شويّه موسيقى

RUSSIAN FOLK - Midnight In Moscow (Balalaika) - www.itoky.com

حبيت نسمّعكم
المقطوعه هاذي..اللي اسمها

midnight in moskow

من المقطوعات اللي نحبّهم برشه

و اللي تجيني كأنها نسمه بارده

فيها رذاذ خفيف متاع ثلج

في نهار شهيلي كيما اليوم

البالالايكا... آلة موسيقية تقليدية روسية

ARTiculer-enfants : مدوّنه جديده للاطفال : فكرة رائعة في حاجه للتشجيع

حبيت نعرّفكم على مدوّنه جديده

مازالت في المهد

وفكرتها رائعه

و قابله للتطوير

المدوّنه هاذي اسمها

articuler-enfants

انشأها صديقنا

artticuler

اللي نتمنّو نولّيو نشوفوه على تن بلوغ في اقرب الآجال

و أراد من خلالها انّو يأسس فضاء تدويني للاطفال..يحسّسّهم و ينفّحهم و يدرّبهم على التدوين .. خاصة اذا تكون الماده المقدّمه ليهم غنية و طريفة و فيها الاضافة و الافادة و التسلية و غيرها من هاك الجو اللي يحبّوه الصغار

الحاصيلو

اللي يساعدو .. يمكّن ابناؤو من انّهم يساهمو في تأثيث هالمدوّنه بكل الاضافات الطفولية الجمبله .. و فكّ عليهم و من الكبار اللي قال فينا جاك برال

les adultes ... sont tellement cons

:)

متضامن مع سليم بوخدير

انا متضامن مع الصحفي و المدون المعتقل

سليم بوخذير

و اعبّر عن رفضي لكل اشكال الوصاية

و تلجيم الافواه

و كبت الحريات

ـ" البؤســـاء" يعودون 2

ما عنديش ربع ساعه

ملــّـي متعدّي من نفس البلاصه

نلقى نفس الجماعه، تقريبا ،اللي كنت حكيت عليهم هنا

تحت نفس الحيط

في نفــس التوقيت

يمارسو في نفس النشاط

بنفس الحماس و التركيز

مع فرق بسيط

انـّــوعددهم ... زاد

خذوا ارقامكم الكثيرة .. و اعطونا حرّيـــة واحده

قبل إغراق مسامعنا

و عيوننا

في وابل من الارقام.. المضخّمه

و المبهرة

أطلقوا سراح كل المعتقلين ..و الموقوفين

من معطلين ... مهمّشين... و مناضلين

إفتحوا تحقيقات جادة

و شفافة

حول جرائم مقتل هشام علايمي

و حفناوي مغزاوي

و غيرهما

من مصابي

و جرحى

انتفاضة الحوض المنجمي

و افتحوا ملفات تحقيق جاده

حول الاعتداء ات الصارخة

التي استهدفت حرمات المساكن

و الدكاكين

كابـــــوس

البارح عملت كوشمار .. هاو اش شفت

صفّ كبييييير متاع ناس معصّبينلهم عينيهم بشوليقه كحله .. و ايديهم مربوطه لتالي و مجرّحه .. ريقهم شايح .. عطاشى .. ساقيهم مسلسله .. واحد ورا واحد .. الكـِــنْدي .. الطاهر الحداد .. ابن سينا .. حسين مروه .. الحلاج ..مرسيل خليفه .. محمود درويش .. غيلان الدمشقي .. يوسف شاهين ... و برشه اخرين ما نعرفهمش ... و يطلـّعو فيهم بالوحيـّد بالوحـيّد فوق منصّه لوح مـّسّخه .. قديمه ..ماكلها السـّوس و معـشّــشّه فيها الفيران و الجرابع .. المنصّه هاذي فيها مقصله .. يقصّو فيها في روس العباد

