jeudi 29 janvier 2009

اضراب فرانسا اليوم .. و مخّي



اكيد انّكم فيبالكم بالاضراب العام اللي دعاتلو النقابات في فرانسا اليوم .. و اللي توقّعولو شـَبــَه بالخميس الاسود متاع ازمة 29 .. ـ احتجاجا على سياسة ساركوزي اللي تعاطت مع الازمة على حساب الشغالين
التفاصيل هنــا




اللي ديمه يطيّرلي مخّي في المناسبات هاذي هو المقارنة اللي نلقى روحي نعمل فيها لا اراديا بينّا و بينهم .. بكل اسف .. في عدّة مستويات .. سواء الاعداد للاضرابات .. الاعلام ..الدعاية .. تقبّل الناس ليها .. تقبّل الحكومات المتوجّهة ليها اصابع الاتهام .. تنزيلها اعلاميا منزلة الحدث العادي .. شوفو هنــا كيفاش توقعات صدى الاضراب، ماخذة طابعها الاعلامي التحليلي "المحايد" .. بل الجميل و الاحتفالي (لعب .. و ثلوج ... ) و ماهيش ماخذه الطابع الكارثي ..الانتقامي .. التجريمي .. بل الراقي ..الحضاري.. الانساني .. اللي يعكس وعي الناس بكرامتها المهنية و بكياناتها الانسانية .. تنظيم و تأطير و ترشيد طاقات الرفض في الانسان .. حتى يتم توجيهها توجيه صحيح .. صحيح بمعنى ناجع



ما نتصوّرش كان ثمّه فيهم اشكون يتساءل في تساؤلات من نوع: قدّاش من واحد باش يتفصل على خدمتو خاطر شارك في الاضراب .. ونذكّر هنا بقضيّة الثلاثة اساتذه اللي وقع طردهم في السنة الفارطة لمجرد انهم شاركو في اضراب

و ما نتصوّرش كان نهار اذا واحد يمشي يطلّع في رخصة متاع تاكسي مثلا .. يرفضوه .. على خاطر ولد خالتو شارك في اضراب عامين لتالي

و ما نتصوّرش كي تجيهم الفيشه راس الشهر .. يلقوهم سرسبوهالهم حس تحت مس و قصّولهم اجرة يوم عمل .. بعنوان غياب غير شرعي

و غيرها من سيناريوات تجريم الاضراب و تجريم الاحتجاج عموما ، اللي قاعدة ترجّع فينا قرون لتالي .. و قاعدة تنحت فينا في ثقافة القطيع البعباعي .. وقاعدة ترسّخ في اذهان الاجيال الصاعدة اللي الاضراب و التظاهر ممارسة فوضوية حقودة عنيفة سلبية متآمرة على امن العباد و البلاد..كيما هالنموذج المسكين مولى التعليق الخامس على تدوينة عياش

شي يسخــّـف .. و يعيـّف

تقنيّو و صحفيّو الاذاعة و التلفزة .. بين الاعتصام .. و اللـّـفت

قريت العنوان .. قلت خلّي نشوف المحتوى الدّخلاني .. الى اي درجة كان وفيّ لنقل الاحداث


دخلت
و بديت نقرا
مرّه نعثر في لفته
ومرّة في صحفة كريمه
ومرّه نتشحط بدوزه قويّة متاع عطف ابوي
و مرّة تصبّ عليّ مطر متاع عبارات شكر و عرفان

ياخي ماله وينو

الاعتصام

اللي عاملينو الصحافيين و التقنيين منذ مدّة في الاذاعة و التلفزة .. ؟؟؟؟ .. ـ

ميسالش .. مابين ربطة اللفت و صحفة الكريمه

مافيها باس كان نحكيو بشفافية و نزاهة و مصداقية

على الوقائع كيما وقعت

***

غمزة : ياخي موش هاذي معاركنا الحقيقية يا "شسمك" ؟؟؟؟؟ـ

mercredi 28 janvier 2009

مدوّن ياباني يصمم لوقو تضامنا مع غزّة

مدوّن ياباني

ينخرط في "الدروشه الجماعية"ـ

و يدين مجزرة غزة

و يصمم اللوقو هاذا



المرجع : مدونة جاكييز

شكرا جاكييز على تعريفنا بهذا المدوّن صديق الشعوب هنا

و شكرا ...على مدّنا برابط لمزيد فضح اعداء الشعوب هنا

mardi 27 janvier 2009

WANTED ... مجرم حرب مطلوب للعداله

اتفق تماما مع قصّة اونلاين في حقيقة انّ الامريكان لن يسمحوا باحالة هؤلاء على العدالة نظرا لاحكام قبضتهم على مختلف هيآت القضاء العالمية .. لكن ذلك لا يمنع من المطالبة بمحاكمة هؤلاء المجرمين .. الآن..او لاحقا
ايقال سلوفيك ygal slovik آمر لواء 401 للمدرعات

