ترحيب و تذكير

اصدقاءنا المحرَّريـــن

لم تستهينوا باهاليـــكم .. فنلتم شرف السّــَجن

و لم يستهن أهاليكم بكم .. فنالوا شرف تحريركم

و لئن فضّل الآخرون إحداث الصلة بين الافراج عنكم و بين اليوم السابع من هذا الشهر

فإنّني من الذين يفضّلون ربط الافراج عنكم باليوم الـــرابع ، يوم حرية التدوين

معا

من أجل الافراج عن كل مساجين الرّأي

و من اجل الكفّ عن حجب المدونات

مرحبا بكم بيننا

شكرا ... يا سيادة الـ ... معلّم/ تحية الى المعلمين في إضرابهم التضامني مع مساجين الرديف

حبيت نتوجّه في كليمتين

بتحية كبيرة لمعلمي الابتدائي

اللي شنّو يوم أمس 5 اكتوبر 2009

إضراب بيوم تضامنا مع زملائهم

و باقي مساجين الحوض المنجمي

، نسبة نجاح الاضراب فاقت خمسين بالمائه

حسب المصادر النقابية

لكن في رأيي انّها المبادرة في حد ذاتها

اهم من النسبة

في جرأتها

رغم انها جات متأخرة شويّة

نرجو ان تتلوها سلسلة من التحركات المشابهة

، و من مختلف القطاعات

حتى نحوّل فعلا كلمة : " لم / لن ننسى" ـ

من شعار شفوي الى عمل فعلي

مساجين الرديف .. عذاب لهم ..و عذاب لاهاليهم

العقوبه اللي تسلّطت على شباب الرديف اللي عبّرو بارقى الاشكال على رفضهم للاوضاع المزرية اللي يعيشو فيها هوما و اهاليهم
تلتها عقوبات اخرى لاهاليهم و عايلاتهم .
وقت اللي كل شهرين ثلاثه ، يقومو بابعاد المساجين و تفريقهم على مختلف السجون في مختلف الولايات
و وقت اللي عايلة عندها زوز اخوة مسجونين .. واحد في سجن رجيم معتوق و لاخر في سجن الكاف .
اش يلزمها مصاريف لايصال قفة فيها بعض الماكل و الملبس .. و بعض الحبّ ...و بعض دموع اجمل الامهات .
و للي ما يعرفوش رجيم معتوق
اللي كانت هي بيدها قرية صحراوية /معتقل متاع الطلبة و التلامذة الـ"مشاغبين " ـ
هاو بارك فيها المولى ، و ولات حتى هي بسجنها
تصوّرو معايا العذاب اللي يمكن يتكبّدوه الامهات و الاباء اللي محروقين على كبادهم
كلّ قفه اسبوعية تتكلّفلهم بالشيء الفولاني من الاتعاب المادية و البدنية و المعنوية ...و حرقان الاعصاب
حطّ خمسة لاف في يد العون هاذا... و عشرة في يد العون لاخر
هكّه ، يتضاعف العذاب . عذاب للمساجين ، و عذاب لاهاليهم

****

ملاحظه عابرة لن اعود اليها
انا نكره التدوين التفاعلي ، الا اضطرارا ، خاطر كيف تولّي هاذيكه الخديمه ، هاذاكه ما يعبّر الا على ضيق افق ، و خواء و ضحاله في الطّاسه متاع الدماغ ، و هكّه يولّي الابداع في التدوين التفاعلي تعويض على الابداع في مسائل فكرية و الا فنية
نكتب على عايشه .. علر زكيه .. على جارتي .. على الكعواش ..على التفاح الخامر .. على مثلث برمودا ..على الورد .. على البيرة .. على ما زمزم .. هاذيكه اوموري .. حرّ .. و رجاءًا ، اللي يدبّر يدبّر علر روحو
ايّ فكّ عاد

