كوريغراف .. جايّة من غزوة بدر

ــ الو .. اهلا براستوس
ــ أهلا بيك .. آ ... اش عندك جديد ؟
ــ عندي جديد .. وقتاش تنجم تطلّ .. باش تحضر و تشوف و تاخذ فكرة
ــ وقتاش البروفه الجّايّه ؟؟ـ
ــ غدوة لابري ميدي .. تنجم تجي ؟؟ـ
ــ باهي .. أوكي .. تو ناخذ كونجي بنص نهار .. و نجيكم .. ماو غادي كي العاده ؟ـ
ــ ايه .. ايه ..غادي .. نتقابلو غدوه ماله ؟؟
ــ أوكي .. تشاو

اللي كان يكلّم فيّ صاحبي .. مسرحي موهوب .. تجمعني بيه صداقة شخصية و فنيّه .. نتذكر منين كنا اعمارنا 14 ... و 15 سنه ..كنا مغرومين بحاجات اكبر من اعمارنا .. نسمعو في محمد عبد الوهاب .. و ام كلثوم .. و نقرو في نجيب محفوظ و ايميل زولا ..و بدينا زادا مع بعضنا نعملو في شويّه مسرح مدرسي .. في اطار فرقة تابعه للمعهد كوّنها استاذنا متاع المسرح .. صديقي هاذا ، هوّ كمّل .. و انا لا . لقيت روحي اكثر في الموسيقى .. و في الالوان

نادالي باش نحضر معاه البرايف و ناخذ فكرة على عمل مسرحي جديد يحضّر فيه .. و نعاونو في المقاربة الموسيقية .. سواء في الانتقاء من الموسيقات العالمية .. و الا في المقاطع الحوارية اللي يلزمني نلحّنهملو

مشيت .. دخلت للقاعة الكبيرة .. ركح من غادي .. فوقو بنيات و وليدات يعملو ستّه و ستــّين كيف .. مزيانين .. ناشطين .. فرحانين بالمسرحية.. و بالحياة .. و بالهوا .. و بالضو .. و بالحب .. و بالدنيا الكل ..ينقّزو .. يلعبو .. شوّية تسخينات .. زوز من غادي يلقّنو في بعضهم في اجزاء من الحوار يمكن استعصات عليهم .. هاذا من هنا يصلّح في ماكياجو .. هاذيكه تبلّص في حاجات تابعة الديكور .. كوبل من غادي .. يحكو بالشوي مع بعضهم .. اكيد يتمعشقو .. شكون قال .. يجي نهار و يعملولنا زواج فنّي يكسّرو بيه الدنيا :) علاش لا ؟؟؟...ياخي اش يزيدو عليهم جان بول سارتر و سيمون دي بوفوار ؟؟ :) والا بوسي و نور الشريف :) و الا فاطمه بوساحه و راجلها اللي ما نعرفش اسمو .. هاك اللي كتبّلها كلمات غناية : يا كرهبة كمال رنّي..رنّي .. ماصابني كاسات فيك نغنـّي .. و من وقتها انطلقت قصة حبّهم.. اللي أثمرتلنا كل ما شدت به عمتك فطّومه .. قيتارة التاي الاحمر العكـّاري :) ـ
:):):)
الحاصيلو .. فرهدوني .. و خرّجوني شويّه من الروتين اليومي متاع الوظيفة .. و لو لسويعات

و انا هكاكه .. مرة نسمع في صديقي و هو يفسّرلي في التوجّه العام للمسرحية .. اللي بين قوسين عجبتني فكرتها برشه .. و مانيش باش نحكي عليها .. خاف لا يسرقهالو واحد من الانونيمات اللي نجمهم متألّق هالمدّه :( و مرة نتفرج شويّة على هاك الوليدات و البنيات ..و على التحضيرات اللي قاعدين يقومو بيها فوق الركح .. و مرّات نغوص شويّه في ذاكرتي البعيده .. منين كنت في عمرهم .. و منين بديت ننفح في هالاجواء هاذي .. اما نقول نشاله هوما يولّيو مشهورين عاد ... موش كيما ما ولّيتش أنا :) ـ

