بوشلاكه ... و ... "صلة الرحم" !!

ماااااء ... دماااااء !!!!

البـطحا

نـُو بـَالـْياجْ  ("non.. balayage")

نـُو مونـْت  ("non.. mont ")

نـو تـُور   ("non.. tour")

شكون يتذكّرها .. ههه 

كنت منغمس في لعب البيس و الزربوط وقت اللي سـْـرَى الخبر في الحومة ، و بدت الناس الكل تتلاقف فيه ببرشه شغف و فرح و ابتهاج . و اللي عندو حاجة فيدو حطّها ، و الناس الكل قالت يا البطحا

   البطحا تترشرش

 كل حد يرشرش المساحة الصغيرة اللي باش يستقر فيها هو و عيلتو ، في رمشة عين تكون الكل مرشرشه .. يتبدّل لون التراب و شكلو .. و مزاجو .. و تفوح ريحة البلل ..كل حدّ يأثّث مكانو ، هاذا جرّاية .. و هذا كليم مزيّن  ..و الاخر كليم شوالق ، حصير .. زربية .. جلد علوش .. تابوريّات .. قياسات .. كراسي .. كنتول او ياجور للجلوس ..

خالتي خديجة ( اللي غنيت عليها الغناية هاذي) بحكم قرب دارها للبطحا .. تخرّج البنك اللوح متاعها .. بنك زمني بلنـز يلمّع .. الخدوش اللي فيه زاداتو عمق في التاريخ .

   خالتي خديجة كانت اكثر وحدة تحتفل بالنهار هاذا . رغم تقدّمها في السّن نسبيا ، هي كانت اكبر نسا الحومة ، و رغم ما يفرضو عليها عمرها من ضرورة التحلي بالـ"وقار" و الـ"حكمة" و الـ"نضج" .. الا انّو ميلها للمرح و للحياة و لاستراق لحظات سعادة سريعه من ضنك العيش هو اهم ما كان يميّز كاراكتارها

خالتي خديجة كانت معروفة بفدلكتها الخضرا على صغار الحومة ، هاي خوّفت وحدة من البنيّات الصغيّرات و ڤـالتلها راني باش نعرّسلك بفلان (احد اولاد الحومة الصغار) ، و كي البنية يجد عليها و تبدى تبكي و خايفة .. تموت هي بالضحك

 هاي حسبت روحها باش تطهّر واحد من الولاد (لولاد برك .. خاطر وقتها ما كانش ثمّه في الدنيا كارثه اسمها : وجدي غنيم .. ههه ) رغم اللي كنا نعرفو انّها تفدلك ، لكن اتقانها في التمثيل كان يسيطر علينا و يخلي الحكاية تجد علينا و نهربو .. و كي نشوفو الكبار يضحكو .. نولّو حتى نحنا نضحكو و   دموع الخوف  مازالت ما شاحتش على وجوهنا   

خالتي خديجة كانت تحب المزود .. و تحب تشطح عليه في الاعراس الشعبية متاع الحومة .. مزود السبعينات .. بجاه الله يا حب اسمعني سامورك شعّال .. ارض علينا يا لمّيمه رانا موضامين .. جنه و اطرافك نار .. يا مولات الزين البرڤـي يا عويشة .. ناري عالزّينه يمّة ما جاتش اليوم .. تشترق شربق .. يا حبق ...

  كان فن المزود محاط بنوع من المنع اللذيذ .. كنا نشرو الكتب متاع كلمات الاغاني خلسة من اهلنا .. باش نحفظوهم .. و الاحساس هذاكه اللي كان يجيني ونا نقرا في كتاب اغاني مزود .. هو اللي لقيتو من بعد كي كبرت شويّ .. وقت اللي مسكت لاوّل مرة ونا تلميذ في الثانوي منشور سياسي و بديت نقرا فيه في تركينه من تراكن دارنا .. و الا اول مرة حطيت فيها  K7 متاع الشيخ امام ..

نرجعو للبطحا

ماكانتش الفريجيدارات منتشرة . كانو اللي عندهم فريجيدار في ديارهم يتعدّو على الاصابع في الحومة .. و كانو الجيران يهزّو كاسرونات ماء ..  للي عندهم فريجيدارات يجمّدوهملهم .. ثمّه الاڤــلال و الجرار و البرّادات الطّين .. و البرّادة يغلّفوها بخيشة نظيفة مبلولة بالماء .. باش الماء اللي في وسطها ما يسخنش .. هكّه .. كانوا يتوهّمو انّو الماء يبقى بارد ..

نحنا بحكم اصولنا الجريدية كانت عندنا هاذي

عاد  من لعشية كل حدّ يهزّ مبرّداتو للبطحا .. ماء .. غلّة .. ثمّة حتى اللي يهزّو عشاهم فرد مرّة خاطر جايّين من احياء بعيدة شويّة

البطحا مرشرشة .. ريحة التراب المبلول هي المسيطرة على الجو .. بخور .. ريحة الفول من كرّوسة الفوّال .. اللي حين ما سمع بالخبر جاب كرّوستو و جا .. ساعه ساعه .. النسمة تجيب ريحة .. ما كنتش نعرفها شنوّة .. اما كانت لا تعجبني لا ما تعجبنيش .. بعد عويمات عرفت اللي الريحة هاذيكه هي ريحة البيرة .. و ولّت عاد تعجبني .. ههه ..

الجراري و الاكلمة و الزرابي و التابوريات و الكراسي مبلّصه .. البرادات و الشقايل المغطّية و المّاعن محطوطة على جنب .. كل حد وش حاطّ في مساحتو الصغيرة ..