ـ"و السجن مطرح الجـــنينه" ... هالمرّه في الرديف موش في غناية الشيخ إمام

قاعة السنما الوحيده في المدينه اللي نعيش فيها عندها مده ملّي تسكّرت .. و تقسمت ، جزء منها ولّى قهوة بودورو .. اغلب روادها اعضاء و محبي جمعية الكورة .. و الجزء لاخر .. مازال فارغ .. اظلم.. موحش .. معششه فيه الجرابع و الرتاتل ، اما انا كل ما نتعدّى من قدامها ، نسمع صوت الهارمونيكا متاع كلينت استوود .. و نسمع صوت صياح بروسلي و هو يشلغم فيها عاري و لابس ومنقّــّز من فوق عماره .. ونسمع صوت تصفيقنا و تصفيرنا على بطولات بيد سبنسر ، و حمزه بن عبد المطلب في فيلم الرساله ، و زادة على تصفيرنا على بوسات شمس البارودي و حسن يوسف الطويله ..بوسات طويله برشه على قلوبنا الصغيرة وقتها :) ـ
و انا نفكّر باش نكتب حاجه على الموضوع هاذا ، على خاطر القاعه هاذيكه عزيزة عليّ برشه ، و كانت تعتبر شباك نلمّدلو من مصروفي باش يتحلّــلي على دنيا اخرى.. دنيا مجهوله .. سحرية .. فيها برشه ضو .. و الوان .. و موسيقى .. و مشاهد خيالية .. و فانتازمات .. ـ
لكن كيف روّحت و حليت الانترنات، لقيت ايميل يتضمّن معلومه مفادها انّو ثمّة نادي اطفال في الرديف و قع تحويلو اخيرا الى ثكنة بوب تضمّ فوق الالف و خمسميات "عون" ، و الانجاز هاذا يجي طبعا في اطار التفاعل الايجابي مع ما وقع و ياقع فيها من احتجاجات ، و في اطار الاستجابة الحينية و الآنية لمطالب الاهالي و تلبيتها بكل روح المسؤولية و التحضّراللي مطلوبين من ناس قريب يولّو مرجع عالمي في حقوق الانسان
المعلومه اللي عندي انّو تم تركيز ثكنة للبوب في الرديف ، بعد ما تمّ الاستيلاء على نادي كان فيما مضى نادي للطفولة
حلو ياسر .. و رايع برشه
يعني ما تستغربوش انّومنّو و هكّه، اي مدينه تتغشــّش .. و تعبّر على الغـُــشّ متاعها بصوت مرتفع شوي .. تكتشف من غدوة الصباح انّو المرشي متاعها و لـّى مركز كوموندوس .. و الا الكوشه تولّي دورتوار متاع قوات التدخل.. و إذا لزم ، يدورو على محلات البغاء العمومي و يردّوها ريفيكتوارات و الا فستيارات متاع الطلايع

هيّا تـْـرَه .. مع بعضنا نتخيّلو مشهد متاع طـِفل في هالـ : إكس / نادي متاع الطفوله، قاعد يتجوّل بين الرفوف متاع قاعة المطالعة ، و الا قاعد يتعارك مع السّـوري(الفـأره) متاع الكمبيوتر في قاعة الاعلامية ، و الا في الملعب اللي تابع النادي ، يلعب في ماتش كورة و صويّتو مبحوح و مطيقر كيفاش صاحبو ما مسّوش بالكورة و هو راسو راس القول .. و الا صوابعو مبلحطين بالقواش (ثلاثة نقاط) و هو غاطس بين الالوان و البنسـُـووات في قاعة الرسم و البراعة اليدوية ، و الا قدّامو بيبيتر و هو متحمّل عود و الا كمنجه اطول منّو و يمرّن في صوابعو على تمرين صولفاج متاع موزار
و فجأة
لا طاح لا دزّوه
ياقع اقتلاعو من قدّام كتابو .. و الا حاسوبو .. و الا لعبتو .. و الا كورتو .. و الا عودو و كمنجتو و قواشو و بنسـُـواتو ...و يتــْــزرع في بلاصتو عضروط .. عيفور .. غضنفري .. مشلّط .. هو بيدو جيعان .. عريان .. اكثر من لونيفورم لزرق والا لكحل .. ما عندو ما يلبس .. يرقد بالبروتكان متاعو باش يكون ديمه على أُهبه ... و ماهوش فاهم حتى كعبه من طبيعة خدمتوشنوّه بالضبط ، سوى انّو مـُـطالب باستجماع كامل مخزوناتو العدائية ، كلّما أُمـِـر بذلك، لاستعمالها ضد ناس عزّل قد يكون هو افقر منهم و اكثر منهم جوع و حرمان و قينيا .. ومن الاجدر ليه انّو يرمي بالماتراك متاعو و ينتمي لمظاهرتهم ، اللي هي في واقع الامر، و كان جات الدنيا دنيا : مظاهرتو هوّ

و تتحلّ عاد الخزاين و الكزيــيـيات متاع رواد هاك نادي الاطفال ، المليانة بالصلصال و الاعواد و الاقراص و القصص و التصاور متاع اليوقي ! و السيدييات و اللعب والالات الموسيقية و القواش و البنسوات و الكــْــوُرْ ، و غيرها من اكسسوارات الطفوله ... هاذاكه الكل يتلوّح و تـتـْــسَــتــّـفْ في بلاصتو حاجات كيما هـكـــــّه