و في وسط هالطابور الكبير .. ثمه شخص ، بالسيف ما عرفتو من كثرة الغبابر و العرق و الدمومات و الكدمات اللي أخفتلو ملامح وجهو الطفولي المألوف .... العين زرقا منفّخه .. الوذن مشرومه .. مما يدلّك على انّو تعرّض لتعذيب وحشي اثناء التحقيق معاه في تهمتين ، الاولى : الانحراف ... و الثانيه : اتهام الملايكه بممارسة الحب

هالوجه هو وجه نزار قباني

الزّزّزّحْحْحْ......هاذا زادا ؟؟؟؟؟؟؟؟؟ ـ

و ما نعرفش على روحي كيفاش طـِــيقرْتْ و تنطّرت من وسط الجمهور .. و جريت للمنصّه المشومه .. و تلفّت للسيد اللي مسؤول على القصّان .. قصّان روس الشعراء و المفكرين و المبدعين .. و طلبت منّو انّو يطيّش هاك الشاقور من يدّو .. و من مخـّو .. ويستجمع قواه ..و يتعلم انّو يسمع الآخر المختلف .. بعيدا على المشانق .. و المحاكمات .. و يحكي في الشعر .. في الفن .. في الجمال .. في الابداع

يا سي الجلاد

راهو تصنيفك للشعر و الشعراء الى منحرفين و غير منحرفين يناقض أصلا منظومتك الفكريه اللي تعتبر الشعراء الكلهم .. كدس واحد متاع مهبّله .. يقولون ما لا يفعلون .. في كل واد يهيمون .. لا يمكن ان يتبعهم الا الغاوون..بالطبيعه ، باستثناء حسان بن ثابت واشباهو من مدّاحي الخلفاء و امراء المؤمنين

بالتالي ، يكفي انّو نزار قباني و الا سعدي يوسف و الا درويش و الا غسان زقطان و الا مظفّرو الا اراقون و الا اولاد احمد ...يكفي انّو يحمل لقب شاعر ، و يقترف جرم الكتابه .. و يمارس خطيئة قول الشعر .. باش يتحاكم .. لذلك لا داعي لها التبربيش الزايد في قصايدو ، و ها المجزره اللي تعملت في شعرو، قصد التنقيب على الجمل اللي ذكر فيهم "الله" ـ و الا شبّه حبيبتو بالله و الا شكر الله لانّو خصّو دون الاخرين بحبيبتو الرايعه

تهوّ من اصلو مغضوب عليه ، فقط لأنّو "شاعر" .. سواء ذكر "الله" في شعرو ، و الا ما ذكروش

ثمّ انّو الشعر الجيد .. خاصة عند اللي في حجم و في قامة نزار .. هو بمثابة حالات تجلّي و جدانيه .. و عباره على حمّى من العشق .. هذيان حب .. إفلات طفولي من سجن النمط ..من معتقل المألوف .. اندهاش جديد بسحر اللغه .. "رسم بالكلمات" و التحام عنيف .. متدفــّــق.. بالاشياء و التفاصيل و التاريخ و الاسطوره و...و...و

باختصار هي حالة وَلـَــهْ وْ وَلـَـعْ صوفيّه.. و ما أدلّش على هاذا من انّو الحلاج قال في حب الله .. نفس ما قاله قيس في حب ليلاه

قال الحلاج : ـ

انا من اهوى و من اهوى انا....نحن روحان حـــــلنا بدنا
فإذا ابصرتنـــــــــي ابصرته ...و إذا ابصرته ...ابصرتنا

و قال قيس ، عندما سئل : أتحبّ ليلى يا قيس ؟ قال : لا
قيل : ولماذا ؟؟ .. قال : المحبة ذريعة الوصْلة .. و قد سقطت الذريعه .. فليلى انا و انا ليلى

