mardi 18 août 2009

اســـتنطاق سـُـرعـــُــوفـَـه

وقت اللي حطّيت ايدي على الانترّبتور باش نشعّــل الضّوء .. حســّـيت ايدي تحطّت فوق حاجة اخرى ، اللي هيّ هاذي .






إسمها بالعربية الفصحى يضحّك شويّه : سـُـرعــُـوفه

Tiens … voilà encore une mante religieuse qui veut empêcher la lumière


المرجعية الدينية اللي في إسمها راجعة للحركة اللي تعملها بإيديها وقت اللي تبدا باش تصيّد ، و اللي هيّ حركه تشبّه للحركات متاع التضرّع اللي تتعمل أثناء الصلاة في بعض الاديان


اما انا شخت على الصدفه اللي جمعت التسمية متاعها المأخوذه من الدين ، و بين انّها منعتني باش نشعّل الضّو :) ـ

الحشرة هاذي تظهرلي هكّه عندها كاريزم خاص .. من خزرتها و تلفيتتها و ثقتها .. تحسّسك اللي هي ديمه حاضرة .. و ايّاك تحدّثك نفسك بالإساءة ليها .



مثلا ، و بالمقارنه مع الحشرات المحيطة بينا : نحل .. كافار .. ذبّان.. جراد.. فراشات .. الخ ... ، و اللي الكلّهم يتحرّكو ببدنهم الكل ، هي من الحشرات القليله اللي تنجّم تحرّك راسها بمعزل على بدنها .. تتلفّتلك .. و تخزرلك على جنب .. و تبدا تكيّل فيك ملفوق اللوطه.

شوفو كيفاش تتلفّتلي



حاصيلو .. بعد ما جبت المصوّرة و عملت اللازم .. حطّيتها في قرطاس

و خرّجت رجّعتها لمحيطها الطبيعي : الاشجار





لانّها اكيد ضايعه ، سينون ، اش عندها ما تعمل فوق انترّبتور متاع ضو ؟؟

باش تمنع النــّور زعمه ؟؟؟

ما نتصوّرش .. على خاطر فمّه حشرات بشرية أخرى مضطلعه بهالمهمّة هاذي على أكمل وجه .

أطرف معلومــه عندي على الحشرة هاذي انّها بعد انتهاء عملية التناسل ، الانثى تقتل الذّكر بعد ما تقصّلو راسو و تلتهمو . و موش هاذا اكاهو ، الأطرف و الأغرب انّها ، وفي غالبية الحالات ، هاذيكه هي المرة الأولى و الأخيرة اللي يتناسل فيها الذّكر مع الأنثى متاعو .. يعني الاورقازم الوحيد اللي يعيشو .. يموت فيه .

تقلّي انت ، و هوّ سيادتو وينو حتّى هي تنجّم تعمل هاذا الكل ؟؟ نقلّك اللي هوّ وقتها ماهوش داري بحتى شي على خاطر هيّ و راه/فوقو .. بحكم انّو عضوو التناسلي في ظهرو .. يعني ما ينجّمو يتناسلو الا ما تجي هيّ فوقو و الا وراه ، ممّا يخلّيها هي متحكّمه اكثر فيه في اللحظه هاذيكه .

تقلّي و علاش هاذا الكلّ ؟؟ نقلّك ما نعرفش ، يمكن استكمالا للذّه ، و الا انتقاما لشرفها :) و الا ثأرا لبني جنسها من الاناث مما قد يكنّ قد تعرّضن له من قهر و عبودية عبر تاريخهنّ السرعوفي الطّويل :) ـ

على فكرة ظاهرة قتل الذكر بعد عملية التناسل ماهيش مقصورة على السرعوفه فقط ، تلقاها زاده عند الارملة السوداء .. بالطبيعه الحكايه عندها تفسيرها العلمي أكيد ، اما انا نحبّ نعطيها تفسيري الخاص ، و كأنّها تحبّ تقلّو : شوف ، إذا كان تتصوّر روحك خذيت منّي اللي حاجتك بيه و مشيت متهنّي ، راهو يبطى شويّه ..ياخي باش باش نغذّيهم انا هالميات عضمه اللي خلّيتهملي في أحشائي ؟؟ قدّاش منّي آنا ؟؟ حتّى انت راك بوهم ، و يلزمك تضحّي بحياتك من أجلهم .. إيجا هنا .

و حتّى لو باش ندخّلو حديث في حديث ، الحكاية هاذي متاع انتقام الذّكر و الانثي من بعضهم بعد اتمام عملية التناسل ، تحيلني على برشه سلوكات عندنا احنا معشر البني آدمين.

