vendredi 31 octobre 2008

caricature : 4 Novembre ... 3


محلاها الحـَـياة .. مع بابـّـِـيـّــُـــون

ساعه ساعه .. نبدا هكّه نقول بيني بين روحي : ياخي شبيها مواضيع المدونه الكل متاع واحد ما عاجبو شَــيْ ؟ نهار الكل و هو شادّ المسهولين و يقطّع و يريّش فيهم تقولش قاتلينلو البدري ؟ نهار الكل و هو يخرنن ، هاو فلان قتلوه على خاطر طيقر من البطالة و خرج يطالب بحقّو في الشغل ، هاو فلان عامل اضراب جوع خاطرمسحّتينو من خدمتو قال شنوّة هاو هااااك العام شارك في اضراب قانوني ،هاو فلان حجبولو مدوّنتو ، و يلزمنا نتضامنو معاه على خاطر ينجّم يجي عليك انت الدور من غدوه و تتحجبلك مدونتك ، على حد قول فنانتنا صليحة : "و اللي جْــرى عْـلى الناس يجرَى عْـلـَـيّ" .. و على ذكر صليحه ، باللاهي نستأذنكم واسمحولي ، وحتى كان ما سمحتوليش :):) خليني نفتح قوسين هنا حتّى و لو بعــيد على الموضوع .. اما حابب نقولهم و هوما ما يستاهلوش تدوينه خاصة ، سمعت اللي باش يعملولنا مسلسل خاص على حياة الفنانه الراحلة صليحة ، زعمه زعمه كيما المصاروى و المشارقة عموما كي عملو على ام كلثوم و اسمهان .. براس والديكم اتلهوا في حاجات اهم إعلاميّا و ثقافيّا ، و اخطوها هاك المرا خلّوها رايضة و مرتاحة في قبرها ، و خلّي صوتها يبقى في مسامعنا حنيّن و صافي و دافي و جبالي و يوحي ببساطة مولاتو ، اللي حتى ولو عاشت احداث درامية في حياتها ، راهي تفرضت عليها فرضان ، و مسكينه ما كانتش فاعلة في حتى شى الا في الغنا
عاد
قلت يابراستوس ، علاش ما تعملش ربي في بالك ، و تنظر للنصف المليان من الكاس ، و تنحي هالاهتمام المبالغ فيه بالتجاوزات و الانحرافات و التعدّيات و الانتهاكات ، و يزّي من الشمايت و التّسبيب
ياخي كي بعد قدّااااااش تاقع غلطه ، ما يجيش منك العقل ؟ سايـّـي ؟ تقطعت الرحمه من قلبك ؟؟ ياخي على خاطر عون امن على اعصابو شويّ ، ينجم يكون جيعان نهارتها ، ما كلاش حصّتو الكافية من القــُـرْط و السّدّاري ، مما اثّر على حالتو النفسية ، و خلّاه يغلط و من غير إرادتو قتل مواطن و الا اثنين و الا ثلاثه في مظاهرة . وفات الدنيا ؟؟؟ـ

مازالت البلاد معبّيه بالمواطنين الاحياء راهو

ما ماتوش الكل راهم ، شويّه تفاؤل يعيّشك
و الا على خاطر استاذ طرّدوه من خدمتو قال شنوه هاو هاااك العام شارك في اضراب قطاعي شرعي و قانوني ، تقوم انت تتنرفز ؟؟ تهاوينهم بقية الاساتذة يخدمو ، ياخي هوما الاساتذه الكل وقع طردهم ؟؟؟ باش انت تاخذ على خاطرك ، ايّ .. صلــّي عالنّبي .. و قول محلاها الحياة مع بابـيـّـــون .. و منّا و هكّه يلزمك تغيّر مواضيعك .. و تحكي على المواضيع المشرفّة اللي تنوّرلنا وجوهنا في المحافل الدولية
علاش مثلا ما تكتبش على الوزير الفولاني اللي بسـْـلامتو ، شدّوه بشـْلامتو سارق ، و حقّقّو معاه ، و حاكموه ، و طبّقو عليه القانون كيفو كيف ايّ مواطن مخالف
علاش ما تكتبش على النقاشات العنيفة و الحادة اللي تسود اجواء المجالس النيابية ، و يتم فيها تبادل التهم و حتى الشتائم بكل شفافية
علاش ما تكتبش على مواطن مثلا دخل لرئيس البلدية و سخسخو على خاطر الاعوان ينظّفولو كان قدّام دارو هو ّ ، و ما ياقع تصليح الفوانيس العمومية الفاسده الا كي تبدا في حيّو هوّ والا...والا...ـ
كي تلوّج تلقى راو
ايّه سيدي انا هكاكه في غمرة فرحة الحياة مع بابيـّون ، و بديت نبتسم انها تونس ، و بديت نخزر للدنيا من جانبها الوردي ، و بديت انّظّف في سـَـريـرْتي من الحقد الاعمى ، و الضغينه و الشماته ، و بديت نندم على كل كلمة جارحة صدرت منّي تجاه هالرّجالات الافذاذ ، و البــَـرَرَرَرَرَهْ ، اللي ما انفكّو يشملونا بعطفهم الخاص ، و يوليونا بعنايتهم الشخصية و لفتاتهم الكريمه
و حسّيت براحة نفسية كبيرة ، كيما نشوف عندكم ، ما ثمّاش احلى من التوبه النصوح ، يكذب عليك
ينعلك يا شيطان
و زعمه بديت نفكّر باش نرجع نقرا مدوّنتي من الاوّل ، و تعاليقي في المدونات الاخرى ، و نراجعها ، و نحذف منها التعاليق الجارحة ، الطايشة ، و نردّها مدونه منسجمه مع هالنور اللي قذفه الله في صدري .. هالنور متاع التسامح .. و التجاوز .. و اللـّــُحمه ، و بداية صفحة جديده مع عمايل المساهيل و المسهولين
وحطيت السي دي متاع غنّاية "معــًا .. معـًا من أجل توووونس معـًا ..ترااراراراارار" و بديت نسمع فيه و نتذوّق في معانيه لأوّل مره ، و انا نادم على الايّامات اللي تعدّوا من عمري من غير ما نسمع ــ بصفة ارادية ــ هالغناية المؤثّرة
بربّي تمعّنو معايا في هالكلمات العميقة ، و هاللحن الثوري : " معــًا .. معـًا من أجل توووونس معـًا ..ترااراراراارار"ـ
الللاااااااه ...ـ
انا هكّاكه ، و التاليفون ينوقس ، في الحقيقه ما حبيتش نجاوب ، خاطرني منسجم مع الغنّايه ، امّا كي لقيتو فلان ، جاوبتو
بين قوسين ، فلان هاذا عامل عامين علم نفس في الجامعة ، و اضطرّاتو ظروف باش يدخل للوظيفه العمومية ، و وين ؟؟؟ في البلدية :) :) :) اما مسكين مازال من هاك النوع المطيقر من كلّ شي ، و مازال مل ذاقش لذّة الحياة مع بابـّـيــّــون :)ـ
ــ وي .. اهلا بالكلوشار .. سافا ؟؟ـ
ــ اهلا .. وينك ؟ اسمع .. حبيت نشنّفلك الآذان متاعك بمعلومه فيها رقم باش تشيخ عليه ، 220 مليون باش تتصب في الكونت متاع البلدية متاعنا ، خاصّة بهاك الاحتفالات
البلدية هاذي من البلديات اللي تحت المتوسطه ، و ـ(متوسّطه هنا بالمعنى المتعارف عليه ، يعني في بلاد ماهيش كبيره و ماهيش صغيرة )ـ
ــ يزّي بلا تمنييك ، تآنا مازلت كي بديت نشيخ مع النّص المليان متاع الكاس ، و انت تقلّي 220 مليون .. و احتفالات ؟؟؟ـ
ــ آمــا كاس ؟؟؟ قاعد تشرب انت توّا ؟؟ .. نجـــي ؟؟؟ :) ؟؟؟ـ
ــ وين تجي ؟؟؟ شدّ بلاصتك .. نقصد انّي ولّيت متفائل و ما عادش نخزر كان للنص الفارغ من الكاس .. يا فلان ، يا خويا ،ما نعرفش هكّه كيفاش رجعلي شاهــد العقل ، و قلت ياخي علاش ما نولّوش عاقــلين ، و محــلانا ، و نـسـْـتـَـعـْـلـْـشــُــــو، و نخرّجو الصّوف في عوض الشعر ، و نبعبعو في عوض نتكلّمو ، و نززّو في عوض نحجــّــمو ؟؟؟ و حتّى كي ننقدو ، ننقدو نقد وخيّان و تبدا وجوهنا حمرا من الحشمه من المسهول اللي ننقدو فيه ؟؟؟ـ
ــ يا بشر ْ .... راهي 220 مليون ، في بلدية بـِـيدُونــَه ، مّاله البلدية الفلتانية قدّاش يصبّولها
ــ انت حقود
ــ احسب 81 بلدية في معدّل 250 مليون
ـ(رغم انّي نتصوّر بلاد البابيّون فيها اكثر من 81 بلدية موش كيما قال هوّ ...)ـ
ــ انت عنصر مشاغب
ــ راهو اكثر من 20 مليار دهن و سيرفاسار و قماشات و علامات و كتيبة لافتات و لوح و تزيين و بقلاوه و امبولات و منصّات و لوح و مكاتب (مكاتب : جمع مكتوب/جيب ، موش جمع مكتب / بيرو) ـ
ــ تحت آنا عنوان هالمبالغ باش تتصب ؟ يا عدوّ البابــيــّـــون
ــ تحت عنوان "التنميه" .. ماو تعرف ، الفلوس اللي تتصب بعنوان "التنميه" ، اكثر اهمية من الفلوس الاخرى متاع ما يسمّى " المصاريف الاعتيادية "ـ
مصاريف "التنمية" تشمل الاناره العمومية ، صيانة المنشآت الرياضية و الثقافية ، الخ ... الخ ... و زادا ، السرفاسار و اللّوح و القماش متاع كرّوسة العروسه ، و من اهمّيتها ، انّو المسؤول البلدي الكبير ، القابض و الا اللي هوّ ، مسموحلو باش يدخل في الروج على حسابها ، قبل ما يصبّوها ، على خاطرها جايّه جايّه ، بل يمكن يتعاقب كي ما يدخلش في الرّوج على حسابها