و كيما هكّه

قالـــّو مركز طفوله ..!!!!... و الا نادي اطفال .. و الا ندرا اش من زمّاره
اش عنّا ما نـّــ...ــنـَعملو بيه ؟؟؟؟ ـ
مصاريف و خساير و تجهيزات .. و من بعد يتحوّلو الى عناصر مشاغبة ... تِماهو منطقيا ، و حسب الظروف اللي عايشين فيها هوما و اهاليهم ، باش يتعثّرو في قرايتهم .. هاذا اذا ما تحشّـتش ساقيهم من الاوّل .. و ما يواصلوش .. و يكونو فريسه ساهلة لمثل هالـ :"وظائف" اللي من نوع البوب .. دونك ، علاش احنا ما نختصروش المسافات الزمنية ، و نجيبولهم طزازن و ستايك بوب حاضر باش ، من راسو لساسو ؟؟؟ـ
علاش نبقو نضيّعو في الوقت ، نستنّو في هالوليدات حتى يكبرو ، و يفشلو في قرايتهم ، و ينحرفو و يتعلّمو الزطله و الالكول على بكري ...و من بعد ، كي يتوبو ، يولّيو : بوب
وفعلا ، كيما شفتو ، الكعيبات اللي جابوهملهم عمناول ، تباركلّه ، توت أوبسيون ... زياده على ليزوبسيون برانسيبال متاعهم ، و المتمثله في اتقان مسك و استعمال الزّلالــط ، و رمي لكريموجان و الرصاص الحي و الميت ، فإنّهم يتمتّعو بديزوبسيون إكسترا : يعرفو زادا يمرمدو الشيّاب و العزايز ، و يعرفو يخلعو الحوانت ، و يعرفو زادا يعرّو ارواحهم على النـّسا المتظاهرات
هو المعروف على الدول اللي مازالت في طور التخلف ، والا ، خلينا نكونو متفائلين شويّ و نقولو: في طور التنميه المستديمه ، معروف عليهم انّو اكثر قطاع محظوظ و مقرّب و مدلّل من حيث الاعتمادات و التجهيزات و الانتدابات ،هو قطاع "الامن" ، هاذاكه علاش انا نتساءل، ياخي هالـفوق الالف و خمسميات عون اللي جايبينهم و حـاشــينهم في نادي اطفال، كادهم لا جابولهم معاهم وين يسكنو
مثلا : يعملولهم اقفاص ، كيما في فيلم
La planète des singes

شوفو هاك القفيّص محلاه .. كيفاش ساترهم .. وهوما في لحظة انسجام و وئام
و الا يعملولهم عــْـشـش، كيما في افلام الوستارن ، اللي يسكنو فيهم ليزانديان ، مع احترامنا الشديد لثقافتهم و تقاليدهم

هاذا اذا ما قلناش ياخي هوما اش مجيّب ملايكة اصلهم من الاساس ، حتّى باش ندبّرو وين نسكّنوهم

الحقيقه .. تخلّطت عليّ الافلام

شــي بقى في ذاكرتي من ايّامات قاعة السينما اللي حكيت عليها في الاوّل

و شي من الافلام الاخرى اللي عايشينها توّ.. من غير قاعات .. و من غير ما نلمّولها من المصروف .. و من غير تصفيق ... و من غير تصفير

الحاصيلو

حــاله حلـــيله

القهوة ... مطرح قاعة السينما

و قـَـزرْنة البوب ...مطرح نادي الاطفال

و ..."السجن ... مطرح الجنينه..." ـ

و هيّ ماشـــيه ... ـ

اليوم 16 جوان ...حملة اعتقالات جديدة بالرديف

آخر المعلومات التي وصلتني تؤكّد إقدام الاجهزه الامنية بعد ظهر اليوم الاثنين 16 جوان على القيام بحملة إعتفالات واسعة بمدينة الرديف شملت ما يفوق الستين معتقلا..من المعطّلين و النقابيين

يحدث هذا في الوقت الذي لم تحرك فيه هذه الاجهزة ساكنا في اتّجاه تتبّع المسؤولين عن عمليّات قتل الابرياء .. أو عمليّات النهب و الاعتداء على حرمات المنازل والدكاكين

الرديّــف في تونس ... أم .. سيدي إيفني في المغرب الشقيق

سيدي إيفني

بلدة في جنوب المغرب الشقيق

اهاليها يعانون من الفقر و الخصاصه لدرجة انهم انتفضوا ..متحــــدّين عمليات التهديد .. الخطيرة التي تعرّضو اليها... والتي وصلت حدّ الاغتصاب .. و استباحة المحارم

و الكلام هاذا راهو ماهوش من راسي

بل اكثر من ذلك

وقع ا طلاق الرصاص المطاطي .. على المواطنين

مما أدّى بالعديد منهم .. انّهم يغادرو المدينه... في اتجاه الجبال المحيطه

كما يذكر انهاهالمنطقة تعاني من "التهميش" الاقتصادي و السياسي .. منةذ ثلاثين سنه .. ممـّـا سبـّب هالحاله متاع الاحتقان

المعلومه هاذي .. نسوقها ... بهدف الاهتمام بيها ..و تحليلها .. وا لنظر في الاسباب .. اللي انّجمو نشتركو فيها مع اشقّاءنا في المغرب ..

واللي قتلني آنا ريتو

قفصه و نحن .. بين تهاطل المعلومات الكترونيا .. و شـحـّــها رسميا

و انا نفكر باش نكتب تدوينه موضوعها محدد : قفصة بين تهاطل المعلومات الكترونيا... و شـحـّــها رسما..جاني تعليق في التدوينه السابقة يحذّر فيّ من الانسياق ورا البيانات اللي في اغلب الاحيان ، ما تعطيش المعلومه الصحيحه ..