المرأة التقليدية المتتلمذه مليح على جدّايتها و عمّتها و خالتها .. بمجرّد ما تتزوّج ، و تشعر انّها حصلت على اهمّ حاجة في حياتها : الراجل ، تولّي تــقتلو ، اما موش بالـْـــتـِـهام رأسو ، و إنّما بالبرود العاطفي .. و بالكوجينه ..و بالرّوتين .. و بإدمان المسلسلات .

و الشّي من بعضو راهو .. حتّى عمّك الراجل التقليدي .. بمجرّد اتمام العملية الجنسية/الواجب الزوجي/إثبات الفحوله/و تأكيد السيطرة .. مع المـْـرا ، يقتلها .. اما زاده يقتلها بنوع آخر .. يقتلها وقت اللي يعطيها بظهرو بكل جفاف .. و من غير ما يكون متاكّد هل انّها تمتّعت معاه كيما يلزم و الا لا .. و يقتلها داخلو بعد ما يصيبو نوع من القرف و الكره ليها ، كره ناتج على ما ترسّب فيه من ثقافة الجنس=الخطيئه / الجنس=الإغـــواء/ الجنس=الطّرد من الجنّة / الجنس= السقوط في الرذيله/ الجنس=الشعور بالذنب/ الجنس=النّدم/ الجنس=كره الشريك ... الشّريك المتسبّب في هاذا الكلّ : الــمـْرا

حكاية القتل بعد التناسل متاع هالنوع من الحشرات ، ذكــّرتني زاده في فيلم كنت تفرّجت عليه من مدّة طويلة ،عنوانو : ماتادور.. باختصار على مصارع ثيران ما تكتمل لذّتو الجنسية الا بقتل شريكتو . بالنسبة ليه ، الحياة ، بعد اللذه القصوى هاذيكه ، لا معنى لها .. و صادف انّو تعرّف على فتاة تشاركو الفكرة هاذي ، و عندها رغبة انّها تموت في اللحظه هاذيكه ، و لكم ان تتصوّرو النهاية... الفيلم يوفى هكّه





نرجع للسرعوفة ..الضيفه متاعي

من بعد ما حطّيتها في الشجر .. لقيتها في العشيّه في الوضعية هاذي


نصف جثّه .. بدون رأس .. ملقاة أرضا .. تنهشها جحافل النمل .. مـمّا خلاني نتأكّد اللي هو ذكـــر .. وقع قتلو و الــْــتهام رأسو بعد ما استسلم لأنثاه .. و عاش معاها اعلى درجات الحبّ .

يبدو أنّو وقت اللي جاني للدار في الصباح هاذاكه .. ماكانش ضايع كيما تهيـّألي ، بالعكس .. كان عارف روحو اش يعمل .. كان هارب من حُـبـّــُـو/حــَـتـْـفــُــو .. اللي هزّيتو أنا ليه .. بايديّا


****


تحيين


وقع حذف بعض الفقرات لاسباب خاصة

23 commentaires:

Voltairien a dit…

bravo
très joli texte !

brastos a dit…

merci voltairien

tout le plaisir est à moi .. marhbè bik

:)

عياش مالمرسى a dit…

J'ai aimé l'analogie entre la mante et les humains, toujorus aussi excellent Brastos!

Voltairien a dit…

une "amante" religieuse...

brastos a dit…

ahla ayech

deja
في الويكيبيديا لقيتهم حاكين عليه الفيلم .. و مشبّهين المرا هاذيكه بالحشرة هاذي


هنا


http://fr.wikipedia.org/wiki/Matador_(film)

brastos a dit…

voltairian


alors en fin de compte .. la mante .. n'est qu'une amante .. :)

ferrrrr a dit…

يا براسطوس، علاش ما عطيتوش اللجوء الزوجي الراجل السرعوف، هارب عندك بالروح وانتي ترجعو روفولي للدكتاتورية حتى كلاها في عظامو المسكين

brastos a dit…

فررررر

هههههههه

انا فيبالي انّور فيه .. و نسهّلّو في طريقو ..

