mercredi 16 juillet 2008

كابـــــوس

البارح عملت كوشمار .. هاو اش شفت

صفّ كبييييير متاع ناس معصّبينلهم عينيهم بشوليقه كحله .. و ايديهم مربوطه لتالي و مجرّحه .. ريقهم شايح .. عطاشى .. ساقيهم مسلسله .. واحد ورا واحد .. الكـِــنْدي .. الطاهر الحداد .. ابن سينا .. حسين مروه .. الحلاج ..مرسيل خليفه .. محمود درويش .. غيلان الدمشقي .. يوسف شاهين ... و برشه اخرين ما نعرفهمش ... و يطلـّعو فيهم بالوحيـّد بالوحـيّد فوق منصّه لوح مـّسّخه .. قديمه ..ماكلها السـّوس و معـشّــشّه فيها الفيران و الجرابع .. المنصّه هاذي فيها مقصله .. يقصّو فيها في روس العباد

و في وسط هالطابور الكبير .. ثمه شخص ، بالسيف ما عرفتو من كثرة الغبابر و العرق و الدمومات و الكدمات اللي أخفتلو ملامح وجهو الطفولي المألوف .... العين زرقا منفّخه .. الوذن مشرومه .. مما يدلّك على انّو تعرّض لتعذيب وحشي اثناء التحقيق معاه في تهمتين ، الاولى : الانحراف ... و الثانيه : اتهام الملايكه بممارسة الحب

هالوجه هو وجه نزار قباني

الزّزّزّحْحْحْ......هاذا زادا ؟؟؟؟؟؟؟؟؟ ـ

و ما نعرفش على روحي كيفاش طـِــيقرْتْ و تنطّرت من وسط الجمهور .. و جريت للمنصّه المشومه .. و تلفّت للسيد اللي مسؤول على القصّان .. قصّان روس الشعراء و المفكرين و المبدعين .. و طلبت منّو انّو يطيّش هاك الشاقور من يدّو .. و من مخـّو .. ويستجمع قواه ..و يتعلم انّو يسمع الآخر المختلف .. بعيدا على المشانق .. و المحاكمات .. و يحكي في الشعر .. في الفن .. في الجمال .. في الابداع

يا سي الجلاد

راهو تصنيفك للشعر و الشعراء الى منحرفين و غير منحرفين يناقض أصلا منظومتك الفكريه اللي تعتبر الشعراء الكلهم .. كدس واحد متاع مهبّله .. يقولون ما لا يفعلون .. في كل واد يهيمون .. لا يمكن ان يتبعهم الا الغاوون..بالطبيعه ، باستثناء حسان بن ثابت واشباهو من مدّاحي الخلفاء و امراء المؤمنين

بالتالي ، يكفي انّو نزار قباني و الا سعدي يوسف و الا درويش و الا غسان زقطان و الا مظفّرو الا اراقون و الا اولاد احمد ...يكفي انّو يحمل لقب شاعر ، و يقترف جرم الكتابه .. و يمارس خطيئة قول الشعر .. باش يتحاكم .. لذلك لا داعي لها التبربيش الزايد في قصايدو ، و ها المجزره اللي تعملت في شعرو، قصد التنقيب على الجمل اللي ذكر فيهم "الله" ـ و الا شبّه حبيبتو بالله و الا شكر الله لانّو خصّو دون الاخرين بحبيبتو الرايعه

تهوّ من اصلو مغضوب عليه ، فقط لأنّو "شاعر" .. سواء ذكر "الله" في شعرو ، و الا ما ذكروش

ثمّ انّو الشعر الجيد .. خاصة عند اللي في حجم و في قامة نزار .. هو بمثابة حالات تجلّي و جدانيه .. و عباره على حمّى من العشق .. هذيان حب .. إفلات طفولي من سجن النمط ..من معتقل المألوف .. اندهاش جديد بسحر اللغه .. "رسم بالكلمات" و التحام عنيف .. متدفــّــق.. بالاشياء و التفاصيل و التاريخ و الاسطوره و...و...و

باختصار هي حالة وَلـَــهْ وْ وَلـَـعْ صوفيّه.. و ما أدلّش على هاذا من انّو الحلاج قال في حب الله .. نفس ما قاله قيس في حب ليلاه

قال الحلاج : ـ

انا من اهوى و من اهوى انا....نحن روحان حـــــلنا بدنا
فإذا ابصرتنـــــــــي ابصرته ...و إذا ابصرته ...ابصرتنا

و قال قيس ، عندما سئل : أتحبّ ليلى يا قيس ؟ قال : لا
قيل : ولماذا ؟؟ .. قال : المحبة ذريعة الوصْلة .. و قد سقطت الذريعه .. فليلى انا و انا ليلى

مع فرق بسيط هنا في الذات المعشوقه المتوحـّــَـد معها

و كيما بالضبط تقمعت الحركات الصوفية من طرف التيارات الاصولية الجامده ..و وقع التنكيل بروّادها .. في عوض تاقع دراسة اصولها الاجتماعيه و الثقافيه و السياسيه .. و البحث في الاسباب العميقه لمنشأها .. باعتبارها ردّة فعل على حكام متسلّطين باسم الدين .. مستبدين باسم الله