كلام معقول .. و كيما ريتو في اول التدوينه السابقة .. قلت :الايميل هاذا وصلني توّ .. بما يعني انّي ما نتبناش بالضروره لوغتو و ما ناخدش محتواه بصيفه مسلّمه ..فقط هي معلومه وصلتني لتوّها .. حبيت نطرحها في البلوقسفير .. و نفكّرو فيها مع بعضنا .. و هاذي في اعتقادي طريقة جيدة للاحاطه بما يمكن الاحاطه بيه مما يحدث لتجميع المعلومات و دراستها.. خاصة امام الشحّ الاعلامي الكبير و المثير للشفقه و السخرية من هالـ"هياكل" .. و هالـ"المؤسسات" .. و هالـ"اجهزه" .. اللي مستفرده بناس عزّل .. و خايفه من الاطفال ..قلت هالشح الاعلامي اللي غارقه فيه اجهزة اعلامنا الرسمي ... بما يعني انّو ايّ معلومه يتحصّل عليها واحد منّا .. باي طريقة .. سواء يجيه ايميل .. او اتصالات هاتفية مع من هم اقرب منّو لمسرح الاحداث .. او لقطات مصوّره ...الخ ... تعتبر ثمينة .. و تنجم تعاون بعد تصحيحها و ازالة غبار المبالغة ...في بناء الصورة الحقيقية لما يحدث.. مهما كانت درجة الصدق اللي تنطوي عليها

مثلا انا البيان هذا من خلال شكلو و كتابتو و اخراجو و لوغتو الحماسية التحريضية .. و اللي ذكّرتني ببيانات اخرى ما عنديش برشه ملّي لقيتها تحت باب داري .. و بالتحديد يوم 26 جانفي .. و يوم 8 مارس ..هاذاكه علاش عطاني انطباع انّو و قع طبعو و توزيعو على المنازل .. و ينجم يكون حتى في منطقة اخرى غير الرديف ..والحقيقه كنت نتصوّر انّو ثمّه اشكون باش يقول : لقيت البيان هاذا تحت باب داري .. و هاذا حصل برشة مرّات

باختصار .. نـَــشري ليه ما يعنيش بالضروره التسليم بمحتواه .. بل مجرد رغبة مني في اني نشرّك معايا المجموعة في تلقي المعلومه ..ثم الاشتراك في تناولها بالتمحيص

انا مانيش من دعاة المبالغة و التحريض في غير وقتو و في غير ظروفو .. اصلا الفن هاذا ..ما نتقنوش .. ونطلب من الصديق اللي بعثلي التعليق اللي حكيت عليه .. و منكم .. انكم ترجعو للتدوينتين اللي كتبتهم فيما يخص الاحداث اللي صارت في معتمدية فريانه من ولاية القصرين .. و انا نتصوّر اللي كل من يقراهم باش يستنتج اللي لوغتي بعيدة على البيانات التحريضية و المبالغة.. و نحاول نتّبع الدقة و الموضوعية و التحرّي .. و نشر المعلومه و نقيضها معا.. و تحكيم المنطق

عندي ملاحظه اخرى نحب نتوجّه بيها لبعض الوخيّان اللي نراهم بصراحه مبالغين في الخوف من هالغول اللي اسمو "التوظيف السياسي للاحداث"..و هوما ناسين اللي خوفهم الكبير هاذا، راهو زادا نوع من "التوظيف السياسي" اللاواعي .. و هو اخطر .. على خاطر كي انا نقعد على الربوه .. و مانعطيش ما هو مطلوب مني من مسانده (سياسية قبل كل شي ، دايّور ما ثماش مسانده اخرى ممكنه على الاقل توّ)بدعوى الحذر من الوقوع في فخ الاطراف اللي تحرّك في الناس هاذي ..انا يظهرلي نولّي اقرب للسلبية و للتقوقع السياسي الضيق منّو للحكمه و الرصانه

باختصار

يلزمنا نفكّرو في تطوير اشكال مساندتنا لهالناس المحاصرين.. بقطع النظر على اشكون الطرف اللي يمكن يكون فاعل اكثر في الاحداث .. الفولاني و الا الفلتاني

عـُـمـّال بلا مناجم .. لمناجم بلا عُـمـّــال!!!!ـ

في الحقيقه، الملامح العامة متاع التدوينه هاذي عندها مديده مهرّجتلي مخّي .. و هي تتلخص اساسا في السؤال هاذا : اللي وقع و ياقع في الرديف و غيرها من منطقة الحوض المنجمي ..اش نّجّمو نسمـّـوه ؟؟ انتفاضة شعبية متاع فقراء و بطّاله .. وصل الامر بواحد منهم انّو، كي ما نجّمش يعيش عزيز .. مات كريم .. امّا المرة هاذي موش "بين طعن القنا و خفق البنود" ..كيما اشترطها المتنبي .. و انما.. بين تصرقيعة متاع ندرا قداش من الف فولت.. و شماتة رئيس ... الشعبة ؟؟ـ
والا هي هَـبـّـه جهويّه قبليه متاع شويّه قفاصه .. ما لقو ما يعملو .. قالو هيّا نكرهو المـْــلل الاخرى ؟؟؟ـ
انا من الناس اللي يكرهو المبالغه .. وتحميل الامور أكثر ملّي تتحمّـلو .. و زادا من الناس اللي يكرهوالتسفيه المجاني والتحقير اللامسؤول من قضايا مصيريّة