حرزي حاليفي herzy halevy آمر لواء المظليين

ايلان مالكه ilan malka آمر لواء المشاة



dimanche 25 janvier 2009

افضّل الردّ هنا

لو اتفقنا فرضَا على "عفن الستالينية" .. فانّنا ما نختلفوش ـ(فعلا و موش فرضــَا)ـ انّو ما "اعفن" من "الستالينية" الا ما قاعدين نشهدو فيه من تمسح مجاني لاشباه "مثقفينا" على اعتاب الصهيونية .. و تبييض صورتها .. و التخفيف من جرايمها .. عبر لعق ايادي مجرميها لازالة ما علق بها من دماء الاطفال ، وتمجيد تفوقها العسكري و التكنولوجي و تقزيم المقاومين لمشروعها .. ثم .. نتصوّر انّو اللي ما" يتورّعش" عن ممارسة الدعاية لاصوات تنعق بالديمقراطية و الحرية و العلمانية .. و هي في باطنها متورّطه مع أخمج و أنتن و أعفن فكر عنصري عرفو التاريخ : الصهيونية.. موش من حقّو يرفع المظلمه ورا اختها مما قد يلحقو من نقد ومعارضة .. و ما يمكن ان يراه هو استفزازا .. هو تسمية للاشياء بمسمّياتها ووضع للنقاط على الحروف
انتهى الامر .. لم يعد التظليل يجدي .. هؤلاء المتباكين على الحلم الليبيرالي .. و الحلم الاسرائيلي .. و وهم الحداثه.. حداثة الهزيمه .. حداثة التطبيع مع قتلة الاطفال .. سيكونون اوّل المغتسلين ببول الامريكان و الصهاينه .. كما اغتسل به سابقوهم من اشباههم .. في العراق .. في لبنان..في فلسطين المحتلة
لا اعتقد ان هناك قلّة ادب اكثر من تقزيم مقاومة الاحتلال و تبرير ابادة الشعوب فمصائر الشعوب ليست مجالا لممارسة شطحات الرفاه الامني الاديولوجية .. على ركح مشيّد من جثث و جماجم الاطفال .. و كيما سبق و قلتها .. لا فرق بين هذا التطرّف الذي يصطبغ بالعلملنية .. و بين التطرف الديني...كلاهما صنيعة الاستعمار باختلاف اشكالو.. الفرق جزئي .. وظيفي .. الفرق يكمن فقط في تقاسم الادوار


الرجاء من اصحاب القلوب الرقيقه الامتناع عن مشاهدة الصورة اسفله

pour voir la photo ci dessous .. ames sensibles s'abstenir


vendredi 23 janvier 2009

منصور رحباني ... انت ؟؟؟ الآن ؟؟؟ ـ

و نحنا مازلنا بصدد رحيل الموسيقار الكبير منصور الرحباني ، اللي بالتاكيد ، لو كان خيّروه توقيت وفاتو ، ما كانش يخيّر الفترة هاذيكه ، اللي العالم الكل منشغل فيها بحاجه وحده : غزّه
فيروز .. و من وراها الرحابنة .. اوكسيجاني بدون مبالغة .. ما نحســّش بالرغبة في الاستماع اليها .. بل بالـــحاجه

عندي انطباع .. و الا وهم .. اللي اشياء الاموات يتبدل طعمها بعد رحيلهم
ساعة الجـَـيب متاع والدي
ماهيش هيّ قبل وفاتو و بعدها ..البلّار متاعها ازداد بريق و صفاوة .. و النقوش اللي على الطبقة البرّانية متاعها زادو وضوح و دقّة .. و طلاءها الفضي ازداد لمعان

و قس على ذلك .. حتى الفنانين و الشعراء

احمد الزعتر .. ازداد عنادا و طفولية و عبقا و صمودا بعد رحيل درويش

ريتا ... ازداد نبيذ شفتيها سحرا

هل ان الاموات ينثرون فتات روحهم على اشيائهم رأفة بنا مما يمكن ان يصنعه بنا الحزن .. ثم يرحلون مبتسمين ؟؟؟ ـ

ام هل انّ اشياءهم ، و بدافع الحزن و الحب .. تتقاسم هذه الروح الراحلة .. تنهشها .. تـَـرِِثـُها ؟؟ ـ

نرجع لمنصور الرحباني .. هالنهارين نسمع في اوبيريت لفيروز ، من تاليفو هو و عاصي ، اسمها "ناطورة المفاتيح" ..(عسـّاسة المفاتح) و رغم اني سامعها و نعرفها من قبل .. الا اني كيما حكيت .. لقيت فيها طعم اخر بعد رحيل منصور

ملك ظالم و طاغي .. يقرّر الشعب متاعو باش يرحلو الكل و يخلّوهالو .. معناها اقعد فيها احكم على الحيوط ، وعبّي السجون بالحجر.. و الخنافس
هيّا نعمــلو كيفهم ؟؟؟ :) :) :) ـ

لكن ، و في حركة رمزية تشير الى انّهم ما تخلــّــوش على بلادهم نهائيا ، و للحفاظ على امل العوده ، سلّمو مفاتحهم لفتاة ذكية و جريئه .. اسمها زاد الخير ، اللي تقوم فيروز بدورها ، و كلّفوها بالتحاور مع الملك.. و من غادي جا إسم الاوبيريت

تصوّرو بلاد كاملة .. بديارها بشوارعها بزناقيها باكواخها بقصورها بحوانتها .. فارغة ، الا من زوز من الناس : ملك و مـْــرا

مـْـرا ذكيّة بالطبيعه ... ماهيش غبيـّه

:)


و انطلقت زاد الخير في حوارات نافذه و عميقة و محرجه ، و تـْـحـَـطّ سي وخيّنا بالسيف عليه في وضعية تحاورية ، وضعية مواجهة ، مقابله ، مساءلة ... خلاتو يتراجع و يفيق و يندم


اوبيريت اكثر من رايعة .. و اجمل ما فيها المزج ما بين الفانتازيا و الطابع الغرائبي للاحداث و بين واقعيّتها و تطرّقها لليومي المعاصر .. و هالاسلوب هاذا هو ابرز ملامح المسرح الرحباني

الحاصيلو .. هي راهي ما تتحكاش ، اما تتسمع .. و في الاصل تتشاف ، خاطرها تبقى في النهاية عمل مسرحي

فوداعا .. منصور رحباني .. و شكرا على كل جرعة حب و حياة .. حقــنتها في شرايين اسماعنا




يمكن تحميلها من هــنا ... و هنا تنجّمو تحمّلو المقاطع الغنائية منها

mardi 20 janvier 2009

مـتــشابــهـــــــات



اربعة و اربعون رئيســـا .. احتلال .. اغتصاب




اربعة و اربعـــون ساقــًــا .. تسمـــيم .. قتل

رئيســـان اثنان فقط ..........ـ



ساقــــان اثنتان فقط ... مع كثير من الغباء..و الاستغباء


الديمقراطية آتية الى الولايات المتحدة الامريكية.. هكذا حدّث ليونارد كوهين



الغناية ، حاجة بسيطة .. شويــه صور و شويّــه ميتافور و لحن جميل .. لكنّها تنجّم تكون أبلغ و أفصح من عشرات الخطب و البيانات