أسمعو معايا خونا أبو جعفر المنصور اش يحكي للرعيّه : ـ

ـ"أيّها الناس ، انما انا سلطان الله في ارضه اسوسكم بتوفيقه و تسديده ، و أنا خازنه على فيئـه..أعمل بمشيئته ، و أقسم بإرادته ، و أعطيه بإذنه ، قد جعلني الله قفلا عليه إذا شاء أن يفتحني لأعطيـّـاتكم ..و قسم فيئكم و ارزاقكم ، فتحني . وإذا شاء أن يقفلني ... قفلني" ـ

و لذلك اعتقد انّو التيار الصوفي...رغم ما كان يحب يغلّف بيه دعوتو من عشق الهي خالص و كلام في وحدة الوجود .. فإنّو زادا الفساد السياسي و الاجتماعي يعتبرو من اهم عوامل وجودو و تناميه .. وهو ما يفسّر زهدهم في الدنيا .. كردّ فعل متطرّف على الحكام اللي استسلمو بشكل كلّي " للّهو" و "المجون" و " العبث" ـ

و الحقيقه ، حتّى كان باش نخرجو شويّه عالموضوع ، و الحديث ذو شجون .. موش كان التيار الصوفي وقع التنكيل باصحابو .. ياخي غيلان بن ابي غيلان الدمشقي ، اوّل من تكلّم في القدرفي القرن 2 للهجره ، موش قصّلو هشام بن عبد الملك ايديه و رجليه.. و صلبوه ؟؟؟ ـ

و الكـِـندي ، الفيلسوف و الموسيقي و عالم الطبيعيات .. موش اضطهدو المتوكّل ؟؟؟ ـ

و ابن حزم .. موش حرقولو كتبو لمجرّد انّو دعا للخروج على المذاهب الاربعة و ازالة ما علق بهم من قداسه .. حتّى انّو قاللهم : ـ

وإن تحرقو القرطاس لا تحرقوا الذي ...تضمّنه القرطاس بل هو في صدري
يسير معي حيث استــــــــقلت ركائبي...و ينزل إن أنـــــزل و يدفن في قبري

كيما قال ابن سينا .. في الابيات الشهيره اللي كتبها بالفارسيه للي كفــّــروه : ـ

ليس سهلا عليك ان تجعلني طريد الديــنِ
إذ ليس هناك إيمان أحكم من إيــــــــماني
إذا كنتُ أُعـَــذّ في الدهر كافـــــــرا متبرّمَا
اذن فلن يكون طول الدهر من تجدْهُ مسلمَا

نرجعو للشعر .. و انا تعمّدت انّي نحاول ايجاد بعض التقاطعات للمحاكمه الاخيرة لنزار مع غيرها من المحاكمات التاريخية اللي استهدفت فيها الانفاس النيّرة .. و كذلك حبيب نوجد نوع من التماهي الوجداني للشعر مع التصوّف .. و اكيد انّو لأهل الاختصاص و النقاد الجادين رأي اكثر دقــّـة في هاذا .. اما كيما قالو : اجمل الشعر اكذبه ، بالنسبة ليّ شخصيا ..اجمل الشعر .. هو اكثره انغماسا في الروح الصوفيه .. و استحضارا للملاحم الاسطورية ..و تماهيا مع الآلهة .. لانّو الشاعر و الفنان عموما .. هو إله صغير:) عندو القدرة على انّو ، بالقلم والريشه و اللون و الشكل و غيرها من تقنياتو ..و من وساءلو السحريه ..، ينفخ فيك شيء من الفرح .. او الحزن .. او الفتنه .. او الغضب .. او الشبق

و هذاكه علاش اذا ما تكونش ، وانت تقرالو ، في حاله مشابهه ليه .. ما يوصلك حتى قـرام من رسالتو .. و تولّي وقتها عاد ، تشدّ القارد متاع الايديولوجيا و الجمود بمختلف انواعها .. موش الدينية فقط .. و تبقى في حدود الحكم السطحي الاخلاقوي على الاشياء .. و تنصبلو مشنقه..و الا صـَــليب

6 commentaires:

3amrouch a dit…

براستوس
باهي هاو بدا الغيث النافع يهطل
هكه نتفهامو وانجم نجاوبك على افكارك
كيف نبعدو على الشعارات الفارغة والرمل والبغلي ومواد البناء تحلى القعدة
جيتي توا مستعجلة بناء على دعوتك تو نرجعلك لمزيد النقاش خلي نحيو شوية الركود والملل..

WALLADA a dit…

مَـلاَّ قَرِيحَة عندك و مَـلاَّ خيَالْ
برَافُو

Free.Ali a dit…

يعطيك الصحة على هالبوست

Bel Malwene a dit…

رااااائع يا برستوس ... أبدعت كيف العادة

الحلاج الكافي a dit…

خــفافيش الظلام و وزراء الله يامروننا بالرحـــــيـــــل لأنهم لا يفهمون كنه الغيمة و رذاذ الشعر وقد خاب عسسهم عن حــجز جواز شيطان الشعر.. فأوغلوا الشر.. فليغني الشعراء ما لذ وطاب سمعه و ليشرب الخفافيش مــاء البحر

brastos a dit…

@ 3amrouch
ارجع وقت اللي تحب
مرحبا

@ wallada
يظهرلي الكوابيس تنجم تكون موحية في بعض الاحيان هههه

@free ali
شكرا و مرحبا


@ belmalwene
توينك يا راجل ؟؟
زارتنا البركه :)


@ alhalleje
يوفى الحديث
:)