مع فرق بسيط هنا في الذات المعشوقه المتوحـّــَـد معها

و كيما بالضبط تقمعت الحركات الصوفية من طرف التيارات الاصولية الجامده ..و وقع التنكيل بروّادها .. في عوض تاقع دراسة اصولها الاجتماعيه و الثقافيه و السياسيه .. و البحث في الاسباب العميقه لمنشأها .. باعتبارها ردّة فعل على حكام متسلّطين باسم الدين .. مستبدين باسم الله

أسمعو معايا خونا أبو جعفر المنصور اش يحكي للرعيّه : ـ

ـ"أيّها الناس ، انما انا سلطان الله في ارضه اسوسكم بتوفيقه و تسديده ، و أنا خازنه على فيئـه..أعمل بمشيئته ، و أقسم بإرادته ، و أعطيه بإذنه ، قد جعلني الله قفلا عليه إذا شاء أن يفتحني لأعطيـّـاتكم ..و قسم فيئكم و ارزاقكم ، فتحني . وإذا شاء أن يقفلني ... قفلني" ـ

و لذلك اعتقد انّو التيار الصوفي...رغم ما كان يحب يغلّف بيه دعوتو من عشق الهي خالص و كلام في وحدة الوجود .. فإنّو زادا الفساد السياسي و الاجتماعي يعتبرو من اهم عوامل وجودو و تناميه .. وهو ما يفسّر زهدهم في الدنيا .. كردّ فعل متطرّف على الحكام اللي استسلمو بشكل كلّي " للّهو" و "المجون" و " العبث" ـ

و الحقيقه ، حتّى كان باش نخرجو شويّه عالموضوع ، و الحديث ذو شجون .. موش كان التيار الصوفي وقع التنكيل باصحابو .. ياخي غيلان بن ابي غيلان الدمشقي ، اوّل من تكلّم في القدرفي القرن 2 للهجره ، موش قصّلو هشام بن عبد الملك ايديه و رجليه.. و صلبوه ؟؟؟ ـ

و الكـِـندي ، الفيلسوف و الموسيقي و عالم الطبيعيات .. موش اضطهدو المتوكّل ؟؟؟ ـ

و ابن حزم .. موش حرقولو كتبو لمجرّد انّو دعا للخروج على المذاهب الاربعة و ازالة ما علق بهم من قداسه .. حتّى انّو قاللهم : ـ

وإن تحرقو القرطاس لا تحرقوا الذي ...تضمّنه القرطاس بل هو في صدري
يسير معي حيث استــــــــقلت ركائبي...و ينزل إن أنـــــزل و يدفن في قبري

كيما قال ابن سينا .. في الابيات الشهيره اللي كتبها بالفارسيه للي كفــّــروه : ـ

ليس سهلا عليك ان تجعلني طريد الديــنِ
إذ ليس هناك إيمان أحكم من إيــــــــماني
إذا كنتُ أُعـَــذّ في الدهر كافـــــــرا متبرّمَا
اذن فلن يكون طول الدهر من تجدْهُ مسلمَا

نرجعو للشعر .. و انا تعمّدت انّي نحاول ايجاد بعض التقاطعات للمحاكمه الاخيرة لنزار مع غيرها من المحاكمات التاريخية اللي استهدفت فيها الانفاس النيّرة .. و كذلك حبيب نوجد نوع من التماهي الوجداني للشعر مع التصوّف .. و اكيد انّو لأهل الاختصاص و النقاد الجادين رأي اكثر دقــّـة في هاذا .. اما كيما قالو : اجمل الشعر اكذبه ، بالنسبة ليّ شخصيا ..اجمل الشعر .. هو اكثره انغماسا في الروح الصوفيه .. و استحضارا للملاحم الاسطورية ..و تماهيا مع الآلهة .. لانّو الشاعر و الفنان عموما .. هو إله صغير:) عندو القدرة على انّو ، بالقلم والريشه و اللون و الشكل و غيرها من تقنياتو ..و من وساءلو السحريه ..، ينفخ فيك شيء من الفرح .. او الحزن .. او الفتنه .. او الغضب .. او الشبق