انا كنت ديما من المعجبين بالفنان الموسيقي الشاعر الروائي الكندي/الامريكي .. ليونارد كوهين .. اليهودي اللاصهيوني .. بل اللي خرج منذ سنوات على اليهودية تماما و بصدد خوض تجربة بوذيّة


من اشهر اغانيه


Take this waltz


I'm your man


The future


Take me to the end of love


و خاصــّــــة ، خاصّــــة ، غناية


Suzane


اللي عاودوها برشه فنانين ابرزهم ملكة الجاز




و غنّاها بالنسخة الطليانية




احد اكبر اسماء الاغنية الهادفة في ايطاليا خلال المنتصف الثاني من القرن الفارط


الغناية اللي حبيت نعرّفكم عليها اليوم .. و نهديهالكم .. امّا قبلكم انتم .. نحبّ نهديها لاوباما اللي أدّى منذ لحظات القسم رئيسا لاكثر البلدان المشكوك في ديمقراطيتها ... هاذي بطبيعة الحال الرسالة اللي تضمّنتها الاغنية هاذي متاع صحيّبنا ليونارد كوهين و اللي عثرتلها على ترجمه جيّدة للعربية في مدوّنه رايعة اسمها : مذكّرات عربي محبط


الغناية اسمها


"Democracy"

It's coming through a hole in the air,
from those nights in Tiananmen Square.
It's coming from the feelthat this ain't exactly real,
or it's real, but it ain't exactly there.
From the wars against disorder,
from the sirens night and day,
from the fires of the homeless,
from the ashes of the gay:
Democracy is coming to the U.S.A.
It's coming through a crack in the wall;
on a visionary flood of alcohol;
from the staggering account
of the Sermon on the Mount
which I don't pretend to understand at all.
It's coming from the silence
on the dock of the bay,
from the brave, the bold,
the batteredheart of Chevrolet:
Democracy is coming to the U.S.A.
It's coming from the sorrow in the street,
the holy places where the races meet;
from the homicidal bitchin'
that goes down in every kitchen
to determine who will serve and who will eat.
From the wells of disappointment
where the women kneel to pray
for the grace of God in the desert here
and the desert far away:
Democracy is coming to the U.S.A.
Sail on, sail on
O mighty Ship of State!
To the Shores of NeedPast
the Reefs of Greed
Through the Squalls of Hate
Sail on,
sail on, sail on, sail on.
It's coming to America first,
the cradle of the best and of the worst.
It's here they got the range
and the machinery for change
and it's here they got the spiritual thirst.
It's here the family's broken
and it's here the lonely say
that the heart has got to open
in a fundamental way:
Democracy is coming to the U.S.A.
It's coming from the women and the men.
O baby, we'll be making love again.
We'll be going down so deep
the river's going to weep,
and the mountain's going to shout Amen!
It's coming like the tidal flood
beneath the lunar sway,
imperial, mysterious,
in amorous array:
Democracy is coming to the U.S.A.
Sail on, sail on ...
I'm sentimental, if you know what I mean
I love the country but I can't stand the scene.
And I'm neither left or right
I'm just staying home tonight,
getting lost in that hopeless little screen.
But I'm stubborn as those garbage bags that Time cannot decay,
I'm junk but I'm still holding up this little wild bouquet:
Democracy is coming to the U.S.A.


للّي يحب يحمــّــلها (من هنا


و هاذي ترجمتــــها

رغم انّو كيما تعرفو .. الترجمه في المجالات هاذي تـُـفقد النص الكثير من بريقو .. اما ميسالش ، بالخصوص بالنسبة للي ما عندهمش علاقة باهية باللغة الانقليزية

ديمقراطية

إنها قادمة عبر ثقب في الهواء
...من تلك الليالي في ميدان تيانمان
...إنها قادمة عبر الشعور...ـ
بأن هذا ليس حقيقياً بالتمام...ـ
من الحروب ضد الفوضى...ـ
من زمامير الخطر ليلاً نهاراً...ـ
من نيران المشردين...ـ
من رماد الشاذين...ـ
اليمقراطية آتية إلى الولايات المتحدة الأمريكية...ـ
آتية عبر شق في الجدار...ـ
على متن فيضان وهمي من الكحول..ـ
.من الحساب المذهل...ـ
لصلاة على جبل...ـ
التي لا أدعي مطلقاً فهمها...ـ
آتية عبر الصمت...ـ
من على ظهر رصيف الخليج...ـ
من الشجعان، البواسل والمهشمون...ـ
من قلب "الشفروليه"...ـ
الديمقراطية آتية إلى الولايات المتّحدة الأمريكية...ـ
آتية من أحزان الشوارع...ـ
من الأماكن المقدسة حيث تلتقي الأعراق والأمم...ـ
من شوارع الاجرام...ـ
التي تتسرب إلى كل مطبخ...ـ
لتقرر من الذي يخدم ومن الذي يأكل...ـ
من آبار الخيبة...ـ
حيث تسجد النساء لتصلي...ـ
لرحمة الله في صحرائنا...ـ
والصحاري النائية..ـ
.الديمقراطية آتية إلى الولايات المدتحدة الأمريكية...ـ
ابحر نحو... هيا ابحر...ـ
هيا يا سفينة الدولة الجبارة...ـ
ابحري نحو شطآن العوز...ـ
متفادية شعب الجشع...ـ
عبر صرخات الحقد...ـ
ابحري... ـ
هيا ابحري... ابحري وابحري..ـ
.إنها قادمة إلى أمريكيا أولاً...ـ
مهد الأفضل والأسوأ...ـ

