عمار ... و الظلال الصينية ...2...(الحــلّ)ـ

ما نطوّلش عليكم ، هاذا حلّ سؤال التدوينه السابقة

عندما يصبح المقص نافذتنا الوحيدة ، نظاراتنا الوحيدة ، اسلوبنا الوحيد في التعامل مع الآخر

يتحوّل بلد الفرح الدّائم الى غابة

و يتحوّل صاحب النظارات/المقص

القابع بكل جبن خلف الستار

الى حيوان

عمّار ... و الظلال الصينية

l'ombre chinoise

او' مسرح الظلال' من اجمل و أقدم و أعرق الفنون ، خاصة في ميدان فن العرائس و غيرها من اساليب التنشيط المسرحي للاطفال

و اللي يتمثّل في اعتماد الشكل اللي يعطيه انعكاس تشبيك الايادي و الاصابع بطريقة معينه على ستار ابيض ، مع اضاءة بيضاء خلف ذلك الستار ، قصد الحصول على اشكال اخرى .. حيوانات .. شخصيات غريبه .. ذات احجام و اشكال مضحكة ، الخ ... كيما تنجّمو تشوفو في الصورة هاذي

و هاذي

حبيت اليوم ، و مانيش باش نخرج على موضوع الحجب ، نقترح عليكم ظلّ اسود ، و لكم ان تتخيّلوا الشكل الحقيقي اللي يقبع وراء الستار

الظلّ هو هاذا

لينا .. إلى إطلالـــــة أخــرى

تحية كبيرة للمدونه لينا بن مهني ، اللي اكّدت انّها بنيّة تونسية بالحق ّ في برشه مناسبات ، و خاصّة المدّة الاخيرة ، وقت اللي كانت سباقة في التعريف بقضية الطلبة المسجونين ، من متابعة يومية ، لنشر حوارات معاهم ، و مع محامييهم ، الى المساهنة في بعث مدونه مختصّة في كل ما يتكتب حول القضية هاذيكه

و تحية كذلك لمقص عمار ، اللي كلّ يوم يزيد يأكّد انّو مقصّ حافي ، و حافي برشه زاده ، على خاطر موش معقول باش مقصّ 'ماضي' يكون خوّاف لهالدّرجة هاذي ، و مناش ؟ من مجرّد مدوّنه

لينا .. نحن في انتظار إطلالة أخرى

حجب آخر .. تخلّف أخر .. تقهقر أخر .. على درب الحداثة والرقيّ

يتواصل المسلسل المقرف و المتخلّف و الماسط متاع حجب المدونات على اساس آلأراء السياسية المختلفة متاع اصحابها
تقريبا في ظرف شهر من زمان ، انا شخصيا شهدت حجب خمسة مدونات جاكييز (إثر نشرو لرسالة سهام بن سدرين) سفيان الشورابي ، ارابيكا ، منجي الخضراوي إثر نشرو لأحد مقالات الراحل محمد قلبي

و توّة مازلت كي اكتشفت حجب مدونة "افكار ليلية"ـ

بكل ما يعني ذلك من استغباء و استبلاه للناس ، و كانّ مجرّد حجب مدوّنه كافي لاسكات صوت صاحبها ، و الا إثناؤو على التفكير بطريقتو هاذيكه ، و الا ، و حتى على مستوى تقني ، كافي لمنع الناس من الدخول ليها

نحبّ بالمناسبة نتوجّه بسؤال (للاسف لا فائدة ترجى من الاجابة عليه ) سؤال لمحترفي الكذب على الذّقون ، و اللي بكلّ برود (فريجيديتي)إزاء ما يحدث للمدونات الجادة و المختلفة ، ما يخجلوش من انّهم يتشدّقو علينا بالدروس في الديمقراطية

هنيئا لكم تبوّؤكم مكانة ريادية في هذا المجال : مجال إلجام و تكميم الافواه على درب الحداثة ... و الرّقي

