lundi 21 avril 2008

تساؤلات قديمة/متجدّدة ، حول "الاغنية الملتزمة" ...ـ

المبادرة اللي قاموا بيها مجموعة من طلبة المعهد الاعلى للتنشيط الشبابي الثقافي ببير الباي ، و المتمثّلة في اختيار "الاغنية الملتزمة في تونس " كموضوع لرسالة التخرج متاعهم ، مبادرة رايعة ويستحقّو عليها تحية كبيرة .. و تستحق التنويه و الدعاية ليها .. خاصة امام ما نشهدوه من انحطاط على كافة الاصعدة .. و منها .. بل اهمها .. الانحطاط الثقافي و الفني .. و شخصيا تأثرتلها و تحمستلها و اثارت فيّ العديد من مشاعر النوستالجيا الخاصة .. لاني ، و انا في الجامعة ، كنت قريب من برشة مجموعات موسيقية ملتزمة ، و نشطنا في اطار مجموعة ما تمكنتش باش تستمر لعدة اسباب .. و منهم اللي مازالت تربطني بيه علاقات صداقة
و في السياق هاذا .. اخشى ما اخشاه .. انّو يقوم واحد.. افكارو لا تاريخية و ناقصة إضاءه .. رغم رداء الحداثة الملفوفه بيه .. هالرّداء اللي لوكان تنحّيهولو .. تلقاه مخبّي تحتو سيف مصدّد عـُمـْرو مئات السنين .. و داخل علينا ببرنامج اسمو : إقامة الحدود.. و يقول لهالمجموعة المتنوّرة من الطلبة : ملّا ديناصورات ... ( و ما نعرفش عاد اشكون الديناصور هنا ؟؟؟؟؟) ياخي مازال وقت اغنية ملتزمة هوّ ؟؟؟ ... تـِــالاغنية الملتزمة راهي مشات مع جدار برلين
قلت ، و هالمبادرة القيّمة ، ما اثارتش فيّ فقط مشاعر النوستالجيا بصفة خاصة .. لكن زادا خلتني نطرح برشة تساؤلات .. في الحقيقة فيها القديم و فيها الجديد .. حول مفهوم "الاغنية الملتزمة" .. و تاريخيتها .. و جدواها
ياخي اشبينا فيسع نسينا اللي ثمة قصايد و اغاني و مقطوعات موسيقية في التاريخ .. كانت سبب في اندلاع مظاهرات .. بل كانت سبب في اغتيال اصحابها .. و سجنهم و التنكيل بيهم ؟؟ـ
و من جهة اخرى ، هل ان الاغنية الملتزمة تعني بالضرورة الاغنية السياسية .. و هل ان الاغنية الملتزمة هي ضرورةً الاغنية "الورعة" ..."التقيّة" ... " السامية"... اللي ما تتغناش بالجسد مثلا .. ياخي الجسد ماهوش من المحرّمات ؟ و هاذاكا حدّو الجسد ما كلى على راسو في ثقافتنا ؟؟ و ياخي موش من اهمّ مهمّات هالاتجاه الموسيقي : النفاذ الى المحرمات .. ؟؟ـ
ياخي هل انو التحرر الاجتماعي و الوطني حاجة ، و التحرر النفسي/ الجسدي/ العاطفي حاجة اخرى معزولة ؟؟؟؟ـ
ياخي غناية جورج براسنز اللي يحكي فيها على مرا فقيرة متشرّدة ترضـّــعْ في ولدها الجيعان على الرصيف .. بينما عـون الامن يخزرلها لصدرها العريان بطريقة شهوانيّة .. غنايه كيف هكه وين تتصنّف ؟؟ـ
علاش ما تستفيدش الاغنية الملتزمة من ارقى ما وصلتلو الموسيقى العالمية من تقنيات التوزيع و الهرمنة و الكتابة المتقنة عموما ؟؟؟... و تخرج من سجن الشعارات اللي اتحطّت فيه .. بحيث في برشه اعمال يصعب التفريق مابين غناية ومابين بيان سياسي؟؟ـ
ياخي مش عندنا حاجة اسمها الاركستر السنفوني التونسي ؟؟؟ كل شهر و هو يكرّم في باخ .. و موزار.. و شتراوس .. و تشايكوفسكي ... طيّب .. هاذاكه تراث عالمي انساني ...عالعين و الرّاس .. لكن زادا من المفروض انو هالاركستر ينفتح على تجارب محلية محترمه و جدية .. و انا نعرف برشه موسيقيين موهوبين في مجال التوزيع و حتى التاليف الاركسترالي مع امتلاكهم لوعي ثقافي و سياسي متطوّر .. لكنهم ساكنين البيران و مدوّرين بيهم خمسة و الا ستّــه "مـُـريـدِيــن" .. و يمارسو في الاستمناء الثقافي في حالة تراجيديّه من الاحباط
هل انو التغنّي بالثورات ..و بنضالات الشعوب .. ينفي الجماليّة .. و التقنية الجيّــدة ؟؟ـ
علاش ديمة الاغنية الملتزمة يرافقها فقر تقني .. و تواضع في المجهود الموسيقي المبذول ؟؟ـ
علاش ما نواجهوش عنف و شراسة العولمة ( في واجهتها الثقافية بطبيعة الحال).. بعنف و شراسة موسيقية ؟؟ و هنا، العنف و الشراسة الموسيقية.. تاخذ معنى القوة التقنية .. القوة الاخراجية .. يعني قوّة الارضية المادية للاغنية.
صحيح انو البلاتفورم السياسي يدّخّل هنا .. ومن حقّ ايّ واحد يقلّي : توّا انت في شكون قاعد تسأل ؟؟ـ
في المبدعين المغمورين اللي ما تتحـلـّــلْهـمش البيبان الا اذا انتجو في اطار الاحتفالات بالسابع من ندراشنوّه ؟؟؟ـ
في المسؤولين على الثقافة في البلاد ، اللي من الغباء اننا ننتظرو منهم انهم يكونو استثناء على غيرهم من المسؤولين في الميادين الاخرى .. ؟؟ـ
في التجار و المستثمرين في الميدان الثقافي ؟؟ هاك اللي مسرحية والا غناية بالنسبه ليهم كيفها كيف قاجـّــوات البطاطة و الطماطم بالنسبة للخضّار .. ما تحيلك الاّ على سؤال واحد : قدّاش ربحي ؟؟؟ـ
في الفنانين التقليديين اللي كل ساعة تقوم عليهم مو ضة الحماس الحـنّـيّــَة .. و تسْـخف قلوبهم على الشعوب .. و يتحفونا بتخلويضة ما اثقلش من دمّها .. مرّة يطلقو عليها اوبيريت الحلم العربي .. و مرّه ، الضمير العربي .. و هي ما عندها حاااااااتى علاقة بالاوبيريت كقالب موسيقي/مسرحي
مثلا
علاش الوضع السياسي اللامستقر و اللاآمن في لبنان .. انتجلنا تجارب موسيقية ذات مستوى عالي جدا من المهارة التقنية مع المضامين الانسانية .. المستحدثة .. الطريفة .. كيما الرحابنة اللي بدوا بوليسية .. و اصبْحو مجدّدين .. و مرسيل خليفة ..اللي بدا بعود .. و اصبحْ مؤلّف سنفوني ... و غيرهم .. و غيرهم .. بينما هنا .. وين كيما يقولوها : بالامن و الامان :) يحيا هنا الانسان :) .. يتبارى المنشطين و المنشطات على اشكون تاخذ السبق انها تعــدّّي في حصّتها أخـْـــيبْ مزاودي