إنه هنا حيث عرفوا المجال الواسع..ـ
.وآلية التغيير...ـ
وهنا عرفوا العطش الروحي...ـ
وهنا تتفسخ العائلات...ـ
وهنا حيث يقول المستوحشون...ـ
أن على القلوب أن تتفتح...ـ
بطريقة جوهرية...ـ
الديمقراطية آتية إلى الولايات المدتحدة الأمريكية...ـ
الديمقراطية آتية إلى الولايات المدتحدة الأمريكية..ـ
.آتية مع ومن النساء والرجال...ـ
يا حبيبتي...ـ
لنمارس الحب مجدداً...ـ
سوف ننحدر إلى القعر..ـ
.الأنهار ستبكي...ـ
والجبال ستهتف...ـ
آمين... آمين..ـ
.إنها آتية مثل السيل الجارف...ـ
في ظل التمايل القمري...ـ
امبراطوريّ.. غامض...ـ
في عرض غرامي...ـ
الديمقراطية آتية إلى الولايات المدتحدة الأمريكية...ـ
ابحر... وابحر...ـ
أنا عاطفي... أتعرف ما أعني...ـ
أحب البلد ولكني لا أطيق المشهد...ـ
وأنا لا يساري ولا يميني...ـ
أنا سأبقى في منزلي الليلة...ـ
ضائعا في تلك الشاشة الصغيرة البائسة...ـ
ولكني أكثر عنادا من أكياس القمامة التي لا يفنيها الزمن...ـ
أنا سقط المتاع ولكني لا زلت صامدا ومتمسكا بتلك الباقة البرية...ـ
الديمقراطية آتية إلى الولايات المدتحدة الأمريكية...ـ

dimanche 18 janvier 2009

يا زياد طارق بن يوسف .. ياخي وجهك في قفاك ؟؟؟ـ

زياد طارق بن يوسف : واحد من الكاتابلازمات القزوردية ، و للي ما يعرفوش اهوّه هنا ، رغم اني ما ننصحكمش باش تشوفوها الصفحة متاعو خاطر ما فيها ما يتشاف ، نموذج متاع واحد عندو بوردال محلول في دماغو .. هاك النهار في طمبك العدوان على غزة، بعثلي دعوة للالتحاق بمجموعة اسمها "من اجل الصدافة التونسية الاسرائيلية" ـ

بالطبيعة ، و زيادة على رفضي للدعوة ، بعثتلو رسالة طرد

ياخي البارح زاد بعث يطلب في صداقتي من جديد .. يمكنشي قالّك مادام ما طرّدنيش بالثلاث .. فمّه امكانية رجوع

:)

الحاصيلو هاو قدّامكم ، اشهدوا .. يازياد طارق بن يوسف .. راك مطرود بالـثّـّـلاااااااث

:)

تعميما للفايده .... خطرلي باش ننشرلكم الحوار اللي دار بيناتنا .. باش تشوفو قدّاش ثمّه كاتابلازمات و كوارث
تـِــدْبــِي عالارض و هي وجوهها في قفاها

jeudi 15 janvier 2009

برشة فنانين توانسة حاولوا يعملو مسيرة .. و تعرّضوا للاعتداء ...صحيح الخبر ؟؟؟ ـ

وصلتني معلومه .. حبيت ننشرها في انتظار انّو ياقع تأكيدها او نفيها
في العاصمة ، و منذ يومين ، مجموعة من الفنانين التوانسة .. ابرزهم جليلة بكار ومحمد علي بن جمعة ومنير الطرودي ولبنى نعمان ونصر الدين السهيلي ونجاة حسني، مع العديد من السينمائيين والسينمائيين الهواة والموسيقيين والممثلين والمخرجين والكتّاب والفنانين التشكيليين والراقصين قاموا بالتجمع اما المسرح البلدي .. و حاولو القيام بمسيرة تضامنية مع اهل غزة .. الا انهم تعرّضو للمحاصرة الامنية و المنع و حتى الاعتداء بالعنف .. فانطلقوا في رفع شعارات مندده بمصادرة حقهم في التظاهر ، ثمّ توجّهوا الى دار الثقافة ابن رشيق .. اين واصلوا تجمّعهم و شعاراتهم و هتافاتهم .. الا ان البوليس اغلق عليهم الباب لمنع امكانية التحاق ناس اخرين من الشارع معاهم
ثمّ دخل عليهم البوليس و امرهم بالخروج ، موش مع بعضهم ، اما زوز زوز .. و الزوز اللي يخرجو ياخذولهم تصويرة
اعتقد انّو (في حالة صحّة هالمعلومه)ومهما كانت قوة و حجم هالتحرك ،الا انّو يعتبر سابقه ايجابية في تاريخ اهتمام فنانينا بالقضايا المصيرية و الوطنية بمثل هالاشكال الراقية و الاساليب الجريئة .. على الاقل يحاولو البدء بمحو فكرة انّهم فنانينا محدودي الاطلاع و الثقافة .. جايين من المريخ .. و ماهمش معنيين بما يحدث حولهم
نحب نعرف ويني نقابة الفنانين من هاذا الكل ؟؟ يعني اذا الخبر صحيح .. شنوّة كان موقفها ؟؟ و اذا الخبر موش صحيح ، ويني من اساسو ؟؟؟ــ
ياخي موش عملو نقابة فنانين ؟؟؟ و الا انا نحلم و نخلوض ؟؟؟ـ

dimanche 11 janvier 2009

المظاهرات : حرام = المظاهرات : دروشه


رئيس المجلس الاعلى للقضاء في السعودية : صالح اللحيدان يفتي بفساد المظاهرات .. انظر هنا



و عندك زادا .. عمّك ابو اسحاق الحويني


مقطع فيديو هنا

المظاهرات : فساد في الارض


و الداعين لها و المشاركين فيها مفسدون .. وجب .. ردعهم




موش ثمّه تقاطع ما بين الفتوى هاذي .. و الفتوى لخرى ؟؟؟ هاك اللي تسمّي المظاهرات : "دروشة جماعية" ؟؟؟؟؟ ــ

jeudi 8 janvier 2009

الصهاينه .. "الامن القومي التونسي" .. ثقوب في صدور الرضّع .. و .. ثقوب في الذاكرة