لا ... لسجن الطلبة

في تواصل مع التدوينه هاذي
حبيت نقول كليمتين بالقدر اللي تسمح بيه المعلومات اللي عندي
في الحقيقه رغم شحّ المعلومات عن الحركة الاحتجاجية اللي قاموا بيها طلبة كلية الآداب بمنوبه ،على خلفية المطالبة بحق زميلاتهم في التمتع بالمبيت الجامعي ، و اللي اسفرت على الحكم بالسجن على عدد من الطلبة .. قلت رغم شحّ المعلومات حول الموضوع هاذا ، فإنّو حتى شي ما يبرّر سجن ابناءنا الطّلبه
نتوجّه بدعوة للمدونين الطلبة انّهم يفيدونا بأكثر معلومات على القضية هاذي

مغالطات تاريخية و لخبطة مفهومية

استنادا الى اسطورة/رواية محاكمة سقراط ، كواحدة من اهم المحاكمات التاريخية للفكر المختلف ، فانّ تطابق الاهداف بين الكاهن و الجلاد ، يحتّم على واحد منهم ، في لحظة ما ، الانسحاب ، لتمكين الاخر من العمل على تحقيق نفس النتيجة : محاكمة و من ثمّ اعدام صاحب التفكير المختلف ، فقط باسلوب آخر
يعني ، التطابق بين (الجلاد) : مقصّ عمار ، و بين (الكاهن) : الاصوات اللي تبرّر المقصّ و تشرعنلو و تنظّرلو، و اقلّها ما تبديش حتى نزر قليل من الاحتجاج عليه ، بديهي انّو (هالتطابق في الهدف) ما ينسّيناش انّهم حاجة وحدة ، رغم الابتسامات العريضة السمجة اللي تعلو احيانا محيّا الكاهن (مقابل العبوس الاعتيادي للجلاد) ، ابتسامات تكشف عن انياب ما تقلّش لمعان عن لمعان المقصّ / اداة الجلاد

من المحاكمات التاريخية ، الى المغالطات التاريخية و اللخبطة المفاهيمية اللي وردت في التدوينه هاذي ، و اللي من الضروري تفكيكها.ـ
ابرز تمظهرات هالمغالطات و هاللخبطة تتلخّص حسب نظري في علاقة "الحزب الاشتراكي الدستوري" التاريخية بالتيار الاشتراكي العالمي
ثمّ موقع سليلو "التجمع" من بعض الاحداث اللي شهدتها البلاد في فترات تاريخية محدده.ـ

اوّل جملة اثارت استغرابي في التدوينه هي انّو : "الحزب الاشتراكي الدستوري تبنـّى الاشتراكية و الشيوعية" وقت اللي يقول في التدوينه
Le PSD a été socialiste (et même communiste à un moment)
يبدو لي من الضروري هنا نرجعو من جديد نقراو الابجديات و الادبيات الكلاسيكية متاع مفهوم الاقتصاد الاشتراكي و نحتكمولها باش نقيسو مدى اشتراكيّة الحزب الاشتراكي الدستوري
الاشتراكية ، و بعيدا على الشعاراتية العاطفية و على الديماغوجيا و البروباغندة السياسية ، هي أساسا مصطلح ذو دلالات اقتصادية . موش هكّه ؟ قد يحدث اننا نـُـوجدو تمظهرات للمفهوم هاذا ، حتى في مستوياتو التطبيقية في مراحل قديمه من التاريخ ، لكن في اعتقادي نتصوّر اللي مفهوم الاشتراكية خذا هيكلو و تشكّلو العام إبّان الثورة الصناعية كردّ فعل حتمي و تاريخي على سيطرة النظام الراسمالي
ياخي فمّة مفهوم آخر للاشتراكية سوى انّها نمط اقتصادي يقوم على الملكية الجماعية لوسائل الانتاج و هيمنة الدولة الاشتراكية على مصادر الثروة من اجل الحدّ من التمايز الطبقي ؟ هاذي بالطبيعة الملامح العامة متاع مفهوم الاشتراكية تبقى التدقيقات و التحديدات اللي تخصّ كيفية و شروط ارساء النظام هاذا موضوع نقاشات و اختلافات كبيرة و جوهرية احيانا
يعني هنا هالرّداء متاع "الاشتراكية" اللي لبسو "حزب الدستور" في بداية الستينات ما كانش يعني انّو ذو برنامج اقتصادي اشتراكي تحديدا ، بل كان في اطار مغازلات للحزب الاشتراكي الفرنسي ، و هاذا جانب آخر من الحديث. ـ
و من هنا يولّي غريب برشه انّو صاحب التدوينه في نفس الوقت يتباهى بانتماء "الحزب الاشتراكي الدستوري" ، حتى في مرحلة معينة من مسيرتو ، للـ"إشتراكية" بل ... اكثر من ذلك .. و يا للهول .. لـلــ"شيوعية"ـ