من خلال حديثي مع برشة اصدقاء.. في الدنيا و في الآخره (الآخرة نقصد بيها العالم الافتراضي :) ...)..ومن خلال بعض الهـْـرَجْ و الخزعبلات اللي وقعت اخيرا حول المقارنة بين ستاراكاديمي و نجمها .. و بين تبديت و قتيلها ... لا نحب نقول شهيدها .. اينعم .. شهيدها

هالمقارنه ما عملتهاش .. مابعد الشي على بعضو .. اما حبيت نزيد نبيّن لاوطنية و لا شفافيّة اجهزة الاعلام الرسمي ..من خلال تــكريزة وقعـتــلي في الخدمه .. بحيث زملائي في العمل بالغو في الاهتمام بالموضوع هاذاكه..و في اعتبار انّو التصويت لنادر واجب وطني .. مما اثارني الحقيقه .. و خطبت عليهم خطبه عصماء .. :) و عطيتهم المثال متاع هشام ..و قضيتو .. و اهلو .. كشاب .. تونسي .. زادا..و هو نموذج لشريحة كاملة شبيهه بيه ..لا اكثر لا أقل..اما التعتيم اللي وقع عليه .. خلانا ما نجموش نخرجو من البوتقه اللي حطّنا فيها ..ـ
قلت، من خلال هاذا الكل .. استنتجت انّو كيما ثمه اللي تحمّس برشه .. لدرجة انّو اقترح على المدونين القيام بإضراب .. و مهما كانت ردة الفعل هاذي انفعالية .. فهي محترمه
و ثمه اشكون اكتفى بتلقي المعلومات و التعليق عليها .. و ما حـْـبَـسْـشْ غادي
و ثمّه .. يا سيدي يا بن سيدي .. اللي قالك انا خاطيني .. الشي هاذا ماعندناش في سِــبْـرْنا .. يا وخي .. و هوما علاش يوصلو يجوعو .. حتّى يخرجو للشارع و يصيحو: رانا جواعى ؟؟؟ انا مدوّنتي سـِلـْـمـِـيـّــِـــه..و ما بْحب إسـْــمَــعْ هالحَــكِــي.. و مـَـافـِـينـِــي إتـْــحـَــمّـَـالْ هالــمـَـشــِــيـهـِـد تـَبـَعْ العـِــنـِـفْ
و ثمه شكون عطى جرد تاريخي هام للمنطقه هاذيكه .. و زادا اللي خذا وقتو و فكر و كتب من منطلق رزين و حاول يبعد على الاندفاعات العاطفية اللي تحجب الحقائق في اغلب الاحيان ..و شاف للمسالة من زوايا متعددة
من بين الانتقادات اللي توجّهت للحركه الاحتجاجية هي:مضمونها الجهوي .. و ثمّه اشكون سمّاها عروشية و قبلية ..هو راهو ثمه فرق .. الجهويّة متفقين فيها مربوطه بحدود الولايات .. و مرّات تولّي مربوطة بالـ:أنديكاتيف متاع التاليفونات الفيكس :) ـ
و العروشية راهي حاجه اخرى
ينجمو يكونو زوز في ولايه وحده .. انديكاتيف تيليفونيك واحد :) معتمديّة وحده .. حومه وحده .. و هوما بيناتهم عداوه عروشية .. و كل حدّ يورّث فيه لولدو ..
و تبقى هالنعرة العروشية .. و هالعصبية ..نوع من انواع الشوفينيزم .. كشعور جماعي ضيّق ، بالاشتراك مع أخرين في الانتماء الى لقب واحد .. او الى جد واحد .. او الى قـَــبر واحد.. يمكن يكون مدفون تحتو حـلـّوف

اما احيانا .... حبينا و الا كرهنا .. هالنعرة هاذي تساهم في إذكاء التحركات .. و تساهم، في بعض البلايص، في تحديد التحالفات و الاتتخابات .. سواء في الشعبه و الا حتى في النقابة ...و باش ما نبعدوش .. و نبقوا في انتفاضة الحوض المنجمي ..نّجّمو نقولو، و حسب المعلومات اللي عندي ، اللي العروشية كان عندها دور على زوز مستويات

لولاني ، باعتبارها كانت نوعا ما "حافز" .. و كانت عنصر تحريك معنوي و نفساني .. لاثارة منافسة الاهالي لبعضهم .. من نوع (على سبيل المثال) : ياخي شبيهم كان اولاد بويحيى يخرجوا في المظاهرات .. وينهم اولاد عبيد ؟ارجو اني ما نتفهمش هنا نشجّع على تغذية هالمشاعر المتخلفة .. بل انا بصدد الحديث على اش وقع؟؟ـ