الثقوب التي نراها في الصدور الغضّة للرضّع ، تذكّرني في الثقوب التي تشكو منها ذاكرة المتسائلين عن تهديد و خطر الصهاينة للـ"أمن القومي التونسي "ـ
إقرؤوا هذا .. لترميم ثقوب الذاكرة .. بما انّ ترميم ثقوب صدور الرضّع قد تعذّر




مذبحة حمام الشط 11 أكتوبر 1985

بعد ما يناهز الثلاث سنوات من خروج منظمة التحرير الفلسطينية من بيروت ، تعقبت الطائرات الإسرائيلية مكاتبها وقيادتها التي انتقلت إلى تونس. وشنت هذه الطائرات في 11 أكتوبر 1985 غارة على ضاحية حمام الشط جنوبي العاصمة التونسية، وأسفرت عن سقوط 50 شهيداً ومائة جريح حيث انهمرت القنابل والصواريخ على هذه الضاحية المكتظة بالسكان المدنيين التي اختلطت فيها العائلات الفلسطينية بالعائلات التونسية
وجاءت حصيلة الغارة الإسرائيلية ثقيلة حسب التقرير التونسي إلى الأمين العام للأمم المتحدة : مصرع 50 فلسطينياً و18 مواطناً تونسياً وجرح 28 شخصاً وخسائر مادية قدرت بـ 5,821,485 ديناراً تونسياً ( نحو 8,5 ملايين دولارواستمراراً في نهج الإرهاب الصهيوني ، لم تتورَّع تل أبيب عن إعلان مسئوليتها عن هذه الغارة رسمياً فور وقوعها وأعلنت أنها قامت بها في إطار حق الدفاع عن النفس ، متفاخرة ،
في الان نفسه ، بقدرة سلاحها الجوي على ضرب أهداف في المغرب العربي


اغتيال "ابو جهاد " ببرودة دم .. في تونس


للتخلص من أبو جهاد، احد اهم مهندسي انتفاضة الحجارة ، و بالتحديد في 16/4/ 1988 ، قامت عصابات صهيونية بعملية اغتيال كلفتهم ملايين الدولارات، وذلك بإنزال 20 عنصرًا مدربًا من عصابات الإجرام الصهيوني من أربع سفن وغواصتين وزوارق مطاطية وطائرتين عموديتين للمساندة على شاطئ رواد قرب ميناء قرطاج، وبعد مجيء خليل الوزير الملقب بأبو جهاد إلى بيته كانت اتصالات عملاء الموساد على الأرض تنقل الأخبار، فتوجهت هذه القوة الكبيرة إلى منزله فقتلوا الحراس وتوجهوا إلى غرفته، و أسكنوا في جسده سبعين رصاصة..و غادروا بهدوء .. و كانهم كانوا بصدد القيام بفسحة..في ضواحينا الجميلة

و البقية تأتي

mardi 6 janvier 2009

اليوم الثلاثاء : اضراب عام بقفصة .. مظاهرات تلمذية بالقصرين


قفصه ... تبدع من جديد

دخلت اليوم جميع القطاعات المهنية في ولاية قفصة في اضراب عام دعتلو القياده النقابية الجهوية ، احتجاجا على الاعتداء بالعنف اللي تعرّضتلو مجموعة من النقابيين اللي حاولو اخراج مسيرة سلمية يوم الخميس الفارط ، مُـدينه لاعتداءات الصهاينه على اهالي غزة ، و مندّده بالصمت الرسمي

مسيرات بالجمله .. تجمع جماهيري بأعداد غفيرة برشه بساحة الاتحاد ، ضمّ كل القطاعات العاملة و المعطّله :)تلامذة .. طلبة ... خطابات .. شعارات معبّرة على رفضهم للعدوان


في القصرين .. على إثر دخول قوات الـ"أمن" الى ساحة المعهد الثانوي بحي المنار و قيامها بالاعتداء على التلامذة اللي تجمّعو بساحة المعهد و بدوا يرفعوا في شعارات منددة بالعدوان و بالمواقف الرسمية المتواطئه ، قرّر اساتذة المعهد الخروج الى الشارع احتجاجا على التعدي على حرمة المعهد ، و خرج الجميع اساتذة و تلامذة الى الشارع في مسيرة ضخمة جابت الشوارع الرئيسية للمدينه و لمّت حولها كلّ اللي كانو قابعين في المقاهي و واقفين على الارصفة ، و انتهت الى مقر الاتحاد الجهوي للشغل ، اين اجتمعت الحشود الكبيرة و تم حرق علم الكيان الصهيوني




الحقيقة ما يحسب للتليمذات هاذومه انّهم كانوا في المستوى المتحضّر و اللائق بالحدث ، يعني انّهم اكتفوا بالتعبير على مساندتهم لاطفال غزة و استنكارهم للمواقف الرسمية المخجلة دون تكسير او تحطيم او استعمال للعنف .. لا لفظي و لا مادّي
فـتحيّه كبيره ليهم.. و ارجو انّهم ابغال و كركدنّات الـ"أمن" يتعلّمو منهم مثل هالسلوكات المتحضّرة

عنقوديــّه .. عقائديّــه .. كلـّها قنابـــل

بعضهم يحلو له إطلاق صفة "الدروشه الجماعية " على كل تحرّك جماعي من اجل المطالبة بحقوق مهضومه او انتفاضة شعبية او مقاومه ، و لا داعي لتذكيرهم بأنّهم سبقّلهم و اطلقو مثل هالمصطلح السّمج و ثقيل الظل على تحرّكات الحوض المنجمي في السنه الفارطة ، وقت اللي عدد كبير من المدونات التونسية اللي حسّت روحها معنيّة باللي صاير ، انخرطت في سلسلة من التدوينات اللي تدين القمع اللي تمارس على اهالي الحوض المنجمي .. نتذكّر وقتها انها الناس تناقش في اللي قاعد يصير و اسبابو و تداعياتو و تتناقل في المعلومات رغم شحّ مصادرها و تحيل في بعضها على روابط الفيديوات و المواقع و النشريات الالكترونية اللي غطّت الاحداث ، و تستخدم في معارفها الرقمية بهدف اعادة بعث المدونات المحجوبه بسبب تغطيتها للاحداث