السيد ماهوش يبالغ ، و ماهوش يزيد ، الرقم قدّامو ، و مهما كان الرقم ضخم و الا ضئيل ، على خاطر المسألة نسبية هنا ، اللي يعتبر ضخم للجهة هاذي ، هو ضئيل بالنسبة للجهة الاخرى ، و العكس بالعكس ، الا انّو اكيد انّو الناس ماهيش شبعانة و محققة جميع توازناتها ، و متمتعين بجميع حقوقهم الاساسية ، و ما عادش ثمّه وين تتحط الفلوس الا في شويّة الجراتل و الدرابل متاع بوسعديّة اللي ينفخوهملنا بيهم كلّ خريف

تلفّت لهاك الكاس اللي كان منذ لحظات نصّو مليان ، و سبحان مغيّر الاحوال ، لقيتو ولّى نصّو فارغ .. فارغ كيما ايّامنا .. و ليالينا .. و صباحاتنا ..و عشيّاتنا .. و تلافزنا .. و مسارحنا .. و جرايدنا .. و كوادرنا .. و شوارعنا .. و تواريخنا

و نحّيت السّي دي متاع "معـًـا .. معـًـا من اجل تووووونس معـًـا .. تررا تررراتتراا ترا"ـ

و حطّيت سي دي آخر بعد ما نفضتو من الغبرة

دار الفلك من بعد طول العــِـشـــرة

و الدّهر حال بحال .. مرّه بمـــرّه

mercredi 29 octobre 2008

caricature : 4 novembre ... 1

من هـْـنا

لنهار 4 نوفمبر

اللي هو "للــّي ما فيبالوش" ـ

.. و الا للــّي "في بالو و موش مهتم" ،ـ

و الا فيبالو و عامل روحو مافيبالوش ، ـ

و الا فيبالو و ماذابيه راهو ما فيبالوش..ـ


و اللي يتزامن مع صدور الحكم في قضية الصحفي زياد الهاني

اللي رفعها ضد الوكالة الوطنية للانترنات

بتهمة ممارسة الرقابة

اللي شاف انّها سبّبت عرقلة و اعاقة للعمل متاعو

بوصفو صحفي بالاساس

عاد في اطار الاحتفالات بالـرابع من نوفمبر

كل يوم هالوقيت

إذا تحبّو بالطبيعة

اعملو طلّه تو تلقو تخربيشه متاع كاريكاتير

mardi 28 octobre 2008

ديالــــوق .. مخنـــوق

ــ نــــاشــدت ...؟ـ
ــ نـا ..؟ شـِـبـْـت
ــ و عـْلاشْ ...؟ـ
ــ لا ... لتوّ ما عـْـلاشْ ... مازال واطــي
ــ قتلي مازال باطــي ...؟ـ
ــ واطي ، واطي ... ماهوش باطي
ــ شـْــباطـك انت ... انا خاطيني .. ما نشابطش
ــ ماهوشْ باطي ... مَاهـُـو ... اشْ ... اشْ .. اشْ ... شْـباطــنا في بعضنا .. هو اللي يخلـّيه يـَبـْـطى
ــ زعمه يخـلــّــيهْ يـَـبْــطى .. و الا يخــلـّـ...ـلـّ...ـلـّـ...لـيه ْ يـَبْـ ... يـَبْـ...يـَبـَـنـَـفسجْ...؟ـ ؟؟
ــ كيف كيف ، يخــلـّــــيه يبطى .. و الا يخـلـّيه يَـبــَـنَـفـسج
نفسج ... نفسج ... نفس الــجـّـْـــماعه
ــ واطــــــــينْ
ــ وْ باطـِــــينْ

lundi 27 octobre 2008

الرصــــيف الحائر .. بين "مهنــّد" و كتاب "الكبائر"..ـ


السيد هاذا ..اللي ما سمحتش لروحي باش ننشر صورتو ، يبيع ،عالرّصيف ، في ثلاثه اصناف متاع بضاعة و ماشي في بالو اللي هالســّلع اللي يبيع فيها .. ما عندها حتى علاقه ببعضها
واحد : تصاور و بوستارات مهنّد و نــــور

اثنين : كتب صفرا ... "الكبائر" ... "نساء حول الرسول" ... ""عذابات القبر" ... الـــخ


ثلاثة : انواع عديده و مختلفة متاع ماكياجات "مضروبه" .. و غير صحّية.. مكدّسين فوق كرّوسه مقلوبه


البائع البسيط هاذا .. اللي ينجّم في اي لحظة يتهزّ لمركز الشرطه و يتحاكم بتهمة التجارة الموازية.. ما يعرفش انّهم هالثلاثة بضائع اللي يسوّق فيهم عالرصيف في بلاد ريفيّة كيما البلاد التونسية :)ينجّمو يحلّو تران في مخ فتاة مراهقة و فقيرة ... و حتّى ماهيش فقيرة . و ينجّمو يشوّهولها وعيها ..و يدمّرولها بنيتها النفسية و العاطفية .. و تنجم هالاشياء المعروضة عالرصيف .. تصنع من فتاة جميلة و مقبلة على الحياة بكل اندفاع الفراشات .. تصنع منها مومس والا مرا خوانجية خايبة

البضاعة الاولى المعروضة قدّامها ... تصاور نور و مهند ... هاو اش تقوللها :ـ

انا نور ... و حبيبي اسمو مهنّد .. و انت .. ؟.. اذا تحبّي يكون عندك حبيب كيما مهنّد .. يلزمك تكوني كيفي انا .. مزيانه .. وجهي صافي .. شعري ... بدني .. كل شي فيّ مزيان..وانت ؟... يا فقيرة ... يا مْـحَـتـْـحـْــتـَه .. يا زوّاليّه .. ماكش كيفي

انت فقيرة .. و مغمورة .. و مدفونه..
انا نموذج الانوثه .. و انت ... لاشيء
انت ماكش انثى

و تو... قدّامك حاجتين

يا إمـّا تنخرطي في ماراطون لانهائي متاع ادمان مرضي على الماكياجات و الكرايم ..و تكوني مدفوعه بوعي مسطّح بانّو كمال جسمك .. و جمال وجهك هو وسيلة وجودك .. بل .. الوسيلة الوحيدة لوجودك في هالحياة .. ..و لا فايده ترجى من ثقافتك .. و من جمال روحك .. و من جمال اقبالك على الحياة .. و من جمال عاطفتك .. و دفءها .. و من جمال اهتماماتك

هاذا الكل ما يجلبلكش حبيب كيما مهند ..