15 commentaires:

abunadem marzouki a dit…

عندك الحق الاغنية الملتزمة تراث عالمي يلزمنا نحافظو عليه موش موضة قديمة وتعدات .مع ان بعضهم بدا يروج فيها كالسلعة تقول انت لكن فيها جمالية على كل حال كيما عمل محمد الحلو لبعض اعمال شيخ امام او رضا الشمك عندنا في تونس او الضمير والحلم العربي والا ماجدة الرومي .انا نتصور باللي يكون عمل كي هكة يتعدى في التلفزة والا الراديو على الاقل يشد وقت متاع خنار اخر كان باش يتعدى في بلاصتو .شوف اغاني سوسن الحمامي وامل عرفة كي ظهرت مع الانتفاضة الفلسطينية كانت باهية انك تسمعها في لواج احسن من مزود .والا انا غالط؟؟؟على كا احنا ندعمو كل من يعيد الروح له الاغاني هذية حتى بالهمس الخفيف....شكرا

Anonyme a dit…

هات اللى يفهمك ؟؟؟؟ مثلا هاى علامة قف منصوبة قد السماء الزرقاء في وجوه الاعلاميين اللى بهذلولنا بالذوق متاعنا ؟؟؟؟؟ مانيش ضد اى شكل من أشكال التعبير نحكى هنا أمّا باهي كيف انوّعو في المنوعات وموش تولى كى كورس الزوايل حاشى من يسمع

Anonyme a dit…

ana ltawa lafhimet hal eloghnia elmoltazma bech moultazma??
bil mousi9a?
fama aghani mte3 chi5 imam ma3andhoum 7atta 3le9a bil mosi9a kima :3ala bagrat 7a7a elnata7a??biensure fama aghani 7lowin bercha kima "sabou elmarakib 3al meghrib we fatouni"
bil kalimet?
fama aghani "moltzma" ye9oulou fiha :2000 3ichrinet tawa jouni??!!
bi 5at siyessi?
fama aghani achbeh matkoun bi un discours politik
donc mo5tsar el7dith:je pense k'il faut redefinir la chanson"elmoltazima"
awel iltizem 7asseb ra2yi yelzim yekoun iltizem bil dhewe9 soit au niveau des paroles soit au niveau de la composition..

