dimanche 14 décembre 2008

بعض احسن المدونات

الدعوة الرشيقة اللي وجّهها صديقنا حسين هنا ، و اللي هي حسب رأيي اعمق و اضخم من مجرد مسابقة سطحية .. بل انا نرى فيها نوع من الحميمية اللي ممكن تتبنى مابين المدونين
اما ارجو انّو خونا حوحو يسمحلي باش نشارك بنوع من التعديل في الصيغة مادامنا في سياق بعيد على الشروط الجافة و الصارمه :) ـ
اوّلا .. و ثانيا .. و ثالثا ، انا لا يمكن انّي نتخيّل البلوغسفير من غير صديقنا أزواو..اللي ارجو انّو يغفرلي "مبالغتي" هاذي اللي تنجّم تحرجلو تواضعو المعهود
و من بعد تجي المدوّنات الاخرى اللي ديمه نتسكّع فيها .. و اللي انا قسّمتها تقسيم اخر
منهم اللي نحبّهم برشه خاطرهم ما يكتبوش باستمرار .. اما كي يكتبو يعطيوك شبعة افكار دقيقه و طريفة و جريئه ، و في السياق هاذا نذكرو ماني ، ماهيفا ، قصة اونلاين ، بالملوان ، الفري راس
عندك زاده المدونين اللي عندهم بلاده بنينه برشه .. و اللي عادة ما نقرالهم تدويناتهم بصوت مرتفع :) باش نحاول نتمثّلهم قدّامي اكثر .. و انا متأكّد اللي طريقتهم في الحديث متميّزة برشه ، منهم : بيغ تراب بوي ، الدوعاجي ، الزبراط من جينيف ، المسلم السابق و عياش مالمرسى
ما نّجّموش نفوتو المدونات اللي تحتوي على التحاليل الاكاديمية المتعمقة ، و اللي بقدر ما تختلف معاها في بعض الاحيان ، الا انك ما تنجّم الا تحترم مجهودها و دقّتها ، على سبيل المثال : طارق ، كوسموبوليس ، و كارب ديم
نمشو توّة للمدونين اللي عندهم معزّه من نوع خاص عندي ، لسبب واحد هو انّهم مبدعين بصوابعهم .. يمكن هنا فمّة شويّة انانية .. لانّهم زملاء في تخديم الصوابع .. في الفن اكاهو بطبيعة الحال :)ـ اللي هوما سونيا و هبلاتها .. و ارتيكيلي و نقاش تونسي اللي مع الاسف مازلت كي اكتشفت انها امتدت لها الايادي الوسخة و حرمتنا من رسومو الرائعه
هاذا بالطبيعة مع امّالي الدار: هناني و اسلوبها الخفيف السهل الممتنع .. ابوناظم و خربشاتو الثاقبه ..البرباش نموذج المدوّن الهادئ .. ارابيكا و تصعصيعها الحلو :) ولاده و اندفاعها المزيان .. اللص رقم واحد اللي مخبّيه داخلها ..فنّانه كبيييييرة .. جاكييز ،اللي عييت ما نقلّو شبيك حارمنا من وجودك في التن بلوغ.. الجنّي ، نموذج المدوّن اللي ما يحبّش يكون واحد اخر في مدوّنتو
و القائمة تطووووول

9 commentaires:

kheldouna a dit…

Bravoooooo Brastos !

انا من طبيعتي نكره اللوبيييزم اللي يهدم اكثر ماللي يبني و نكره زاده البلادة اللي موش في بلاستها
تقسيماتك كانت كي ما كنت نتصورها انا بالنسبة لي
ممكن هذا يدل علي اجابية التعددية

Merciiii!

brastos a dit…

اهلا خلدونه

الحقيقه كل حد عندو ما يميّزو .. و من غير اختلاف شي ما عندو معنى

L'AsNumberOne a dit…

شهادة نعتز بيها برشة... شكرا صديقي

احمد+منى a dit…

سريوزلي انت سميت احسن اقلام البقوسفار
احنا نزور بانتظام تقريبا نفس المدونات

Sonya a dit…

شكرا صديقي
انا زاد يعجبوني تخربيشاتك اليدوية و نقشاتك الفكرية
ديجا كيف سمعت بالمسابقة لخرى امشيت كيف الناس الملاح حطيتلك مدونتك في مجموعة احسن مدونة في 2008
امّا ما حبوش يعديوك على خاطرك طلعت ما كش عاقل
و ماكش ماشي على الصراط المستقيم

HNANI a dit…

الله يخلّيك يا براستوس، أنا زادة من زوار دارك كل يوم، نحط السفساري على راسي وانقول يا دار برستوس هههه
شكرا على شعورك النبيل و والله شهادة منك وشهادة من سيدي علي هوما أكبر جايزة ، بكل صدق
شكرا

عاشور الناجي a dit…

ا لله يخليك يا براستوس

أنا اسمي مكتوب؟

طيب
:)

Bel Malwene a dit…

Merci beaucoup cher Brastos ... hethi fokhra lia eni nkoun men bin les blogueur eli ta9ralhom !! khater ana je suis fan de ton blog de tes dessins et de tout se que tu écrit ...
j'aime bien ton idée comme j'aime celle de houssine ... et j'aime surtout qu'on en discute ainsi ... chacun apporte son idée chacun contribu par ce qu'il voit bien sans se monté la tête avec des débilité de qqun eli y7eb yerkeb 3al les blogeur pour faire sa fortune et ca célébrité ...
merci encore Brastos et je ferai de mon mieu pour réactivé mon blog en commençant peu etre par choisir mes blogs préférés.

عياش مالمرسى a dit…

Merci Brastos :) :)