الحل الثاني ..انك ترجعي تقري كتاب "الكبائر"..و كتاب " نساء حول الرسول".. و كتاب " عذابات القبر"... وتتقوقعي في الدوائر المغلقة متاع "التبرج" ... و " الحرام" ... و "العورة" ...و تنكمشي داخل خرقة من القماش الاسود..في انتكاسة تراجيدية .. و يأس درامي من الوصول الى امتلاك ربع ما تملكه "نور" .. ـ

نور اللي هي في نهاية المطاف .. ماهي الا منتوج تجاري .. كيفها كيف ايّ نوع متاع ايّ حاجة
ياغرت
كراهب
سراول

******

مساكن فتياتنا الصغيرات

تنـفـــيسه ...for fun


هــُــمـّـَـا " الكــَـمـْـيه " حـَــمامْ و فــْـراخْ
و احنا الفـــــــــول دوَّخــْـــنا ... و ْ داخْ

dimanche 26 octobre 2008

مرحبا بـ"خيل و ليل" الجديدة .. و لا تربّح من كان سبب !ـ

اللي صار مع مدونة "خيل و ليل" .. صاربالضبط مع مدونة ارتيكيلي بعد ما كتب خاطرة فيها نفــَس نقدي و ساخر شويّه من الرّواغل اللي تقوم كل رمضان و كل عيد على الهلال و ما
نفس السيناريو ... وبنفس الطريقة .. تتلقّي ايميل من قوقل قروب ، تتضمّن رابط يكفي باش تكليكي عليه ، تدّمّر مدونتك كلّيا
!!!!!!!!!! ???????

رغم اللي احنا متأكدين اللي ازواو من الاكيد باش يرجع يأثثلنا مدوّنة اخري على نفس منوال الثقافة و الفنون و العناية الدقيقة بالتراث ، لكن مع هاذا زادا، السجالات الفكرية ، و المواقف النيّرة الوضّاءة والمضامين الراقية و الطريفة في آن واحد

قلت رغم انّا متأكدين من هالعوده و منتظرينها ، الا انّي نعبّر على اسفي لغياب خيل و ليل القديمه ، و استغرابي الشديد من هالطريقة الغريبه لتدمير المدونات ، و اللي ما نعتقدش في براءتها

دونك ، الواحد ياخذ حذرو من اي ايميل مشبوه من جماعة القوقل ، و الا من المتسلّلين باسمهم

samedi 25 octobre 2008

يا حاجب "فرده و لقات اختها" .. اشنوّه الشــّيخه اللي شختها ؟؟؟؟ـ

هاذا العنوان الجديد متاع مدونة فرده و لقات اختها






و سيبو المدونات
يا


حيوانات



mercredi 22 octobre 2008

caricature : بوكشطه يصلّي


دربـــال ... 1 ـ

إسمو : دربــال ... ـ
و كيما لاحظتو ، اسمو غريب ... و يذكّر ببرشه حاجات عندها علاقة بالتقربيع و الهبله
دايــّور ، صوتيا ، "دربال" ... قريبه برشه من "هـبال" ـ
مثلا ، من دربال .. انّجّمو نمشيو لـ : "درباله"...اللي تعني : "جرتيله" .. و الا ببساطه ، تعني فوطه كبيرة .. ايّ لباس فضفاض .. مرفرف .. هابط قد من فوق ، قد ملّوطه .. ما يفصّلش البدن ،بدائي شويّ .. يقول الفرنصاوي : ـ
vetement drapé
اللي ما تبعدش برشه ، فونيتيكمون ، على : دربال
زادا اسم "دربال" .. ما يذكّركش بغناية عم الهادي الجويني : اوّل نظره ، درباني ..؟؟؟ يعني هبّلني .. مهمشني
عندك زادا .. في مجال الزّرد ، وحلقات الذّكر اللي تتعمل لـلـ : "أولياء الصالحين" في بعض الارياف ، وين يكثر ضرب البنادر و البخور و الايقاعات المتسارعة .. العنيفة .. و تدقّ معاها القلوب .. بنفس التسارع.. وبنفس العنف .. يقولو : فلان "ادّرول" .. يعني انغمس .. و داخ في حب سيدوفلان .. لين التحم بيه .. في لحظة روحانية و وجدانية .. و كتعبير على درجة حبـّو لها الولي الصالح ، ولّى ياكل في الضّــلف متاع الهندي .. بشوكو ، من غير ما يدقـّو، و وثمّه شكون يسخّنو المنجل في الجمر لين يشعل و يحمار ، و يلحسوه من غير ما تتحرق لساناتهم
هاذوكم ، عندنا، يسمّوهم : الدّرواله
الحاصيلو ، درواله ، درباله ، يدّرول ، درباني، بردلــْها
Drapé , Bordel
الكلّو معجم صوتي قريب من اسم زميلي في العمل ، و اللي اسمو : دربال
بون .. كي نقول زميلي ، موش معناها شادّ جنبي ، و مكدّس قدّامو لوراق و الفاتورات و البونوات و الرّابّورات .. و عينيه مرشوقة في الكمبيوتر لين تنقبت ... على ما ثمّ شي
زميلي ، اما يخدم لبرّه في الشوانط . يعني اوراقي و رابّوراتي .. و..و.. ما يفوقوش بـَـالـْـتـُو .. و بـْـيـُوشـُو .. اهميّه ، هاذا اذا ما قلناش تنجّم تكون ذات اهميّة اقلّ
دربال ولد ريف
ما يطيقش المدينه
من كلامو ، و من طريقة حديثو .. يخليك تحسّ انّو ملزوز عليك ، و على مدينتك بحيوطها و كراهبها و ضوها لحمر و لخضر و دخاخنها و امهـفـّاتّها و ايقاعاتها السريعه
و كي تبدا تحكي معاه ، و تحاول تحلّ معاه الهدره ، يخلّيك تقرا في عينيه كلام من نوع : و كان ماهيش هالخبزة الكلبة و هالشهرية المحمومه ، ما كانش ينجم يكونلك الشرف باش تحكي معايا من اصلو.ـ
دربال عندو خوف مزمن من انّو ايّ واحد يعدّيها عليه
في وعيو انّو العملة الوحيدة المجدية في المدينه هي انّك اذا ما عديتهاش انت على ايّ واحد ، راهو بالضرورة ثمّه شكون عدّاها عليك
و بما انّو هو مواهبو ضعيفة و تكاد تكون منعدمه في انّو يعدّيها على الناس ، دونك ، ديمه متوثـّب ، و متحفـّز ، و ديمه شادد القارد ..بطريقة ولات شبه كاريكاتورية ، لدرجة انّو هو ولّى موضوع تنبير و تندّر في الشوانط مع زملاه ، اللي لاعبينها معاه "ولاد مدينه" ـ
كلمة "صباح الخير" يخاف منها .. خاصة كي تصدر من واحد ما يعرفوش مليح ، خاطر تنجم تكون فخّ .. طـُـعـْـم .. هاذاكه علاش ديمه يرجّعها بحذر كبير .. باستعمال لهجة و نغمه صوتية تتضمّن مفادها : هاني جاوبتك على صباح الخير متاعك ، اما ما تزيدش معايا الكلام
باختصار
مخّو عبارة على "ساحة وغى" تدور فيها "حرب ضروس" ماتوفاش، مابين زوز أعداء ما ثمّاش ما ألدّ منهم : "قـِـيَـم الريف" ضد "قـِـيَـم المدينه" ـ
دربال في المدينة ، ما أبخلش منـّو
يخاف من انّو يخلّص عليك قهوة ، يمشي في بالك انّك عدّيتها عليه ، و نحّيتلوفلوسو من جيبو ، و شربت بيهم انت قهوتك
دربال في الرّيف ، ما اكرمش منّو
لانّو يلعب في ميدانو .. مجالو ، ما عندو مناش يخاف ، و حتّى كيف يضيـّفك بعلّوش ،راهو باستحباب ، و بإرادتو ، و تبعا للقيم اللي سايدة في المكان اللي ذبحلك فيه العلّوش
المناسبات اللي واتت و مشينالو للريف متاعو ، لميدانو .. كان مثال للكرم ، و كأنّو يحب يقول : دربال اللي تعرفوه غادي ، هاذاكه واحد آخر ، ماهوش انا
دربال الحقيقي تعرفوه هنا . في مجالو ، وين تسود القيم متاعو ، وين ينحّي قناع الحذر و الحساب وشدّان القارد و الخوف حتّى من صباح الخير
وقت اللي دربال يبدا يستعرض في مواهب الكرم متاعو في الريف ، يحسّــسـّك ، في نظراتو و نبرة صوتو و تقاسيمو بانتصارو عليك.ـ
و كلّ ماتكون اللــّــَحـْـمَه اكبر ، ذكـَــرْ ، كل ما تسقط القيم متاعك مقابل صعود القيم متاعو هو
كل ما يكون كاس التاي عاقد و قويّ و معسّل و معبّي بالحشايش لخرى ، كليل .. زعتر .. مزّوكشه ...كل ما تكون الضربه قاضية
يبدا يضحك من عينيه .. و وجهو يتزرع فيه الدم .. و نبرة صوتو تفضح ما يحاول يخبّيه من نشوة انتصارو عليك
مادامها كيما قلتلكم .. الحرب ديمه قايمه في مخّو
لكن ، مادام كل قوّة للضعف ترجع ، دربال عندو نقطة ضعف تخلّيه ما يكرهش المدينه كره نهائي ، و تحافظ على خيط رفيّع بينو و بينها
هالنقطة متاع الضعف
و هالخيط الرفيع
هو : المخارق .. و بدرجه اقل الزلابيه
اما المخارق اكثر
و لدربال مغامرات كبيرة مع المخارق و الزلابية اللي يحبّهم بشكل جنوني
اما توّ ، يظهرلي طوّلتها شويّه
ايّه تو نكمّلوها المرة الجايّه