و لاحظت معاهم بنيّة.. ظهرتلي جديده .. تلقّن فيهم في بعض الحركات .. و تفسّرلهم .. حسب ما فهمت للوهلة الاولى .. في كيفية التنقل على الركح .. امّا بأسلوب محتشم برشه .. و بصوت خاااااافت .. ظهرتلي ما هيش منطلقه .. ماهيش إيبانـْـوي .. تلفت لصاحبي اللي قاعد بحذايا في كراسي المتفرجين .. باش نسألو على الانسه هاذيكه شكون و شنيّة دورها ..ما لقيتوش .. مشى لبعيد يريقل في حاجه تابعو الاضاءة .. ولّيت قعدت مركّز معاها هي .. لاحظت حاجات اثارت استغرابي .. بل عدم اعجابي

لبـْستها .. دجين فوقو حاجه كحله .. كيما البلوزه .. و الا كبّوط قماشو خفيف .. طوييييييل .. يضرب للكعبه .. امّا مشقوق من ليمين و من ليسار .. الفونت لنصّ الفخذ

مريول كول مونتون اكحل .. مغطيلها رقبتها الكل و قريب يغطّيلها لحيتها فرد مرّه

طربوشه .. كيما المارسايّاز .. اما نوع آخر .. كحله زاده .. ملموم تحتها شعرها الكل اللي مش باينه منّو حتّى شعره .. و يظهرلي مخيّطه مع الكول مونتون من ناحية رقبتها من تالي

نتصوّر انكم تصوّرتو السّيلووات متاعها

لبستها اثارت استغرابي خاصة و انّو لا الطقس لبرّه و لا الجوّ داخل القاعه يسمح بلبسة مسكّرة التسكير هاذاكه

بحيث بديت نتقلّق منها .. موش للباسها فقط .. اما لعلاقة لباسها بالشي اللي تعمل فيه..و اللي على ما يبدو : كوريغرافيا

ظهرتلي كيما الغراب لكحل في وسط عصيفرات ملوّنين
حركاتها وقت تبدا تلقّن في الوليدات والبنيات .. ثقيله .. رزينه .. ميته .. فارغة من أي احساس و ايّ وعي بالجسد و ايّ احتفال بيه و بالحركه

و هوما .. يعاودو من وراها بطريقة فهمت من خلالها انهم ماهمش فاهمين بالضبط اش قالتلهم :) ـ

و هي تصلّحلهم في الحركات .. و تفسّرلهم في طريقة الانتقال فوق الركح .. من غير ما تعملها قدّامهم

حبيبت نقوللها : يا دوموازال .. اش قولك لوكان تعملها قدّامهم .. راهي الناحية البصرية مهمة لهنا في الانتباه الى جزئيات الحركه .. و تطويع كافة اجزاء البدن للحركه المطلوبه

اذا كان تعملها انت قدّامهم .. تاقعلهم
Fixation visuelle
اللي هي مهمة برشه ، بيداغوجيا، بالنسبة لشخص قاعد يتلقى في معلومه لاوّل مرة

وليت قلت في خاطري يا براستوس .. يزّيك من الكلوف .. تمشيش الطفلة تتنبز .. و تقول من نهارو جا ينقد فيّ ...و يعملّي في سابوتاجات مع المخرج .. و الا تظهرلك دكتورة زمانها في الكوريغرافي .. و من هاك الفنانين المقربعين .. و تشعل فيك و تقلّك انت كلاسيك توّا راهو عصر الايحاء و ليماجينار .. و تجبدلك اسم و الا اثنين بالالمان ما تعرفهمش ....و يزيد يأيـّدها صاحبك .. لغاية في نفسو هوّ :) و تقول يا ليتني قعدت ساكت

ايّ قلت .. نرمي روحي .. و اللي يصير يصير .. كلاسيك .. مانيش كلاسيك .. ما يهمّنيش

هاذي هدرة كوريغراف يوصف في الحركه على الركح شفاهيّا من غير ما يعملها .. ما دخلتش مخّي

تهوّ ستانسلافسكي ، اشهر رواد المسرح المعاصر .. صادف انّي هالمدة قريتلو كتابو : إعداد الممثل.. و اللي ما صاغوش في شكل نظريات .. بطريقة تلقينية و الا خطابية .. بل بالعكس ، عملو في شكل رواية تحكي على استاذ تمثيل في مواجهة مجموعة من تلامذتو الممثلين اللي تعرّضو لصعوبات في التمثيل ، و هو قاعد يساعد فيهم

وينو براشت ، و احتفالو بالجسد ، و تركيزو ملييييح على ضرورة الارتخاء العضلي لتفادي التوتر الجسدي اللي يراه براشت اكبر عدو للممثل ، و اكبر عائق و اكبر مشوّه للحركه الجمالية للجسد