و هذاكه علاش اذا ما تكونش ، وانت تقرالو ، في حاله مشابهه ليه .. ما يوصلك حتى قـرام من رسالتو .. و تولّي وقتها عاد ، تشدّ القارد متاع الايديولوجيا و الجمود بمختلف انواعها .. موش الدينية فقط .. و تبقى في حدود الحكم السطحي الاخلاقوي على الاشياء .. و تنصبلو مشنقه..و الا صـَــليب

قصيد رائع لنزار قباني .. مرحبا بالانحراف اذا كان على هذه الشاكله

عيناك

الدمع الأسود فوقهما يتساقط أنغام بيان

عيناك وتبغي وكحولي

والكأس العاشر أعماني

وانا في المقعد محترق.. نيراني تأكل نيراني

أأقول احبك يا قمري آه لو كان بإمكاني

فأنا لا املك في الدنيا الا عينيك وأحزاني

سفني.. في المرفأ باكية ..تتمزق فوق الشطآن

أأسافر دونك ليلكتي..؟ يا ظل الله بأجفاني

يا صيفي الأخضر ..يا شمسي

يا أجمل اجمل ألواني

هل ارحل عنك وقصتنا أحلى من عودة نيسان

أحلى من زهرة غاردينيا في عتمة شعر إسباني

يا حبّي الأوحد لا تبكي فدموعك تحفر وجداني

فأنا لا املك في الدنيا إلا عينيك وأحزاني

فأنا إنسان مفقود لا اعرف في الأرض مكاني

ضيّعني دربي

ضيّعني اسمي

ضيّعني آه عنواني

تاريخي.. مالي تاريخ إني نسيان النسيان

إني مرساة لا ترسو. جرح بملامح إنسان

ماذا أعطيك ..أجيبيني

قلقي .. ؟ الحادي .. ؟ غثياني

انا ألف احبك ..فابتعدي

عني

عن ناري ودخاني

فأنا لا املك في الدنيا الا عينيك وأحزاني

*********

تبا لهذا الزمن الذي اصبح فيه الطاهر الحداد "جهلوتا" .. و نزار قباني " منحرفا" ...ـ

ثرثرة معلم قديـــم 2 ـ

من بين الحاجات اللي مانيش مستعد نتنازل عليهم: كعبات البيرة .. وخاصة متاع نهار السبت .. على خاطرهم .. علميا و شرعيــّا ضروريين بعد اسبوع كامل ستراس متاع وظيفة ... و نمطيـّه .. و روتين .. وحاله .. و على خاطر فيها لقاء مع اصدقاء باهين .. ماهمش مقلقين .. وما يخوّفوش .. بمعنى .. كي تحكي معاهم افكارك السياسية ... ما تلقاش روحك من غدوه تبحث ... و كي تشيخ على الموسيقى و تعمل شطحه .. ما يقولوش عليك .. مايع ... باختصار كل حد و ما يريــّــحو
عاد
نهار من النهارات .. و انا نمارس في طقوسي البيرّاويــّـه المقدسه .. نلقى ورقة في التابلو د بور متاع كرهبة صاحبي... صاحبي في الثانوي .. و في الجامعه .و...و...وو اللي هو توّا المرشد البيداغوجي للتعليم الثانوي.. قتلو شنوّه هالليـــسته متاع الاسامي اللي عندك .. قالّي .. هاذوكم اساتذه ناجحين في الكاباس .. كتابي .. و انا نعمللهم في تكوين .. نحضّر فيهم للشفاهي ..بديت... بكل فضوليـّة لا واعيه .. نقرا في الاسامي
استوقفني اسم
اسم يعني حاجه في ذاكرتي
ذاكرتي البعيده
البعيده برشه
عبد الله الدّ.
كان ذكي
كانت شخصيّتو قويّه .. و هو ولد 8 سنين
كان يعرف يدافع على نفسو كي نتّهمو بالتشويش .. و هو ما شوّشّ
كان يخزرلي في عيني و هوّ يجاوب على السؤال
كانت عندو قدرة انّو يمتص الغش متاعي بكلمه و الا كلمتين ... يرضـّــيني بيهم
و كيما تشوفو في التصويره