البطحا تنفجر بالحياة

البطحا تتنفّس بشرًا محتفلين

الصّغار متصفصفين فوق السّور متاع النادي المقابل البطحا .. قاصّين بالكون

الانتظار بتوتّر هو الخيط الرابط بين الناس الكل

بعض العايلات "الـرّقّي" شويّة .. كانوا يقعدو بعاد شوي على البطحا .. تفاديا للاحتكاك بالعامّة .. هه .. و كانت قعدتهم تظهر عليها مظاهر الرفاه .. لكن شايحة و باهته و طافية .. وماهيش منسجمة مع الجو العام .. جو الاحتفال الشعبي المخيّم على البطحا .. يجيبو طواول  و كراسي  و اكسسوارات اخرى ما كنّاش فاهمينها شنوّة .. يمكن راهي قلاسيارات .. مثلا ..

حس .. توشويش .. تصفير .. تصفيق .. ضجيج .. عرك .. فيسع ما يتحزّ .. تبزنيس .. تكحيل .. فرص للقاء العشاق الصغار بعضهم ببعض .. و لو من بعيد

 حتّى من اسيا بطرونة الكارتي تجي هي و "بناتها" المتسفسرين للبطحا .. عشيّتها ما ثماش "خدمة" .. على خاطر الشي اللي باش يصير في البطحا .. اهم بالف مرة من تلبية نزوة عابرة .. اسيا و بناتها ماهمش هاربين .. اما الحدث متاع الليلة هو اللي هارب و ما يلزموش يتفلّت

الببّاصات زادة يجو ..

"بازيلو" .. الشايب السّبنيوري البشوش اللي ديمة لابس "كالباك".. المنفي اللي هارب من فرانكو .. هو و جماعتو السبنيور .. واحد منهم اسمو "خيّو" .. و الاخر نسيتو .. زاده موجودين

كنّا و نحنا صغار ، نتعمّدو المرور من قدّام دارو باش نتلفّتو و نشوفو اللوحة الزيتية الكبيرة اللي معلّقها في كولوار دارو في الحيط المقابل للنهج ، و اللي فيها  مرا عريانة .. و كان احساسنا مزيج من صدمة لذيذة و استغراب و اعجاب .. احنا اللي متعوّدين كان بكواتروات "الله" و "محمد" و"السيد علي" و"بورقيبة" و "جمال عبد الناصر" .. لوحة كيف هاذيكه كانت تثير فينا هاك الفضول اللعين ..  و كان هو يبدا شالق بينا .. و يشوفلنا و يضحك بعينيه ، و يزيد يشرّع في الباب .. و يمروح على المشوى (!) و عامل من استغرابنا و فضولنا الكَمـْـيه متاعو .. ههه

العراء في الفن (اه لو يفهمون) هو الوضوح .. هو الطبيعه .. هو الشفافية .. هو الخام .. هو التحرر .. هو العفوية .. هو الرجوع الى البداية .. بالضبط كيما كان "بازيلو" طبيعي و شفاف و متحرر و عفوي .. يكفي باش نعاود نذكّركم اللي هو كان مطارد من فرانكو .. كان مسكين يحب يقوللنا : اللوحة هاذيكه هي انا .. و انا هو اللوحة هاذيكه .. و لذلك انا هنا .. منفيّ بينكم .. قد تقتلوني .. و قد ترحموني .. و رحمه الناس و احبّوه .. و مات .. و دُفـِن بينهم

قصرين طفولتي .. قصرين اواخر الستينات اوائل السبعينات .. كانت تتميّز بنوع من التسامح الديني و الثقافي و الاخلاقي اللي انقرض لاسباب يطول شرحها

اسيا البطرونه كانت تدخل لدار المدّب مسعود .. الإمام متاع جامع الرحمة  .. اللي مرتو خيّاطة .. و تجيبلها القياس متاع "بناتها" و تخيّطلهم عندها لبستهم  .. و ماكانش المدّب مسعود يتقلّق .. كان يفهم اللي هي في الاخير حريفة عند خياطة  ، تجي .. كي الناس الكل ..  ياخذو عليها القياس .. وتشرب كاس تاي .. و تفدلك شويّة مع النسا الموجودات ،  و تخلّص بالحاضر ..و تمشي على روحها ..

كانت خالتي خميسه مرة المدّب مسعود ، كيفها كيف اغلب النسا وقتها عندهم مشاعر شفقة تجاه نوع اسيا و "بناتها" .. و كانو ، على قلّة .. بل انعدام تعليمهم ، يسمّوهم "الصّابـْرات" .. و يظهرلي من خلال التسمية هاذي ، واضح  التفهّم العميق للعمق الوجودي التراجيدي متاع الفئه هاذيكه من النسا.

وجود اسيا و بناتها في البطحا في ليلة كيما هاذيكه .. ما كانش يجلبلهم ايّ نوع من التحرّش او العدوانية تجاههم . رغم معرفة الناس الكل بوجودهم

الحدث اللي باش تحتضنو البطحا ، حدث جلل ،  عندو نوع من القدسية بحيث يخلّي الناس الكل يحسّو بانّهم اخوة

الفن عندو سحر يخدّر بيه الاخلاق .. يجمّدها .. يحيّدها .. يلغيها الى حين .. الاخلاق تظهر صغييييرة قدّامو

نفس الشي مع الببّاصات اللي كانوا متعايشين مع اهل البلاد و محبوبين و اجتماعيين ، و مع المنفيين السبنيور الهاربين من فرانكو .

ما كانش حتى حدّ يتعامل معاهم انطلاقا من اختلافهم الديني . كانت ثمّه مسحة من التسامح الديني بينهم و بين الشيوخ و الائمّة .