و هالبعض الأخر هاذا ، وقتها ، كان داخل معبدو الجديد ، حاطط قدّامو اله جديد اسمو "معاداة الدين" و يصلّليلو ، في طقوس وثنية جلمودية

و نتذكّر مليح انّو وقع تمهزيل تفاعل الناس مع الشهداء اللي سقطو وقتها .. و وقع اعتبار هاذاكه الكل مجرّد "دروشه جماعية" امام المهمه اللي يشوفولها هوما مركزية و رئيسية ، وهي الصلاة و التعبّد في محراب الههم الجديد اللي اسمو : " الــّلااله"ـ

و يبدو انّو اصبح ملحّ تذكيرهم بانّو لا يمكن التصدّي للدين و الا لغيرو من الاشكال البدائية للمعرفة دون وضعو في سياق التاريخ

و اصبح من الملحّ دعوتهم الى الكف على حالة الارتجاج اللي تنتابهم كلّ ما تمكّنت حركة دينية معينه من تحقيق انجازات ، هوما اسبق الى المناداة بيها

هنا بالضبط ، تغيب شجاعة هؤلاء على مواجهة الحقائق ، و قرائتها بتأنّ ، و تغيير بل تطوير ادوات تحليلها و اساليب عملها ، و الاكتفاء ببناء جدار سميك من الايديولوجيا بينهم و بين هذه الحقائق .. و هوما بالشكل هاذا يقدمو ارواحهم هوما و جدارهم الايديولوجي المتجمّد وجبة شهيّة لمثل هالتيارات ، اللي تزيد تقوى ، و تتعلّم المرونه و المراوغة و الممارسة المطّورة .. على حساب تكلّس و جمود العقائديين الجدد .. يكفي ان اجلب لكم معلومه صغيرة من ماضينا الطلّابي : اسرّ لي احد الاصدقاء انّه اثناء انتظامه مع الاتجاه الاسلامي ، كان كتاب لينين "ما العمل" من الادبيات التنظيمية الداخلية للجماعة
و في هذه المعلومه ما فيها من دعوة الى التعامل المرن سواء مع الواقع او مع القناعة

قلت ان مصطلح "الدروشة الجماعية" نراه يتكرر الآن أمام حملة المساندة اللي صايرة للمقاومة الفلسطينية بجميع فصايلها

اجدني مدفوعا الى اعادة طرح العديد من التساؤلات المكرورة و الممجوجه ، ايه ، لكن المنسيـّه ربما

هل انّ مجزرة غزه هي الاولى في تاريخ الصهاينه
و هل ستكون الاخيرة

من اكبر سنّـًـا ، المجازر الصهيونية ؟ ام حركة حماس ؟؟

هل انّو الاصطفاف وراء المقاومه كخيار مبدئي و ليس كقياده سياسية و تنظيمية ، هو بالضرورة اصطفاف وراء حماس كمشروع للتطرف الديني ؟؟

هل انّ النكرات التي تقبع في الرخاء الامني وراء الشاشات ، اشد عداء للجهل و الظلامية و التخلف من الفصائل المقاومه الاخرى ، اليسارية .. الشيوعية .. تحديديا ؟؟؟؟ ـ

و هل الاطاحة بحكومة حماس ، و هي الذريعة اللي الكيان الصهيوني بيدو كفّ على التذرع بيها لقيامو بالهجمه ، ضامن لكفــّو على ارتكاب مجازر اخرى

ما الفرق بين شماتة الاسلاميين ابّان رحيل محمود درويش بدعوى "كـُـفـْـرِهِ" .. و بين شماتة "المتعلمنين" الآن في القتلى و الجرحى بدعوى "اسلاميّتهم" ؟؟؟؟؟ـ

ما الفرق بين تدوينه اذا يقراها الصهاينه يطبعو منها الاف النسخ و يرمو بيها فوق روس اهالي غزّة و يكون لمفعول قرائتها من طرف الثكالى و الايتام و فاقدي عائلات بأسرها ، نفس مفعول القنابل العنقودية ، و بين القنابل العنقودية الفعلية ؟؟؟؟ ـ

هل انّ الحرب التي يشنّها الصهاينه الان على شعب غزه هي حرب نيّرين ضد ظلاميين ؟؟؟ حداثيين ضد رجعيين ؟؟؟ ديمقراطيين ضد متطرّفين ؟؟؟ علماء ضد جهلة ؟؟؟ تقدميين ضد متخلّفين ؟؟؟؟ـ حتى يـُـدعى "النيّرون " و "الحداثيون" و "التقدميون " الى الانخراط فيها ؟؟؟ ـ

ام هي حرب كيان غاصب ، محتل ، مأزوم حضاريا و تاريخيا ، يشكو مجتمعه من تفتت داخلي بفعل تكوّنو من جملة من لقطاء العالم اللي ما تربطهمش حتى روابط ثقافية هامه اكثر من اكذوبة الدين الموحّد ، و ما تربطهمش حتى روابط سياسية اكثر من رعاية اعظم قوة في العالم ليهم ، كيان لا ضمان لاستمرارية وجوده الا بالمزيد من القتل و الترويع و التوسع و الابادة

علاش في عوض هالروح الانهزامية ، ما ياقعش التفكير ، و الا الدعوة الى انشاء تحالفات اخرى مغايرة ، المراهنة على قوى جديده صاعده عالميا .. التفكير في استثمار الصحوة اللاتينية .. استثمار التنين الاسيوي.. العمل ضمن منظمات انسانية عالمية من اجل التتبع القضائي لمجرمي الحرب .. الخ .. الخ .. من الاشياء اللي ممكن تتعمل عوضا عن هذه الشطحات الانهزامية ..قد تبدو افكارا بعيدة المنال او طفولية ، و لكن الا ترون انّ اشد الاحلام طفولية اشرف من الخذلان المحترف؟ ـ