lundi 20 octobre 2008

ـ"و السجن مطرح الجـــنينه" ... هالمرّه في الرديف موش في غناية الشيخ إمام

قاعة السنما الوحيده في المدينه اللي نعيش فيها عندها مده ملّي تسكّرت .. و تقسمت ، جزء منها ولّى قهوة بودورو .. اغلب روادها اعضاء و محبي جمعية الكورة .. و الجزء لاخر .. مازال فارغ .. اظلم.. موحش .. معششه فيه الجرابع و الرتاتل ، اما انا كل ما نتعدّى من قدامها ، نسمع صوت الهارمونيكا متاع كلينت استوود .. و نسمع صوت صياح بروسلي و هو يشلغم فيها عاري و لابس ومنقّــّز من فوق عماره .. ونسمع صوت تصفيقنا و تصفيرنا على بطولات بيد سبنسر ، و حمزه بن عبد المطلب في فيلم الرساله ، و زادة على تصفيرنا على بوسات شمس البارودي و حسن يوسف الطويله ..بوسات طويله برشه على قلوبنا الصغيرة وقتها :) ـ
و انا نفكّر باش نكتب حاجه على الموضوع هاذا ، على خاطر القاعه هاذيكه عزيزة عليّ برشه ، و كانت تعتبر شباك نلمّدلو من مصروفي باش يتحلّــلي على دنيا اخرى.. دنيا مجهوله .. سحرية .. فيها برشه ضو .. و الوان .. و موسيقى .. و مشاهد خيالية .. و فانتازمات .. ـ
لكن كيف روّحت و حليت الانترنات، لقيت ايميل يتضمّن معلومه مفادها انّو ثمّة نادي اطفال في الرديف و قع تحويلو اخيرا الى ثكنة بوب تضمّ فوق الالف و خمسميات "عون" ، و الانجاز هاذا يجي طبعا في اطار التفاعل الايجابي مع ما وقع و ياقع فيها من احتجاجات ، و في اطار الاستجابة الحينية و الآنية لمطالب الاهالي و تلبيتها بكل روح المسؤولية و التحضّراللي مطلوبين من ناس قريب يولّو مرجع عالمي في حقوق الانسان
المعلومه اللي عندي انّو تم تركيز ثكنة للبوب في الرديف ، بعد ما تمّ الاستيلاء على نادي كان فيما مضى نادي للطفولة
حلو ياسر .. و رايع برشه
يعني ما تستغربوش انّومنّو و هكّه، اي مدينه تتغشــّش .. و تعبّر على الغـُــشّ متاعها بصوت مرتفع شوي .. تكتشف من غدوة الصباح انّو المرشي متاعها و لـّى مركز كوموندوس .. و الا الكوشه تولّي دورتوار متاع قوات التدخل.. و إذا لزم ، يدورو على محلات البغاء العمومي و يردّوها ريفيكتوارات و الا فستيارات متاع الطلايع

هيّا تـْـرَه .. مع بعضنا نتخيّلو مشهد متاع طـِفل في هالـ : إكس / نادي متاع الطفوله، قاعد يتجوّل بين الرفوف متاع قاعة المطالعة ، و الا قاعد يتعارك مع السّـوري(الفـأره) متاع الكمبيوتر في قاعة الاعلامية ، و الا في الملعب اللي تابع النادي ، يلعب في ماتش كورة و صويّتو مبحوح و مطيقر كيفاش صاحبو ما مسّوش بالكورة و هو راسو راس القول .. و الا صوابعو مبلحطين بالقواش (ثلاثة نقاط) و هو غاطس بين الالوان و البنسـُـووات في قاعة الرسم و البراعة اليدوية ، و الا قدّامو بيبيتر و هو متحمّل عود و الا كمنجه اطول منّو و يمرّن في صوابعو على تمرين صولفاج متاع موزار
و فجأة
لا طاح لا دزّوه
ياقع اقتلاعو من قدّام كتابو .. و الا حاسوبو .. و الا لعبتو .. و الا كورتو .. و الا عودو و كمنجتو و قواشو و بنسـُـواتو ...و يتــْــزرع في بلاصتو عضروط .. عيفور .. غضنفري .. مشلّط .. هو بيدو جيعان .. عريان .. اكثر من لونيفورم لزرق والا لكحل .. ما عندو ما يلبس .. يرقد بالبروتكان متاعو باش يكون ديمه على أُهبه ... و ماهوش فاهم حتى كعبه من طبيعة خدمتوشنوّه بالضبط ، سوى انّو مـُـطالب باستجماع كامل مخزوناتو العدائية ، كلّما أُمـِـر بذلك، لاستعمالها ضد ناس عزّل قد يكون هو افقر منهم و اكثر منهم جوع و حرمان و قينيا .. ومن الاجدر ليه انّو يرمي بالماتراك متاعو و ينتمي لمظاهرتهم ، اللي هي في واقع الامر، و كان جات الدنيا دنيا : مظاهرتو هوّ

و تتحلّ عاد الخزاين و الكزيــيـيات متاع رواد هاك نادي الاطفال ، المليانة بالصلصال و الاعواد و الاقراص و القصص و التصاور متاع اليوقي ! و السيدييات و اللعب والالات الموسيقية و القواش و البنسوات و الكــْــوُرْ ، و غيرها من اكسسوارات الطفوله ... هاذاكه الكل يتلوّح و تـتـْــسَــتــّـفْ في بلاصتو حاجات كيما هـكـــــّه