الظلام بدا يخيّم على البطحا

شششششششششت

ششششششت

سي الهادي جا

سي الهادي هاذا كان هو الحاضن لكل ماهو انشطة فنّية و ثقافية في الجهة ..  السنما و عرض الافلام في الساحات و البطاحي الشعبية  ، مباريات  الشطرنج و البايبي بال (baby ball) ، و الياناصيب .. تلقى عندو هو اخر البَكـْـرات  متاع اخر ما غنّت ام كلثوم و عبد الحليم و فريد .

بين قوسين ، المدّة الفايته مشيتلو على امل نلقاش عندو مانييتوفون . على خاطر لقيت عند اختي الكبيرة بكرات

 يرجع تسجيلهم الى اوخر الستينات . و قلتلها ملا كنز عندك ، لازم نسمعوهم و نحموهم من التلف . عطاني مانييتوفون و قالّي اللي عمرها عالقليله خمسين سنه ، و ورّاني طريقة استعمالها ،

شدّيت هاك البكرات .. نظّفتهم من الغبار ، اللي هاذي تمشي شوي و تتقطّع .. السكوتش خدّام .. ماوسع بالهم كانو ناس الوقت هذاكه .. البكرة الوحدة تلقاها ملصّقة بالسكوتش يجي عشرين مرّة .

بقيت نثبّت حتى في نوعية السكوتش اللي كانو يلصّقو فيهم بيه .. سكوتش قوي  و يابس  .. صعب الاستعمال .. ماهوش (soft) بالكل .. و استغربت كيفاش كانوا ينجّمو يطوّعوه لتلصيق حاجات فينو و دقيقة و صغيرة كيما شريط مغناطيسي متاع بكره تسجيل

محتوى البكرات اغلبو تسجيلات عائلية ... اخوتي الكبار اللي وقتها مراهقين يسجّلو في رواحهم  .. اللي تغنّي في نجاة و ام كلثوم ، و اللي يغنّي في جيمز براون و فهد بلان .. و اللي يحكي في نكته  شطرها ناقص على خاطر الشريط تقطّع في حلاوة النكته .. ، و كل مرّة واحد منهم يحسب روحو مذيع و يستجوب في خوه و الا اختو اللي زعمه زعمه فنان و الا فنانه  .. جدّايتي مسجّلينها تقرا في اذكار و مدائح و ادعية ، والدتي تغنّي في "يطوّل عمرك يامّيمه يا حنينه" ، و بفعل ارتباكها من المكروفون نست الكلمات و عوّضتها بتخلويضة من وحي اللحظة من الحروف المغمغمة ، وسط ضحكات اخوتي ..

و لاحظت في الخلفية ، صوت متاع وليّد صغير متاع عامين عامين ونص ماكسيموم ، يشوّش و يحب يفك الميكروفون من اخوتو الكبار ، من غير حتى ما يعرف لا يتكلّم لا ينطق مليح لا يغني لا يعمل حتشي .. هكاكه .. يبدا يبكي و يفك ، و في طمبك الفكّان و الصياح  يتقص التسجيل .. ههه ... و عرفت عاد وقتها اللي السيد المزعج هاذا لم يكن سوى العبدوللّه .. ههه.

قدّاش  كنت مكرّههم في ارواحهم .. و مانخلّيهمش يسجّلو في عقلهم . و اكيد كان الوقت ضاغط عليهم ، على خاطر الاوقات اللي كانوا يسجّلو فيها كانت هي الاوقات اللي يبدا فيها والدي في الخدمه ، و الا في القهوة .. على خاطر "سي السّيّد" كان ما يحبّش الحس و العبث و الفوضى متاع الفروخ في القايلة .. هه ..

اما باش ما نظلموهش و هو توّ في "دار الحق" ، والدي كان من المستجيبين الكبار لدعوات التحرر و الحداثة متاع جيلو ، و ما كانش يحس اللي هاذا يتعارض مع تديّنو و صلاتو و حجّو و زيتونيّتو ..

والدي كان في اواخر الستينات مرات يهز الوالدة للسنما . وقتها صغير و ذاكرتي يا دوب بذت تسجّل . نتذكّر ليله كيفاش هي تقدّ في روحها ،  و تأنّقت و برفنت و تسفسرت بسفساري الهمّة ، موش متاع كل يوم ، و مشت هي واياه سهرو في قاعة سنما الدولاب ، تفرّجو في "رابعه العدوية" ، و من غدوة نشوفلها كيفاش تحكي لاخواتي الكبار بكل اندهاش على الفيلم و تفاصيلو و الوانو و ازياؤو و اغانيه .

قد يكون السلوك هاذا عادي وقتها في العاصمة و الا في بعض المدن الكبيرة الاخرى ، اما في القصرين ، و في اواخر الستينات ، راجل يخرّج مرتو للسنما . حاجة ماكانتش معتادة . لكن والدي كان يعملها . و حاجة كيف هكّه بالنسبه ليّ هي  موضع اجلال و تقدير كبيرين.

اما اطرف تسجيل في البكرات هاذي هو المقطع هاذا من الاخبار و اللي يقول فيه المذيع اللي "مجلس الثورة في ليبيا عقد جلستو الاولى بقيادة العقيد الشاب معمر القذافي" .. وقتها جا  في بالي مشهد "من انتم" .. و مشهد وجهو الغارق في الدم و العرق و الدموع و البزاق (حاشاكم) متاع جرذان الناتو .. و ضحكت من سخرية التاريخ

التسجيلات حوّلتهم الى mp3  و حطّيتهم في تاليفوني ، و في سيديات.. و رجّعت المانييتوفون لسي الهادي .. اما بصراحة .. سمعانهم عندو بنّه استثنائية و هوما في بكراتهم و آلة تسجيلهم الاصلية .. خاصّة كيف يبدا السكوتش خدّام ..ههه

نسّيتوني فاش كنت نحكي ...اه .. ايه .. البطحا

عاد قلنا سي الهادي جا للبطحا

جت الكرهبة السحرية متاع سي الهادي

بل موكب سي الهادي جا

 مئات الاعناق تتلفّت في نفس اللحظة لنفس المكان

يخيّم على البطحا في لحظتها سكون رهيب .. الصمت متاع آخر لحظات الانتظار ..