الم يبدأ الكيان الصهيوني من حلم طفوليّ ؟؟؟ ـ

جيّد جدا ان نعمل ما في وسعنا لمحاربة "الجهل" و "الظلامية" لكن لا يجب ان يكون ذلك على حساب حرية الشعوب و على حساب التلاعب بمصائرها

للكيان الصهيوني دينه و للكيان الصهيوني تخلّفة و لليهوديات حجابـهنّ و محافظتهنّ و قوامة الرجال عليهنّ ولليهود صلوات و تلمود و ادعية و ختان و صوم و لحيّ و سوالف و طقوس ارتعاشية امام حائط مبكاهم .. وهو لعمري جهل اشدّ خطرا لانّه مقترن بارادة سياسية في البقاء على حساب كل من يعرقل هذه الارادة ، إن كان مؤمنا أو ملحدا

لماذا لا نكرّس حناجرنا لمحاربة هذا الجهل ايضا .. اليس هذا من ذاك؟؟؟ ـ

انا من طبعي انّي نتروّى قبل اطلاق التهم الكبيرة ، او الانطلاق في توزيع النياشين الوطنية ، كيما قاعده تعمل مدونة عبرات اللي نعبّرلها على تحفّظي على المقاييس المتبعة في تصنيف المدونين بشكل يتعمد الاثارة المجانية .ـ

اقول انّ الـ "وطنية" اللي وإن كانت تعني عند البعض مجرد مشاعر ملتهبة قد يؤجـّجها قصيد شعري أو أغنية حماسية ، فإنها في تقديري تتجاوز هالمفهوم العاطفي ، على اهمّيتو ، الى تأسيس آخر اقتصادي و سياسي واعي بالمرحلة و متطلّباتها ، واعي باولويات الصراع ، واعي بخصوصية التحالفات وفق قراءة متبصّرة و تحديد دقيق للاعداء الرئيسيين

حتى في الاقتصاد يوجد مفهوم "رأس المال الوطني" .. و هي راس المال اللي يتراكم من جملة المصانع و الحرف و الانشطة التجارية و الفلاحية المحلية دون ما يتدخّل رأس مال اجنبي لإجهاض هالتراكم او تشويهو .. قد يبدو كلام خارج شويّة على الموضوع ، لكن من خلالو نحب نقول اللي اطلاق صفة الوطنية او نفيها ، يلزم يتفهم خارج السياق الاخلاقي التخويني او البطولي الى سياقات اخرى أدقّ سياسيا و طبقيا

من المضحك انّي نصنع عدو في ذهني و نسمّيه جهل و ظلامية ، ونبدا نحارب فيه كيفما اتفق ، و اينما اتفق ، و وقتما اتفق

لكل منا الحق في خوض معاركه ، لكن اعتقد انّو اللي احنا بصددو الان ، ماهوش حرب دونكيشوتية ضد "الجهل" و" الظلامية" بقدر ماهي حاجه اسمها : سياسة عالمية

نرجع للـ "دروشه الجماعية" ـ

وقت تتكرّر نفس التسمية و الوصف لحركات تتشابه و تلتقي في التصدّي للاستبداد ، في غزه او في الرديّف .. و يندرجو لثنين في جدول "الدروشه الجماعية " فإنّو التقييم يبدا ياخذ في منعرج أخر

انّك تطالب بالتصدّي للابادة الجماعية و تقتيل عائلات باكملها .. هذا اسمو دروشه جماعية

انّك تتعلّم تفصل منهجيا ما بين نصوصك المقدّسه / المكدّسة في دماغك ، و بين مقتضيات لحظة سياسية و عسكرية حرجه .. يعتبر دروشه جماعية

انّك تتعلمّ تتحرر من هيمنة النصوص وتتعلّم تقرا واقعك بنضج و بواقعية و بمبدئية ، هذا يعتبر "دروشة جماعية" و تكريس لـ"بقايا الدين " فينا

ما هذا ؟؟؟؟؟

ما اعتقدش اللي هالاصوات المحبطه و السلبية (باش ما نطيحش في اتهامات اخطر من هكّه.. على خاطر الخيانة بيدها ماهيش في متناول الجميع).. ما اعتقدش انها اكثر ذكاء و حكمه سياسيين ، و اكثر هضم لخصوصيات اللحظة الراهنة ، و اكثر تشبّع بالتجربة مع الكيان الصهيوني (هالتسمية اللي ما اعتقدش انّها تنزل بردا و سلاما على من تتلخص احلامهم في زيارة "اسرائيل" ... ) من الاطراف الديمقراطية الوطنية العلمانية الاخرى اللي انتمت لخيار المقاومه

هؤلاء ، هاللي مترفّعين على "الدروشة الجماعية" ، ما نعرفش اش كان يكون موقفهم لو كانوا غزّاويين في قلب الميدان ، ؟؟؟ اللهمّ تكون عندهم قدرة سليمان على مخاطبة الحيوانات ، اما في الحالة هاذي يلزم تكون عندهم القدرة على التحاور مع القنابل العنقودية و فهم لغتها و فتح جدالات معاها و هي على قاب قوسين من الانفجار ، و اقناعها بانّهم "ضد الجهل" و "ضد التخلّف" و ـ"ضد الظلامية" ... و ماعلى تلك القنابل الا ان تؤجــّل انفجارها ، أو ان تغيّر وجهتها ، و لتبحث لها عن مرمى أخر ، اكثر جهلا و اكثر تخلّفا .. هكذا بطريقة توم و دجيــرّي

علما و انّـو ـ وهاذا من باب الابتسامه ـ توم و دجيرّي بيدهم ينجّمو يلقّنونا درس متاع سياسه في حلقة من الحلقات اللي فيها مولاة الدار جلبت قطّ دخيل عليهم ، مصنّع تكنولوجيا ، يتميّز بذكاء تكنولوجي رهيب و مبالغ فيه بشكل انّو ضيّق عليهم الخناق ، و ما عادوش لاقين الفرصة موش باش يتعاركو برك ، اما حتّى باش ياكلو في كروشهم..مما دفعهم الى التحالف ضدّو .. و بعد ما قضوا عليه .. وطرّدوه .. تلفّتو لبعضهم