Anonyme a dit…
Ce commentaire a été supprimé par un administrateur du blog.
brastos a dit…

التعاليق المحذوفة تحتوي فيروسات

brastos a dit…

@ abounadem

انا معاك في انو الرداءة و التسطيح و التهميش .. الثقافي تخلّي الواحد يكبـّـش حتى في قـشـّــه كما يقال
اما انا مع التاسيس لمشروع موسيقي ملتزم بزوز حاجات على حد السواء : الانسان و الجمال
وصديقنا رضا الشمك نموذج جيد للي حكيت عليه



@ arabicca
باهية هالـ : "قف" متاعك يا ارابيكا
مرات الواحد يحس مخو باش يتكلاطا .. ما تنفع فيها كان عيطة والا تصييحة بـ : قففففففففففففففففف




@ anonyme
كيما قلت لابو ناظم اروع و ادقّ التزام هو الالتزام بالجمالية و بالانسان في ابعاد و جودو بكلّها موش كان الحب المريض بالهجر و الخيانة والعذاب السطحي

demnaghozzya a dit…

سامحوني الناس الكل.
أنا عندي احتراز على مصطلح: ملتزمة.
الكلمة في حد ذاتها تحمل دلالات مناقضة لمفهومها.
كيف نقولو التزام بشيء ما معناها صنعنا لأنفسنا قيودا.
والفن هو من معدن الحرية لا يعترف بأي شكل من أشكال القيود.
أحب أن أقول إنه يجب عدم الخلط بين الفن والإيديولوجيا.
الفن حرية والإيديولوجيا قتل للحرية.
الّي يخلّي الأغنية "الملتزمة" تموت هو التسييس الإيديولوجي. ولّي يخلّيها تحيا هو الفنّ والحرية.
وشكرا

Anonyme a dit…

@ Mazar
لا أعتقد أنّ براستوس أراد أن يسلب الفنّ الملتزم حرّيّته.....

المشكلة هو أنّ هناك فئة تحاول أن تسحب من الإنسان حقّ التّغنّي بالجمال بكلّ حرّيّة...

هذه الفئة تسعى عن قصدٍ لخلْطِ البَعْرةِ بالدُّرّة، وتعمل دائما على اتّهام العمل الفنّي المبدع بالتّسيُّس والإلتزام والتّأدْلُجِ....

ولهذه الفئةِ، فيما تفعلُه، خلفيّاتٌ سياسية إديولوجية...ومصلحة في أن تُحافظ على المفهوم المنحطِّ للفنّ لدى عامّة النّاس....

وهذه الممارسة السياسية، بل البولسية في أغلب الأحيان، لا تقتصر على الأغنية الملتزمة فقط....بل تنسحب على باقي الأنشطة الإجتماعية ......

فالصّحافة الحرّة تُصَادَرُ لأنّها ملتزمة بالحقيقة......

والأحزاب السياسية المعارضة والجدّية تُحاصَرُ وتُقْصى ويُطارَد مناضلوها ويُتّهمون بالولاء للأجنبي لأنّهم ملتزمون بقضايا شعبهم ويرفضون الفساد والتّعامل مع العدوّ.....

وغير ذلك من الإلتزامات المحرّمة كثير لأنه يطرح بديلا لما يسود من رديئٍ.....وفي ذلك سلب للحرّية مطلقًا

demnaghozzya a dit…

ياخي الفن الـمـْـ.....ــزمـّـر ماوراهش ايديولوجيا مقصودة و مدروسه و مأسـّــسـَـه ؟؟؟

الرد:
يا سي براستوس. يظهرلي أنا ما دافعتش على الفن المزمر اللي تحكي عليه.
كانشي عاد إذا كان تعتبر الّي كل عمل فني ما هواش ملتزم هو رديء ومزمّر

demnaghozzya a dit…

والأحزاب السياسية المعارضة والجدّية تُحاصَرُ وتُقْصى ويُطارَد مناضلوها ويُتّهمون بالولاء للأجنبي لأنّهم ملتزمون بقضايا شعبهم ويرفضون الفساد والتّعامل مع العدوّ

الرد:

يا j'accuse
اللي نحبك تفهمو هو انه الأحزاب السياسية المعارضة اللي تحكي عليها تحمل في حد ذاتها إيديولوجيا سياسية.
على خاطرها وقت اللي توصل هي نفسها للسلطة نهار آخر، تصبح أول من يتنكر لقيم الفن والحرية والالتزام

brastos a dit…

اهلا مزار

ما نعتبرش انو يلزم الاغنية تكون ملتزمة باش ما تكونش رديئة
non .. du tout ..

