لا تختزلوه في مجرّد تروبادور"...ـ"

البعض من الوخيان يعتقد اللي من الغريب انّو المهتم بفن من الفنون ، يمارس فيه ، ينتج فيه ، والا حتى مجرد يبحث فيه .. صعيب باش تكون عندو آراء سياسية ، و توجهات فكرية ، قد يكون متمسك بيها قدر تمسّكو بهاك الفن اللي يتعاطى فيه ، بحيث"نختزلوه في مجرّد تروبادور" على حد تعبير أحد الأصدقاء
بالعكس ، في نظري انّو الفنان من جهة ، و السياسي .. والا خلينا نقولو : المفكّر من جهة اخرى ، كل واحد فيهم في حاجة اكيدة للآخر. كيما لابد للفنان من فكرة تقودو ، و تعطي معنى، و انتماء لفنّو باش ما يكونش مجرد تقني و الا أرتيزان ، ما عندوش فعل في اللي يدور حولو ، متعالي عن الصراعات تقولش عليه جاي من كوكب آخر. و المقصود بـ : الفكرة هنا ، موش بالضرورة نسق "ايديولوجي" معلـّب جاهز ، و انما على الاقل تصور منطقي للحياة و للانسان ، و يكون فنّو يصبّ ، بشكل او بآخر، في هاك التصوّر .. دون المساس بطبيعة الحال ، بأجنحة الأبداع
في المقابل ، نشوف انّو ايجابي ، و إيجابي جدا انّو السياسي يكون منفتح على مجالات المعرفة الاخرى ، و على مختلف اشكال الوعي البشري .. حتى يتمكّن من انّو يعدّل و يقلّص ما امكن من "جفاف" السياسة .. و "تجريد" الافكار
و يستحضرني هنا الدور اللي عطاه افلاطون للموسيقى في بناء جمهوريتو الفاضلة ، وقت اللي دعا لضرورة تعليم الشعر و الموسيقى لطبقة الحرّاس ، حرّاس المدينة بالطبيعة . على خاطر صفتهم القتالية و الصدامية ،اللي على أساسها انتـُـدْبـُـو للحراسة تنجّم تقوّي فيهم الجانب المتوحّش و العدواني ، لذلك ، لابد من تمدينهم و تهذيبهم بالموسيقى و الشعر
تستحضرني زادا صفحة جميلة من الاسطورة اليونانية ، وقت اللي أورفـيوس، عازف القيتارة و المغنّي اللي كان يسحر بفنّو البشر و الحجر ، و الطير و الشجر ... و اللي فقد حبيبتو يوريديس بعد ما لدغتها افعى سامـّة، كان لموسيقتو وقع كبير على قلب الملكة برسوبينا ، مما خلاها تأثــّر على الملك ابولو باش يرجّعلو حبيبتو الى عالم الاحياء
خلّي عاد كي نبربشو شويّة في تاريخنا الحديث ، اللي يعج بالامثلة على هالخيط الرفيع بين الفكر/السياسة ، و بين الفن
مثلا ، السنفونية التاسعة لبيتهوفن كانت باش تحمل اسم نابوليون بونابارت ، لولا خيبة ظنّو فيه بعد ما اكتشف بيتهوفن ، الفنان المتحمس وقتها للقيم الانسانية ، اللي هاك الشعارات البرّاقة اللي رفعها نابوليون على العدل و المساواة و الحرية ... ما كانتش اكثر من مطيّة للوصول للسلطة ، وللمزيد من التوسّع ... انزعاج بيتهوفن ، خلّاه يبدل اسم تلك السنفونية الشهيرة ، من اسم"نابوليون بونابارت" الى "سنفونية بطولية .. في ذكرى رجل عظيم"
فيكتور خارا ، الفنان و الشاعر و القيتاريست العبقري الشيلي ، اللي قـصـّـــلـُـو بينوشي صـْـوابعو في ملعب رياضي امام الجمهور ، انتقاما من اغانيه الثورية و الحماسية
شارلي شابلن ـ كفنان ـ بمجموعة من الايماءات و الحركات و المشاهد و بكثير من الخيال الجميل ، فاق السياسيّين في فضح و تعرية الوجه الجشع و البشع للمجتمع الصناعي
بشارة الخوري ، الزعيم السياسي اللبناني صاحب المواقف الوطنية ، كان شاعر يلقّب بالاخطل الصغير ، و من اشهر ما غنالو عبد الوهاب : الصبا و الجمال ، الهوى و الشباب ، يا ورد مين يشتريك ..و غنتلو فيروز: يبكي و يضحك لا حزنا ولا فرحا ...
ليوبولد سيدار سنغهور، السياسي الوطني / الشاعر السنغالي .. وغيرهم.. وغيرهم
في الحقيقة الامثلة عديدة و عديدة جدا .. فقط حبيت نلفت نظر بعض الوخيان للي أشرتلو في اوّل التدوينة