وقت اللي سي الهادي يبدا يراكي في كرهبتو .. حاجة تشبّه لهاك المشهد في فيلم الرسالة .. متاع  "اتركوها انّها مأمورة".. وقت اللي ناقة الرسول تبدا تمشي بالشّوي وسط ملامح الخشوع و السكون و الانتظار و التشوّق على وجوه المهاجرين و الانصار .. و المكان اللي باش  تبرك فيه وحّدها هو اللي باش يبنو فيه اوّل مسجد ..

مئات بل الاف العينين متاع انصار البطحا و المهاجرين ليها J يتبّعو في عملية تنزيل البكرة الكبيرة متاع الفيلم من الكرهبة المقدّسه ، و البروجكتور .. و الكابلوات .. و عمليّة تركيبها فوق السّور ، و ما نطوّلش عليكم ، وقت اللي يبان المستطيل الضاوي على الجدار المقابل ، نحسّو قلوبنا خرجت منّا و طارت ترفرف على هاك المستطيل الضاوي

و يبدا العرض

عرض الفيلم

كانت الافلام اللي يعرضوهالنا في البطحا وقتها عادة ما تكون هاك الافلام الاستعراضية البسيطة متاع صباح و سميرة توفيق و الا افلام هندية و الا واستارن و الا افلام عمار الخليفي .. الفلاقة .. مصباح الجربوع ..

مرة اثناء عرض فيلم واستارن ، وقت اللي سي الهادي حبّ يعدّي مشهد القبله بين البطل و البطلة بسرعة ، غلط بشكل توقّفت  التصويرة في مشهد القبلة بالضّبط . و تطلّب منّو وقت للخروج من المأزق وسط ضحكات  المتفرّجين اللي فهموه اش كان يحب يعمل ، و تمّ هضم الحكاية بسرعة و بخفّة .. و تم تجاوزها . و حتى حد ما كفّرو و حتى حد ما نصبلو المحكمة متاع الاخلاق البالية

التذكّر جميل .. لكن ما نفع التذكّر .. اذا ما يأدّيش لطرح اسئلة محرقة تخص الحاضر ؟ و المستقبل؟

ويني القصرين هاذيكه ؟؟؟

ويني قصرين التسامح و الحداثة ، و قبول الاخر المختلف دينيا و اخلاقيا و ثقافيا

جبّانة الفرانسيس كانت منتصبة في قلب المدينه ، قبور متساوية  الاحجام و منظّمه و انيقة و رشيقة ، و كل قبر فوقو صليب ، كنا نمشو نلعبو فيها الغميضة و الدّريـﭬـة .. و نخوّفو بعضنا فيها

تعايش الجيل هاذاكه مع المختلف عليهم ، كان يمثّل نواتات و ارهاصات كبيرة متع نهضة حداثية شعبية و موش فقك نخبوية .. في القصرين . لولا التهميش الاقتصادي اللي شوّهها و منع تشكّلها

بالطبيعة ،  الصورة ما كانتش وردية ياسر ، باش الواحد ما يطيحش في الماضويّة . السجون كانت تعجّ بالمعارضين اليساريين و القوميين ، و بالطلبة..و الديماغوجيا كانت خدّامه . و اللي بيه الفايدة ماكانش موجود : التنمية الجهوية و التشغيل ..

صعيب بل مستحيل تبني منظومة قيمية حداثية من غير بلاتفورم مادي اقتصادي ثري و متحرّك ، تتربّى فيه الناس و تأسّس فيه قيم اخلاقية جديدة و تنجّر و تهذّب تصوّراتها للوجود و للعلاقات الاجتماعية .

باختصار شديد ، انتهى العرض ، بدت العايلات تروّح ، الحصرّة تترولى .. الاكلمة تطّبـّق .. زوز من غادي يشاملو في بنك خالتي خديجة و راجعين بيه للدار .. و يخزرو لبعضهم .. و يعاودو يستعرضو في اكثر المشاهد اللي اثارتهم من الفيلم .. شفت منين قالّو كذا ؟ .. شفت منين عملّو كذا ؟ .. شفت الغناية الاخّرة  محلاها .. ؟ ... قشور الفول و القليبات .. الياجور و الكنتول اللي كان يقوم بدور الكراسي .. و بدا التراب يشيح من الترشريشه ، و بدات ملامح الحياة تختفي من البطحا اللي مع مغادرة اخر المحتفلين ليها ،  استعادت فراغها و وحشتها

الجدار السحري المقدّس ، اللي كانت صباح تغنّي فيه لرشدي اباضة ، و الا كانت يحتضن الكمائن متاع الفلاقة ، و الا كان مسرح لصولات و جولات و بطولات مصباح الجربوع ... الجدار استرجع شحوبو ، و ظلمتو ، و ظهرت فيه النتوءات و الحفر و الخدوش و بقايا المساحات اللي ماهيش مليّقة و مدهونه كيما يلزم ..