وارجع شوف ميولي الموسيقية في البروفيل متاعي .. طبعا اذا تحب :)

اما ماذابيّ ما نخافوش ياسر من الاغنية الساخرة و الا الناقدة و الا البديلة ..و نشدّو عليها القارد .. خاطر و راها ايديولوجيا ..

هكاكه نولّو نتعاملو مع الاشياء بطريقة مسبقة

من الاجدى انو المقياس يكون مدى استجابتها للذوق السليم و ماهيش هاربة على واقعنا و معاناتنا

و زادا مش بالضروره كـُبّي .. لانّ الفن ديما يدعو للفرح حتى في احلك اللحظات

demnaghozzya a dit…

كلامي الاول قلت فيه إنه مجرد احتراز
لكن انتوما بنيتو منو أشياء اخرى وقريب تتهمو بقية الفن بالعمالة والخيانة والمؤامرة

brastos a dit…

@ mazar

خلينا نتفقو في حاجة
راهو كيف نحكو على رد الاعتبار لها النوعية و الا لهالاتجاه الفني .. سمّيه كيما تحب : ملتزم .. بديل .. المهم نتفقو في تسميتو انو : مختلف
ما يعنيش هاذا اننا نحذفو من دايتنا السمعية ام كلثوم و اسمهان و عبد الوهاب و صليحة و الجموسي و بيتهوفن و ازنافور و بوب مارلي .و نانا موسكوري .........ونعوّضوهم قسـْـرًا باولاد المناجم و الشيخ امام و مرسال خليفة

الحكاية مش هكّه

اما علاش كيما نفتحو وسائل اعلامنا للنوعية الاخرى من الموسيقى .. ما نحلّوهاش امام الفن المختلف .. اللي عندو رؤية متميّزه .. موش بالضرورة لاغية للاخرى .. لكنها مختلفة عليها

انا شخصيا عازف عود .. وعندي عدة محاولات في تاليف اعاني و تلحينها .. و متاثر بجميييييييع الاتجاهات الموسيقية ..من تانغو و صالصا متاع امريكا اللاتينية لفلامنكو اسبانيا .. لبالالايكا روسيا .. للبو واو متاع الهنود الحمر لسيد درويش و حكيم :) لعبد الوهابالدوكالي للبانتاتونيك متاع افريقيا و الصين .. لقوقوش ايران لتيار اغنية المؤلف الفرانساوية
les chanteurs auteurs
.الخ...الخ...

عاد كيف نتخيل روحي شادد عودي و نلحن في كلمات تقول : يا حبيبتي ياللي هجرتيني :) و مشيتي عليّ :) و خليتيني وحدي :) وشمّتّي في الحاسدين :)و اللايمين :) يجيني الضحك على روحي

بينما كيف نطلق العنان لحريتي في اختيار الموضوع اللي نحب نغنّي و ناحن فيه .. نتفرهد .. و ننتج .. و موش بالضروره هالموضوع هو ثوره و الا مظاهرة ... و زادة ينجم يكون
entre autres
في المعنى هاذايا

شوف المواضيع اللي تغنو بيها جماعة
la chanson à texte
brel .. brassens.. ferré..reggiani .. piaf

شوف زادا النصوص متاع البلوز و الجاز قداش طريفة و جديدة و مختلفة و ماهيش نمطيّه

انا سمعت غناية متاع بلوز فيها زوز و الا ثلاثة جمل ..ضدّقني .. علاش تحكي؟ تحكي على وصف لمسمار مصدّد مدقوق في باب لوح ازرق .. و كي ضبّت المطر .. الما اللي هابط من المسمار لونو اصفر .. و مع زرقة الباب عطاو لوحة جميلة

ريت هالغناية محلاها..مع موسيقى و ارتجالات البلوز .. ما نحكيلكش

باختصار .. انا مع الحريةفي الفن ااااااكثر من اي شيء آخر


قداش من مرة تسمع مرسيل خليفة في وسائل اعلامنا ..اللي ما يختلفوش اثنين في قيمتو الفنية ؟؟؟

علاش ؟؟؟

demnaghozzya a dit…

على كل حال انا نشجعك على توجهاتك.
ما ذابيا تعملنا حفلة في بوعبانة ولا جي اف كا خليني نتمتع بالفن سوى ملتزم ولا لا

brastos a dit…

merci Mazar

t'es tjr le bienvenu