جندي ... حصة خاصة

و انا نبربش في اوراقي القديمه .. جات تحت صوابعي ورقة امـّـركْـسَه ..مـْــهـرّيـَــه .. مشدوده بالسـّــكوتـش من الجّـْــوَايـهْ الكـل ..و تقريبا بدت تفقد في ملامحها .. المرة لولى ما عرفتهاش .. و تساءلت : شبيني مستحفظ على ورقة في الحالة هاذي ..؟ كي حليتها .. قريت فيها من فوق .. " بطاقة سراح " و من بين ما فيها .. اسمي .. و مكتوب قدامو : "جندي حصـّــة خـاصـّـــه" ...عاد ولـّيت نفـكـّـرت .. وبقيت .... شادد ... هاك ... الوريقة ... فيدي ... و ... نقرا ... فيها ...و...نعاود... و ... نقرا ... على .. أول باخرة بريطانية.. ترسـّي على سواحل فرجينيا ... في اطاراستكشاف العالم الجديد ... و نقرا مناش يتكون البرلمان الانجليزي .. و شنيّه حدود العلاقة ما بين الملكة و النظام السياسي .. و قصة الملك اوديب .. وإلا "كينغ أوديبس".. كيما كنا نقرو فيها في ديبارتمون الانقليزية .. و جورج أوروال .. و أنيمال فارم ... و قهيوة في البيفات مع لولاد ... كابـّـوسـّـان وحدة تدور بيناتـنا الكل ... نوع من البؤس و الفقر الجميل ... المنتج ... نعلمو بعضنا بآخر الأخبار.. و آخر ما صاير في الاجزاء الجامعية الاخرى .. و في البلاد .. و في العالم ..و نبرمجو اش باش نعملو .. ونوزّعـو المهام .. و تيكه .. و جوتون .. و بلاتو واحد في زوز والا ثلاثة ..و فينا اللي يبدا مزروب ..خاطر عندو موعد حب ..ورد .. سينما.. شط .. احتفال بالجسد ...و... وقتاش يجي البورس ..باش نعملو كعـيـبات في الويكاند .. و نغـنـّـو في شنابرنا ..باصوات عالية .. و الواحد شايخ .. متوازن .. أو...ديزون.. هكـّه متهـيـّـألو...حاسّ روحو مالك الدنيا .. صغر .. قراية .. ممارسة قـناعات ..و عندو صحيـّـبتو في عينيه .. و اكثر مالفرْح دَا مااحْـلمش.. واكثر م الـّلانا فيه ماطْـــــلبْــش .... :) .....و طاااااااااف ...نحل عيني نلقى روحي لابس كمبه خضرا .. وراسي الشـّــعـره لا .. و البروتكان ..ضاربني ..صغير عليّ..و لابسو بالسـّــيف ..و نهرول في الصحرا و عطشان .. تقولش عليّ ماشي نحارب في اليزيد بن معاوية :) ..و المعجم يتبدل من اللي كنت نحكي عليه الى : سرّيّة التدريب ..لورفيجانه ... واجب حراسه ... عضلحشْ...راقو (ثلاثة نقاط فوق القاف)....اتـْـجـمـّعْ..هرولْ .. انبطح ْ..مطروحة واحد .. خوذ وضع الجرمانة ..امرك يا عريف ..ردّ خبر.. خوذ وضع القـحـ...ـه المحترمه ..استعد .. استرح
و كل ما نجي باش نرقد .. يلزمني نتأكد انو ما ثماش زواحف سامة تحت المخدة و إلا لفعه راكشه في الثـّــنـْـيات متاع الزاوره
و الشّــيـخـه وين ؟؟؟
عام كامل.. .ما مسّيناش فيه كرطوشه ميتة بيدينا..وإلا حتى كروس متاع شتاير مصدّده ...ملا ميليتار...زعمة خايفين علينا م السلاح وقتها ..؟؟ ..وإلا رمونا في الصحرا هكاكه .. قال شنوة .. عام جيش .. و هوما في الحقيقه حبّو يرتاحو منا .. خاطر ظهرنالهم طلبة نفـكـّـرو..و ماناش مْعـيـــز نـبَـعـْـبـْـعـُـو... و هنا تـْــبسّـمْـتْ .. و في هاك التـّـبسيمه .. فقت بالورقة .. بطاقة سراح.. فيدي .. و عيني مرشوقة في عبارة " الجندي حصة خاصة فلان بن فلان الفولاني"... حَــــّطيتها على جنب .. و كملت نبربش في بقـيـّـة...اوراقي ... القديمه