القضية ابعد ما يكون على قيس حجم المواقف بحجم المجازر كما قيل

و ابعد ما يكون على الهتافات الحنجورية .. رغم انّو المتقلــّـقين و المحرجين من الهتاف الحنجوري كما اسموه ، منخرطون حدّ النخاع هم ايضا في هتاف حنجوري من نوع اخر ، و لكن شتان بين حنجرة تصيح لدرء العدوان و لادانة التقتيل و التصفية الكاملة للابرياء و الاطفال ضمن مشروع استيطاني تصفوي تطهيري كامل.. قد يتخذ لنفسه ذرائع متعددة ، شتان بين هذه الحنجرة ، و بين حنجرة متموقعة في خندق الشماته و التشفّي و الانتصار للاديولوجي على حساب السياسي .. و هي بالتاكيد اقصر الطرق للغباء

القضية متعلّقة بوعي سياسي جدلي و متفاعل مع المرحلة و بتعامل خلّاق و ليس جامد مع القناعات

لافائدة من تلقيننا من جديد درسا حفظناه عن ظهر قلب ، الدرس اللي اهم عناوينو : من صنع حماس ؟ و من صنع الاخوان المسلمين ، و من صنع الاتجاه الاسلامي ، و من صنع القاعدة و طالبان ، و ما علاقة ذلك باستثمار الدين في الحرب البارده ، و بشحن الـ"مؤمنين" .."الطيبين".. "السّمحين".. "الابرياء".. "الاتقياء" بكل ما يلزمهم لدحر "الملحدين الرّوس".. "الكفار".. "حطب جهنم" و ذلك لاسباب كلنا يدرك جيدا انها ابعد ما يكون على "نصرة الاسلام و المسلمين" ـ اسباب لا تفوح منها سوى روايح البترول

ما اعتقدش انّو ثمّه اثنين متنوّرين يختلفو في انّها حماس ، في نهاية الامر ، و كمشروع اجتماعي و حضاري ، ما تختلفش على غيرها من الحركات اللي قامت على اساس ديني او عرقي او طائفي ، و اللي تكفّل التاريخ بإنهاء وجودها ، بعد ما اثبتت فشلها في الحكم و القيادة ، خاصة في المجتمعات المتعددة دينيا و طائفيا

فيني النجاحات العسكرية للفاشية ؟؟؟ اللي تعصّبت للجنس الاري ؟؟؟؟ـ

فينهم الكوكلوكس كلان اللي تعصّبو للبيض ضد السود ؟؟؟؟؟ـ

الصهيونية بيدها ، كحركه متعصّبة لدين و لفئه معينه ، بقدر ماهي قاعدة تتمعّش عسكريا من مباركة و رعاية الامريكان ليها ، قاعدة تحفر في قبرها سياسيا ،و آلتها في ذلك هالمجازر و المحارق و التقتيل و الاباده .. و خير شاهد على فشلها السياسي و الحضاري المتغطّي بـنجاحات عسكرية ، هو ما تشهدو عواصم العالم منذ ايّام من مظاهرات مليونية .. عفوا من "دروشه جماعية" عالمية ـ

من السطحية و الغباء الارتياح للحلول العسكرية و الامنية ، المراهنه على الصهاينه : اعداءالجميع و اصدقاء انفسهم فقط ، للقضاء على التطرف الديني

الحرب على الجهل و التطرف و الظلامية تبدأ من محيطك الصغير ، من داخلك انت نفسك ، من محاربة المقدس فيك علما و انّو المقدّس ماهوش بالضرورة ديني

سنموت جميعا .. و ربما يموت جيلان او ثلاثة او عشرة بعدنا دون ان نشرب على نخب النهاية الفعلية و التاريخية و الجذرية للتطرف الديني ، فلـِم إذن هذه العجـَـله التي تدفع بالبعض الى حالة هستيرية من مدّ يديــن مرتعشتين شاحبتين الى التطرف الديني اليهودي ليساعدنا على القضاء على التطرّف الديني الاسلامي

دون ان يلتفت هذا الكيان المحتل ، حتّى مجرد الالتفات ، الى هاتين اليدين الممدودتين اليه ، هذا إن لم يبادر الى قطعها.. لانّه في غنـًى عنها

jeudi 1 janvier 2009

قفصه .. فريانه .. القصرين .. مظاهرات

قوات الـ"أمن" في قفصة تمنع مجموعة من المواطنين من الخروج في مسيرة سلمية منددة بالاعتداء الوحشي على أهالي غزّه..من الاتحاد الجهوي للشغل .. و قد انتجت المشادات و المواجهات جريحين على الأقل ، منهم "القطويني" : الكاتب العام لنقابة التعليم الاساسي
إضراب عام (جهوي) في جهة قفصة يوم الثلاثاء 6 جانفي 2009 دعاتلو القيادة النقابية الجهوية احتجاجا على الاعتداء اللي تعرّضتلو مجموعة من النقابيين بعد ما انهالت عليهم هراوات أبغال الأمن
*****

في القصرين .. تكدّست جحافل البوليس بأنواعو امام دار الاتحاد اثر محاولة مجموعة هامّه من المواطنين الخروج في مسيرة سلمية .. مشادات عنيفة .. المجموعة اكتقت على اثر منعهم من الخروج برفع الشعارات .. ثمّ تبادل الجميع موعدا أخر .. في مكان آخر .. و كانت العملية ناجحه في فرض مسيرة سلمية جابت جزءا هاما من المدينه .. دون ترخيص من اية جهة رسمية

*******

مجموعة نقابيين و مواطنين من معتمدية فريانه من ولاية القصرين ... هاك اللي كنت حكيت عليها عمناول هنا و هنا تمكّنو بعد مشادات كبيرة مع البوليس من انجاح مسيرتهم و اسماع صوتهم