ليلتها يظهرلي ما تعشّيتش .. و روّحت العين تسقي العين بالبكا على مصباح الجربوع كيفاش أعدموه الفرانسيس . بعد كل تلك الملاحم الاسطورية و الخسائر اللي كبّدهالهم . و خواتي الكبار و والدتي يسكّتو فيّ و يرضّو فيّ و يفسّرولي اللي راهو تمثيل ، ونا الشّهـﭬـة تهزّ فيّ وتحطّ .. ما سكتّ كان كي  نـْـزَر عليّ بابا و حمـّّر فيّ عينيه .. خوفا على ولدو الراجل من اصابتو بلعنة الاحساس .. وقتها رجـَـعت للجادة .. هههه

حكاية واحد يموت من اجل بلادو .. كانت اكبر بياسر من قلبي الصغير وقتها ، قلبي اللي كان مشغول بالزربوط و البيس .. و من ليلتها  بديت ندرك اللي قلب الانسان ، ممكن يتسع لحاجة اكبر  من البيس و الزربوط .. حاجة كان معبّي بيها قلب مصباح الجربوع .

التحذليق .. يبقى تحذليق

الحذلقة هو عنوان متاع شابيتر كبير تنضوي تحتو عناوين صغرى منها البروباغنده و التعتييم و التطبيل و تتفيه النضالات و التحركات الشرعية و تجريمها ، و ايهام الراي العام بنسب نموّ  مغلوطة

 المتحذلقون ايضا هم مناضلون !!  فهم يستميتون في تزويق العفن ، و في تعتيم الوضوح .. و  هو نضال ما بعده من نضال

كلّكم يتذكّر الكشاكش اللي تتناطر من فم برهان بسيّس مساء الثلاثاء 11 جانفي 2011 و هو يؤكّد على انّ نظام بن علي لاباس و قايم بواجبوو اكثر ، و انّ "الحاقدين" .. "جرحى  نجاحات نظام بن علي"  هم  المتسببون في احداث الشّغب .. هاذيكه هي الحذلقة

توصيف خطاب بعض اللي نصّبو رواحهم ناطقين رسميين باسم الحكومة بالحذلقة ماهوش تجنّي و انما وصف .

اذكر في مدّة الهيئة العليا للانتخابات ، ان احدهم بلغ به التنسنيس و التبربيش و التنسوير على عياض بن عاشور رئيس الهيئة وقتها ، الى انّو لقاه مرّة شرب قهوة مع واحد في مقهى على ملك شخص ولد خالة امّو تربطو علاقة مصاهرة باحد الصهاينه  ، بينما ، و كتعليق على لقطة "عنّقني" بين الجبالي و ماك كاين ، لم نسمع منه سوى اربع كلمات متاع طردان ملام بالتعبير الشعبي :  "العناق ليس ضرورة ديبلوماسية"  . فقط .

الحذلقة انّك تختزل الزمن اللي استغرقاتو تجاوزات و انحرافات بل جرائم السلفيين في "بعض الاحداث التي جدّت في البلاد خلال الايام القليلة الماضية "  و الحال انّو ، و كمثال بسيط و قريب من اذهانّنا  ، حكاية بل كارثة تعطيل الدراسة بجامعة منوبة وحّدها ، عندها اكثر من ثمانية اشهر ، و ماهيش فقط "في الايام القليلة الماضية"

منذ مسك النهضة بحقيبة الامن الداخلي ، لا يكاد يمر يوم لا نسمع فيه عن اعتداء موثّق و مسجّل من هؤلاء  "الكهفيـّين"  موش فقط  على المفكّرين و الاعلاميين و المبدعين و الفنانين و على كل نفس فكري تحرري مختلف  .. بل حتى على المواطنين العاديين و هم بصدد ممارسة حرياتهم الشخصية البسيطة .. في ماكلهم و مشربهم و ملبسهم  ، و في حرماتهم الجسدية ، بالتالي يولّي  التحذليق هو التمادي في تتفـيه خطر السلفيين و التمادي في اعتبارهم مجرّد فزاعة

التحذليق هو اعتبار انّو الخطر هذا ما يتقارنش بالخطر في بلدان اخرى ، يعني ، و هنا لازم ندخّلو فيها شويّة كاريكاتير باش نوصلو للمعادلات التالية : صحيح قصّان ثلاثة صوابع خطر ، لكن ماهوش اخطر من قصّان يد كاملة !!!!!

صحيح قصّان يد كاملة خطير ، لكن ماهوش اخطر من قصّان راس مواطن  !!!!!!!

صحيح قصّان رأس مواطن شي خطير ، لكن ماهوش اخطر من نصب مشانق جماعية داخل الاحياء و الحوم !!!!!!!!!!

صحيح ، تعنيف الفنانين و المبدعين شي خطير ، لكن ماهوش اخطر من تفجير نوادي و دور ثقافة !!!!!

وهكذا دواليك .. الى ان نصل ربما الى اليوم الذي يطلّ فيه علينا احد المتحذلقين الاخرين و يقول : نعم ، نحن نعيش حربا اهلية و نقتّل بعضنا البعض ، و لكن هذا ليس اشدّ خطورة من ان يتم احتلالنا من طرف  قوة اجنبية اخرى

و بين قوسين ، من علائم الفشل الداخلي اعتماد المقارنه مع ماهو اسوأ كآلية لفهم انفسنا

الحذلقة هي ايهام الراي العام بـ "اجراءات امنية مشددّة اتخذتها الحكومة" في الوقت اللي نقابات الامن تصدر في بيانات الاحتجاج و التململ على انّها ممنوعة (من طرف جهات حزبية عليا في الداخلية) من ممارسة عملها كما ينبغي  .

