تساؤلات قديمة/متجدّدة ، حول "الاغنية الملتزمة" ...ـ

المبادرة اللي قاموا بيها مجموعة من طلبة المعهد الاعلى للتنشيط الشبابي الثقافي ببير الباي ، و المتمثّلة في اختيار "الاغنية الملتزمة في تونس " كموضوع لرسالة التخرج متاعهم ، مبادرة رايعة ويستحقّو عليها تحية كبيرة .. و تستحق التنويه و الدعاية ليها .. خاصة امام ما نشهدوه من انحطاط على كافة الاصعدة .. و منها .. بل اهمها .. الانحطاط الثقافي و الفني .. و شخصيا تأثرتلها و تحمستلها و اثارت فيّ العديد من مشاعر النوستالجيا الخاصة .. لاني ، و انا في الجامعة ، كنت قريب من برشة مجموعات موسيقية ملتزمة ، و نشطنا في اطار مجموعة ما تمكنتش باش تستمر لعدة اسباب .. و منهم اللي مازالت تربطني بيه علاقات صداقة
و في السياق هاذا .. اخشى ما اخشاه .. انّو يقوم واحد.. افكارو لا تاريخية و ناقصة إضاءه .. رغم رداء الحداثة الملفوفه بيه .. هالرّداء اللي لوكان تنحّيهولو .. تلقاه مخبّي تحتو سيف مصدّد عـُمـْرو مئات السنين .. و داخل علينا ببرنامج اسمو : إقامة الحدود.. و يقول لهالمجموعة المتنوّرة من الطلبة : ملّا ديناصورات ... ( و ما نعرفش عاد اشكون الديناصور هنا ؟؟؟؟؟) ياخي مازال وقت اغنية ملتزمة هوّ ؟؟؟ ... تـِــالاغنية الملتزمة راهي مشات مع جدار برلين
قلت ، و هالمبادرة القيّمة ، ما اثارتش فيّ فقط مشاعر النوستالجيا بصفة خاصة .. لكن زادا خلتني نطرح برشة تساؤلات .. في الحقيقة فيها القديم و فيها الجديد .. حول مفهوم "الاغنية الملتزمة" .. و تاريخيتها .. و جدواها

ياخي اشبينا فيسع نسينا اللي ثمة قصايد و اغاني و مقطوعات موسيقية في التاريخ .. كانت سبب في اندلاع مظاهرات .. بل كانت سبب في اغتيال اصحابها .. و سجنهم و التنكيل بيهم ؟؟ـ
و من جهة اخرى ، هل ان الاغنية الملتزمة تعني بالضرورة الاغنية السياسية .. و هل ان الاغنية الملتزمة هي ضرورةً الاغنية "الورعة" ..."التقيّة" ... " السامية"... اللي ما تتغناش بالجسد مثلا .. ياخي الجسد ماهوش من المحرّمات ؟ و هاذاكا حدّو الجسد ما كلى على راسو في ثقافتنا ؟؟ و ياخي موش من اهمّ مهمّات هالاتجاه الموسيقي : النفاذ الى المحرمات .. ؟؟ـ
ياخي هل انو التحرر الاجتماعي و الوطني حاجة ، و التحرر النفسي/ الجسدي/ العاطفي حاجة اخرى معزولة ؟؟؟؟ـ
ياخي غناية جورج براسنز اللي يحكي فيها على مرا فقيرة متشرّدة ترضـّــعْ في ولدها الجيعان على الرصيف .. بينما عـون الامن يخزرلها لصدرها العريان بطريقة شهوانيّة .. غنايه كيف هكه وين تتصنّف ؟؟ـ
علاش ما تستفيدش الاغنية الملتزمة من ارقى ما وصلتلو الموسيقى العالمية من تقنيات التوزيع و الهرمنة و الكتابة المتقنة عموما ؟؟؟... و تخرج من سجن الشعارات اللي اتحطّت فيه .. بحيث في برشه اعمال يصعب التفريق مابين غناية ومابين بيان سياسي؟؟ـ
ياخي مش عندنا حاجة اسمها الاركستر السنفوني التونسي ؟؟؟ كل شهر و هو يكرّم في باخ .. و موزار.. و شتراوس .. و تشايكوفسكي ... طيّب .. هاذاكه تراث عالمي انساني ...عالعين و الرّاس .. لكن زادا من المفروض انو هالاركستر ينفتح على تجارب محلية محترمه و جدية .. و انا نعرف برشه موسيقيين موهوبين في مجال التوزيع و حتى التاليف الاركسترالي مع امتلاكهم لوعي ثقافي و سياسي متطوّر .. لكنهم ساكنين البيران و مدوّرين بيهم خمسة و الا ستّــه "مـُـريـدِيــن" .. و يمارسو في الاستمناء الثقافي في حالة تراجيديّه من الاحباط
هل انو التغنّي بالثورات ..و بنضالات الشعوب .. ينفي الجماليّة .. و التقنية الجيّــدة ؟؟ـ
علاش ديمة الاغنية الملتزمة يرافقها فقر تقني .. و تواضع في المجهود الموسيقي المبذول ؟؟ـ
علاش ما نواجهوش عنف و شراسة العولمة ( في واجهتها الثقافية بطبيعة الحال).. بعنف و شراسة موسيقية ؟؟ و هنا، العنف و الشراسة الموسيقية.. تاخذ معنى القوة التقنية .. القوة الاخراجية .. يعني قوّة الارضية المادية للاغنية.
صحيح انو البلاتفورم السياسي يدّخّل هنا .. ومن حقّ ايّ واحد يقلّي : توّا انت في شكون قاعد تسأل ؟؟ـ
في المبدعين المغمورين اللي ما تتحـلـّــلْهـمش البيبان الا اذا انتجو في اطار الاحتفالات بالسابع من ندراشنوّه ؟؟؟ـ
في المسؤولين على الثقافة في البلاد ، اللي من الغباء اننا ننتظرو منهم انهم يكونو استثناء على غيرهم من المسؤولين في الميادين الاخرى .. ؟؟ـ
في التجار و المستثمرين في الميدان الثقافي ؟؟ هاك اللي مسرحية والا غناية بالنسبه ليهم كيفها كيف قاجـّــوات البطاطة و الطماطم بالنسبة للخضّار .. ما تحيلك الاّ على سؤال واحد : قدّاش ربحي ؟؟؟ـ
في الفنانين التقليديين اللي كل ساعة تقوم عليهم مو ضة الحماس الحـنّـيّــَة .. و تسْـخف قلوبهم على الشعوب .. و يتحفونا بتخلويضة ما اثقلش من دمّها .. مرّة يطلقو عليها اوبيريت الحلم العربي .. و مرّه ، الضمير العربي .. و هي ما عندها حاااااااتى علاقة بالاوبيريت كقالب موسيقي/مسرحي
مثلا
علاش الوضع السياسي اللامستقر و اللاآمن في لبنان .. انتجلنا تجارب موسيقية ذات مستوى عالي جدا من المهارة التقنية مع المضامين الانسانية .. المستحدثة .. الطريفة .. كيما الرحابنة اللي بدوا بوليسية .. و اصبْحو مجدّدين .. و مرسيل خليفة ..اللي بدا بعود .. و اصبحْ مؤلّف سنفوني ... و غيرهم .. و غيرهم .. بينما هنا .. وين كيما يقولوها : بالامن و الامان :) يحيا هنا الانسان :) .. يتبارى المنشطين و المنشطات على اشكون تاخذ السبق انها تعــدّّي في حصّتها أخـْـــيبْ مزاودي