mercredi 31 décembre 2008

حديث الرصيف



السيد المحترم اللي ناشر اللافتات هاذومه قدّام حانوتو ، خطّاط ..حانوتو بحذا مقرّ العمل متاعي .. يخطّط رخامات الاموات .. الإيبيتاف .. ماتريكيلات الكراهب ..بلايك الشركات .. الصناديق المضيئه اللي تحمل اسماء الشركات و المؤسسات ..اليوم العشية كتب هالمجموعة من اللافتات هاذي .. و نشرها قدّام حانوتو بالشكل اللي تشوفو فيه في التصاور .. حطّهم يشيحو قدّام حانوتو .. عالرّصيف.. و المواطنين .. ماشين جايين .. و يخزرو للافتات المبسوطه على الماده و في نفس الوقت .. ايديهم شادّه توازنها .. تسايس في خبزة القاتو لا تطيح
نتمنّى ما يسكّرولوش حانوتو
تو نعلمكم بكلّ شي
*******************
ملّا حاله

ت7 : بـلــّــعوا

البارح ... في جو العدوان الصهيوني على غزّة .. في قناة تونس سبعه .. جايبين فيلم "صرخه" .. اللي هو فيلم يحكي على البكاكش .. و يدعو للتعاطف معاهم .. و كيفاش هوما في حقيقة الامر ابطال .. و كيفاش موش ديمه الكلام مهم .. و موش ديمه النطق عندو جدوى
لا
كونوا كيما البكوش "نور الشريف" ..في الفيلم .. اللي جلغتو مبلــّعه من ربّي ... لكنّو في الّخّر خرج بطل... راكم تنجّمو تبلّعو جلغكم .. تبكشوا .. و هاذا ما ينقّص حتى شي من بطوليتكم ... كونوا ابطال تحت الزّاورة .. واكاهو

lundi 29 décembre 2008

الانحياز الى المقاومه بأخطائها ، أشرف من التخاذل "المتعقلن" ـ

التطرّف عموما ، و التطرف الديني بالخصوص ، ما يمكنلوش الا انّو ينتج تطرف مضاد ، صحيح انّو يموقع روحو في الخندق المقابل للدين.. لكن ما يبعدش برشه على الشمولية و الاطلاقية و النصّيــّة اللي تميّز أي خطاب ديني

من الخطير ان يتحوّل الهوس بمحاربة الدين الى مرجعية سياسية تـُحكم مواقفنا ممّا تشهدو اللحظه من خصوصية و دماء اطفال و ابرياء

من غير العلمي و لا العقلاني ، ان ندير ظهرنا للوقائع و الحقائق "التي وحدها لا تـُـدحـَـضْ " و نستسلم فقط لاكداس يقيننا ، بجمود
انا ضدّ الدين السياسي ، لكن نعتقد اللي محاسبة او تقييم او محاكمة حماس ، ما عندهاش اولوية على ادانة مجازر الصهاينة ، الدورية ، و اللي ماهيش مشروطة باشكون يحكم ، حماس والا فتح و الا الجبهة و الا اي فصيل فلسطيني... بقدر ماهي (هالمجازر) مشروطه بالمشروع الاستيطاني بشكل عام ، و هاذا اللي يفسّر دوريّة المجازر و تعدّدها و تتاليها ، بدءا بالنّكبة ،حيث ارتكب الصهاينه قرابة الـ 70 مجزرة بحق الفلسطينيين قصد تطهيرهم عرقيا و ترحيلهم و تهجيرهم

مرورا بمذبحة قبية سنة 55 ، و بكفر قاسم 56 ، مدبحة قرية السموع 66 ... فضلا عن عمليات القتل التي استهدفت اهالي الجولان و سينا اثر هزيمه 67 .. و سقوط الاموات من العمال و الطلبة في ابو زعبل و بورسعيد ... قانا ... جنين ... ـ

وصولا الى غزّه

ادانة و محاسبة حماس ما عندوش الاولوية على التصدّي للامبريالية و الاستعمار ، هالجملة اللي يبدو انّها اصبحت تقلّق العديد ممّن ارهقهم السير .. فبرّروا عجزهم عن المواصلة بنعت مثل هذه الجمل بـ : "شعارات مراهقة" ـ "انفعالات عاطفية" .. ـ

و ماعندهاش اولوية على فضح الرجعيات العربية اللي مؤخّراتها دَوّدت على الكراسي ، و اللي ماعندها حتى دور سوى نهب و قمع شعوبها ، و تنفيذ مخططات الاحتلال و مباركتها مقابل ضمان بقاءها في السلطة

محاسبة حماس ما عندهاش اولوية على انّا نكسّرو دين والدين هالشاشات اللي كلاتلنا عينينا في الفارغ .. و نخرجو مع الناس للشوارع

و باش نكونو واضحين ،انا موقفي الاديولوجي و الفلسفي و الفكري و الثقافي و الفنّي و النفسي و الجنسي و الاخلاقي و المزاجي و...و... من الدين واضح و مافيش داعي لتكرارو .. هكّه .. مجانا .