التحذليق هو اختزال المعارضة التونسية فقط في  منحى " يميني واضح" بل "ليبرالي متشدد". مما يأدّي للاستخلاص انّو الحكومة الموقّرة هي حكومة خيارات اجتماعية بامتياز ، و هي حكومة الزواولة و القلالة ، و حكومة "التدخل الاجتماعي " بل تكاد تكون  حكومة اشتراكية J   و الحال انّو الشق المتنفـّذ في هذه الحكومة لا يتورّع من التهديد ببيع المنشآت و المرافق العمومية إن هي لم تخضع لفلكها (افتعال معضلة  الاعلام و التلويح ببيع مؤسسة الاذاعة و التلفزة)

التحذليق هو المحاججة بمكيالين : التنديد و التشهير الضمني الماكر  باحد الاطراف اللي طلبو تشكيل حكومة انقاذ وطني  تحت حكم المخلوع . و تجاهل انّو  الطرف القوي في الحكومة كان هو نفسو طلب من المخلوع ان يطلق الحريات و يعمللنا 7 نوفمبر جديد (ورد ذلك يوم 10 جانفي 2011 .. و اهالي تالة بصدد التذبيح .. على لسان زياد الدولاتلي احد قياديي النهضة و ممثّلها في هيئة 18 اكتوبر.. )

الحذلقة هي ان ندّعي الوفاء لفرحات حشاد ، و نزوّق مدوّناتنا باللوغوات ، و ندعو الى فتح التحقيقات في مقتله ،

بينما لا ننبس ببنت شفه على ما يتعرّض له الاتحاد (متاع حشّاد هاذاكه) من هرسلة و تشويه و  اعتداءات و محاولات تركيع و اخضاع .

الحذلقة كذلك ان يوجّه احد  "جرحى الانتخابات"  (استنادا الى توصيفه هو للمعارضة ، و استنادا كذلك الى عقلية "الـغـُـلب" السطحية التي تقود ليس فقط البسطاء بل ايضا اولئك الذين عـُـرفو بإعادة صياغة  تفكير البسطاء  بمفردات رنّانه)  و تحت يافطة "حياد" و "موضوعية" باهتة لم تعد تنطلي على احد ، نصائح الى المعارضة بـ "تعديل و تصحيح أدائها" .. و الحال ان من هم في سدّة الحكم أولى و أحق بهذه النصائح ، لانّهم ، المسؤولين الاولين على الانتكاسة التي تعـيشها البلاد إن امنيا او اقتصاديا او سياسيا . و من غير ما نذكّر هنا بالارقام و مؤشّرات النمو الخاطئة  اللي يموّهو بيها على الناس . و اللي تنم على جهل كارثي بالاقتصاد .

و من الطّرائف المبكيات المضحكات ،  انّو في نفس اليوم الذي  يتم فيه توصيف المعارضة بـ "جرحى الانتخابات"  انتحر احد "جرحى الثورة"  الحقيقيين ... احتجاجا على الاهانه و التعنيف و الاذلال الذي تعرّض له .

الحذلقة هي  ترديد جمل مبهمة  من قبيل ان "هذه الحكومة هي منتخبة" .. و الحال انّ الكثير من تلاميذ الابتدائي الان باتوا يفهمون انه اذا كان  المجلس التاسيسي منتخبا ، فإنّ الحكومة ليست منتخبة بل مفوّضة  تبعا لمحاصصة حزبية  بين الاحزاب  الفائزة .. او .. الاحزاب .. اللي رغم انها ماهيش من الانتخابات "جريحه" .. لكنها قاعدة تتحف فينا كل يوم  ... بفضيحه    

نيران صديقة ؟ ام .. سنما ؟؟

عدنان منصر الناطق الرسمي باسم رئاسة الجمهورية : " حتى لا تحفر الحكومة قبرها و قبر الثورة ؟ " .. "قضاء مريض" .. " عـُـلويّة شرعية الثورة على الشرعية الانتخابية" .. و يتحدّث عن "حمق بعض من في الحكم الان " ممن يحمّلهم مسؤولية التخاذل في محاسبة رموز الفساد .
المستشار القانوني لرئاسة الجمهورية محمد شوقي عبيد : "لابد من اقالة هذه الحكومة التي برهنت على خيبتها و فشلها" .. " النهضة بـ 41% من المقاعد تحكم و كان لديها 66% " .. ثم يستنكر مشروع " اسلمة المديرين العامين و الولاة و المعتمدين " و يحمّل الحكومة مسؤولية قرار "ستاندرد اند بوورز"
ايّوب مسعودي ، مستشارالرئاسة في دائرة الاعلام يقول : " اصبح البنك المركزي الممثل المحلّي لمصالح الدوائر الراسمالية التي تحوم حول ثورة تونس مثل النسور" .. ويضيف : "النخب الجديدية التي اتت بها الثورة الى سدة الحكم ستعيد نفس اخطاء الانظمة السابقة في رهن البلاد الى دوائر النهب العالمية"
اصوات من داخل قصر قرطاج و بنسق متقارب زمنيا ، يطلقون النار على الحكومة
نظرا لانّ احتمال "استفاقة جماعية متأخّرة" لهؤلاء ، غير وارد . كذلك احتمال ''انفلات و تسيّب على مستوى المستشارين الرئاسيين " غير وارد ، لانّ الزقزوقي عندو سابقة في اقالة المستشارين المتخاذلين (محمد الكحلاوي) .. فما بالك بالمتسيّبين او المتنطّعين .. يبقى الاحتمال الاكثر ورودا هو * استثمار عجز الحكومة و فشلها في البدء للحملة الدعائية للانتخابات القادمة ، و ذلك بتبرئة رئاسة الجمهورية من هذا الاداء الكارثي للحكومة .
و هذا الاحتمال يؤدّي الى سؤال هام : هل يتمتع هؤلاء المستشارون بكل تلك الامتيازات ، و هل يتقاضون الاف الدينارات من اموال الشعب ، مقابل الانخراط - و قبل الاوان- في الحملات الدعائية لجهة حزبية دون اخرى ؟؟
و في جميع الحالات .. حكومة المحاصصة السياسية عديمة الكفاءة .. بدت تعمل في الريحة

