ثــرثــــرة معـلــّــــم قـديـــــــم

على إيقاع زغاريت الباكالوريا .. اللي تجيبها النسمه من السطوحات الشعبية متاع العايلات اللي مربـّـخينها .. السطوحات الفايحه بروايح البخور .. و الجاوي .. و البيرّة .. والعرق (متاع البدن موش اللي يسكرو بيه الشرقيين) و العرعار و قشور الحوت على النـّـِــفس ...و الروزاطه ..الحاصيلو .. كلّ حد كيفاش يفرح

سرحت شويّه مع مخّي .. و رنّت في وذني تزغريتة الوالده..هااااك العام .. و تحميلتها ليّ هيّ و الوالد يرحمو.. وقت اللي نجحت في الباك .. نتذكّر انّي وقتها كنت شاهق بالبكا في حضنهم ..شي تفريغ للرهبة والضغط اللي عايشين معايا عام كامل .. و شي خاطر خويا اللي عدّا معايا ، ما نجحش .. يعني بصراحه ...فرحتي كانت ناقصه.. و ما فرحت الا وقت اللي شفتو هوّ يضحك .. و فرحان بنجاحي آنا و نسى روحو

أيّه .. بون .. بون .. يزّي لا تولّي دراما و مـَـنـْــوْحَـه ههههههه

باكالوريا .. آداب .. مونسيـــون : قريب من الحسن .. 13 فاصل معدّل .. 17.5 في مادة الانقليزية .. يعني تطلبشي في التوجيه انقليزيه في المرّيخ .. تاخذها .. و انا الرويحه في الانقليزيّة

و رغم هاذاكه

اوموري ما مشاتش .. عامتها .. و اللي مبعدو .. و من غير دخول في الاسباب و التفاصيل توّ

بحيث فجأة نلقى روحي معلّم ابتدائي في ريف .. يعمل 66 كيف : لا ما .. لا ضو .. لا كيّاس ..قدّامي 30 تلميذ جيعان و بردان .. مشبّرين فيّ عينيهم الحزينه .. و معمّلين عليّ باش نخرّجهم من الظلمات الى النور

الطريق اللي يوصّل لها المدرسه .. بيست ..؟ ما توصل الا بخمسه كيلو غــبار و تراب في بدنك و على راسك .. هذا اذا ما تكونش راكب من تالي مع ثلاثه و الا اربعه نعاج .. مهبّطهم مولى الكرهبه لسوق الغنم

الما .. ؟ من الماجن .. و الا المياه المعدنيه ..والا ّ البّادن اللي نجيبوهم معانا والاّ نوصّو عليهم جماعة النقل الريفي .. اللي بدورهم ماهمش ديمه متوفـّرين .. خاطرهم ماهمش مترسمين في النقل الريفي .. و يخدمو موسميا..مرّه يحصدو ..مرّات يهبطو لدزاير و الا المرّوك يجيبو شويّة سلع .. يدلـّــلـو بيهم ... مرّات يحرثو.. دونك .. تولّي الخدمه بالدركتورات .. و الكرهبه اللي تخدم نقل ريفي ، و اللي غالبا ما تكون 404 ، يرتـّـحوها

و على ذكر الـ:404 .. حتّى كان باش نحلّو قوس .. اما نسكّروه فيسع .. تعرفو اللي احنا شعب مبدع في الامثال ؟؟ .مثلا توّ .. كي ذكرت كرهبة نقل ريفي 404 ..تذكّرت عمار بومقص .. و تذكّرت معاه مثل شعبي يقول : أذكر الكلب و ارميلو عظم .. و لذلك ، نحب نستغل هالفرصه السعيدة .. باش نرمي العظم الآتي لبو مقص : سيـّبو المدونات .. يا حيوانات ... مع احترامي الكبير للكلب اللي يتحلّى بالكثير من الخصال النبيله