و كيما هكّه


قالـــّو مركز طفوله ..!!!!... و الا نادي اطفال .. و الا ندرا اش من زمّاره
اش عنّا ما نـّــ...ــنـَعملو بيه ؟؟؟؟ ـ
مصاريف و خساير و تجهيزات .. و من بعد يتحوّلو الى عناصر مشاغبة ... تِماهو منطقيا ، و حسب الظروف اللي عايشين فيها هوما و اهاليهم ، باش يتعثّرو في قرايتهم .. هاذا اذا ما تحشّـتش ساقيهم من الاوّل .. و ما يواصلوش .. و يكونو فريسه ساهلة لمثل هالـ :"وظائف" اللي من نوع البوب .. دونك ، علاش احنا ما نختصروش المسافات الزمنية ، و نجيبولهم طزازن و ستايك بوب حاضر باش ، من راسو لساسو ؟؟؟ـ
علاش نبقو نضيّعو في الوقت ، نستنّو في هالوليدات حتى يكبرو ، و يفشلو في قرايتهم ، و ينحرفو و يتعلّمو الزطله و الالكول على بكري ...و من بعد ، كي يتوبو ، يولّيو : بوب
وفعلا ، كيما شفتو ، الكعيبات اللي جابوهملهم عمناول ، تباركلّه ، توت أوبسيون ... زياده على ليزوبسيون برانسيبال متاعهم ، و المتمثله في اتقان مسك و استعمال الزّلالــط ، و رمي لكريموجان و الرصاص الحي و الميت ، فإنّهم يتمتّعو بديزوبسيون إكسترا : يعرفو زادا يمرمدو الشيّاب و العزايز ، و يعرفو يخلعو الحوانت ، و يعرفو زادا يعرّو ارواحهم على النـّسا المتظاهرات
هو المعروف على الدول اللي مازالت في طور التخلف ، والا ، خلينا نكونو متفائلين شويّ و نقولو: في طور التنميه المستديمه ، معروف عليهم انّو اكثر قطاع محظوظ و مقرّب و مدلّل من حيث الاعتمادات و التجهيزات و الانتدابات ،هو قطاع "الامن" ، هاذاكه علاش انا نتساءل، ياخي هالـفوق الالف و خمسميات عون اللي جايبينهم و حـاشــينهم في نادي اطفال، كادهم لا جابولهم معاهم وين يسكنو
مثلا : يعملولهم اقفاص ، كيما في فيلم
La planète des singes

شوفو هاك القفيّص محلاه .. كيفاش ساترهم .. وهوما في لحظة انسجام و وئام
و الا يعملولهم عــْـشـش، كيما في افلام الوستارن ، اللي يسكنو فيهم ليزانديان ، مع احترامنا الشديد لثقافتهم و تقاليدهم

هاذا اذا ما قلناش ياخي هوما اش مجيّب ملايكة اصلهم من الاساس ، حتّى باش ندبّرو وين نسكّنوهم


الحقيقه .. تخلّطت عليّ الافلام

شــي بقى في ذاكرتي من ايّامات قاعة السينما اللي حكيت عليها في الاوّل

و شي من الافلام الاخرى اللي عايشينها توّ.. من غير قاعات .. و من غير ما نلمّولها من المصروف .. و من غير تصفيق ... و من غير تصفير

الحاصيلو

حــاله حلـــيله

القهوة ... مطرح قاعة السينما

و قـَـزرْنة البوب ...مطرح نادي الاطفال

و ..."السجن ... مطرح الجنينه..." ـ

و هيّ ماشـــيه ... ـ

samedi 18 octobre 2008

le blog de Stupeur vient d'etre "suspendu" !!!!!شنيّة الحكـــايه

شنيّة حكاية
this account has been suspended
اللي تحيل عليها مدونة صديقنا
stupeur
اللي اكّد هو بيدو في صفحتو في فايسبوك انّو هالاغلاق هاذا خارج على ارادتو
و في انتظار ايّ توضيحات
حبيت نعاود ننشر آخر مقال كتبو .. قبل ما يتعرّض لهالاجراء الغامض
هاذا نص المقال

آخر ما صدر في ميدان الجهل والخور من أخبار بلاد الحمير والبقر

برجولية ماعادش إنجم نحمل أكثر من هكة, شيئ ينطق الحجر
راهم بالعربي زادو فيه لين ماعادش
اليوم خوكم قاعد نخدم على روحي و كيف العادة ساعة ساعة نسمع كالصوت متاع مايل جديد عالأوتلوك
نعمل طلة, نشوف المايل شفيه و نرجع نخدم. المرة هاذي كيف حليت المايل ما عادش إنجم, بهمت. دخت. ما صدقتش
ما عرفتش روحي نضحك ولا نبكي ولا نعمل روحي ما فيباليش
أما الفازة تالمون ماهاش عادية, ضاهرلي يلزمها تتعدى فالموفيولا متع الأحد الرياضي
قالك هاذي وكالت أسفار, تونسية, تنضم جولة نور و مهند
الجولة هاذي, تدوم 3 أيامات كاملين يا بو قلب
تمشي 3 أيام لتركيا باش تعمل دولاشة عالبوسفور و تتفرج فالقصر الي مثلو فيه المسلسل و فوق من هذا و دونو يبدى يمني فيك أنك باش تتصور عالكرسي الي حط فوقو سي مهند ترمتوو باش تغزر لروحك فالمراية متع نور و باش تمس الريدو الي يضلمو بيه البيت باش سيادتهم يعملو واحد
الوكالة هاذي تختم كلامها باش تقلك إذا إنتي جاي باش تشوف نور ولا مهند, راهو دويو. تعمل مجهودك باش تمضمض مليح خاطرهم ما يقابلوش أما راك فالحقيقة ماشي باش تعيش بالمنى يا كبول, عفوا يا كمون
العيب موش فالوكالة هاذي الي تبيع فالجولة هاذي ب780دينار كارتة تحك في كارتة. أما راهو العيب فالجبورة إلي تشري فالمنتوج العجيب ياسر
الحقيقة, التونسي عودنا بحضورو الفعال فالمحافل الدولية كيما هاذم أما موش بالصيفة هاذي
أنا نتفكر هااك العام تبدى ماشي فالشارع تعرضك كتيبة على الحيط فيها : أنت أو لا أحد ولى تاكسي كاتب على مال كرهبتو : أنا كريستينا و أليخاندرو ألداما و ما نحكيلكمش على ماريا مرسيدس ولى قوادالوبي أما المرة هاذي ما فهمتش وين آخرتها
الحاصل هذي قالتلهم أسكتو
بلادنا مرهزة من أصلو و كمل زادو غرقوها هالبهايم والبقر
أهوكا باش تشوفو مليح, تنجمو تنزلو عالتصويرة باش تراو المايل كامل
و بالطبيعة الرابط اللي حاطّو هو
يحيل على صفحة مكتوب فيها
this account has been suspended
!!!!!!!!!!!
شنيّه الحكايه
؟؟؟؟

vendredi 10 octobre 2008

ْفي الانتظارْ ... هاي عكاظيّه في عمــّار

النــّـاتَ هلــــمّ نــُـجـــــَـــدِّدُهُ *** فـَعـِصابـة ُحـجــْـبٍ تُــفـْــسدُهُ
شرطــيّ النـّاتِ تـَرَاءَى لنــا *** تُـمـْــسِكُ بمقــصٍّ كـَسـْـرتـُــُهُ
تدوينةَ هـــذا صـَنـْـصـَـرهــا *** مـوقــِـعَ أخــبار ٍ بــَــــــــد َّدَهُ
يخــْتالُ ذليــــلاً .. و لعيــنـًـا *** بمواقــعــِــنا ، تبـّـتْ يــــــدُهُُ
المكــرُ حَـلـفــْـتُ بثــَـعـْــلبـِهِ *** و الخدْعــَـة ِ أنـّـكَ مـُــفــْـرَدُهُ

يعـبـُدنا ،عوضــًا عـن ربـّـِهْ *** وَ "وكالـة ُ نات ٍ" ،معْـبَــدُهُ
عن أيّ "وكالة نات ٍ" تـحْــــــــــــــكي؟؟ لا، بل قل: طاحونـتـُـهُ
طاحــُــونة نات ٍ ، ليس لها *** إلا الإبــْـــحــارَ تـُــقـَــيـّـــــدُهُ

حَجَبـَـت ْ يـُمْـناك َ مقالا ً لي *** أكــَذاكَ مِـقــَصــّــُكَ يَحْـجُـبـُهُ
قد عَزّ شهودي ، إذ حَجَبَت ْ *** فأشَرْتُ لـرقـْـمـِـك أ ُشـْـهـِـدُهُ
أربعـة ٌ .. صفر ٌ .. أربعــة ٌ *** و الصّـفـرُ لطبـعـِـك أنـْسُـبـُهُ
لا عَمَرت دارُكَ ، "عـمـّـارُ" *** مادمت الناتَ تـــُُــخــرّبـُـــــهُ

jeudi 9 octobre 2008

فـتاوي .. و .. رشاوي





بعد ما زبّلها .. بتحريم الزلابية


طـمّـنهم اللي ماكلة الطّمّــينه حلال



يمشيش زادا يحرّم علينا المخارق

قال شنوّة : هاي فورمتها ندرا كيفاش


:):):)