في الشّاص

دو .. ري .. ميـ .. ــليشيات

موعدنا 1 مــاي

العنف الذي مورس اخيرا (و سيمارَس لاحقا) يبيّن بجلاء و وضوح ما بعده وضوح ان الاوراق الهامشية المائعة الفضفاضة المفرغة من ايّ محتوى سياسي جاد و لصيق بالاسئلة الكبرى للثورة ، و التي اتقنت النهضة لعبها سابقا لم تعد مجدية ،اوراق التكفير و مداعبة الوجدان الديني و التوصيفات الاخلاقية السيئة للخصوم السياسيين و احتكار الحديث باسم الهوية و ادّعاء امتلاك احقيتها بذلك الخطاب . كل تلك الاوراق باتت مكشوفة للشعب قبل النخب . الورقة الوحيدة التي لا تزال ممكنه ( وهذا من سوء حظّهم) هي ورقة العنف و القمع . و لئن كانت هذه الورقة تمثّل اخر امل لهم في البقاء السياسي ، فهي ، مع ذلك ، من الهشاشة و الاهتراء بحيث ان احتراقها و احتراقهم معها امر سهل للغاية .

الديمقراطية هي الورقة الرابحة التي لا و لن تملكمها النهضة . لا فقط بحكم مرجعياتها الفكرية و الثقافية الاصولية الماضوية السلفية المقنـّعه ، بل ايضا بحكم ممارستها السياسية التي تتميّز بهذا النسق السريق في مراكمة ... الاخطاء .

موعدنا 1 ماي

ـ9 افريل 2012 ...النهضة تمنع الاحتفال بذكرى الشهداء

منع الالاف المؤلّفة من الاحتفال بذكرى عظيمة كيما اليوم (ذكرى الشهداء 9 افريل 1938) يأكّد اللي عقلية "التّأسيس" اللاتاريخية مازالت تميّز تفكير و ممارسة الخوانجية .. في الجامعة اوّل مؤتمر لمنظمتهم النقابية الزّبالة اسموه "مؤتمر التاسيس" ناسفين بذلك تجربة نضالية طلابية كاملة يشهد لها العالم باكمله . لا معنى للحقب الماضية من تاريخ هذا الشعب . لا معنى لـ 9 افريل 1938 او لغيره من التواريخ .. التاريخ بالنسبة للخوانجية يبدا من لحظة استيلائهم على السلطة لينطلق بذالك مسلسل التنكر لما راكمه سابقوهم من خبرات و تجارب و مكاسب

عقلية "التاريخ يبدأ بنا" هي الوجه الاخر للدكتاتورية .. و هي المدخل الاوضح للاستبداد و الغاء الاخر .. الفكر الاخر..

.

الفهم الاخر ...

و حتى التاريخ الاخر

NAHDHA GAME OVER

تونس مدنية رغم نعيق الغربان

عن غزوة المنقالة

logo : Free Ahmad Foued Najm

شريعة و الا شرائع

يضربها قد قد بالشّمنكه ، و يتقرّع ، و يمسّح على الدّعلة متاعو ، و يمسّح لحيتو بعطر الموتى ، و يرمي جشّتو في وسط هركة يلزمها تكون قصيرة ، كوم كوا تواضع ، و ابتعاد عن الخيلاء و الكبرياء و اللباس المتجرجر متاع الملوك ، و زادة هركه كوم كوا حرام السّروال باش ما يفصّلش افخاذو ، في حين انّو منظر الهــُـركه و هي كابستلو على العـْـقـُد (موطن العـُــقـَـد) متاعو وقت اللي يجي الريح مقابلو اشوم و أشومين ، و يخرج يستمـَدّ و يستواقف في نفس الشّارع الي استشهد فيه شباب محب للحياة الحرة العزيزة الكريمة ، و يهزّ لافته فيها : "لا للديمقراطية ، نعم للشريعه"

اخزر وراك شويّ سيدي خويا ، بربش شوّية في الكلاصن متاع تاريخك ، اللي مع الاسف تشترك فيه مع نفس الشّاب الانيق الرشيق المرح المحب للحياة اللي إذا تثبّت شوّي تو تلقى بقايا دمّو مازالت لاصقة في الكيّاس ، بالضبط تحت سبادريك المصنوع عند الكفّار

خلّينا من كلّ من اعتبر نفسو اوفى واحد للشريعه بدءا بحادثة السقيفة و انتهاء بارهابيّي بير علي بن خليفة

مرورا بارهابيّي جامعة منوبه ، و الكتل اللحمية المستثارة اللي كل نهار جمعه تحتل جامع الفتح و الباساج

خلينا من هاذا الكل

عندما اشترط الشيعة في الحاكم / الخليفة / الامام ان يكون من آل البيت كانوا يستندون الى الشريعه

و عندما اشترط الشنّة في الحاكم / الخليفة / الامام ان يكون هاشميا كانوا ايضا يستندون الى الشريعه

و عندما نآى الخوارج بانفسهم عن هذين الشرطين و رأوا ان العمل الحق هو المقياس الاصلح في مبدا الامامه كانوا ايضا يستندون الى الشريعه

وعندما كفّر الخوارج كلا من عثمان و علي و طلحة و الزبير و عائشة و معاوية و سائر الحكام الامويين كانوا ايضا يستندون الى الشريعه

و عندما واجه الحجاج عنفهم بعنف اشد و اودع 80000 بين رجل و امراة في السجن و قطع راس حوالي 130000 كان ايضا يستند الى الشريعه