لكن انا نشوف انّو وقت اللي يتعلّق الامر بمقاومة المحتل ، يتعيّن ترك المرجعيات الفكرية جانبا ، باش ما نقولش نسيانها ، و الالتقاء حول محور واحد وحيد : المقاومه و التحرير

و التاريخ مليء بالشواهد على ذلك

المقاومه باخطائها ، اشرف من التخاذل "المتعقلن"ــ

dimanche 28 décembre 2008

أوقفــوا هذه المجزرة





غــزّه ... ديسمبر 2008 ــ

jeudi 25 décembre 2008

تدوينه بيضاء .. احتجاجا على مصادرة حرية التعبير





.

الــصّــبـّـــاط .. و الفاتـــورات


بعد ما انهالت عليّ الفاتورات ، فرد ضربة و من غير مقدّمات ، مَا .. و ضو .. و انترنات ، و جزّار و حوّات ، و عطّار و تنقلات ، مع مصروف البيرّات المقدّسات ، متاع الويكاندات :) و التاليفون بانواعو فيكس و نقّال ، قلت نضحّي بفاتورة الآ. دي . أس . آل . و يحلــّها الف حــلال ، مادام دوام الحـــال من المحـــال

و مادام كيما يقولو : الصديق وقت الضيق ، قلت عليّ و على هاك البيق ، يسلــّـفني موش من مكتوبو ، و إنّما من أسلوبو ، باش نكتب هالتدوينه ، اللي عندها مديده عاملتلي في مخّي تزنزيـــنه ، من نهارة الشلبوق الحذائي ، اللي شفناه بالبث الفضائي ، و اللي كلاه بوش الكــَــريه ، من صبّاط صحافي نبيه . نهارتها تمنيت امنية وحيده ، و بعيده ، رغم اللي الاماني متاعي ماهيش عديده ، تمنيت صحافيـّـي بوفرنك ، اللي واقفين منهم على الربوة و اللي قاعدين يتفرّجو على البنك ، و اللي يتصوّرو دورهم ما يتجاوزش مجرد نقل للمعلومه ، دون الانحياز الى الفئات المحرومه ، تمنّيتهم يحفظو هالدّرس : راهو من العـَـبـَـثْ ، الاكتفاء بالركض وراء الحَـدثْ ، دون العمل أحيانا على صنع الحَدثْ

أيّ معليناش ، كلّ حدّ كيفاش ، و لولا هاك الارهاط ، اللي هوما بيديهم يستاهلو ضربة صبّاط ، و لولا صحافيّـي الربوه و الحياد ، و التغاضي على الاستبداد ، ما كنّاش ننتبهو لوجود صحافيين كيف هكّه ، يحبّو البلاد ، بكل ما عندهم من قتاليه و عناد ، و كيما قالوها فلاسفة و مفكّرين أعتاد ، الاشـياء ما تتفهم الا بالاضداد

تفرّجت على المشهد في الفضائيات ، و تيليشارجيتو من الانترنات ، كيما بقيّة المواطنين و المواطنات ، لكن وطنيّتي ، اللي أصبح مشكوك فيها هالنهارين ، بعد احتكار صفة "الوطنية" من طرف "ثـلـــّه" من المدونين ، الــمـُـفعمين و المـْـسـَـتـّـْــفين للوذنين ، بمشاعر النخوة و الاعتزاز ، لكنهم ساكتين ومـْـبـلـّــعين، على فضايح الرشوة و الابتزاز . و بعد حرمان مدونتي من المشاركه في المسابقة ، لانّها ، و كيما هوما قالو ، من المدونات العايقة