Une fois l’indépendance acquise en 1956, le Néo-Destour deviendra le Parti Socialiste Destourien (PSD ; Destour = Constitutionnel) et officialise sont appartenance à l’international socialiste.

و من بعد يستنكر على "حركة التجديد" ذات العلاقة القريبة بالـ"حزب الشيوعي التونسي " تضامنها و دعمها لكوبا و لكوريا الشمالية .. و اللي هو شي متماهي مع الحركة باعتبار البعد الاممي لاي حركة" شيوعية" كيما ورد في تعليقو هنا على تدوينة ماني الافريقي

contrairement aux idéaux d’Ettajdid qui appelle à soutenir Cuba et la Corée du Nord dans le programme de Brahim... ils sont dans l’air du temps quoi !!!).

و من هنا نجي للمغالطة الاخرى ، و هي ادّعاء صاحب التدوينه انتماء الحزب الاشتراكي الدستوري للشيوعية في وقت من الاوقات او تبنّيه لادبياتها و لبرنامجها
كيف كيف ، هنا يلزمنا نرجعو نحدّدو مفهوم "الشيوعية" من ادقّ مفاهيمها من داخل المنظومة الماركسية ، بما انّها تجسيد لبرنامج : "من كلّ حسب طاقته لكلّ حسب حاجته" الى اكثر مفاهيمها المشوّهة و هو : "الشيوعية هي الكفر و الاحاد ... و كفى" . باش ما نلقاوش حتّى ذرّه علاقة بين المفهومين هاذومه و ما بينهما ، وبين ادبيات و برامج "الحزب الاشتراكي الدستوري" مما يأدّي بينا لحاله عقيمه من الخلط المفاهيمي
يدلّل صاحب التدوينه على اشتراكية "الحزب الاشتراكي الدستوري" بانتماؤو " للاممية الاشتراكية الثانية" ، و لو نزيدو نتعمّقو اكثر في الحيثيات التاريخية /السياسية لمسألة الامميّات الاشتراكية الاربع ، تو نستنتجو انّو ما فمّاش إجماع حولهم ، مثلا من اكثر الامميات الاشتراكية المثيرة للجدل و السّخرية .. بل للتندّر داخل العائلة اليسارية الراديكالية ، هي الاممية الثانية ، (و اللي يفتخر صاحب التدوينه بانخراط "الحزب الاشتراكي الدستوري" فيها ) اللي اهمّ ما يميّز الموقف السلبي منها هو الموقف من الاتحاد السوفييتي ، ... الاتحاد السوفييتي ،" الاب" اللي" وفاتو" تشرّع و تبرّر التنكيل بالــ "يتامى" اللي خلاهم .. كيما باش نبيّن لوطه شويّة
يعني جملة كيما هاذي

Lui-même n’est pas monolithique et continue d’avoir plusieurs courants qui le tirent tantôt vers la droite, tantôt vers la gauche ,vers le peuple, vers la bourgeoisie