المستوى الثاني اللي دخلت فيه "النعرة العروشية " كان من الطرف المقابل ..حيث تم الالتجاء للـرّوس(موش اللي من روسيا:)...)نقصدالـرّؤّوس الكبيرة متاع اولاد سيدي فلان و اولاد بو فلتان ... باش يستعملو سلطتهم الادبية و المعنويّة .. المقدّسه احيانا .. و المعتمدة على قوة الفلوس احيانا اخرى .. لإسكات اصوات هالـ : "اقليـّة المشاغبة" .. هالياجوج و ماجوج اللي ندرى منين خرجو

و بالتالي ،اللي وقع ماهوش مجرّد هبّة متاع تفرقة جهويّة .. و باش زادا نكونو موضوعيين .. الناحية هاذي حتى حد ما ينفيها من دوافع و عوامل هالتحرك .. و حتى كان توجدت ، ماهيش من فراغ .. لكن نتصوّر انها ثانويّة جدا .. امام الاسباب الموضوعية الكبيرة

ياخي النسا الكبار اللي شفناهم في الفيديوات .. اش خرّجهم من ديارهم. . من كوجيناتهم ؟؟؟ و الحال انّو المجتمع الجنوبي متسمّي على المحافظة .. زعمه هكاكه .. نفحتلهم باش يتقابلو و يعملو عشويّه يعبّرو فيها على كرههم الجهوي للسواحلية .. مثلا ..؟؟ و الا للجنادبة و الا للقراوى ؟؟؟

و الا على خاطر فدّو من المماطلات و من الكلام اللي ماعادش تردد فيه السلطة فقط .. بل غير السلطة مما يسمّى الـ:"اصوات المعتدلة" ... "الواقعية" ... "الرصينه" من نوع : هاو ما عندناش موارد طبيعية كبيرة .. ما عندنا ما نعملولكم .. و راهو ماهوش" كـُن فـَـيَـكون"... ..رغم انّو هالـ: "كـُـنْ" هاذا ... في مناسبات و سياقات اخرى ، "يـَـكـُــون" ... و "يـَـكـُون" في رمشة عين زادا .. و مانيش انا اللي باش نخمم في حلول للدولة .. ايّ دوله كانت ، باش تخرج من ازمتها .. تـِـغير نلقى حلول ليّ..و نتصور اللي الدولة اللي تمارس في الغطرسه و الاستبداد و تتشدق باحترام القوانين .. موش من حقّها تطالب مواطنيها بالسلوك الحضاري ..لا هيّ و لا اصحاب الحلم الليبيرالي الوردي
يقول القايل .. مايعقلش نعملو معمل يصنع في منتوجات معدّه للتصدير في بلاد ما فيهاش برط ..منطقي جدا .. لكن لو جات موجوده "نيّة"... و "ارادة" التوازن الجهوي و توفير حظوظ العمل للجميع .. خلي نقولو للأغلبية .. راهو وقع تركيز المعامل اللي ما يستحقوش برط .. في الولايات و البلايص اللي ما فيهاش برط ..يعني مثلا معمل متاع شلايك .. عفانا و عفاكم الله .. و بناطف .. :) .. اش تعمل في البلدان البُــْرطيـّه .. في حين انّو الشلايك متاعنا ما هيش معدّه للتصدير .. على خاطر هي من اخيب انواع الشلايك في العالم .. و على خاطر احسنلنا نحافظو على شلايكنا عندنا ... و هاذا كان ينجم ياقع بالعديد من الاساليب .. منها الضغط على "اصحاب رؤوس الاموال"او "بتشجيعهم" ...كل ما تبعد اكثر بمعملك .. كل ما تنقص عليك الاداءات .. مثلا .. ما نعرفش انا .. المهم يسيّلولهم ريقتهم بشويّة إغراءات كيف هكّه .. و مادامي بلادنا.. مساحتها صغيرة .. و اللي يسافر من بنزرت لبن قردان.. ما يتسمّاش سافر و ما يتسمّاش تغرّب.. زادا التسويق الداخلي و التوزيع المحلي ما يطّلبوش كلفة نقل مرتفعه

مواردنا الطبيعية محدوده .. أوكي .. امّا زادا ما عندناش ازمات ديموغرافية .. من تضخم و انفجار و تخلويض في التوزيع .. ما عندناش كوارث طبيعية دورية .. كيما برشه بلدان في العالم .. هاك اللي حَـرث عَام كامل ياكلهولهم ..موش زاوش و انـّما زلزال والا فيضان و الا بركان
و كي نثبتو شويّ.. نلقو اللي المصروف موجود .. ياخي واحد نهار الكل شادّ زلاط على عايلتو .. ما يسمعو منو كان : ماعنديش .. ما ثمّاش .. منين .. هاذاكا اللي موجود .. و نهار عيد ميلادو المبارك .. يصرف ما يشريلو كل يوم زوز كيلو علّوش ؟؟؟ .. ولاش من حق هالعايله المتـّــاخذه باش تقول : ماخفي كان اعظم

