصينه" من نوع : هاو ما عندناش موارد طبيعية كبيرة .. ما عندنا ما نعملولكم .. و راهو ماهوش" كـُن فـَـيَـكون"... ..رغم انّو هالـ: "كـُـنْ" هاذا ... في مناسبات و سياقات اخرى ، "يـَـكـُــون" ... و "يـَـكـُون" في رمشة عين زادا .. و مانيش انا اللي باش نخمم في حلول للدولة .. ايّ دوله كانت ، باش تخرج من ازمتها .. تـِـغير نلقى حلول ليّ..و نتصور اللي الدولة اللي تمارس في الغطرسه و الاستبداد و تتشدق باحترام القوانين .. موش من حقّها تطالب مواطنيها بالسلوك الحضاري ..لا هيّ و لا اصحاب الحلم الليبيرالي الوردي
يقول القايل .. مايعقلش نعملو معمل يصنع في منتوجات معدّه للتصدير في بلاد ما فيهاش برط ..منطقي جدا .. لكن لو جات موجوده "نيّة"... و "ارادة" التوازن الجهوي و توفير حظوظ العمل للجميع .. خلي نقولو للأغلبية .. راهو وقع تركيز المعامل اللي ما يستحقوش برط .. في الولايات و البلايص اللي ما فيهاش برط ..يعني مثلا معمل متاع شلايك .. عفانا و عفاكم الله .. و بناطف .. :) .. اش تعمل في البلدان البُــْرطيـّه .. في حين انّو الشلايك متاعنا ما هيش معدّه للتصدير .. على خاطر هي من اخيب انواع الشلايك في العالم .. و على خاطر احسنلنا نحافظو على شلايكنا عندنا ... و هاذا كان ينجم ياقع بالعديد من الاساليب .. منها الضغط على "اصحاب رؤوس الاموال"او "بتشجيعهم" ...كل ما تبعد اكثر بمعملك .. كل ما تنقص عليك الاداءات .. مثلا .. ما نعرفش انا .. المهم يسيّلولهم ريقتهم بشويّة إغراءات كيف هكّه .. و مادامي بلادنا.. مساحتها صغيرة .. و اللي يسافر من بنزرت لبن قردان.. ما يتسمّاش سافر و ما يتسمّاش تغرّب.. زادا التسويق الداخلي و التوزيع المحلي ما يطّلبوش كلفة نقل مرتفعه

مواردنا الطبيعية محدوده .. أوكي .. امّا زادا ما عندناش ازمات ديموغرافية .. من تضخم و انفجار و تخلويض في التوزيع .. ما عندناش كوارث طبيعية دورية .. كيما برشه بلدان في العالم .. هاك اللي حَـرث عَام كامل ياكلهولهم ..موش زاوش و انـّما زلزال والا فيضان و الا بركان
و كي نثبتو شويّ.. نلقو اللي المصروف موجود .. ياخي واحد نهار الكل شادّ زلاط على عايلتو .. ما يسمعو منو كان : ماعنديش .. ما ثمّاش .. منين .. هاذاكا اللي موجود .. و نهار عيد ميلادو المبارك .. يصرف ما يشريلو كل يوم زوز كيلو علّوش ؟؟؟ .. ولاش من حق هالعايله المتـّــاخذه باش تقول : ماخفي كان اعظم

و للحديث بقيّه ..ـ

7 commentaires:

Anonyme a dit…

الموضوع هذا بالذات يوري المحدودية متاع تدخل المجال التدويني التونسي وقت اللي يجد الجد و تحك الركب ببعضها. إذا ما نتجاوزو الإنطباعيو و الاندفاع الحماسي أو الوجداني يصعب على الواحد أنو يتعرض للموضوع ببرشة هدوء و رياض و ياخذ وقتو في التحليل و يشارك الناس في النقاش. يصعب لأنه الفراية ولاّت من نوع الفاست ريدينق كيف تتطوال الكتيبة و تحاول باش تلم بجوانب متعددة من أي موضوع يوللي الواحد "يقلق" شوية و يطوللها و عامل فيها طز حكمة و ما يلقاش مجال للنقاش و تبادل وجهات الرأي و التحليل و النظر. أنحبوها كيق صلاة الجنازة قرض كفاية و قصيرة... الموصوع من أهم المواضيع المطروحة على النخب التونسية لأنه بختزل معضلة التنمية و المشروع التحديثي متاع نخب الاستقلال و لوين ناويين يوصلو بينا و بالأجيال الجاية و حبيت أته يكون هالموضوع محور لقاء مدونين يحب يقول ميتاب صندي موش قهاوي و دقان حنك ناخذو فيه وقتنما و نسجلو حديث بعصنا و تخرج منه تدوينات متعددة الأراء و المقاربات و كان لزم أنو نعملو رحلة جماعية للجيهة علاش لا... وقتها نتحولو من الموضوع من فرض الكفاية لفرض العين و يوللي المقتنع بأهميته يتقدم فيه بالصحيح موش بالماخذة بالخاظر و عندكش عندي. والحق ما نخبيش ما حسيت بيه من خيبة أمل من انعدام التبادل و النقاش على الأجزاء الثلاثة حول الحوض المنجمي و ما نعتبرش روحي جبت الصيد من وذنو ياما مقاربة انجمو نتناقشو فيها، الواحد يلقى روحو في باب لآشكون تقرى في زبورك يا داود. و تبقى الدعوة متاعي للقاء تدويني حول المشروع التنموي الحداثي التونسي و الخوض المنجمي كمثال تحليلي قايمة نوفرولها ضروف الالتئام و الوجود و النجاح. مع المعذرة على الإطالة.