نتصوّر انّو رغم حالة الهلاميّة المفهومية اللي تطبع جملة كيف هاذي ، الا انّها غاية في الوفاء للتوجّه العام اللي يميّز التجمّع اللي اهم ما يميّز ممارستو هو سحب البساط من الجميع من اجل الانفراد بكل شيء .ـ
بمعنى آخر ، بعض الشعارات السياسوية اللي تعالج بشكل سطحي و جزئي و عقيم مسألة الفقر، كافي لنفي آخر سياسي يساري تحديدا معروف بانحيازو البرامجي و السياسي للفقراء
ارساء اذاعة اسلامية ، بنك اسلامي ، عدم مضايقة المتحجبات ، كفيل بنفي آخر سياسي اسلامي
الخ ...ـ

Sinon

ما فمّاش ما يفسّر و ما يبرّر انحياز حزب سياسي الى الفقراء و البرجوازية في نفس الوقت ، و الى اليسار و اليمين في نفس الوقت ، الا انّو يهدف الى نفي المتحدّثين باسم الفقراء ، ونفي المتحدثين باسم البرجوازية ، ونفي المتحدثين باسم اليسار ، ونفي المتحدّثين باسم اليمين ... و ذلك بتبنّيه لكل هاذا بشكل توتاليتاري شمولي
جمل من نوع "تصادم التجمع الدستوري الديمقراطي مع عنف الاسلاميين و مع عنف اليساريين يتامى الاتحاد "السوفياتي سابقا

l’ouverture démocratique initiée par Ben Ali s’est heurtée à la violence et à la démagogie des islamistes et des gauchistes orphelins de l’ex-URSS.

هنا ، نشوفو نوع من التبرير للاضطهاد و المضايقة اللي كان ضحيّتها موش فقط الاسلاميين ، بل ايضا انفاس اخرى ديمقراطية و يسارية ، و رغم انّي ما انّزّهش الحركة الاسلامية على العنف ، الا انّو ، و خاصّة امام تبرّأ الاسلاميين الرّسمي من احداث العنف المزمع القيام بيها في مطلع التسعينات ، نتصوّر اللي ايّ متفرّج محايد ، ضروري انّو ينزّل الحملة على الاسلاميين منزلتها الاقرب للصحّة و للمنطق ، و هي ، في قراءتي ، المميزات الموضوعية للمرحلة اللي كانت تمرّ بيها علاقة الاسلاميين بالسلطة ( مدى وفاء السلطة لوعودها معاهم ، مدى التزام الاسلاميين ببنود الميثاق الوطني اللي صحّحوه في 88 ، الاعداد للتوجّه التوتاليتاري من خلال التضييق على كل الانفاس المختلفة وقتها و نعطي كمثال القمع اللي تعرّضلو ''حزب العمال الشيوعي التونسي" )ـ
هاذا بالطبيعة مع التاكيد على انّو الدّارس المتمحّص المدقّق في تاريخ الحركة الشيوعية ، يدرك جيدا حاجتين هامّين : اولا اسبقية الحركة اليسارية على تاسيس الاتحاد السوفييتي ، مما يضفي لاستنتاج انّو الاتحاد السوفييت هو الابن الظال للحركة اليسارية ، موش اليساريين هوما "يتامى" الاتحاد السوفييتي
ثانيا ، انّو ما فمّاش إجماع داخل الحركة اليسارية العالمية على انّو الاتحاد السوفييتي يمثّلها ، بالتالي تبرير القمع اللي تعرّضتلو الحركات اليسارية في تونس في مطلع التسعينات بانّو" قمع شرعي" نتيجة لتصادم احلام السلطة السّمحاء ، الطيّبة ، الوردية مع "عنف" اليساريين باعتبارهم "يتامى الاتحاد السوفييتي" كيما ورد في التدوينه يكون تبرير غالط.ـ
يعني السؤال الشرعي هنا ، إذا قمع الاسلاميين جا نتيجة لــ "أعمال عنف" ، باهي ، قمع اليساريين و الديمقراطيين عموما ، جا نتيجة لآش ؟
هاو نعطيك انا محاوله متاع زوز إجابات ممكنه
جا نتيجة لتحرّك المنظمات اليسارية و الديمقراطية و الحقوقية في أطار الشرعية و الحرّية ، واللي ، رغم انّو اقرّها بيان 7 نوفمبر و حدّدها و"بشـّر" بيها ، الا انّها نتايجها قد تكون محرجة و مزعجة موش لنصّ البيان ، بل لما وراء البيان ، و ما وراء البيان هو ما نحن بصدده الآن .ـ
كذلك جا نتيجة لانّو الحراك اللي كان في اطار الشرعية و القانونية بدا يجيب في بعض النتائج الهامة رغم طابعها الجزئي المشرذم و القطاعي المحدود (نعطيك مثال هام جدا : الاتحاد العام لطلبة تونس ، بقيادة يسارية ، ينجز المؤتمر ثمنطاش متاعو ، المنقلب عليه من طرف الطلبة الدساترة سنة 72 ، و الصفحة هاذيكه فيها ما فيها من احراجات سياسية و تنظيمية للطلبة الدساترة )ـ