ـ"سكايب"و الحكومة الصينية ..يتجسّسوا على المواطنين .. و عيناني زادا

العديد من المقالات صدرت أخيرا تفضح تورّط المخابرات الصينية مع موقع "سكايب" في عمليات تجسس على مستعملي الموقع من المعارضين ، لصالح الحكومه.. و ذلك بتسجيل مكالماتهم ، وتخزينها

صحيح انّو الخبر لا يمكن ان يفلت من المبالغة الاعلامية متاع لمريكان ، و تنسنيسهم المقرف على الدوّاخل متاع الدّواخل متاع الانظمه و الا البلدان اللي ماهمش في فلكهم ، رغم انهم يحتلّو الصدارة العالمية في ميدان الفضائح من هالنوع

و رغم ذلك ، فأمام السوابق التاريخية اللي تكشف تورّط شركات شهيرة (قوقل ، ياهو ، ميكروسوفت...)في ممارسات شبيهة.. وأمام الشهادات اللي وارده في المقالات من طرف ناشطين حقوقيين في الصين ، لا يمكن الا اننا نميلو الى تصديق جانب كبير من المعلومه


لكن اخشى ما اخشاه .. انّو ياقع اعتماد هالمقال من طرف بعض الاقلام الماجوره على شاكلة البهتان المسيّس .. قصد التدليل على انها اكثر الدول تقدما و حريّة تمارس في الصنصرة و الحجب و التجسس على شعوبها ، فما بالك بينا احنا


و بطبيعة الحال ، الصنصرة و الحجب و التجسس على المبحرين في النات .. ممارسات متخلفة و ماسّة بالحريات ..ولا دخل في ذلك لتقدم او تأخّر البلد الذي تمارس فيه


نخلّيكم مع البعض من هالمقالات .. هنا.. و هنا

mardi 7 octobre 2008

شعار "خارج المسابقة" : 4 نوفمبر و حرية التدوين

ملاحظة : الشعار هاذا راهو خارج المسابقة
:) :) :)
امّا فقط بعد ما صمّـمتو .. شخت عليه
و ما نخبيش عليكم .. عجبني
:)
خاصّة انّي أول مرّة نصمّم لوقو
حبيتكم تشوفوه معايا
واكاهو

lundi 6 octobre 2008

فـنـّـان الشـّـَـعـْـب ... أم الـشـّـُــعـَـب

بقـْـطفـلـــك بـسّ ... هـالــــمرّه
هالمــرّه بــــسّ... عَ بـُـكــرَه
ع َبـكره بــــسّ... شِي زَهــره
شــِـــي زهرَه حـمرا ... بــَـسّ
*******


الحاصل زايد مع هاك المرا الفنّانه المحترمه الرايعه .. اللي تعتبر مدرسه في الاداء السليم و القيم الفنّية الجمالية الرفيعة .. و الحسّ المرهف .. و المضامين الوطنية البسيطه ، لكن العميقه في نفس الوقت.
انا كي نسمعها تغنّي على الضيعه .. و الناطور .. و الـعِـلـّــيّـات.. و المواسم .. و البيوت العتيقه .. و حنّا السكران ..كيفاش "عم بيصوّر بنت الجيران..." و كيفاش "التلج نازل في الدّني تجريح" ... و كيفاش "عم بتضوّي الشمس .. عالارض المزروعه .. عم بتضوّي الشمس .. و الدّنيي عم توعى" ... والا وقت تكلّم صاحبها من وسط المزرعه : "راح يخلص الموسم .. و إفضى للمحبّي...ويـْنك يا حبيبي .. تا حــطّـك بـِـقلبي .. أعملّي عندك خيــْــمي .. من جـْوانح الغــيْمي .. و بالحب مـْضــوّايي .. جايي لعندك جـــــأيـي..."...و الا وقت تحكي على كيفاش هوما ساكنين في : " بـْـيوت سـْطوحـها .. عـِــلـّـِــيـّـِـي وَرَا عـِــلـّـِــيـّـِـي...بـْـوابْها مفتوحا .. للشمس و للحِـرّيـّــِي..."..كي نسمع النقشات هاذم .. و غيرهم .. ناخذ الجنسيه اللبنانية للحظات .. بما يعنيه هاذا من انّي نعيش قصّة حب مع هالبلاد .. و من خلال موسيقـتها ،نحوّس شويّه في الضيعه .. و ناكل شويّة خبز جبلي .. و نشمّ شويّه كليل .. و شيح .. و زعتر .. و الا نشوف قدّامي .. على مدّ البصر .. دنيا بيضا بالثلج .. مع شويّه قرمود احمر .. و شويّه صنوبر اخضر .. من غير عاد ما نتكولف برشه في الشأن السياسي الداخلي متاعهم .. و نخصّص مدوّنــة كامله للتكوليف ، و لممارسة الدعايه المجانية لتيار سياسي دون آخر
يظهرلي ماسط شويّه هالإنتقال المفاجئ اللي عملتو من وصف فنّي هكّه .. و رومنطيقي للطبيعة و الجبل و الثلج و القرميد .. للحديث في الكلوف و السياسه و الاحزاب و الدعايه

******
ماهو هاذاكه اللي حصلّي .. و انا نسمع في بقطفلك بسّ .. و شايخ معاها .. بتوزيع زياد الرحباني .. و نقارن فيها بالنسخة الكلاسيكية متاع الغناية .. و نبحث على البصمه و الاضافة المودارن متاع زياد... ياخي عملو هكّه ، و قصّو عليها .. و جابو بلاغ يقرا فيه مذيع صوتو معفــّط .. مفادو اللي : شـُعبة ندرا وين ، تنظم عـرض مسرحي يحييه الفكاهي و فنّان الشعب !!!!!!: فلان الفولاني.. في فضاء ندرا شنوّه
كلمة : فنان الشعب .. عملتلي تروماتيزاسيون يحبّلي باش نرتاح منها
********
بون ...ديمه نتفادى الانخراط في نقد البرامج التلفزية و الا الاذاعية ..رغم انو موضوع مغري للكتيبه و ـ"ساهل" ... ساهل بمعنى حك راسك و شد برنامج تلفزي ريّشو و مَـْروْشــُو و مرمدو و فتّق فيه مواهبك.. تو تولّي كاتب مهم
و اكيد ، ما يخفاكمش اللي هالـ"النقاد التلفزيين الافذاذ"... "فطاحل النقد التلفزي المعاصر" قاعدين يتناسلو و يتكاثرو و يتوالدو.. و معشّشّين في صحافة البودورو .. و متمعّشين منها .. كيما الفقاقيع.. و يا مغلوبتي شكون نغلب..و اللي يقرالهم و هوما يشلّكو في برنامج و الا في منشط ما يقلّش تفاهه عليهم ، يقول ملّا روح نقديّه .. ملا فكر ثاقب .. ملا جرأه .. ملا سجاعه .. و ملا دقّه في الانتباه للنقائص ... و ملا ... و ملا ... اما ديمه تبقى البهامه هيّ القاعدة في هاذا الكل ، على خاطر اذا تحاول تخرّجهم من بوتقة النقد التلفزي .. و تطلب منهم باش يجرّدو شويّه ، يشمّرو على ذريّعاتهم في نقد المشهد السمعي البصري عموما ، و علاقتو بالقيم الثقافية المراد ارساءها ، و اللي ماهيش معزوله على خيارات سياسية عامه .. وقتها ، منين كانو مبدعين في "تشليك" البرامج التلفزيه ، يولّو هوما بيدهم يلبسو شليّكاتهم ، و سفساريهم و المحطّه .. سينون .. يتشلـــّكو و و يتحطّو في شكارة اعداء الوطن .. المشاغبين ..
المغضوب عليهم .. الظالــّـــين ... آمـــــــين...:)ـ
اما اسمحولي ...هالمرّه و بـسّ..:) باش نعبّر على الفدّه المزمنه اللي تتحيّرلي كلّ ما نسمع واحد من هاك "الفكهاجيّه "المرتزقة متاع لمّان النكت منّا و منّا .. و تلصيقها بالبزاق ..باش بالسّيف يصنعولنا كارثه اسمها وان مان شو ... يضحكو بيها على ذقون الشعب الكريم اللي يجي ، باش يضحك على روحو شويّه .. و يروّح
و من بعد ، تسمحلهم وقاحتهم .. و تجوديرهم باش يسمّو ارواحهم : فنان الشعب ، و ما يترددّوش في المسّ من التجارب الجادة الاخرى و الاساءة ليها بدعوى "عدم شعبيتها" ...ـ


