خالتي المرا الكبيرة المقربعة المغرومة بالنـــوار

بوصفي نخدم في وحدة من هاك المؤسسات القمقومة اللي تبتزّ في المواطنين أكثر من الخدمات اللي تقدملهم فيها ، كيما نقولو ستاق..صوناد..أونــاس.....حاجة كيف هكـّة ، عاد عندي كونتاكت شبه يومي مع المواطنين...اللي يحب يعمل اشتراك ، و اللي يحب ينهي الاشتراك ، واللي عندو شكوى ، طالبة تحب تعمل تربـّص ، واحد مشوي و مكوي من الفاتورة ، واحد معاقب و جاي باش يكـفـّر على ذنوبو و يسترجع رضى المؤسسة عليه بعد ما طلبو منو يدفع مصاريف العقوبة ، اللي أحيانا تفوق مصاريف الإستهلاك
آش عـلـيـنـــا
صباح من الصـّــباحات ، دخلت مرا كبيرة ، الـ 60 سنـه موجودة ، و طلبت حاجة بعيدة كليـّـا على الـمـألوف
صحيح انها ما كانتش عادية ، تتكلـّم بصوت عالي برشة حتـّـى من مسافة قريبة ، تتكلم مع الناس الكل فرد مرّة ، تــسـألـك ، انت تبدا تجاوب فيها و هي تدمــغك بسؤال آخر تقولش عليها تحقـّــق معـــاك
الحكاية ، انّها عجبتها نبتة من النباتات اللي منوّّرين في جنينة الإدارة ، وحبّـت تاخذ منها مشتلة ولاّ عريـّـف ولاّ عرق ولاّ اللــي هـوّ .
كان واضح انها مغرومة بالنباتات ، لكن كان واضح زاده انـّـهـا ما كانتش سليمة المدارك العقليّة ، يعني ، بـلـغـة المـتـثـقّـفـيـن ، مْـقـرْبْـعَـه..و هاذا ما أكدوهولي زملائي اللي يعرفوها قبلي .
و بوصفي زاده نقاسمها هالهواية " النباتات ، مــوش الـتـّـقَـرْبـــيع :)" اهتميت بطلبها ، و خرجت معاها لجنينة الادارة ، و نحّيتلها عرف من النبتة اللي عجبتها و ورّيتها حاجات أخرين ، زادت اختارت ، و كل ما تخليلي فرصة باش نحكي شوي " و هي فرص قليــــلة برشه :)" نحاول نورّيلها طريقة الغرسان ، العمق ، هاذي تحب الما و هاذي لا ، هاذي تحب برشة شمس ...الخ...
و كنت في اللحظات هذيكة نحس اني قاعد نقدم في خدمة لانسان مريض و يعيش حالة عصبية و نفسية غيرعادية و غير سليمة و غير مستقرّة ..و حسـّيت روحي هكـّه بطل شوي :) كي فكـّرت انـّو هالرّبــع ساعة اللي عديتو في جنينة الادارة ، مع خالتي المرا الكبيرة المقربعة المغرومة بالنـّـوّار ، ينجّــم يجلبلها نوع من الارتياح و التوازن ، حتى بصفة وقتيّة،
الحاصيـــــلو
حكات لي على نباتاتها و ما هبّ و دبّ في جنينتها ، و قلت في خاطري : محلاها إذا كان الواحد وقت اللي مـخّـو يقربع ، تجـيه الـتـّـقـربيعه هــكّــه على النبات و النوّار و الخضوريّة ، تِـهامْ بعقولاتهم ، و هوما وجوههم شاحبة و مسوبعة ، والناس الكل متلهـّفين مزروبيـــن على ما ثمْ شيْ
و لا خضوريّة في الجناين و لا في القلوب
هي تحكي و آنا نسمع و ننعم ، و كيف تتكرّم علي بشويـّـه سكات ، نقول معاها كليمة و لاّ اثـنـين حتـى لين شيّعتها ، وخرجـت و مشات خالتي المرا الكبيرة المقربعة المغرومة بالنوّار
و رجعت لـبـيـرويـــا. أمـّا ما رجعتش فرحا مسرورا :)
رجعت للاوراق و الـرّابـّــورات الباردة ،
و المواضيع النمطيّة اليوميــّة اللي تنرفزنـــــي
ما نكذبش عليكم ، مكتـئـب
كيف اللي كنت في منامة بــــاهية و فقـت ، تقولش عليّ اوّل مرّه نكتشف جنينة ادارتنا
و اكتشفت حاجة اخرى : انّها هــيّ ، خالتي المرا الكبيرة المقربعة المغرومة بالنوار ، هيّ اللــي نـفـّــسـت عليّ شوي ...و هيّ اللي زيارتها ، و حديثها معايا في ميدان نحبـّـو و بعمري ما حكيت فيه مع زملائي ، جلبتلي نوع من الراحة ...الوقتيّة
و عرفت انّي آنا هو اللي تفرهدت شوي في جرّة زيارتها و في جــرّة هالربـيـّـع ساعة اللي عـدّاتـو معايا
يعني
يبدو اني آنا زاده ، مداركي العقلية و العصبية غير سليمة :) موش هيّ فقط
و آنا زاده اللـــي " بلغة المـتـثـقـّـفـيـــن " مقـربـــع :) ... موش هيّ فقط