للحديث بقية

بيــــان مياديـــن .. في يوم حرّيــة التدويـــن

انــت
يا صاحـب المقــص
كم أشفـــق عليـــك
و أنت تجــوب المدوّنــات
متصعلكا فيها
صعلكة َ قطــّـاع الطرق
الرّذِلـــه
تلك التي تنأى بعيدا عن صعلكة المتمرّدين
الشريفه

أيّها الجلاد الأخرس

الذي يتسلّى بخنق الانفاس
و لســـانُ حال ِ ضعفــِـه يقــول
ـ"لا تضيقـــوا ايهـــا النــاس ببطشـــي
فانــا اقــتل كــي لا تقـــتلونــي
و انا اشنــق كـــي لا تشــنقـونـــي
ـ"و انا احجــب كـــي لا تحجبـونــي"ـ
وانا ادفنــــكم في ذلك القبـــر الجماعــــيّ
لكـــي لا تدفـــنوني..." ـ

فهـــل من دافـع آخــر
وراء عبثـــكم الدنـــيء بمدوناتــنا
سوى اننا نضع اصابعـنا على ما خفي من الامــورْ .. ؟
و نعمل على كشف المســـتورْ..؟
و لا نـــريد لأقـــلامنا ان تكون
ْالقــلمَ المـــأجور
أو العبدَ المأمور.ْ..؟
نحــن لا ندّعــي امتــلاكَ الحــــقـيـقه
و لا ننسب لأنفسنا التـّــــفرّدَ بالصحيح المطلق
و لا نزعم اننا نمسك باليقــين المنزّل
و لا نتظاهر بالحلول السحرية الجاهـــزه
لقضايا البلد
بل اننا فــقط نطـــرح الاســـئلة
و نريد لأســـئـلتنا ان تكون محـرجــه
ولا نريد ان نطرحها خلــسة
بل بصوت مرتفع
لمـــاذا تكرهون الاسئلة...؟ـ
لماذا تــُـخرِســون كل من يطرحها...؟ـ
لانّ الاجابة عليها
لن تكون سوى اصابع َاتّهام ٍ.ِ. موجهة اليكم
الى مقصّاتكم .. ـ
الى ابواقكم .. ـ
الى ألـْسنتكم الماجوره..ـ
الى اقلامكم المـُــشْــتراة..ـ

تتّهموننا بالتخفـّي وراء الشاشات
فهل كنا سنلتجئ الى هذه الشاشات
إن انتم فتحتم لنا مجالات التعبير الاخرى ؟؟ـ
و إن انتم مكّنتمونا من الإدلاء بآرائنا المختلفه
في ســـائر الفضاءات العلنية
دون مراقبة
و دون تضييق
و دون تتبـّعات
و دون تلفيق تهم
و الشواهد على ذلك كثيرة
اذ لم يسلم السياسي
ولا الفنان
و لا الرياضي
و لا الممثــّـل

