jeudi 28 février 2008

ربي يرشـّــهم ملـّــي بـلّـــنا

مـْـسخّـفـْـني ياسر حال الشعب اللبناني ..المسكين .. توّه مدّه ماهيش شوي .. وهو محروم من رئيس يحيطو بالرعاية الموصولة.. و يُـنْـقـْــشُـو ساعه ساعه بلفته كريمه .. و يشملو بعطفو و باهتمامو الخاص .. و هكاكه .. يترعرع تحت سامي اشرافو و تحت رؤيتو الحكيمه ..و يضمنلو اسباب الرفاه و الرقي و التنمية المستديمة
رغم انو شعب عريق و مجرّب و محنـّـك.. و ما يستاهلش هالبهذله اللي تـْـحطّ فيها
راهي ماهيش شوي
الله يصبّرهم
و هالفراغ السياسي اللي قدّر بيه عليهم ربي في اعلى هرم السلطة ..انعكس حتى على حياتهم الاعلامية ..فـَـولينا نشوفو في فضائياتهم سكاتشات اقل ما يقال فيها انها قليلة حـْيا..أو ينعدم فيها الاحترام اللازم للشخصيات العامة و الخاصة.. هاك الاحترام اللي ما عندهاش برشه ملـّـي نصّت عليه وثيقة وزراء الاعلام العرب
مْــساكن وْ برّه
قال شنوّه .. شعب مجبول على الاختلاف و التعايش من قديم زمان .. على خاطرو متعدد الاديان و الطوايف و القوميات ...ايشبيه ..؟؟..و برّا راوْ..؟ يقومو ينسوا دور وسايل الاعلام الرئيسي .. واللي هو شويّه رقص على شويّه منوعات على شويه احتفالات على شويّه عروض ازياء على شويّه ملفات نستدعو فيها رموز المعارضة باش يمجدولنا الانجازات .. ينسوا هاذا الكل .. و يوصلو لدرجه هستيرية من تقليد الزعماء السياسيين متاعهم ..و لا تمنع لا معارضة .. ولا موالاة .. و لا نواب .. و لا نائبات ..هذا لابس باروكه.. و يحكي كيما جنبلاط..و لاخر ضاربلها كشطه و جلباب ..و كوب زيرو.. في اشارة للجنسية السعودية اللي يتمتع بيها الشيخ سعد .. و هات ماك اللاوي ..الله يسترنا .. زايد ..هاذاكا حال اللي ما عندو- البعيدة - لا حسيب و لا رقيب
تماو عالاقل ..كيما يقولو.. وإذا عصيتم فاستترو..مثلا .. عرس .. حفلة خاصة
هكّه ؟؟؟.. امام الملأ..؟؟؟و العالم الكل يتفرج ..؟؟؟ لا .. و السكاتش اللي تشوفو اليوم في قناة .. تزيد تشوفو من غدوه في قناة اخرى .. ياخي ما يندموش؟؟؟ ما يصحّيلهم حدّ ضميرهم ؟؟ ما يجيهمش شاهد العقل ؟؟؟ ما يرجـّــعهم حتى حدّ للجادّه ؟؟؟ ما يبْـراكيهم حتى حدّ عالمادّه ؟؟؟ ما يلقوش في كراهبهم حتـّـى مادّه ؟؟؟؟
الصّبر و برّه
كيفاش ينجّمو يروّحو لديارهم بعد ما كانو يقلدو في هاك الشخصيات الخاصة و العامة ..؟؟ و حتى كيف يروّحو .. كيفاش ينجّمو يهزّو عينيهم في عينين نساهم .. و رجالهم .. و صغارهم .. من غير حتى شعور بالذنب ..اينعم ذنب .. ياخي شويّة اللي كانو يعملو فيه ؟؟؟..ياخي لازم اللاّما ينشرو حصيرتهم قدام العالم الكل ؟؟ و يضحّكو الناس عليهم ..؟؟؟عندهم الحق .. ما ذاقوش لذة الاحساس بالفخر و الاعتزاز بفضل الحكمه .. و التبصّر .. و السياسة الرشيدة ضمن مسيرة رائدة في كنف التحاور و التشاور

8 commentaires:

ماهيفا a dit…

حاصيلو صحة لينا أحنا و برة. الكلنا يد واحدة

Bel Malwene a dit…

أبدعت يا براستوس ... برافو !!!
الواحد يقول الحمدولله الّي ما تغلغش فينا مرض حرية الرئي اللهم عافينا ... وإلاّ راهوا ولينا منعوتين بالصبع والقاصي والداني مالدول الشقيقة و الصديقة يضحكو علينا ... آش قالك آش قتلك : مساكن ولاّو عندهم ديمقراطية وحقوق الدراشنية !!! عفنا و عفاكم الله

moghrama a dit…

rabbi ybakki 3lina essetr we idim 3lina ha enne3ma illi ahna fiha , el7asel elwahed ma ya3rf 9imet bledou illa ma ychouf el5onnar mta3 ghirou!ama mana7kiwech 3al francis , hedhoukom mchew fi hewya min hek el3am,illi mché fih wzir mil wezra mte3hom dha7iet ettfadlik el masset !!
bravo brastos , tu excelles com dab!

moghrama a dit…

rabbi ybakki 3lina essetr we idim 3lina ha enne3ma illi ahna fiha , el7asel elwahed ma ya3rf 9imet bledou illa ma ychouf el5onnar mta3 ghirou!ama mana7kiwech 3al francis , hedhoukom mchew fi hewya min hek el3am,illi mché fih wzir mil wezra mte3hom dha7iet ettfadlik el masset we 7orriyyet etta3bir!!
bravo brastos , tu excelles com dab!

Sonya a dit…

لووووول
الحمد الّه احنا عايشين في نخوة و اعتزاز
ابدعت كالعادة

النسر الأسود a dit…

كيفما قالوا الجماعة : ربّي يبقّي علينا الستر. ولو انّ الوضع اللبناني يبقى ديما وضع فريد من نوعه في المنطقة العربية...

الاّ انّي ماذابي نشوف تعاليق بعض التوانسة المتعصّبين اللي ديما يفاخروا بأنه التوانسة أحسن ماثمّة في العرب، بل وانّهم خير منهم وهذاكه علاش فيهم شكون يمشي لبعيد ويقول اللي نحن ماناش عرب جملة :)

moghrama a dit…

howa shih manach arab arab à 100/100 isal si azwaw tawa i9ollek ,ama hawka t3ourebna..mché fibelna el3ourouba haja kbira...ya hasra ..

brastos a dit…

@ maheva
يد واحدة .. و زيد .. وسخة
@ bel malwene
ريت يا بالملوان
كيفاش تلفزتنا ما فيهاش الوان ..و ماهيش حتى اسود و ابيض .. هي اسود فقط

@ moghrama
الله يسترنا من الهرج الزايد ..

@ sonya
نخوة و اعتزاز ...
على وزن
سرقه و ابتزاز

@ النسر الاسود
...هاك اللي ما يصدّقو يحطولهم ميكروفون قدام و جوههم في الريبورتاجات اللي تضحّك متاع لخبار ..و يطيحو يمجّدو في كل شي ..
انا نخاف عليهم من جنون العظمة :)))