Anonyme a dit…

يا ميادين كنت موضوعي و عقلاني في تقييمك لكن ثمّة حاجة تأسّفت عليها برشو انو بعض المدونين انخرطو في اتجاه نقدي موجّه لأحداث الحوض المنجمي معناها النقد الي يحبّوه جماعة مجالس الصحوات كيما سمّيهم قبل في تدوينتي romdhane.maktoobblog.comو هوما(يوميات مواطن) الخلايا الحزبية الي تركيبتها عروشية و استعملو سياسة فرّق تسد لكن الناس كانت فايقة بيهم
أنا كنت نستنى في نقد بنّاء لأحداث الحوض المنجمي نقد للأساليب النضالية الي استعملوها و كيفاش كانت تنجم تكون أكثر تأثير كنت نستنى في نقد يخلي الحركة هذي تخرج من اطارها الجغرافي المحلي و الجهوي الى اطار وطني لأنو تونس بكلها حوض منجمي بما فيها من بطالة و رشوة و تهميش و اقصاءو تلوّث و اثراء غير مشروع صحيح المواطنين الي في الرديف و الحوض المنجمي لكل عملو الي عليهم النقد هذا يلزم يتوجه للواقفين على الربوة بكلنا آش قدّمنا للحركة هذي قاعين انبرو في القهاوي و المدونات فيناش شكون حضر ليوم تضامني مع الحوض المنجمي فيناش شكون حاول يوثّق الحركة في المدونة متاعو و المصادر موجودة في الشبكة العنكبوتية
أنا نعتبر نقطة القوّة في الحركة هذي تجاوزها للتصنيفات القبلية و العروشية و توحّدها في أهداف مشتركة و وعيها بالمؤامرات و محاولات الالتفاف المتعددة و التضامن الكبير بين كل المواطنين و لأول مرّة تكسر هيبة النظام و يعجز أمام صمود قرية صغيرة لمدّة أربعة أشهر و بعد كل المدّة الناس الي يأطروا في الحركة يعتبرو انها حققت برشة من أهدافها و هذا درس لينا الكل
romdhane

Big Trap Boy a dit…

يمكن تعليقي يفاجئك لكن أنا موافقك في كلّ ما قلتو
:)
الحلّ الليبرالي إلّي عطيتو راهو يتعلّق بالتصرّف في شركة الفسفاط موش معناها الدولة ما لازمهاش تتدخّل باش تشجع الإستثمار في الجهة

Legend Of The Fall a dit…

والله ماذا بيّا انقابلك في أقرب وقت ممكن و على انفراد
اكتبلي على
magazine.diana@yahoo.co.uk

brastos a dit…

يا خرا فة الخريف
آسف
انا ما نقاسمكش الرغبة هاذي

Legend Of The Fall a dit…

توّة شفت روحك كيفاش ما تحبّش ثقافة الحوار؟ ما نقصدش لنّا الحوار مع الشباب، و لكن نقصد ثقافة الحوار إنّو نتحاورو باش انشوفو اشنوة اللي ماشي و اشنوة اللي مش ماشي. هكّكا انجمو انصلحوا حاجات. خسارة. تصوّرتك متفتح أكثر

brastos a dit…

اهلا بيغ

نتصوّر انّو اهم ناحية في اي حلول نقترحوها و مهما كانت منطلقاتنا .. هي اولوية العنصر البشري على جانب الربح

...
تعليقك فاجأني .. صحيح ..
اما شويّ مش برشه
:)