يكفي أن تكون مختلفا ، لتصبح مجرم حق عام

لم يكفكم كل هذا؟؟ـ
لم يكفكم إخراس الاصوات الحرّة
إمّا بشراء ذممها ، أو بالتضييق عليها ؟؟ ـ
لم يكفكم ردم الجامعات
في مقابر جماعية من التسطيح و التمييع و التجهيل
لم يكفكم احتكار جميع السلط
و وسائل الاعلام
و منابر الحوار
في سلوكٍ أخطبوطيّ ٍكريه

ماذا بقي بعد
بعض مدوّنات ليس الا
هي أشبه بحدائق خاصة
و بشرفات تطلّ على سماء أخرى
غير ملوّثــة
غير متعفــّنه
لاتزال تنطوي على قدر من المناعة و الصدق


كل مدونة تـُـحجـَـب
هي صوت يـُـــكـتـَم
هي نـَـفـَـس يـُقطـَــع
هي خـطوة تـُــكــبّــَـل
هي قصيدة تـُــغـْـتـال
و "هل من أمّةٍ في الارض
ــ الا نحن ــ
تـــَغــتال القصيـده"...؟؟ ـ

آن أن تخلعــوا رداء الاقـــصاء
آن أن تــبتــلعوا ألسنتكم الخــشبية
و أن تزيــلوا عمّا بـقي من بصائركم
نظـّــارات الفكر الواحد
الأوحد
الوحيد
آن أن تدفنوا مقــصّاتكم الصّـــدِئـَـه
تلك الأشبه بكــواتم الصــّوت
بــــــــــــــــــــحبال المشـانق
بصريــــــــــــــر المقصلات
آن أن تكــفّوا عن لعب أقذر الأدوار
دور يهــودا
تبّــًا لزمنكم هذا
الذي فيه
ـ"مات المسيح النبي ، و يهودا بالألــوفات" ـ


مع كل مدوّنة تحجب
تعود الى مســامّ انــفي روائح أعرفها
روائـــح أقــبية السـّـــجون .. و الزنازيــن
روائــح الرطـــوبة الخانـــقه هناك
و المراحيض العفنة
روائــح الصــّـــدأ
الممزوجة بعــرق الســجّانين
المنبـعــثــة من اجسادهم "المتجــثـّــثـه"ـ
و من احـــذيـتهـم الكريهة
رائحة خيانتهم لأنــفسهم
لضحكات اطفالهم
و رائحة خيانة نسائهم لهم
هل من رائحة أخرى لمقصّاتكم .. غير تلك..؟ـ

و مع كلّ مدونة تـُـحـْجب
يتسرّب الى مسامعي وقع خطى جنكيزخان
خطواته التي أثقلها حقده الاعمى
بـهرولـــة كلابـه المسعوره
و صريــــر سلاســله
باكيا أبـــــاه الضــــائع
و مجـــده الضائع
و إرثه الضائع
هل من صوت آخر لمقصّاتكم ...غير ذاك...؟ـ

أوروبـــا قــتلت قاليلي
و أخرسته
بعد ان اعمى القساوسة بصيرتها
و بعد أن تجرّعت كأسا كـــان مزاجها
جشع الاقطاع و جهل الكنيسه
و أخرست به كلّ من كان ينوي الكلام
دون أن تعلم
أنّ جماجم الرضّع
الموؤوديــــن تحت دهاليزها ظـــــلامــًــا
على ايقاع النواقيس الموحشه
ستكشف عهرها و بغيها
وإنْ بعــْــد قــــرون

حين تصدّى ابو الوليد بن رشد للجامدين
تهافـــتت العمائم السود كالغربان المسعوره
على كتبه الملتهبه
و احترقت هي
بالنار التي أضرمتها


