jeudi 2 juillet 2009

اخّـخّـيت عليكم يا ارابيش .. سّاعه تونتون عمّار .. يقتل .. يقتل .. يقتل بالتّربيه

عالاقل .. تــُـونـْــتـُـونْ عمّار ياقف في الفو روج
و كي يمشي للبــوسطه يقص نومروه و يقعد عاقل عالبنـك
و يستعمل القنطرة اللي عملتهالو البلدية بكلّ حنان
و أكثر من هكّه
tonton 3ammar
لاهي يخدم على روحو

موش لاهي يقطّع و يريّش في العباد

:)

تي آمااان ... شبيكم عليه

;)



9 commentaires:

ferrrrr a dit…

ههههههههههههههه
دمت يا براستوس سواكا حارا في افواه البعض ممن بيل على قدرهم

Legend Of The Fall a dit…

مافيباليش اللي السواك حار

Haykel AZAK a dit…

:D . Tmak3ira 3alameyya :)

Legend Of The Fall a dit…

عندك الحق يا دك. جنيتكرم، أحنا التوانسة ما انفعنا كان في 3 حاجات: التمقعير و التنبير و الضّمار الفارغ

ولد بيرسا a dit…

:-D mabldek ya brastos
HAHAHAHA

brastos a dit…

@ferrrrr
Dr.Gnitekram
ولد بيرسا

مرحبا .. و ما تنسوش باش تقصّو نوامركم في البوسطه .. و تاقفو في الفوروج .. و من بعد توّ نشوفو مدى اهليتكم للمطالبة بحرية التعبير .. و حرية الابحار
هههههه

على فكرة .. زعمه الواحد كيفاش يعمل باش يولّي
non-arabish
مثلا .. يشارك في مناظرة ؟ يبعث ملفّ فيه تصاورو و هو يقصّ في نومرو من البوسطه ؟ يصوّر روحو و هو واقف في الفوروج ؟؟؟
:))))






@ خرافة الخريف

ماو كي انت تحبّ تتضومر و تتمقعر و تنبّر على جحافل و شعوب و امم كاملة .. يلزمك تركش كي واحد تنفحلو هكّه ويقوم يتمقعر عليك

ديمه تتعمّد الاستفزاز لجلب الاهتمام .. و هي حالة ادعوك للتخلّص منها .. على خاطر كيف انت تجي في النهار اللي خصّصوه المدونين باش يكونو كلمة وحده ضدّ الحجب و الصنصرة و الرقابة الكلية للانترنات ، تجي انت تعمل بكائية على الفوروج و على نوامر البوسطه .. رغم اهمية نوامر البوسطه في حياتنا :) :) :) اما اختيار التوقيت لا يخلو من روح استفزازية مجانية .. انت معروف بيها..و كاني بيك تحبّ تقوللنا : يا ارابيش .. هههه ... وقت اللي تتعلّمو اسلوب الحياة المتحضّر ، وقتها ارتقيو لمستوى التنديد بالحجب و الصنصرة و المطالبة بالحريات.. و اللي هو نفس الخطاب الخشبي و القزوردي اللي كرّهونا بيه في حياتنا

ok ?

يا

"non-arabish"

!!

Legend Of The Fall a dit…

راجع حساباتك يا براستوس على خاطر أنا كي كتبت مقالي كتبتو نهار 2 جويلية مش نهار 1 جويلية و على حسب علمي نهار 1 جويلية هو النهار اللي كان مخصص للحجب و للصنصرة مش نهار 2 جويلية و بالتالي أنا ما خرجتش على الصف. ظاهر فيك عندك مشكلة مع التواريخ و الأيامات سي نون إمّالا باش أرابيش يا أرابيش

بالنسبة للاستفزاز، و الله ما ريتو هالاستفزاز وين....أنا كتبت موضوع عادي حبيت نكتب فيه من قبل و الشيء اللي حكيت عليه هو ظاهرة اجتماعية انشوفو فيها كل يوم

مافهمتاش أعلاش ديما اتشدو في القشور: هاو استفزاز...هاو اسم مقال....و في بلاصة تناقشوا ألأفكار و إلا تعطيو أمثلة و إلا تطرحوا حلول، بالعكس، تقوموا اتسبوا و تصيحوا و تعيطوا...