قلنا البيست حموم .. و الما : بـَــحّ
الضوّ ..؟ عليك و على الشمع .. الفنارات .. البريميسات .. اللــّــامبات اليدويّة ...و في الليل .. تبدا تسمع في الذيوبه تعوّق
Enfin
ثمّه اللي يقول هاذاكه ابن آوى شاكال بالفرنساويّه .. ماهوش ذيب .. على خاطر الذيوبه الصحاح انقرضت من شمال افريقيا

ما نعرفش

لكن الاكيد انّو الاصوات اللي سمعتها ماكانتش نبيح .. و لا تمعــويش .. كانت اصوات نعرفها في البرامج الوثائقية متاع عالم الحيوان :) و حتى المواطنين متاع الريف هاذاكه .. عندهم برشه حكايات توصل لمستوى الاساطير على علاقتهم التاريخية القديمه بما يسمّوه هوما : ذيوبه . عندهم في جدودهم و اسلافهم اشكون كلاه "الذيب" و اشكون تعارك مع الذيب و قتلو .. و اشكون اصطادو .. وفيهم اشكون ورّاني جلد الذيب ( والا ابن آوى) معلّق في دارو

و بما أنّو هالريف هاذا ماهوش قريه .. و ماهوش دشره .. بل .. دْوَاويـــر "جمع دوّار" ... يعني متفرّقين في الجبل و بعاد برشه على بعضهم و على المدرسه .. هاك التليمذات ... كل يوم يضربولك مارشه متاع ساعه .. في عزّ الشتا .. في قشـّـابيـّه محكوكه .. مهرّيـــه .. و تحتها مريول نص كم .. و كرطابلتو اللي قرا بيها خوه قبلو .. و الا قفّه بلاستيك .. حاطط فيها كتبو و كرارسو و شويّة الكـِــسره العربي و الا الطابونه .. اللي لكمتتهملو امّو في منديله .. فطورو متاع نص النهار بما انّو ملـّي يجي الصباح ما يروّح كان لعشيّه

و اللي مسلّكها فيهم.. يجيب معاه شويّة لبن في شقف قازوز .. و مرّات في شقف بيرّه .. ماهيش مسكّرة مليح .. بحيث ما يوصل للمدرسه كان شطرها يتكب على كتاب القراءه .. و يمرمدو .. و يرنـّخو .. و تتخلّط حلاوة العلم .. وقروسة اللبن .. و مرارة الفقر.. في كرطابله وحده .. بل .. في قفه بلاستيك

في الايامات البارده متاع الشتا .. كنت نوصّيهم.. كل واحد .. و هو جاي الصباح للمدرسه.. في ثنــيـّـتو يقشقش شويّه حطب .. يجيبهم فيدو.. كل حد اش ينجم .. خاصة انها المنطقة جبلية .. 30 تلميذ اذا كل حد يجيب قشّه ، تعمل حاجه

و دبرّت قاع متاع بـتـّــيـّـه .. نشعّلوه البرّه م القاعه .. و وقت تتنحّى الدخاخين و يبقى كان الجمر .. و يولّي سامور هايل .. ندخّلوه و نحطّوه في قلب القسم و ندورو بيه كيما لي زانديان .. و نعملو ربيّع ساعه اربعة دراج .. تسخين .. حركات .. لعب .. ضحك . يدفا القسم .. و تدفا يديهم .. و تدفا قلوبهم .. و تتحلّ اذهانهم للقراءه .. و الايقاظ العلمي .و...و...و

كنت نحسّ انّي نشاركهم الظروف القاسيه هاذيكه .. تقولش علينا لكلـّـنا منفيـّيـــن : هوما و انا ..

هاذاكه علاش كنت نعيش معاهم مشاعر متاع دفء انساني كبير و عميق برشه.. ما كنتش نحبّ نكون المعلّم اللي يخوّف .. البوليس .. او الاب الثاني في صورتو الرديئة المتسلّطه..

