mardi 10 mars 2009

انتحــال صــفة ... قاتــل

الدنّيا حرب .. كاسدة .. مقيّنه

سي خونا ، بياع سواقر
بوهالي ..زوّالي..ـ
مـْهنتل .. مْجرتل .. مـْــقـَجــْول
عريان .. بردان .. جيعان

واقف في الـ
arrêt
شادّ كردونتو متاع السواقر

و يستنّى في التــّران يجي باش يبيع اش كتّب ربـّي

التّران جا

وقف

وجوه الجنود المحاربين شاحبة .. و شعوراتهم و و كساويهم مغبّرة .. و عينيهم مضبّبـــه على الدخّان

شافوه شادّ كردونة السواقر و واقف

فرحوا هوما

و فرح هوّ

طلـّو عليه من شبابك الفاقونات.. يحبّو يتكيّفو

اشارولو باش يطلع

طلع

واحد خذا من عندو سواقر .. اما بما انّو جاي من الحرب ، ما عندوش الفلوس ، مدّلو البيريّه متاعو

لبسها سي خونا و فرح بيها

الاخر شرا من عندو باكو كامل .. مقابل فيستة ميليتارفاضلة عليه

لاخر خذا كيما نقولو نصف باكو مقابل سروال

لاخر مقابل البرودكان

هبط سي خونا من التران .. فرحان كيفاش لابس

uniforme

حاجة ما كانش يحلم بيها

و بدا يتفرّج على روحو


روحو الجديدة .. اللي لابسة لباس محترم .. بدلة جديدة .. منظّمه .. نظيفه .. من الراس للرّجلين

اش مازال فيها من بيعان سواقر

فكّر باش يطيّش هاك الكردونة .. اما قبل ما يطيّشها ، هزّ راسو للسما في خزرة معبّية بكلّ ما بعثاتو فيه هالكسوة الجديدة من شموخ .. وكبرياء .. و ثقة

الجنود يتكيّفو و يغنّو و يلعبو .. رجعت فيهم الروح بعد التضبيبه اللي كانو فيها

التران صفّر ..

طلّ عليه واحد من الجينيرالات اللي كانو في الـ

First class

كي شافو لابس الـ

Uniforme

مشى فيبالو واحد من الجنود متاعو هبط .. و ناوي باش يفصع

اشارلو بالطلوع

سي خونا .. فهم اللي سي الجينيرال حاجتو بالدخّان

حرّكلو راسو في ما معناه : لا .. ما عادش عندي سواقر

القطار بدا يتحرّك

بالطبيعة الجينيرال فهم الـ "لا" هاذيكه : لا ، مانيش طالع

يعني فهمو "جندي مروفز" ـ

في اطلع

في لا

في اطلع

في لا

و التران بدا يمشي

يجبد الجينيرال الفرد و يحطّهالو بين عينيه

التّران مشى ... بـْـعـِـد ... غاب

و سي خونا بقي مطيّش عالرصيف .. الكسوة الجديدة ملطخة بدمّو.. ايديه شادّة كردونة السّواقر .. و عينيه مرشوقين في السما


الحكاية المزيانة هاذي ماهيش متاعي .. هي قصّة قصيرة لنجيب محفوظ .. من مجموعة قصصية اسمها : همس الجنون.. حبيت نحكيهالكم بطريقتي

ذكّرتني فيها المناوشة اللي وقعت هالنهارين بين زوز مدونين حول موضوع انتحال الصفات

يعني ... باهي انّها المناوشة .. تولّي مناسبة لتذكّر قراءاتنا القديمه .. و تنشيط للذاكرة


خير من الثرثرة .. اللي يولّدها احيانا الفراغ


;)

6 commentaires:

eddou3aji a dit…

7lowwa beddarja:) hia hia ou najjamt to5roj eb 7aja 7lowwa mel 7ala el 7lila hadhi...vraiment ya3tik essa77a ;)

Anonyme a dit…

Et tu nous dois un morceau de musique en plus!!!

brastos a dit…

ha ha ha
ورّطتو رواخكم الزّوز

هههههه

jaccuZe .. bien sur tu t'adresses au violoniste "dou3aji"

انا خاطيني

هههه

دوعاجي ..جاوب الراجل يكلّم فيك

:):)

eddou3aji a dit…

:))) la la wa 9ila ya7ki 3lik ya brastos ou ena houni ndhom sawti el sawt jaccuse ou ntaleb bi2il7a7 bina9cha bahia kima el 3ada.
ena ghali ou tlab 3arre5iss amma 7atta ordinateur ma3andich :))) nsa55ef :))

brastos a dit…

tsa55ef ?????
:):):):):):):):):):):):):)

brastos a dit…

behi

اما يلزمني شوية وقت .. خاطر كنت نبوستي على
boomp3

توّه مسكّر

اما نوعدكم