بون ...
ينجّم يوصفلهم الاحساس المرافق للحركه .. ينجم يستدعاهم الى انهم يستعيدو من اعماقهم لحظات شبيهه عاشوها في حياتهم الخاصة ، يستحضروها ، يستفيدو منها في لحظة التقمّص

هاذا الكلّ ينجم يتقال شفاهيّا .. اما الحركه في حد ذاتها

لا ...لا ... لا

يلزمها تتعمل قدّامهم .. على الاقل مرّة وحده
يوسف شاهين .. شيّوبه .. و كاردياك .. كي ريتو في الـ : مايكينق أوفّف متاع فيلم المصير ، يشطح هو بيدو في الشطحات المرافقين لغناية "علّي صوتك بالغنا" .. زعمه شبيه .. ما يعرفش يقوللهم .. اعملو و اعملو .. هزّو ايديكم .. حلّو ساقيكم .. هنا .. اعملو تنقيزتين و تلفيته .

و يظهرلي قرات في عنيّ هالكلام الكل .. و لاحظت عليّ عدم استساغة اللي قاعده تعمل فيه ، ممّا زاد شجّعني باش نستاذن منها و نكلّمها ( بيني بينها بالطبيعة موش قدّام الممثلين الصغيّرين لخرين) ـ

ياخي صاحبي جا .. كيما قلتلكم .. كان لاهي مع جماعة الاضاءة

ولّيت سألتو هوّ .. و قتلو هو على ملاحظتي ظهرت الحكاية لا كلاسيك .. و لا ايماجينار .. و لا براشت .. الحكاية الكل انّها البنية بعد ما قرات في احد المعاهد متاع المسرح ..
... و بعد ما تخرّجت .. اختصاص كوريغرافيا

تحجّــبت

و هاك الكبّوط . والا البلوزه : حجاب

و هاك المارسايّاز المخيّطه مع الكولمونتون من ورا رقبتها : حجاب

و عدم رغبتها في القيام بالحركه هاذيكه و اكتفاءها بالوصف و التلقين الشفاهي : حجاب

قالي صديقي :انا ما نحبش تكون عندي افكار مسبقة .. هي جات اقترحت عليّ انّها تنشط معايا في المجموعة .. و انا احترمت تكوينها و شهادتها .. و قلت لازم باش تفيدني بحاجه .. و قلت اكيد انها ماهيش باش تخلط الامور .. وقت الحجاب : حجاب .. و وقت الكوريغرافيا : كوريغرافيا ... و قالّي زادا انّو باش يحاول يقنعها بعكس اللي تعمل فيه .. لانّو يضرّ بالعمل .. و ما عندو حتى علاقة بالفن .. و الا يقدملها اعتذاراتو، و يقوللها هكّه رانا ما نتفاهمنوش

وحاول يقنعها

و ما اقتنعتش

و قدملها اعتذاراتو

و قاللها هكّه رانا ما نتفاهمنوش

ومشات على روحها

آخر مرّه ريتها .. جات عيني في عينها .. عملت روحها ما راتنيش

و رغم هاذاكه .. نحب .. بكل حب .. نهديلها اللوحة هاذي اللي اسمها

La Dance

متاع

Matisse
شكون يعرف .. تنجّم تتعدّى نهار من هنا .. و تلقى الهدية متاعها..و تفكّر شويّ

