jeudi 11 septembre 2008

خبز ... و إله ... و قمر

بحكم علاقتي الخاصة شويّ بالموسيقى ، نتوحّش الاغاني كيما نتوحّش العباد .. صدقوني .. مرّات تجي على بالي غناية نكون عندي سنين ما سمعتهاش .. و تتعدّى في خاطري و كأنّها تلوم فيّ على طول المده اللي ما سمعتهاش فيها..أيّه ما نطوّلوهاش.. جات على بالي هالنهارين غنايه لمارسيل خليفه نحبها و ناسيها ليّ برشه .. اسمها "يا علي" .. ما نعرفش علاش الغنايه هاذيكه دون غيرها .. و علاش مارسال دون غيرو .. وعلى فكره .. انا نموت على البحث في الاسباب الخفيّه اللاواعية للتصرفات و الا للرغبات .. بربشت شويّ في ذاتي العميقة .. و فسّرتها برغبة لاواعيه منّي باش نخرج شويّة من جوّ التقوى و الورع و الخشوع و الرجوع للّه "وقتيا" اللي محاصرتنا بيه قنوات البترودولار ..اللي هيّ بيدها تستنى وقتاش يخرج بركه هالشّهر باش ترجع للعـِـنبْ ... العـِـنَـبْ .. العييناااااب :)ـ
الحاصيلو
و انا نلوّج على هالغنايه النادرة في مواقع الغنا .. طمبجت في التصويره هاذي

من غير تعليق على التصويره .. على خاطر شي يضحّك ..وعلى خاطر حتّى لوكان القمره فكّرت باش تشكّل اسم بشر من خلال اشكال تضاريسها .. موش كانت تكتب اسم نيل ارمسترونغ ..؟؟ صاحب اوّل خطوه فوق ترابها .. كيما تبقى كل فتاة تحبّ تكتب اسم اوّل راجل شافت معاه الحب؟؟ـ
التصويرة صحيح ادهشتني .. من حيث وين ينجّم يوصل الاعتقاد في الخوارق .. و وين ينجم يوصل تأليه الاشخاص .. و الذوبان و الاضمحلال أمام ذات بشريةأخرى .. لكنّها اوحتلي و ذكّرتني بخرافه من بين الخرافات اللي لقـّــنوهـُـمْـلنا و ورّثوهُـمـْـلنا الكبار ، خرافة القمره ، و كيفاش هي أصلها مرا شنقها ربّي عقابا ليها على خاطر هيّ مسحت ولدها بعد ما عمل كـَـاكـّــَـا :) بقطعة خبز و علّقها من شوافرها ، و في روايه أخرى من صدرها
الحقيقه ، و احنا اطفال صغار ، و في سهاري الصيف وقت تبدا القمره بنت 14 و الا 15 ... نـتـْـسـِـحـْــرُو بيها .. و يكثر جرينا و لهيطنا و لعبنا و تبزنيسنا .. و يظهرلي برغم اللي كنّا قصار .. بما انّا صغار .. الّا انها كانت تظهرلنا.. و نحنا صغار .. اكبر و اضوى و اصفى و اوضح و أقرب من توّا .. رغم انّا احنا اللي كي كبرنا.. ولّينا اطول :)ـ
هاذي مقدمه صغيرة .. بحكم انّي مغصور شويّه بالوقت .. و المرّه الجايّه باش نحكيلكم شويّه بأكثر تعمّق على تأثيرالخرافة هاذي .. خرافة المرا اللي مسحت ولدها بالخبز و شنقها ربّي و ولـّــت هي القمره .. عليّ شخصيا .. و على برشه حاجات اخرين مرتبطين بالخرافه هاذي

6 commentaires:

oliive a dit…

Bonjour,
Je ne savais pas que cette khorrafa de la lune etait connue par d'autres gens. Moi aussi je me rappelle de cette histoire. Et ca m'a toujours hantée l'idée que cette belle femme soit punie de telle facon.

عياش مالمرسى a dit…

J'ai bien aimé l'article car j'ai aussi ce faible pour la lune que je ne saurais expliquer.. Loup garou dans une vie antérieure :p ?
on attends la suite..

Anonyme a dit…

Mar7ba bik !
awel marra nasme3 ya 3ali c.etait en 82!et mon neuveu porte le nom de ali a cause de cette chanson..
7low 3inwen elpost..ama fi belik ely el9amar 3andou zouz wojouh..a3mel tala 3la ART.ticuler taw ta3ref.. encore une fois mar7ba bik!

Anonyme a dit…

يلزمك تكمّل الحكايه قْـبَـلْ ليلة سبعة وعشرين....

وإلّا ربّي يعَـلْقِـك من شَـعْـرِكْ

brastos a dit…

@ oliiive

bonjour
moi de meme .. j'ai croisé peu de gens qui la connaissent


@ عياش
voilà la suite .. :)


@ articuler
ahla bik
oui je le sais .. et on n'en voit qu'un seul

brastos a dit…

@ jaccuZe

سبعه و عشرين شنوّه ؟؟