و عندما اعتزل واصل ابن عطاء حلقة استاذه كان ايضا يستند الى الشريعه

و عندما تنكّر الخوارج لعلي في معركة صفين و قرروا قتله هو و معاوية كانوا ايضا يستندون الى الشريعه

و عندما حارب طلحة و الزبير و هما صحبة الرسول عليا و ارادوا قتله كانوا ايضا يستندون الى الشريعه

و عندما اعتلت عائشة زوجة الرسول و ام المؤمنين الجمل المصفّح لقتال علي كانت ايضا تستند الى الشريعه

و عندما وقف كل من سعد ابن ابي وقاص و عبد الله ابن عمر و محمد ابن مسلمة و اسامة ابن زيد موقف الحياد من تلك الحرب بين عائشة و علي كانوا ايضا يستندون الى الشريعه

و عندما اتهم الامويون عليا بقتل عثمان و كفّروه باعتباره مرتكب كبيرة كانوا ايضا يستندون الى الشريعه

و عندما يعتبر الشيعة ان الامامة /الخلافة هي ركن من اركان الاسلام الاساسية فهم في ذلك يستندون الى الشريعه

و عندما يرى السنة عكس ذلك ، فهم ايضا يستندون الى الشريعه

و عندما مازج غلاة الشيعة الايمان التوحيدي بالتيارات التناسخية (تناسخ الارواح) و الحلولية (حلول الخالق في المخلوق) التي تناتقلوها من ثقافات الشرف الاقصى ، و اعتقدو بحلول روح الله في جسم علي ، كانوا ايضا يستندون الى الشريعه

و عندما قامت "مدرسة الرأي" كمحاولة للتأقلم مع اوضاع و بيئات جديدة لم يكن ممكنا موضوعيا للمصدرين الاساسيين للتشريع الاسلامي (القران و السنّة) ان يـَـسـَـعاها كان مؤسّسوها ايضا يستندون الى الشريعه

بل عندما وصل الامر ببعضهم الى الى عدم الاخذ ببعض الاحاديث لصالح إعمال الرأي كانوا ايضا يستندون الى الشريعه

و عندما قامت "مدرسة الحديث" كمدرسة مناقضة لمدرسة "اهل الرأي" ، بل عندما قال بعض رواد مدرسة الحديث باولوية الحديث على القران و بنسخه له كانوا ايضا يستندون الى الشريعه

اهم المحاور الفكرية لـ"علم الكلام" ، رغم تهويمها في الميتافيزيقا ، كانت منطلقاتها و نتائجها سياسية بالاساس .

لم يكن لمسألة"هل ان مرتكب الكبيرة كافر ام مؤمن" ان تحوز كل ذلك الاهتمام من المتكلّمين ، لولا منشأها السياسي المتمثّل في اتّهام عليّ بالضلوع و المشاركة في قتل عثمان ، و بما ان القتل من الكبائر ، وجب تكفير عليّ ، ممّا يقصيه مباشرة من احقّيته بالخلافة .

كذلك مسألة القضاء و القدر ، و القدرية و الجبرية ، ذلك المبحث الفلسفي المحلّق في المجرّد النظري ظاهرا ، المعبّر –باطنـًـا – عن حركات التمرّد ضد استبداد الخلفاء (و باسم الشريعة ايضا) و محاولة تاسيس نظري لفعل سياسي بحت ، يحرّض و يحثّ على "قدرة" الناس على تغيير حياتهم و مصائرهم ، و يرفض فكرة ان الفقر و الجوع و الظلم و الاستبداد هي ابتلاء و قضاء من الله و "لا رادّ لقضائه"

النّص الديني ، و مشتقّات النص الديني ، و كل ما اتّصل به من افكار ، تشريعـًـا و تفلسفـًـا ـ ليس معزولا عن سياق سياسي و اجتماعي متغيّر و متحرّك و محدد زمانا و مكانا

ثلجك .. ما دفـــّــانيش

http://www.youtube.com/watch?v=h07-k6hfFS4

ثلجك دفــّاني .. جـَـمْري برَّدَك

رغم روعة الغناية هاذي في سياقها العاطفي ، و روعة الصور الرومنسية و الموسيقى القوية .. الا انّو وقت اللي نكلّمو ﭬصرينـّا العزيزة ، نـﭬولولها ثلجك ، مع الاسف ، مادفــّـاناش .

ثلجك كـْـشفنا .. و كـْـشفهم

ثلجك كـْـشف بردنا و فقرنا و مْرضنا و عـْـرانا و ﭬــْـرانا

و سطوحاتنا الطايحة و شوارعنا الخايخه

و كشف كذبهم و عجزهم و نفاقهم و لعبهم بينا و باصواتنا

ثلجك ورّا اللي نحنا كنا ، و مازلنا ، في اخر الحسبة

لا الحكومات اللي تعاقبت علينا منذ اكثر من خمسين سنه حمتنا منّو

و لا اللي توّ ، و اللي من المفروض انّهم ناطقين باسم الثورة ، اقنعونا بأداء جادّ و جدّي باش يحمونا منّو

لون ثلجك لبيض زاد غـَـمّـقْ و وضّح الوان اخرين ... متاع حاجات اخرين ..

ثلجك لبيض زاد وضّح الاصفر متاع المرض

و الرمادي متاع النفاق

و الازرق متاع الهـَم

و الاسود متاع رايات الظّلام و الظّلم

و البنفسجي متاع الاستبداد المتنكّر في لحية و قميص

ثلجك .. ما دفــّـاناش .. و حتّى جـَـمـْـرْنا .. ما برّدكش

المال مقابل السّروال .. كاريكاتير

كاريكاتير : برد .. سياسة .. سوريا