عاد قلت يا براستوس يا بوهالي ، الخير بين ايديك و انت تصيح : يا قلّة رجالي ؟؟ ، ايّ هزّ راسك للعلالي ، و خلّي عندك ثقه في قناتك الوطنية اللي نورها يلالي ، و قناة ت 7 هاي بحذاك ، حلــّـها ترا و بيّن حسن نواياك ، اش مجرّيك ورا المعلومه ، في قنوات اخرى ملغومه ، من النزاهة و الشفافية محرومه ، و من الارهاب مدعومه ؟؟؟ علاش ما تنهلش المعرفه من قناتك الوطنية ، و الحال انّها بالمعلومات الصحيحه غنيّة ، و بالتحاليل العميقة مليانه ، و بمبادئ حرية الاعلام و استقلاليتو شبعانه ؟؟؟ـ

بدّلت لتونس سبعه ، و نلقى من الاخبار شبعه : حـَرصَ ، أَوْلـَى ، ما انفكّ ، توجّه ، اهتمّ ، عزّز ، أشرف ، ثمّن ، دشّن ، أ َذِنَ ، ..... و فاتت النشرة المحلية ، و العالميه ، و قلت لعلّ باش يجيبوها بعد النشرة الاقتصادية ، جات الاقتصادية و الرياضيّة ، قلت لعلّ بعد هاذيّ ، و تفرهدت شويّه ، بعد ما جات النشرة الجوّيّه ، و حكات على السحب المتراكمه ، وقتها وين أنصفـْـت قناتنا المسالمه ، و قلت اكيد هالكميات الهائلة من السحبْ ، هي السببْ ، وراء ما اصاب التقنيات من عطبْ ، و منعها من متابعة و نقل الخبر عن كثبْ ، و كيما يصير على الرجال ، وقت اللي تنهال عليهم الفاتورات ، يصير على القنوات ، و قت تنهال عليهم التّـسـحيبات ، و التـّضبيبات ، امّا التسحيبات و التضبيبات في الحاله هاذي، إعلامية ... و ما هيش جوّية

الحق الحق ، هاذا الكل ما فهمتوش ، مراعاة لمشاعر بوش ، و الا طحين للعنكوش ؟؟


و في الختام ، و من موقعي الغير هام ّ ، كمواطن وسط الزّحام ، نقترح على مؤسسة ت 7 باش تسكّر و تحلّ في عوضها كوشه و الا حمّام ، و المنشطات الممكيجات الجاهلات ، يولّيو حارزات ، و منشّطي الترهدين و الرّطابه ، يولّيو طيّابه . و الا عندي اقتراح آخر ، و راني جادّ و مانيش ساخر ، اش قولك يا مؤسسة ت7 لو كان تبدّل الأفــار ، و تحلّللنا دبّو متاع فريب سيبار ، و هكّاكه تربح دعاء الخير ، من الزّوالي و الفقير ، في هالشّتا القمطرير ، ثمّاش ما تبدع في هالمهام التافهة البسيطه ، ما دام ما كنتش في مستوى الرساله الاعلامية اللي بعهدتك منوطه

و لنا لقاء آت ... بعد خلاص فاتورة الانترنات...و بحياة راس البوبلينات .. اللي مولاها يتجسس على الكـْــلـِــيـُـونات



:) :) :)