كلــيـمــتـيـــن حــول : الحجاب و الجنـس

الحجاب ديمه يـتـْــذْكــَــر في سياق انّو الداعين ليه ، سواء كانو آلهه أو بشر ، يحبّو يفرضوه على المرا باش ، كيما يقولو هوما، تحافظ بيه على "عـفـّـتها"...ـ
و كلمة العـفـّـة هنا كي نقــشـّـروها .. و نزيدو نقــشّروها .. ونزيدو نقــشّروها .. نوصلو لجوهرها اللي هو : الجنس
هيّا مّاله نجبدو الحديث حول علاقة الحجاب بالجنس .. باش نخرجو شويّة على السياقات النمطية متاع النقاش في الموضوع هاذا ، و اللي هي ، يا إمـّا سياقات متاع" كفار" و "مؤمنين" ، و الا سياقات سياسية متاع "طائفية" و احداث تميّز ،حتى على مستوى اللباس ، و الاّ سياقات تجارية متاع فضائيات بوكشطة البتروليــّــه
و رجاء من غير تنرفيز .. ونذكّر انّو كل حد حرّ في تفكيرو .. رغم انّو موجود بيناتنا شكون راكب على حرية التفكيرو يحب من خلالها يوصل باش يمنع غيرو من انهم يفكّرو كيما يحبّو
و زادا راني مانيش نتحدث من وجهة نظر "فيمينيست" .. و رغم انّو"الفيمينيزم" هو رد فعل على قهر آخر الا اني نرفضو ، لانّو يختزل الحكاية في معركه ابدية بين الراجل و المرا ، الشي اللي ماهوش صحيح ..ـ
و زادا ، حتى كان طوّلتها شوي ، انا راني مع انّو كل حد يلبس اش يحب ، الجـِـشـّـه جـِــشـّــتـك غـطّـيها بشكارة و الا

بالاحبال .. دبّر راسك ..اللي انا ضدّو : وقت اللي واحد يجي لواحد آخر يقـــلّو :البس هكّه ، و ما تلبسش هكّه

في موروثـنا التقليدي .. وحتى الديني .. المرا مطالبه اكثر من الراجل بـ : "التعـفـّـف" هاذايا ، يعني بإنامة .. او إماتة الجنس فيها .. وكل ما كان عندها القدرة باش ما تحكيش على رغباتها... الجنسية بالخصوص .. ما تعبـّرش عليهم .. ما تفدلكش بالجنس .. ما تبيّــنش انوثتها حتى لروحها هيّ .. كل ما اصبحت جديرة بلقب "عفيفه" ... و هاذا يرجع لعدة اسباب .. أعمق ببرشة .. و أبعد في التاريخ من السبب السطحي متاع ( المرا الصالحة هي عماد الاسرة ، و لذلك هي معنية اكثر من الراجل باش تكون اخلاقها حسنة ) ـ
على خاطر انّجّمو نبقــو ايّامات و نحنا نحدّدو في اش معناها "مرا صالحة" .. واش معناها "أسرة" .. و اش معناها "اخلاق حسنه" ... ـ
للمسالة علاقة بالوعي الذكوري /القضيبي اللي نشأ مع تقسيم العمل اجتماعيا و جنسيا ، و بعد ما تحوّلت المرا من مشارك في الانتاج ، الى جزء من الممتلكات ، يعني كيفها كيف العـْــلـِـــيلـْــشات و الدّجَـيـّـجات و أواني الطبخ ... اللي لاهيه بيهم في الدار و الا في القبيلة والا اللي هوّ .....و بالتالي ولّات خاضعة لانساق اخلاقية و قيميّة تفرض عليها باش تعمل هاذي و ما تعملش هاذي .. تحكي مع هاذا و ما تحكيش مع هاذا .. تـتـكلم في الموضوع هاذا و ما تتكلمش في هاذاكه .. و زادا .. تلبس هكّه و ما تلبسش هكّه

طبعا ما سـْــرتـْـش نفس القوانين ، على كل المجتمعات ، و بنفس الاشكال ، و في نفس الازمنه ،.. لكن الحضارة الانسانية متشابهة في ملامحها التاريخية العامة