باش انرتحك انت و الجماعة الكل، راهو دمي بارد برشا برشا برشا. و كان تهبط السما على الأرض ما انبدّلش طبيعتي و راني باش نقعد نكتب بنفس المنوال و بنفس الطريقة لأني مقتنع بالكلام اللي انقول فيه و الشيء اللي نعمل فيه و إذا فمة واحد من المدونين ماشي في بالوا اللي أنا نهتم برشا بأرائكم و تعليقاتكم، راهو غالط ألف في المائة

فرانشمون؟ زايد. تضيعو في وقتكم معايا على خاطر مهما عملتو مهما قلتو، أنا مانيش باش ناخذ بكلاكم و مهما اتقال و مهما فمة شكون يسب، انحب انقولو راهو أنا حتى شعرة ما تتهزلي و راكم اتطلعوا في الدم لرواحكم في حين أنانقعد شايخ على التعليقات و المقالات

brastos a dit…

واحد :كلمة "ارابيش" كي تتقالّي من طرف شخص من امّه اخرى متفوّقة عليّ ، و يكون عنصري ابا عن جد .. نتفهّمها .. رغم اني ما نقبلهاش . اما كيف تتقالّي من طرف واحد عندو انبتات مرضي و عزلة اجتماعية و نفسية كيفك .. ما نّجّم كان نحطّها في سياق الوبنه الذّهنية

اثنين : حملة التنديد بالحجب متواصلة لمدة اسبوع كيما اقترحو برشه مدونين (بالطبيعه نحكي على المدونين التوانسه موش لبنانيين) ـ

ثلاثه : النقاش معاك ما يروقليش برشه
و لذلك
full stop

Legend Of The Fall a dit…

@brastos: لا عاد مش هكّا. فيساع فيساع ما هزّيت الراية البضا و سمعت كلامي و فول ستوب؟؟؟؟؟ راهو الانسان اللي يبدى مقتنع بالشيء اللي يعمل فيه، يواصل فيه للنهاية و يضرب على الفكرة متاعو

بالنسبة لحملة ضد الحجب و تواصلها لمدة أسبوع ما نكذبش أعليك ما فيباليش بيها. ماشي في بالي اللي الحملة خاصة بنهار برك

بالنسبة لكلمة "أرابيش"...لأنو الواقع. علاش اتحبوا اتغطيو عين الشمس بالغربال؟؟؟؟ صحيح اللي فمة أمم أخرى اكثر تخلّف منا لكن أحنا اليوم في عالمنا العربي و بصفة خاصة في بعض الدول العربية اللي منهم تونس، بعض المظاهر الغير حضارية أصبح مش من المسموح بيه القبول بيها. و اللي هي مظاهر تتكرر في مجتمعاتنا العربية. ما نعرفش إذا إنت سافرت و إلا لا، و لكن في العديد من الدول المتقدمة وصلو لنسبة من التحضر اللي ما انجموش احنا نتصوروها. زعمة هوما لهالدرجة خير منا؟؟؟؟ يا ذنوبي

بالنسبة لوصفك لي بالانبتات و العزلة و غيرو...والله أنا لتوا مافهتاش حاجة و ماعينيش لامحالة نفهمها لأنو لا عندي الوقت و لا عندي الجهد باش نتلها بيها، هي أعلاش كل ما تختلفو مع شخص و اراؤو إلا و اتهاجموا شخصو و شخصيتو و انتوما ما تعرفوش هالشخص بالمرة أو معرفتكم بيه سطحية؟؟؟؟؟؟ ربي يهدي ما خلق