و للحديث بقيّه ..ـ

الاصوات تسعف نادر...و السيـاط "تـعـفــّـس" هشام

تدجين إعلامي يعيّف .. يقزّز .. كوادر الادارات ..شهايد .. اجازات .. مراحل ثالثة .. و عاشرة .. يعدّيلك بالساعتين يحكي على نادر .. و ستار اكاديمي .. و التصويت .. و ما يولّي "يحب بلادو" كان وقتها ـ ينعطلـّـاهي على الكـــــاذب
و نحب انـّـبـّـه هنا انّو موقفي من ستار اكاديمي ..و الا تعرفوش كيفاش .. كلمة "موقفي" كبيرة شوي على السياق هاذا .. برّه نقولو .. عدم هضمي لهالقرْبلـّـه .. ماعندوش علاقة بــ : "صراع الأجيال" .. كيما صار مؤخّرا فيما يخــص "ملتقى كازا" .. اللي ، مع الاسف ،الحديث فيه اوشك على انو يفـقـد جانب التـقــيـيـم ا و الــحديـث فــي جــدوى الـمـشي مـن عــدم جـــدواه .. لكن ولـّـى صـــراع بـيــن "شيّـاب خارفـــين " ... و " شباب يافعـــين " ـ
الحقيقة انا شخصيا و كرونولوجيا .. يعني حسب ب.ت.و.متاعي .. نجي بيناتهم .. امّا ذهنيا .. و في الدنيا .. نحب ديمه نقيّم المواقف انطلاقا من صحتها .. غلطها .. جدواها .. عمقها .. وضوحها .. غموضها .. خبثها .. صراحتها .. ديبلوماسيتها .. ثوريتها .. رجعيتها .. طرافتها .. موش انطلاقا من عمر صاحبها أو صاحبتها
و زادا في الدنيا .. نحب ياسر الاحتفالات (الله غالب .. هالكلمه : "احتفال" راهي مزيانه .. اما تـْــــَظـلـْـمت بسبب السياق الوحيد اللي ديمه ياقع استعمالها فيه).. و الفرحة و الشيخه و الفن و الرقص .. و الحب و الحياة .. و التاي لخضر في الصيف ... و التاي لحمر في الشتا ... :) و ما نحبش القينيا و الكبّي و العبوس .. رغم انو الواحد منين يتلفت .. لازم تصادفو حاجه تدرّعـلو خواطرو .. و الا تصرقعـو بستراس هو بيدو... و رغم هاذا .. نمّن اللي كل واحد فينا عندو طفل صغيــــر عايش معاه ...لداخل .. كالكوبار ... في بلاصة من البلايص .. و هالطفل هاذا ما يفهم شي .. الا حاجة وحدة : الحياة . هاذاكه علاش يلزمك ساعه ساعه تـتلفتــلو .. و تلعب معاه شويه .. و تهارشو .. سينون ..يولّـــي يفدّ و يتمرّد .. و يولّي يلعب بالسرقه عليك .. و وقتها .. تولـّـــيلك فاتاريــّـــه هات اش يحدّهـــا
نرجعو لزملائي
زملائي اللي عندهم نهيّرات و هوما هاذيكه الـنــَّــمْـنَـامــَـــه متاعهم(كلمة نمنامه ما عندها حتى علاقة بقلة الحيا :) اما كانت تستعملها جدايتي .. و كانت تقصد بيها كثر الكلام بلا فايدة)ـ
لا .. ـ

و مــوش حديــث عـرضي و عـادي مـتاع تفاعـــل مـع بـرنامــج فــي الـتلفزه بكــل بسـاطـــة .. تِــهــكّـاكه و شوف و شوف .. مــمكن تــتــقبل .. امّا راهو بالنقاش .. و الاختلاف .. و الحماس .. و احيانا التنوبــيز .. و النغــره و الغــضبــه ..كان لزم.. و واحد "مع" .. و واحد "ضد" ـ ..
و يـمـشــيش في بــــالكم زاده اللـــي هالـ:"ضد" هو ضد على خاطــر يــري اللــي حالــة شبـــابنــا بعيـــده علــى الاهـــتـمـام الكبـــير و المبــالـغ فيــه بـهالحــكايـات .. و الا هو " ضد" على خاطر شبابنا لا يــكـفي مـحــــروم مـن الارضيـــة المـاديــة اللازمــة لـحــياتــو ، واللـــي هي : العمــــل... نـزيـــدو نـدمّـــّرولو وَعــْــدُو بالاهــتمام المـَــهـُــوس بنجـــوم التلافــز .. و يـصـْــبـْــحوهوما يـعومـــو فــي البترودولار .. وهو.. يبقى يعوم في الاغــتـراب .. و الاسـقـــاط .. و التــصعـيـد .. و القــأيـمــه مـازالــت تـطــول من الامــراض و العــقـد النفسية اللـــي مـا توصّــل الا للانــحراف والا للتطـــرف

caricature : هشـــام .. لن يـُـطـوى ملف الجريمة

من قتلك يا هشام ؟؟؟؟؟ـ

الى الوزراء الذين أغرقوا قفصة بالزيارات المكوكية منذ اندلاع حركة الحوض المنجمي الاحتجاجية

الى المسؤولين سواء المقالين أو المنصـّـَـبين

الى الاصوات اللاشريفة

التي كان دورها يتلخص في همز و لمز و تأليب العروش و القبائل ضد بعضها

قصد تهميش قضيتهم الاساسية

الى جحافل الــ"أمن"...التي ترابط في مدخل الرديف محولة اياها الى معسكر

الى كل هؤلاء... و الى غيرهم من أصحاب الأيادي الوسخة

.