الوحيد اللي تفطّن لوجود آلة التصوير اللي محطوطه في آخر القاعه .. و تلفـّــتلها ..هو عبد الله

كان نظيّف و قرّاي و ذكي و روحو خفيفه و شخصيتو مرحه و قويّه .. و كان زادا .. يعاني مع اصحابو و معايا في البرد و بـُعد المدرسه ... و...و غيرها من الحاجات اللي حكيت عليهم في التدوينه الاولى
.........
زعمه هوّ ... اللي يتربّص عند صاحبي؟؟؟ـ
- بربـّي هاذا منين
- شكون .. عبد الله...؟؟ آه .. من .........ـ
- شوف ... وقتاش باش تقابلو المره الجايّه ؟؟ـ
- النهار الفولاني... علاش ؟ـ
- بربّي اسألو .. قلّو شكون قرّاك في الفرنساويّه في السنه الثالثه ابتدائي متاعك
- شنيّه الحكايه ؟؟ تعرفو ؟؟ و كي يظهر تشابه اسماء
- موش مشكل .. المهم ثبـّـتلي هوّ و الا لا .... .. مازالت بيرّه ؟؟؟ ـ
...................
في النهارالموعود ... اللي .. ما ما نكذبش عليكم .. كنت مغصور فيه كأني نستنى في نتيجه متاع امتحان .. جاني صاحبي .. و قالي : ظهر هو ... تلميذك .. متاع 17 سنه لتالي ... و راهو ما صدّق قتلو تتذكّرش معلّمك متاع الفرنسويّة في السنه الثالثه ابتدائي .. و هوّ اتهزّ و تنفصّ ...وقالّي: سي فلان .. و حكالو على العود و الاورغ و الموسيقى في القسم .. و على التصاور .. والراديو كاسات ..و السـّـامور متاع النار .. و اللعب ..و الضحك .. ..و...و...و
.....................
الحاصل ... ما نحكيلكمش على اللقاء اللي تم بيناتنا .. صدّقوني عينيّ زغللت بالدموع وقت اللي.. بعد 17 سنه ..شفت تلميذي ...و خلّيني نقول : ولدي.. هاك البوتشه متاع 30 و الا 40 صنتيمتر اللي كان صوتو كيما هكّه
اسمعوه يقرا في انشوده


abdalla 88 89 cocorico - www.itoky.com

راجل قدّامي .. استاذ انقليزيّه .. لكن ..الغريب في الحكاية انّو .. ما عادش يخزرلي في عيني برشه و هوّ يحكي معايا .. كيما كان يعمل و هو صغير
ولّى يحكي معايا و هو:) حاشم
الحاجه اللي ما كانتش فيه 17 سنه لتالي
قدّاش فرحت بيه و هو يحكي عالبلوز و الجاز .. و على الموسيقى المفضّله متاعو..و على تشارلز ديكنز .. و الادب الانقليزي
باختصار... ما نكذبش عليكم .. وصّيت عليه صاحبي و حكيتلو على ظروفو .. و قالّي صاحبي : تهنـّـى عليه .. هاذاكه راهو طيّاره
عطيتو تصاورو اللي عندي .. و عطيتو كاسات فيها تسجيل صـَـوْ تي ليه وهوّ يلقي في انشوده .. و عطيتو كرّاسة الخطّ متاعـو .. وقتلو : هاذيـّه أمانه خلاّها عندي عبد الله الصغير .. و قالّي اعطيها لعبدالله الكبير
و ... و لّينا اصحاب