نعم لصراع الافكـار..لا لصراع الـمـؤخـّــرات

إيمانـّـا بحق الإختلاف مازالت تشوبو برشه شوايب ، و مازال سجين خلفياتنا الإيديولوجية الضيقة ، و أحيانا ، الذاتية و حتى المزاجيـّـة.
معقول برشه ، و ماهيش جريمة باش الواحد تكون عندو خلفية ايديولوجية ، من خلالها يقيم تصورو للعالم، للتاريخ، للعلاقات، للأحداث ، و يبني اطروحات بديلة باعتماد اداة التحليل اللي يشوفها انسب و أقرب للدقة و للصحة
أما هاو الخطر وين : وقت اللي تتحو ّل هالخلفية الى مطيـّـة لتكفير لخرين و الحكم عليهم بالجهل لمجرّد انهم ما يشاركونيش فكرتي وإلّا ماهمش معايا في نفس الصندوق ...ووقت اللي تتحول هالخلفية الى ادّعاء التفرد بامتلاك الحقيقة..و ممارسة نوع من التعالي الوهمي و المرضي العقيم على كل من يختلف معايا
بالطريقة هاذي نولـّـيو ماحناش إزاء ناس تفكر و تنقد و تحلل ، بل إزاء ستايك حليب ، و أقفاص دجاج حاكم ...قال شنوّة ، نفكـّّرو كيف كيف .
(نتوجـّه بالكلام هاذا لبعض المدوّنين و بعض المعـلـّـقين اللي يمارسو في عرك الحـوُمْ ، و عرك الحمام ، و الحزّان الجربي ويطبـّـقو في انصر اخاك ظالما او مظلوما في غـير بلاصتها
اللي تسمّيه انت مقدسات و خطوط حمراء ، غيرك يسمـّـيه اسباب للجهل و للتخلف و للإعاقة الفكرية و الحضارية..
و اللي نسمـّيه آنا نقد و تحليل و جرأة في إثارة المسكوت عنـّو ، و حطـّـانو في إطارو التاريخي و إزالة أكداس الغبار المتراكمة عليه اللي تعيق فهمـنا الصحيح ليه ، تسمّـيه انت تهجم على المقدسات و مسّ من المحظور
اش عملنا مـّـاله ؟؟؟
الإختلاف هاذا نهائي و مطلق و أبدي وأكثر من ذلك ، طبيعي . أمـّا هل انو بالضرورة يؤد ّي لهالحوارات العقيمة بما تحتويه من تبادل للشتم و السب الإخلاقي الرخيص و جبدان لخوات و لـبـّـيـّــات و المؤخـّرات...
و إلّا مقارعة الحجة بالحجة ، و الفكرة بالفكرة .. ...في جو من الصراع النظري الفكري الإيجابي ، حتـّى ولو ما يتمخـّـضش هالنقاش بالضرورة على الاتفاق ، و موش لازم يكون بالضرورة هادئ و متربـّي ، اما خليها تكون " قـلـّـة تربية " فكرية و ماهيش أخلاقية.. بالضـّـبط كيما تمارس الأمم اللي احتلتنا ، و محـتـلـّـتـنـا ، و على هالحساب هاذا، مازالت باش تكمّل على غربتنا