مَـن قـَــتـَـــل هـشــــام؟؟؟؟ـ

.

للرديّف ان تـفـخـــر بهــذا الطفــل/البــطـل

أين/ مـتى تـدرّبـت على هــــذا أيّــها البطـــل الـــصّـغيــر؟ ـ

فـــي غـــزّه ؟؟؟ ـ

أم ... فــي فقـــرك الـيـــومـيّ ؟؟ ـ

...

سِـيــــَـان

...

مادمــت "...الآن حرّ .. وحرّ ... و حرّ ..."ـ

من اجل ان تـتّـسع خيمة الرديـّف لكل المحرومين

بكلنا مطالبين باش نساندواهالينا في الرديف و المعتمديات المجاورة ليها ..في وقفتهم الصامدة ضد سياسة الكيل بمكيالين في التشغيل و في انتفاضتهم ضد سياسة التجويع و الحرمان و التوزيع اللاعادل و "الجهوي" للثروات .. و في حركتهم الاحتجاجية ضد اللامبالاة اللي قوبلت بيها مطالبهم المشروعة و اللي من اهمها و أقدسها : حق الشغل .. مع اننا ضد تكميم الافواه والمغالطة الاعلامية و حملات الاعتقال اللي طالت العديد من المساهمين في هالتحرك الشجاع و العظيم .. و خاصة الجريء .. لانو موش امر هيّن ياقع تحرك كيما هاذا .. و بالتواصلية هاذي .. و بالالتفاف الشعبي هاذا .. في وقت وقع فيه تلجيم و تدجين كل المنابر و المجالات اللي كانت تتنفس.. و تتمتع و لو بقدر ضئيل من حرية التعبير..فرضاتو فرضان بعد باااارشه تضحيات ومعارك ..
قلت انو هالاعتقالات شملت العديد من الناس .. سواء كانو مناضلين و كوادر نقابية محترمه .. والا حتى مواطنين "لا متسيسين" .. كل ذنبهم انهم قالو ياخي شبيها بلادنا غنيّة بالثروات ، و الفاقونات العام اثناش ن شهر وهيّ تحمّل في فسفاطنا و مشتقاتو .. و الاربعة و عشرين ساعة و نحنا نربشو في المناجم .. و فنينا اعمارنا فيها .. كيما فنوا اعمارهم الذين من قبلنا .. و الذين من بعدنا .. و بالرغم من هاذاكا نحن جواعى و بطالة .. و اولادنا ماكلتهم القهاوي و البيران و يزطلو تحت الحيوط .. من الفراغ و غموض الافاق و انسدادها
يمكن ذنبهم انهم المرّه هاذي قالو هالكلام بصوت مرتفع شويّة .. بالرجال .. بالنّسا .. النسا اللي تحت تاثير الفقر و التجويع ..ماعادتش اصواتهم عورة ..و بلهجة حادة و حاسمة و حازمة .. ماعادش توشويش.. الجوع راهو ما يحبّسو شي..و هاذاكا علاش تصدّعت برشة آذان ..هاك الآذان اللي- اللهم عافينا- ولّت كيما كلاب بافلوف .. معدّله سمعها على معجم واحد : معجم المناشدة و مشتقاتها
..و ما خالف المعجم هاذاكه ، نجنـّـدولو ما استطعنا من ترسانتنا "الامنية" ..اللي تحسدنا عليها الامم الاخرى
الكلام هذا بصراحة رغم اهميتوفي اضاءة هالتحرّك الباسل .. الا انو يبدولي متأخّر شوي على النسق اللي عرفاتو الاحداث اخيرا ..هاذاكه علاش نحب نتوجّه بدعوة لكافة المدوّنين الشرفاء.. انّهم..بالاضافة الى تكثيف التدوين في هالموضوع .. يكونو عمليين من مواقعهم .. و من مؤسساتهم اللي يشتغلو فيها .. و الا يدرسو فيها ..عايلاتهم .. اصدقاءهم .. جيرانهم ..عمليين بمعنى القاء المزيد من الضوء على هالاحداث بجبدانها و الحديث فيها ..و الخوض في اسبابها و نتائجها .. على خاطر كيما ثمّه اللي مواكبها و قريب منها مليح.. ثمّه زادا اللي عندو عليها مجرد معلومات غامضة بفضل صخافتنا البودورو.. و ثمّه زادا اللي ما في بالوش جمله
و زادا .. حاجه اخرى نشوفها هامه .. اللي قريب من ايّ فرع من فروع أي منظمة انسانية و الا هيكل نقابي.. يحاول يعدّي المعلومه .. و يحثّ على تطوير اشكال المساندة .. باش تخرج الحركة من حالة العزلة و المحاصرة اللي صاحبتها منذ اندلاعها