نحن لسنا ابن رشد
و لا قاليــــلي
و لكننا بشر تأبى كرامتنا
تبييـــــضَ ما اســْــوذّ من الوجوه
و تزييـــفَ ما انكشف من الوقائع
و مواراة َما سـطع من الحقائــــق
و تلميعَ ما ســــــــاء من الصــّـور
لا نريد أن نكون قططا سائبة .. جائعه
تلعق الدماء العالقة بأيادي المجرمين
لتحوّلها بعد ذلــك الى حـِـبرٍ بغـِــيّ ٍ
يصف الجائعين بالـ"عناصر المشاغبة"ـ
لن نكــــون مجرّد ألــْـسنة لتبرئتهم
و لا مخابئ لأداة جرائمهم
باختصار
لا نريد ان نكون "بهتانـًا مـُـسـيـّـَـسـًـا"ـ

ألم تفقــهوا الدرس من خربشاتنا بــــعد .. ايّها الاغبياء..؟ـ
ألم تدركوا معاني منمنماتنا بعد ..؟ـ
و ماذا تعني سطورنا المنحوتـــــة
على هذه الجدران
جدراننا نحن
جــــــــدراننا
التي رفعنا بنيانها بسواعــدَ
رفضت الانخراط في مستنقع الخشب
و مزابل الصحف المعروضة علـــى أرصفـــة الشوارع
كـــــــــالبغايا
جـــــــدراننا التي أثـّـثـْـناها من أنفاس
ارادت ان ترفرف بعيـــدا عن كوليـــرا المشهد الاعلامي
ماذا يعني ذلك ..؟ ـ
سوى اننا نريد ان نقول ما لا يقال
و نبوح بما لا يباح به
و نصيح بما لا يصاح
شأننا في ذلـــك
شأن اطفال مقبلين على الحياة
يضجـّون أملا في غد أجمل
وأكثر إشــــراقا
يرغبون في مسك قوس قزح
ينشرون الوانه
يوزعونــــــــها وسع السّـمـــاء

رغما عن حرّاس السّماء
يرفضون الانصياع الى اوامر شيوخ القبيلة
و وصايا الكهّان الجدد
شيـــوخ ؟؟؟
و لكن أيّ شيوخ هؤلاء ...؟ ـ
المثـْـقـــلين بالعقد
المنْـهكـــين بالهزائم
الثــّــملين بأسوإ الخمور و أردإها
تلك المعتّقة في دهاليز الظلام و الانكسارات
شيوخ .. مكـبّــلين بوعي الخصاء و الاخــصاء
شيوخ .. متمعّشين من السمسرة على خبزنا
و على مائنا
و على نبيذنا
شيوخ .. يتشدقون بحب البلاد
التي لا تربطــهم بــها
ســوى بعــض الخيـــوط الواهيـــه
دون ان يعلمـــوا انّ "قمّة الأمجـــاد
لا تـُــبـْـنى
على أشلاء خيــــط العـنـكـــــوت"ـ

ستظلّ مقصّاتكم
دليل عجزكم
و ألة جرائمكم
و برهان ضعفكم
تتخـفـّــون وراءها
كجنــديّ يحارب الحريّه
فهو مهــزوم في داخله.. مكسور
قبل دخوله ساحة الحرب

أمّا نحن
فلن نكفّ عن ملاحقتكم
و عن تعريــَـتكم
بآخر حرف
من أخر مدوّنه أفـْـلـتـتْ من المقص العفن

أمّا نحن
فـلـْـيخيّم الليل على اقلامنا
التي اسـّـسـت لحروفها
من أحلام هــذا...و اوجاعه
و من ألام ذاك... و آماله
و من تعب هــؤلاء..و خمرهم المســـائيّ
ومن جـوع اولــئك.. و خبزهـــم الصّــباحي
لن نكـُـفّ

امّا نحن
ـ "...تضيـــق بنا الارض
تحشرنا فـي الممــرّ الأخـــير
فنخلـــع أعضاءنـــا و نمـــرّ..."ـ

caricature : مظاهرة للمدونات المحجــــوبه