dimanche 14 décembre 2008

بعض احسن المدونات

الدعوة الرشيقة اللي وجّهها صديقنا حسين هنا ، و اللي هي حسب رأيي اعمق و اضخم من مجرد مسابقة سطحية .. بل انا نرى فيها نوع من الحميمية اللي ممكن تتبنى مابين المدونين
اما ارجو انّو خونا حوحو يسمحلي باش نشارك بنوع من التعديل في الصيغة مادامنا في سياق بعيد على الشروط الجافة و الصارمه :) ـ
اوّلا .. و ثانيا .. و ثالثا ، انا لا يمكن انّي نتخيّل البلوغسفير من غير صديقنا أزواو..اللي ارجو انّو يغفرلي "مبالغتي" هاذي اللي تنجّم تحرجلو تواضعو المعهود
و من بعد تجي المدوّنات الاخرى اللي ديمه نتسكّع فيها .. و اللي انا قسّمتها تقسيم اخر
منهم اللي نحبّهم برشه خاطرهم ما يكتبوش باستمرار .. اما كي يكتبو يعطيوك شبعة افكار دقيقه و طريفة و جريئه ، و في السياق هاذا نذكرو ماني ، ماهيفا ، قصة اونلاين ، بالملوان ، الفري راس
عندك زاده المدونين اللي عندهم بلاده بنينه برشه .. و اللي عادة ما نقرالهم تدويناتهم بصوت مرتفع :) باش نحاول نتمثّلهم قدّامي اكثر .. و انا متأكّد اللي طريقتهم في الحديث متميّزة برشه ، منهم : بيغ تراب بوي ، الدوعاجي ، الزبراط من جينيف ، المسلم السابق و عياش مالمرسى
ما نّجّموش نفوتو المدونات اللي تحتوي على التحاليل الاكاديمية المتعمقة ، و اللي بقدر ما تختلف معاها في بعض الاحيان ، الا انك ما تنجّم الا تحترم مجهودها و دقّتها ، على سبيل المثال : طارق ، كوسموبوليس ، و كارب ديم
نمشو توّة للمدونين اللي عندهم معزّه من نوع خاص عندي ، لسبب واحد هو انّهم مبدعين بصوابعهم .. يمكن هنا فمّة شويّة انانية .. لانّهم زملاء في تخديم الصوابع .. في الفن اكاهو بطبيعة الحال :)ـ اللي هوما سونيا و هبلاتها .. و ارتيكيلي و نقاش تونسي اللي مع الاسف مازلت كي اكتشفت انها امتدت لها الايادي الوسخة و حرمتنا من رسومو الرائعه
هاذا بالطبيعة مع امّالي الدار: هناني و اسلوبها الخفيف السهل الممتنع .. ابوناظم و خربشاتو الثاقبه ..البرباش نموذج المدوّن الهادئ .. ارابيكا و تصعصيعها الحلو :) ولاده و اندفاعها المزيان .. اللص رقم واحد اللي مخبّيه داخلها ..فنّانه كبيييييرة .. جاكييز ،اللي عييت ما نقلّو شبيك حارمنا من وجودك في التن بلوغ.. الجنّي ، نموذج المدوّن اللي ما يحبّش يكون واحد اخر في مدوّنتو
و القائمة تطووووول

Portrait : Youssef Chahine


ـ"مدونون وطنيون" !!!...أو أقصى مظاهر الـطّحينوفيلي

كل مرّة تفاجأنا كمشة متاع طحينوفيل بالمزايده و اعطاء الدروس في الوطنية ... و آخرها هالبلوغسفير الجديد اللي مسمّين ارواحهم المدونون الوطنيون

الحقيقة ، دوب ما دخلت للصفحة متاعهم عالفايسبوك ، رجعت خطيوتين لتالي .. و فركت عينيّ باش نثبّت انا وين بالضبط .. على خاطر تهيّألي اللي انا في مقرّ متاع شعبة مهنية متاع سبيطار مّسّخ .. و الا حاجه كيف هكّه

ما هيش صعيبة على حتى حد باش يستنتج اللي هالشكشوكه "الوطنية" الجديده .. ماهيش معزولة على الاراده اللي عمّال تقوى و اللي تتمثّل في تأسيس جمعية للمدونين

و زاده ، من المفارقات .. المضحكات المبكيات .. اللي هالزّمارة "الوطنية" الجديده تزامن تأسيسها مع التصريح بالأحكام القاسية اللي صدرت ضد العناصر اللي كانت فاعلة في تحركات الحوض المنجمي الاحتجاجية ، احكام وصلت الى حدود العشر سنوات سجن ، ضد ناس كل جريمتهم انهم قالو : نحبّو نخدمو .. نحبّو نعيشو ... نحبّو نتنفّسو ... نحبّو نحسّو بأنسانيّتنا .. و بالطبيعة هالكراوك اللي أسّـسولنا هالزّمّارة الجديدة هوما الـ"وطنيين".. اما ضحايا الاحكام الظالمة و القاسية و المهينه ، هاذوكم خونه و يكرهو بلادهم و يحبّو يدمّروها

فيني هالزمارة "الوطنية " الجديده من هاذا ؟؟؟ فيني وطنيتها ..؟؟ فينو انغماسها في الشأن الـ"وطني" ؟؟؟ و الا الوطنية عندهم ما تتجاوزش شويّة الشوالق البنفسجية اللي عمّال يلفّو بيها في جثثهم ؟؟؟ يخلي دار الهمّ .. حكّ راسك ، و حكّ ........ و سمّي روحك وطني



ما نعرفش علاش ديمه في المواضع اللي من قبيل الطحيوفيلي .. و القـْوادوفيلي .. و هزّان القفـّـيلي ... و ماكلة الجـّـيفيلي .. تجي قدّام عيني التصويرة هاذي



ياخسارة على هالبلاد

تحييـــن

حضّرو رواحكم زاده للشّكشوكه لخرى اللي قاعده تطبخ هنا