الحقيقه اذا هالكمشة جهلوت .. اللي باركين على قلوبنا .. و مـّرضينّا بالسّكّر .. بالتـّــفكهيج الماسط..و التلوسيق والتّلوحيس .. هاذا مرّه جايبلنا ولد اختو ..و مرّه ولدو .. و مرّه ولد ولدو ... قال شنوّه .. عايلة فنّانين .. والكلّهم فنّاني الشّعب
أذا كان هاذومه فناني الشعب .. مّاله هاذا شنيّ ... و هذا ... وهذا... و غيرهم من الفنانين اللي بالحق اعتصرو آلام و آمال شعوبهم .. و ترجموها لأعمال فنيّة خالده ، و الأهم من هاذا : انّهم دفعو اثمان باهضه مقابل جرأتهم و شجاعتهم و إيمانهم بفنّهم و بقضاياهم : سجن .. موت .. مرض .. اغتيال.. فقر

dimanche 5 octobre 2008

photo : carotte .. en strip-tease


سـُــبحــــــــانـــــو
!!
:)

samedi 4 octobre 2008

يا أيّها المديرون الجهويــّون .. نقـّـصو من البهامه .. لعلّـــكم تفــلـــحون

المدير الجهوي الجديـــد متاع المؤسسة اللي يخدم فيها العبدوللــّــه ، لايطاق .موش لانّو غير كفؤ فقط ، لانّها الحكاية هاذيكه ، حكاية حطان الرجل الغير مناسب في المكان الغير مناسب .. اوشكت على انها تولّي قاعده
هو لا يطاق خاصة من طرفي .. و من طرف بعض الزملاء . و هاذا راجع لعدة اسباب ، منها انّو متربّي و مفطوم ، كيما امثالو ، على ثقافة و وعي العـْروفات ، و راضعها في الحليب .. الثقافة العروفاتية متاع هاك اللي بقدر ما يبدا يتذوبل .. و يتروخف .. و يتروخس .. و يتحوشم .. و غيرها من الافعال اللي على وزن "يتفوعــل" .. قدّام "أعرافو هوّ" ...فإنّو ما يفلّتش فرصة باش يحسّــس زملاه اللي يعتبر روحو "عرفهم" بسيطرتو و بتفوّقو و بسلطتو عليهم
و اللي عادة ما تتجاوز حدودها المهنية و الادارية ، الى مستويات مريضة من التسلط الشخصي التعويضي اللي في حاجه للعلاج من اجل استعادة شويّة توازن ، و زادا من اجل أعادة تشكيل وعيو المهني و الاداري بانّهم الناس اللي في المؤسسة هاذي راهم قبل كل شي و بعد كل شي زملاء .. و متساوين قدام القانون .. و من الأجدر انّو يسود بيناتهم الاحترام و الانسجام .. الانسجام المهني بالطبيعة
الانسجام الشخصي بلاش منّو .. ما حاجتناش .. ما ناش في نادي تعارف .. و ماناش باش نتناسبو
هو ما يعرفــنيش
و بالطبيعة ، كيما ايّ مسؤول يجي جديد ، اوّل حاجه يلوّج عليها هي العوينات اللي باش يضوّولو الدنيا : القوّاده .. ويبدا عاد ينسنس ..و يتشمّم في ريحتهم .. حتّى لين يلقاها
ياخويا نسمع بيها .. لين ريتها بعينيّ

قالّك القوّاده عندهم ريحة خاصة .. متكرّم بيها عليهم المولى .. ما تخرج كان منهم هوما .. و زاده راهي ريحه أكسكلوزيف للأعراف .. ما يشمّوها كان هوما
و باش نوضّح حاجة : الريحة هاذي راهي تنتمي لدائرة الروايح الكريهة ، مثلا : (و بربّي سامحوني عاد ) القروسيـّه ، الشـّـياط ، الزّفــوريّه ، الجيفة ، الضبابط ، الصّنان ، الساقين ....الخ ... و نزيدوها توّا ريحة القواده..و القايمه مفتوحه للجميع باش يضيفولها روايح اخرين ، و هكّاكه ياقع تبادل الخبرات و التجارب
عيّطلي للبيرو متاعو .. و بدا يلمّح الى انّو ماهوش عاجبو الوضع في البلاد .. امّا الواحد بربّي اش باش يعمل .. مادام الخبزه تحب هكّاكه .. و يلمّح لانّو منين كان في الجامعه .. كان متحمس .. و يحلم ببرشه حاجات .. لكن الحياة الواقعية حاجه اخرى ..و راهو ضغط الحياة اليومية يخلّي الواحد ما يلقاش الوقت باش يخمم في روحو .. فما بالك باش يخمم في غيرو..و ما حبّش يسكت .. و كانّو الراجل عندو احساس بالذنب مقلّقو .. و يحب يحكي فيه
الحاصيلو .. نفخهملي بهالاعترافات و هالتداعيات اللي مالهاش لزوم


و عمّك براستوس يسمع في هالكونفـسـّيون .. تقولش عليّ ببّاص في الكنيسه .. و شويّه لا قتلو : "ميسالش يا ابني .. ادع الرّب باش يغمرك بسعادتو الابديه" .. و نضربلو ضريبتين صليب في الهوا ، قدّام وجهو..نباركو بيهم .. و هي عواشر منّا و الا منّا
بديت نكرّز من هالحديث اللي من غير مناسبة .. و اللي ما تسمحش بيه درجة علاقتي بالسيّد هاذا .. الا في حاله وحده : حالة استفيـــد
و قاطعتو : ما نعرشّ .. امّا .. سامحني .. حتّى كانك تتحدّث .. علاش عيّطــّـــلي بالضبط سي البوخاري
هو ما اسموش البوخاري .. امّا انا ظهرلي اسم البوخاري اكثر اسم يتلائم معاه .. و نحب نحتفظ بالاسباب :)ـ
باختصار

و من غير ما نطوّلوها .. الحوار اللي دار بيناتنا .. مفادو انّو ماخذ عليّ فكرة متاع انّي غاوي تبربيش بصوابعي في كل ماهو تصوير .. دهينه .. رسم .. تشكيل .. بورتريات .. كاريكاتير .. تلوين
زادا خذا فكرة انّي انا (مع زميل أخر) الوحيدين اللي ماناش منخرطين في الشعبه المهنية
و زادا ما ننسوش اللي هاك النهار متاع الاحتفالات و تزيين الكراهب .. و الزّوايل ، و لمّان التليمذات و تلبيسهم ازياء ريفية و رومانية و بيزنطية .. على شويّه ماجورات .. على شويّه راقصات شعبيات .. على شويّة "فرسان"(يخلي دار الهم)... باش يتعدّو قدّام الوالي ... راكبين على الزّوايل اللي مستانسين بالتراب و السّواني و الجبال .. يجيبوهم يتمشّو فوق الكياسات "المزفــّــته" ..قدّام مجموعة من زوايل و هوايش من نوع آخر .. آدمي .. و يزبـّلو عالكياس .. و تتخلّط روايح زبل الزوايل .. بروايح البارود متاع "الفرسان" .. كوم كوا تعبير على اصالة المنطقة .. و روايح العرق و الغبابر ..ـ
مع هاك الريحه اللي زدناها اليوم لقايمة الروايح المـنــْــتـْــنـَه : ريحة القواده ، اللي تبدا عاد تفحفح من المنصّة الشرفية..اللي باش يبدا سي البوخاري واحد من المتصدّرين فيها
النهار هاذاكه قــْــرُبْ
دونك .. البهامه متاعو .. خلاتو يستنتج انّو هالـ"فنان المتوفـّـر / هالمصمم المجاني " و الــ"معارض" في نفس الوقت ـ(و هاذا حسب تصنيفو هوّ بالطبيعه) ، انــّـجـّّمو ، باستعمال هالخطاب التبريري اللي كسّرلي بيه البطاطه عالصّباح ، نقنعوه بانّو يزيّــْــنلنا و يصمّــملنا العربه اللي
باش تشارك بيها المؤسسه في كرنافال السابع من ندرا شنوّه ...ـ
و بالتالي يفضّل المصروف كيما قال هوّ .. و زيتنا في دقيقنا .. و هات من لوغة الدقيق المصفّي ...
و نحب نذكّر هنا اللي الولايات و لجان التنسيق يمدّو المديرين الجهويين و المساهيل الي من النوع هاذا بميزانيّة خاصة بتزيين عربة الكرنفال