كنت نقول : يكفيهم الفقر و الظروف الطبيعية الكاسحه و المناخ المقوّد و بـُــعد المسكن على المدرسه والأمّيّه و الجهل اللي معششه في اوساطهم العائلية و حرمانهم من كل ما يحتاجو طفل و تلميذ في العمر هاذاكه من تلافز و فضاءات و ساحات و حدائق و مراكز و مكتبات و دور مطالعة و نوادي لمختلف الانشطه الفكرية و اليدوية و الفنيه و مسابح و قاعات العاب و قاعات سينما و دور اطفال و دور شباب و ماناج ... ما يكفيهمش حرمانهم من هاذا الكل ؟؟ نزيد آنا نكبّلهم سعودهم بالعـصا و الصياح و الكشّه...؟؟ـ

نجحت في انّي نخلق نوع من الصداقة و العشرة معاهم

يكفي باش نقوللهم : انتم مشوّشين .. و هاذاكه علاش انا تو غضبان منكم.. و ماعادش نكلّمكم.. و ما عادش نقرّيكم بالقدا.. و ما عادش نضحك معاكم.. و ماعادش نعزفلكم بالعود

و نمشي نقعد في آخر طاولة و نرسم الحزن على وجهي .. و نبدا نلاحظ في ملامح الاسف و الندم على وجوههم .. و ملامح توبيخ الضمير و الشعور بالذنب .. اللي نحسّو يوجعهم اكثر من الضرب بالعصا .. على خاطرهم كانو يحبّوني بصفه خاصّه

و هالحب الخاص بالطبيعه عندو اسبابو ..كانت علاقتي بيهم متميّزه برشه على علاقتهم بزملائي لخرين .. كنت نعمل معاهم في حاجات .. نعرف انّها تبقى منحوته في اذهان اطفال في عمر 7 و 8 سنين
مثلا
القسم ، معايا انا .. ماهوش فقط بلاصه متاع قرايه اكاهو ..مرّات يولّي زادا نادي موسيقى .. و ستوديو تصوير فوتوغرافي .. و ستوديو تسجيل.. و مرسم .. و قاعة مطالعه .. و غابة .. و قاعة العاب .. و سيرك .. ـ

في اول الحصة .. والا اخّرها .. و الا في الفاصل مابين المواد الكبيرة .. اللي فيها نوع من التجريد و الجفاف .. لغة .. حساب.. كنت نهزّلهم العود والا الاورغ و الا الهارمونيكا .. و نعزفلهم بيهم الاناشيد .. و نسجّللهم اصواتهم في الراديو كاسات اللي كنت نخدّم فيها بالباتريّات .. يقولو في الاناشيد و انا نعزفلهم .. و نسمّعهالهم .. و نبدا معمّر المصوّره في أخر القاعة .. ناخذلهم تصاور من غير ما يعرفو .. و في الاسبوع الجاي نورّيهملهم .. ونعطيهملهم .. و نحسّ انهم قريب يطيرو من الاستعجاب و الفرحه و الدهشه .. و نعرف انهم ماهمش باش يستحفظو بيهم.. ونقول

ميسالش .. النيقاتيف موجود عندي

بحيث .. هوما و انا .. تورّطنا في حب بعـضنا

هوما : كانو يمثّلولي شباك صغير يحل على فرحة طفوليه بالحياة حتى في بلاصه كيف هاذيكا .. بعد الانتكاسه اللي وقعتلي في قرايتي الاعوام لولى

و انا: نمثللهم المعلّم اللي من المفروض عندو سلطه عليهم .. لكن هاو ظهرحتى هو كيفهم .. ما يفلّتش فرصه باش يغني و يعزف و يلعب و ينقــّــز و يضحك و يمثــّــّل و يرسم ..

بعد 17 سنه .. قابلت واحد منهم .. سي الشباب .. خليتو عمرو 7 سنين .. لقيتو استاذ انقليزيّة

اما توّ طوّلت برشه .. للحكايه بقيّه