ربي يرشـّــهم ملـّــي بـلّـــنا

مـْـسخّـفـْـني ياسر حال الشعب اللبناني ..المسكين .. توّه مدّه ماهيش شوي .. وهو محروم من رئيس يحيطو بالرعاية الموصولة.. و يُـنْـقـْــشُـو ساعه ساعه بلفته كريمه .. و يشملو بعطفو و باهتمامو الخاص .. و هكاكه .. يترعرع تحت سامي اشرافو و تحت رؤيتو الحكيمه ..و يضمنلو اسباب الرفاه و الرقي و التنمية المستديمة
رغم انو شعب عريق و مجرّب و محنـّـك.. و ما يستاهلش هالبهذله اللي تـْـحطّ فيها
راهي ماهيش شوي
الله يصبّرهم
و هالفراغ السياسي اللي قدّر بيه عليهم ربي في اعلى هرم السلطة ..انعكس حتى على حياتهم الاعلامية ..فـَـولينا نشوفو في فضائياتهم سكاتشات اقل ما يقال فيها انها قليلة حـْيا..أو ينعدم فيها الاحترام اللازم للشخصيات العامة و الخاصة.. هاك الاحترام اللي ما عندهاش برشه ملـّـي نصّت عليه وثيقة وزراء الاعلام العرب
مْــساكن وْ برّه
قال شنوّه .. شعب مجبول على الاختلاف و التعايش من قديم زمان .. على خاطرو متعدد الاديان و الطوايف و القوميات ...ايشبيه ..؟؟..و برّا راوْ..؟ يقومو ينسوا دور وسايل الاعلام الرئيسي .. واللي هو شويّه رقص على شويّه منوعات على شويه احتفالات على شويّه عروض ازياء على شويّه ملفات نستدعو فيها رموز المعارضة باش يمجدولنا الانجازات .. ينسوا هاذا الكل .. و يوصلو لدرجه هستيرية من تقليد الزعماء السياسيين متاعهم ..و لا تمنع لا معارضة .. ولا موالاة .. و لا نواب .. و لا نائبات ..هذا لابس باروكه.. و يحكي كيما جنبلاط..و لاخر ضاربلها كشطه و جلباب ..و كوب زيرو.. في اشارة للجنسية السعودية اللي يتمتع بيها الشيخ سعد .. و هات ماك اللاوي ..الله يسترنا .. زايد ..هاذاكا حال اللي ما عندو- البعيدة - لا حسيب و لا رقيب
تماو عالاقل ..كيما يقولو.. وإذا عصيتم فاستترو..مثلا .. عرس .. حفلة خاصة
هكّه ؟؟؟.. امام الملأ..؟؟؟و العالم الكل يتفرج ..؟؟؟ لا .. و السكاتش اللي تشوفو اليوم في قناة .. تزيد تشوفو من غدوه في قناة اخرى .. ياخي ما يندموش؟؟؟ ما يصحّيلهم حدّ ضميرهم ؟؟ ما يجيهمش شاهد العقل ؟؟؟ ما يرجـّــعهم حتى حدّ للجادّه ؟؟؟ ما يبْـراكيهم حتى حدّ عالمادّه ؟؟؟ ما يلقوش في كراهبهم حتـّـى مادّه ؟؟؟؟
الصّبر و برّه
كيفاش ينجّمو يروّحو لديارهم بعد ما كانو يقلدو في هاك الشخصيات الخاصة و العامة ..؟؟ و حتى كيف يروّحو .. كيفاش ينجّمو يهزّو عينيهم في عينين نساهم .. و رجالهم .. و صغارهم .. من غير حتى شعور بالذنب ..اينعم ذنب .. ياخي شويّة اللي كانو يعملو فيه ؟؟؟..ياخي لازم اللاّما ينشرو حصيرتهم قدام العالم الكل ؟؟ و يضحّكو الناس عليهم ..؟؟؟عندهم الحق .. ما ذاقوش لذة الاحساس بالفخر و الاعتزاز بفضل الحكمه .. و التبصّر .. و السياسة الرشيدة ضمن مسيرة رائدة في كنف التحاور و التشاور