زعمه زعمه.. رانا من الشعوب المُـحـِــبّة للحياة .. ذات التقاليد الاحتفالية

لا يـْــقـِـيس بـْـشــرّ عاد


و زادت بهامتو اوحتلو باش يكدّســلي على مسمعي جمل من نوع : نعدّيهملك سوايع زايده .. خالصين ، و نقوّيلك العدد متاع الانتاج و الانتاجية
مخ الهدرة .. جاوبتو بالرفض .. و بانّها المعلومات اللي عندو عليّ صحيحه .. اما مشوّهة
صحيح انا نرسم .. امّا ما نرسم كان اش نحب
و انّي "ما نعملش في السياسه" ، اما كي نعملها راني نعملها كيما نحب و مع اللي نحب
و مانيش للبيع .. لا مقابل عدد الانتاجية .. و لا مقابل ساعات اضافية وهميّة ، ينجم يكون.. الخـدّام .. والا عسّاس الليل .. اولى بيهم
بلّغــتــلو رفضي مبطّن بهالارساليات القصيرة هاذي..رغم اني متأكد انّو المفاهيم و الطريقة هاذي للنظر للامور ، لا يمكن لسي البوخاري .. و لامثالو من أنصاف و اشباه التكنوقراط باش يفهموها
و خرجت من بيروه .. فرحا مسرورا بإدارتنا اللي اجهزة حواسيبها الكل مـْـفريــْــسه ..و ما وقعش انتداب عون مسؤول على الاعلاميّة .. و بيرواتها مهرّية و مكسّره .. و توالاتها مستّفه.. و الشاص عادم .. و الفوتوكوبيوز فاسده .. و حيوطها مندّيه .. لا ريشوات .. لا كليماتيزورات .. في حين انّو جماعة الشعبة المهنية و النقابه .. لثنين .. بقيادة سي البوخاري .. بصدد اتمام الجلسات التمهيدية لتصميم العربة اللي باش تمثّل المؤسسة .. في اليوم المشهود .. و كبّان السعود
و بقيت نتساءل في تساؤلات ..صحيح هيّ تساؤلات بديهيّه و اعتباطيّه و انكاريّه .. امّا مافيها باس الواحد يكرّرها من باب التفرجين على القلوب .. في زمن منكوب:ـ

ياخي الوزرا و البيديجيات و الديجيات و الدي آرات .. ماهم مجرد تكنقراط و بيروقراط .. و ما عندهمش علاقة بالفعل و بالقرار السياسي .. امّاله شبيه يولّي مسموح لأقـلــّــهم ، ولأسفل سافــليهم بالسياسة .. و قت يولّي الامر يتعلّق بتزيين العربات و الكرنفالات و الزوايل اللي باش تزبّل عالكياس و ترجع لمرابضها؟؟؟؟؟ـ
وياخي لوقتاش هالاستغباء و هالطريقة في التعامل اللي لا يمكن الّا انها تصنع منّا ناس مرضى نفسانيين .. : من جيهة لا لتسييس مؤسسات الدولة .. و من جيهة أخرى : ادارة كامله مجنّدة روحها لتزيين دركتور باللافتات و التصاور الـمـْــبـَلـْــحـْـطه بالاحمر و البنفسجي ...ـ؟؟؟ـ

mercredi 1 octobre 2008

انا مع أن يكون يوم 4 نوفمبر : يوما وطنيا من أجل حرية التدوين

حبيت نضم ّ صوتي



في ان يكون يوم 4 نوفمبر من كل عام ، هو

اليوم الوطني لحرية التدوين

مّاله انا بدوري

نتوجّه للجميع بدعوة للانضمام الى هالاقتراح

ليكن يوم 4 نوفمبر يومنا الوطني من اجل ان

ندوّن

نخربش

نكتب

نفكر

نعبّر

نتحاور

نتناقش

نضيف

ننقد

نطلق اجنحة اقلامنا

.

.

.


آخر الاخبار عن اضراب الجوع بالقصرين

وصلني الايميل هاذا ، و حبيت ننشرو بالضبط كيما هو ، لكن المره هاذي وقع التحري مليح مليح من صحة المعلومه و التاكد منها ، بدليل الصورة المرفقة ، و اللي وقع التقاطها منذ لحظات ، يعني ليلة العيد ، تمثّل شاحنة الحماية المدنية واقفه امام مقر اتحاد الشغل بالقصرين ، و هي تستعد لنقل البعض من المضربين ممن تعكرت حالتهم الصحية الى المستشفى
الصورة فنيّا ، ماهيش بالوضوح الكافي لكن هاذيكه الصورة الوحيده المتوفّرة حاليا

و هاذا نصّ الايميل
أمام استفحال أزمة البطالة وتدهور الأوضاع المعيشية بجهة القصرين والوقوف بالملموس على زيف الوعود الإستهلاكية المروجة في المجالس الجهوية بالأمس القريب لفائدة الشباب دخل يوم الأربعاء 24 سبتمبر كل من عادل قسومي (مجاز) وقيس عتوري (باكالوريا) ولطفي قسومي والعليمي عيشاوي ولطيفة عيساوي (فنيين سامين) في اعتصام وإضراب جوع بمقر الإتحاد الجهوي للشغل بالقصرين وقد حاول بعض أعضاء الإتحاد إخراجهم عنوة إلا أن الشبان المذكورين تشبثوا بحقهم في الشغل وإيصال صوتهم للنقابيين والإحتماء بدار الإتحاد في جهة اكتوت طويلا بالفقر وانعدمت فيها كل منابر التعبير عن الرأي وانسدت فيها كل الآفاق ولم يبق أمامهم إلا المخاطرة بحياتهم من أجل الحق الطبيعي والمقدس الشغل.
هذا ويتواصل إضراب الجوع عشية العيد لليوم السادس على التوالي وسط لامبالاة تامة من البيروقراطية النقابية وطنيا وجهويا وتجاهل من السلط الرسمية في فترة دقيقة وحساسة من المفروض أن تغمر فيها الفرحة والسرور أسر هؤلاء الشباب الذين لم يحضوا بالمساندة المنتظرة إلا من قبل عائلاتهم وعدد ضئيل من النقابيين لا يترجم ما تزخر به الجهة من الطاقات النضالية.
لكن يبدو أن الحسابات الخاصة لبعضهم والخشية من ردّة فعل السلطة والبيروقراطية للبعض الآخر واهتزاز المعنويات وترك الأمور للعفوية القاتلة هي التي تسيطر الآن على الجميع. فعسى أن تكون فترة ما بعد العيد أفضل للمضربين والمعتصمين وللحركة الإجتماعية بالجهة، وما على النقابيين الديمقراطيين إلا تحمل مسؤولياتهم كاملة وبكل جرأة من أجل الدفاع عن حق الشغل سواء تعلق الأمر بالمنخرطين باتحاد الشغل أو بغيرهم، إذ البطالة الطاحنة ليس لها وطن ولا جهة ولا فئة أو شريحة، كما ليس للنضال حدود مصطنعة أو تصنيفات وهمية.
ويعدّ هذا الإضراب عن الطعام الثاني من نوعه في أقل من شهر، حيث شنّ ثلاثة أساتذة من المعطلين من أصحاب الشهائد وهم محمد الناصر الرحيمي (أنقليزية) والصادق السايحي (فرنسية) واسماعيل الغرسلي (عربية) إضراب جوع واعتصام بمقر الإتحاد الجهوي للشغل بالقصرين يوم الخميس 28 أوت الفارط للمطالبة بحقهم في الشغل. وبعد أن أغدقت عليهم السلط الجهوية وعودا كاذبة بالتشغيل، عمد الإتحاد الجهوي إخراجهم من المقر ورمى بهم على قارعة الطريق.