فحوله .. بطوله .. على الجدران

اولا شكرا لصاحب مدونة ريزيرّاكسيون اللي متخصّص في الحديث عليّ انا ، و يعملّي في الدعاية المجانية تلو الدعاية المجانيه

كنتوش تعرفو اللي انا عندي مدوّنه اخرى اسمها : تـْــصِـيـوْرات متخصّصة في التصوير الفوتوغرافي لولا الدّعاية اللي عملهالي هوّ ؟

انا الحقيقة كنت عامللها رابط محتشم على هامش المدونه تحت عنوان

je est un aute

و قلت خلّي اللي يكتشفها وحدو يكتشفها ، و اللي ما فاقش بيها ، ما خسرش حاجه كبيرة :)

و الحقيقه اللي يزوروها كانو قلال

اما بحياة راس هرقل/عمروش ، نتصوّر توّ باش يزيد عدد زوارها

عاد

التدوينه هاذي ، و اللي قراها صحيّبنا و هو لابس نظاراتو التناسلية ، متكوّنه من مجموعة صور ، كنت خذيتهم من داخل بناءة قديمه لمعمّر فرنساوي ، تهدّمت و هجرها اهلها و اصبحت مكان يرتاده الشبّان المهمّشون و المسدوده امامهم آفاق الحياة "المنحرفون" الـ"كلوشارات" .. انا لا اميل لهذه التسميات نظرا لسطحيتها و عدم دقّتها و امتلاءها بالاحكام المسبقه

على كل ارجو انّكم تعملو حواسه باهية

كيما تشوفو نحبّ العدسه متاعي تتصيّد ما خفي من الامور

الناس اللي يجيو للمكان هاذا و هوما في غالبيتهم شباب ، يمارسو كل ممنوعاتهم و مكبوتاتهم بشكل عنيف كيما يعبّرو عليه في الرسوم اللي يرسموها بالفحم على الحيوط هالمخبأ متاعهم

نشوفو هنا بطولات وهميّة .. سيوف .. سكاكين .. عضلات

يعني رسوم جدرانية كيما هاذي نتصوّرها تجاوب على العديد من الاسئلة حول علاقة الشباب بالعنف بالواقع بالخيال بالجنس بالحب

نشوفو اللي هالصور المرسومه على الجدران هي انواع و اشكال متعددة من التصعيد.. و من الاسقاط

هكذا يبدا الانحراف حسب تصوّري

يبدا بالبحث عن القدرة على ان نكون مثل النموذج المثالي متاع القوي ..القادر.. العنيف ..القاهر.. اللي نشوفوه في السينما و في التلفزة

نشوفو زاده من خلال الصور التعبير على الكبت الجنسي متاع شبابنا و كيما كنّا حكينا برشه مرات انّو الكبت قبل ما يكون في النصف الاسفل ، هو في الوعي و في التصور و في الدماغ

على كل الصور اثارو فضولي ، و ذكّروني بالكهوف متاع الانسان البدائي

حبيت ننقلهم هنا و نحكيو فيهم مع بعضنا

شكرا للزيارة

و شكرا للي عمل من حيث لا يدري دعاية لهالمدونه اللي ماكانتش ماخذه حظّها مليح