و هالعِـفــّــه هاذيّه ، هي من اهم مقاصد فرض ارتداء الحجاب .. يعني باش المرا ما تـهـيّـــــجــش الراجل بمفاتـنها .. يعني لتفادي انّو الراجل ينـقـّـز مثلا على زميلتو في الخدمة .. في البيرو .. في القيشي .. في الستاندار .. و الا مثلا هي تمدلو تقرير باش يصحح فيه و هو يقوم يلعـبلها على شعرها .. تصوّرو واحد ماشي يخلّص في فاتورة الما .. ياخي بـْـدا على الموظفة متاع الكنتوار .. بعد اللي المرا جايّة للخدمه و شعرها عريان ... تِاللّاو منـّو المتّـاخذ .. ،
ولاّش لازمنا صحور متاع جنس ؟؟ يعني ، كيما ، بالنسبة للي يصيمو ، يلزمهم يتصحّرو باش ما يجوعوش يعني قبل ما تمشي للخدمة ، يلزمك تعمل تكويرة باهية :) باش ما تنقزش على زميلتك
باهي ...ـ
و كي المرا يلزمها تـتـغـطى بالشكل هذا باش ما تــشهّـــيــش عمّـــك الراجل .. ياخــي هــيّ ما تـشـتـْــهــــاش ؟؟؟؟ ما يثيرهاش وحيّد بوقوس .. بديّن .. قدّ مقدود :).. ذريّعات و زنود امـّـسـْـكـْـلين .. صديّـــرو مكبوس.. من تحت بودي :)... ثمه اللي تحب الشلاغم .. ثمّه اللي لا .. اللي تحب لحيه هايجه .. سوفاج ..ولخرى تحب زيرو خفيف .. اللي تحب صدر الراجل قازونـّـي ..و اللي لا .. الحاصيلو .. في بالي ما جبتش جديد كي نقول انّو كيما احنا معشر الرجال عندنا فانتازماتنا .. هوما زادا معشر النسا عندهم فانتازماتهم .. لكن السؤال هنا .. شبيها رغـبات المرا و شهاويها .ما تأدّ يـــش الى فــرض الحجــاب على الراجل في حضــور مرا غريبه عليه .. ؟؟؟؟؟
حاجتيـــــن : يا إمـّـــا المرا مجرّد موضوع للشهوه ، يعني تـشـَــهـّــي الراجل فقط ..امـّـا هيّ ما تشتهيش الراجل .. هاذاكه علاش يلزمها هيّ اللي تغطّي روحها باش هو ّ ما يشتهيهاش .. و هاذا غالط

أو أنـّــو.. اللي فرض الحجاب.. قرا بحساب شهوة الراجل في المرا و ما قراش بحساب شهوتها هيّ فيه .. و هاذي نظرة غالطة ، لانها احاديّـــة
ثمّاش حاجه ثالثه ؟؟؟ـ
هاني تذكّرت حاجه .. يقول القايل راهي ماهيـــش كان المرا بدنها عوره و يلزمها تغطّيـــه بكلّو ، راهو حتى الراجل عندو عورتو اللي يلزمو يغــطيها : واللي هيّ من تحت الـسـّــُـــرّه .. لركايبو ..ـ
ياخي اش بقى ؟؟؟
يعني الراجل ينجّم يمشي للخدمة في فوطه و ما عليهش حتى إثم ..خاصّة في المناطق السخونة .. و الا في الصيف .. و يتسمّى هاذاكه "الزي الصيفي للعمل" ـ
و هنا تصوّرو معايا بيرو فيه خمسه و الا ستّه رجال .. موظّــفين .. مـتـْـفـَــوّطــينْ ..اكاهو.. و معاهم بنيّه .. شابّه .. و نوّارها مفتّح جديـــد ....و بقطع النظر على اشكون ينجم ينقّز على اشكون هنا.. المشهد يظهرلي كاريكاتيري
و حاجة اخرى
ديمه في اطار علاقة الحجاب بالجنس
بالنسبة للمثليين الجنسيين ..اش نعملو معاهم ؟؟ خاصة و انها الظاهرة ماشية و تقرب للعاديه .. و ما عادتش مخــبّـيَه ياسر .. و زاده ، على ما نشوف ، يبدو انّو على كلّ مثلي واحد مـُـعـْـلـَـن ، ثمّه مجموعه مثليين متخبّين .. نعملوشي زادا حجاب خاص بالرجال اللي يخدمو معاهم مثـلـيّـين ؟؟ حماية ً :) لهم من التنقيز :).. و تفاديا لاثارة الغرائز:)...ـ
مّاله ، عالحساب هاذا ، يلزم الحجاب يتفرض حتى في البيت السخونه متاع حمام النسا ... على خاطر ثمّه ليزبيانات ينجّمو ينقّزو زادا ..ـ
نزيدو نفترضو هنا، بيرو في اداره، يخدمو فيه ثلاثة موظّفين .. مـْــرا و زوز مثـليـّـــين ..اشكون اللي يلزم يلبس حجاب لهنا ؟؟؟ هيّ ؟؟؟ و الا هوما ؟؟؟
هيّ ؟؟؟؟ ما ظاهرليش ، على خاطربكل بساطه ، حتى كي هيّ تـنحّي حوايجها الكل ، بدنها ما يعنيلهمش حتى شي .. اما تخاف لا هوما الزوز ينقـّزو على بعضهم ..ـ
دونك ، عليهم و على الحجاب ..مادامو احسن دوا ضد التــّــنـقـيـــز ..ـ