mercredi 23 janvier 2008

طـفـل ... و طباشـيــر ... وجــــدار


المشهد متاع الـصـّــغـَـيـّـرات اللي يخربشو.. و يكتبو عالحيوط..في الـحـْـوُمْ الشعبية خاصة.. بالطباشير و اقلام الزينه .. ومـرّات حتى بالفحم.. مشهد مزيـان .. و احيانا ..كي تصادف و نعثر في مشهد كيف هكـّه.. نسمح لروحي باش نبقى بعيد عليهم شوي .. و نراقب في العملية بالسرقة منهم .. و بكل انتعاش .. حالة واحد محروم من حاجة.. و يشوف في غيرو يعمل فيها.. ويعمل فيها بكل أريحية زاده :)
و نبدا نشوف فيهم قداش محـتـفـلـين بلحـظـتهم .. و نشوف كـيفـاش العلاقة ما بين الذات المعبرة (الصغير) و وسيلة التعبير(الطباشير/ قلم الزينة) و مجال التعبير(الحيط / الباب) علاقة منسجمة.. و منسابة .. و متكاملة و ما
تدغدشـهاش حتى عوائق و الا حواجز

اللحظة اللي يمسك فيها طرف الطباشير.. و يصور بطل الكوميك اللي يحبّو.. و الا يعاود يمثـّـل درس القراءة اللي قراه نـهـارتـها في القسم .. و الا - باش نكونو واقعيين- يكتب في كلمة " بذيئة" متعلمها جديدة و فرحان باستعمالها.. تالحاصيلو.. يكتب في أي حاجة .. ما نعتقدش انو في اللحظة هاذيكة يكون مرتبك.. و الا مسكون بهاجس متاع خوف من كرهبة ضخمة .. بيضا و كحلا..مثلا..تعمل بجنبو فران ساك .. و يهبطو منه..مثلا ، زوز عزلـّـكة.. و يكرفتوه بتهمة..مثلا.. الكتيبة عالحيوط.. و ما تبعها من نشر اخبار زائفة و اثارة البلبلة و الشغب في الطريق العام ...


بالعكس
هو وقتها في لحظة نشوة كبيرة.. و يحس اللي ذاتو تحققت.. و مخزوناتو تفجّرت.. و مكبوتاتو تـْـكـَبـّـِـتْ :) ... و حتى كي يمشي يعمل دروسو.. و الا يعمل أي حاجة اخرى .. يعملها بإتقان و تركيز .. على خاطرو متوازن و حاسس بالأمان .. و بالثقة في ذاتو و في الآخرين ..

5 commentaires:

الــبوهــــالـــي a dit…

...و تبدا عاد مجالات كتيبتهم تضياق من الحيوط ..الى كراسة الذكريات..الى رسائل حب سرية..الى كتيبة صامتة مـخبّــية في القلوب

Anonyme a dit…

c'est vrai ... c'est le plus grand moment d'épanouissement pour eux ...et surtout à la sorie de l'école :):):)...les enfants sont tellement superbes ..

Dodo a dit…

محلاه نصك و محلاها الطفولة البريئة
انا يعجبوني كي يخرجو الحقيقة كيما هيا بلاش كذب و تنوفيق
ويقولولهم يزي ما يجيش

brastos a dit…

da7dou7a
il n'y a que les adultes qui sont "tellement cons" disait Brel

brastos a dit…

@البوهالي
@anonyme
اعتقد انو المهم ما نطيـّـشوش قطعة الطباشير من ايدينا