"نهاية سرعوف هرّاب"ـ


هههه


على وزن "نهاية رجل شجاع"ـ

ART.ticuler a dit…

وأنا نقرا في أول التدوينة تذكرت الفيلم ماتادور ..بعد لقيتك حكيت عليه والحقيقة كنت متوقع ذلك :-)
إن لم تشاهد الفيلم الوثائقي ميكروكسموس فلتفعل ذلك في أقرب فرصة !

brastos a dit…

اهلا ارت

هاني عملت تحيين و زدت عملت الرابط متاع حكاية الفيلم في ويكيبيديا

شكرا على الفيلم اللي باش نعمل جهدي ونشوفو ... اكيد

Dovitch a dit…

Un beau texte avec une touche magique de romantisme, de poésie et de tragédie.
J'aime bien le suspens entretenu tout au long de la lecture et surtout la chute à la fin de tes textes.
Du bon Brastos ... bravo

elaroui a dit…

يعطيك الصحة نص فنان

Sonya a dit…

عملت 66 كيف و انا نقرالك يا براستوس
يعطيك الصحّة 

brastos a dit…

@ dovitsh

merci l'ami :)

brastos a dit…

@ el eraoui

مرحبا بيك .. و مبروك المدوّنه الجديدة .. نشالّه ما يقولوش اللي انا مولاها بلاكه .. ههه .. خاطر هالنهارين فمّه صولد في التّهم من النوع عاذا

شكرا .. الدار دارك

brastos a dit…

@ sonyaaaaaaaaa

تي وينك ؟؟؟ ..

ça fait longtemps .. merci

شكرا على الزيارة .. و زاده على حاجة عندي مديدة حابب نشكرك عليها .. موقف أخر باهي وقفتو معايا .. الف شكر

ojo a dit…

Brastos,
vraiment 3melt jaw wena nakra fil blog mte3ik.. ya3tik issa77a..
haja barka yilzimni nkoulhelik, ma ta3milch kar lil houthela illi ka3da titsakka3 hel ayyamet, we y7ibbou yraj3ouna 1400 3am il teli..
barra imchi we khalli il kelb tenba7..

تيمور a dit…

قمة في الإبداع يا فنان يا عظيم
لكن أظن ان ليك يدا في الجريمة
و سوف يقع اتهامك يا وغد
يا قاتل الحشرات
يا بيف باف

mahéva a dit…

منذ فترة وهذه المدونة تستنطق. ابتدأت باستنطاق السلط عما يحدث مع مناضلي الحوض المنجمي ثم باستنطاق الساهرين على حفل مرسال خليفة في قفصة ثم مدمري الطفولة البريئة ثم القائمين بعمل عمار في الفضاء التدويني ثم هذه السرعوفة التي لم أحض من قبل في التعرف على اسمها.

وبصراحة جعلتني أتمنى أن أكون أحد الشهود الحاضرين على هذه المحاكمات. شكرا براستوس

subjectif a dit…

bravo c'est exellent

brastos a dit…

@ ojo

merci .. c'est exactement ce que je suis en train de faire

إذا فمّه شكون يتصوّر اللي الاستفزازات هاذيكه تحرّكلي شعرة .. راهو يتعّب في روحو

مرحبا






@ تيمور
ميسالش ..كي قتلتو و هو قاعد يحبّ .. يبقى يدعيلي بالخير طول حياتو .. لا عاد .. ههه .. نقصد طول مماتو

:)




@ maheva
يعيّشك ماهيفا .. اخجلني هذا الجرد اللي عملتو .. و اللي يبيّن اهتمامك بما انا بصدد خربشته هنا .. مرحبا بيك ديمه




@ subjectif
merci .. marhbè bik

fellag a dit…

personne n'a pris la paine de lire la wiki ?

Baihi yé sidi haw aich y9oulou :

"Contrairement à une idée reçue, le cannibalisme lors de l'accouplement n'est cependant pas essentiel pour que la femelle dispose des ressources protéïques nécessaires pour porter les œufs "

et j'ajoute que d'apres les documentaires que j'ai vu et aussi les observations d'accouplement de mante religieuse , l'acte de cannibalisme n'a lieu que si la femelle ne trouve pas de nourriture et ceci est generalement du o faite qu'elle ne se trouve pas dans son milieu naturel , puisque dans celui ci se trouV tout ces besoins et c'est a cause des observation en labo et en d'autre milieux ( votre jardin ici par exemple ) que cette idée est née ! c'est just qu'elle a besoin de manger du n'importe quoi .

petit plus , on l'apelle aussi :

fraS innibi - فرس النبي

aussi

5anné9T idjéj - خناڨة الدجاج

et meme "NéGiT 5wéli"

sinon merci pour le poste ^^ j'aime bien le style et surtout le passage entre les histoire et plus que tout la Fin :)) merci

brastos a dit…

@ felleg

merci pour ton intervention .. le nom le plus répandu chez moi (en arabe)est : neguit 5wéli :)

la wiki aussi dit aussi qu'elle peut ne pas dévorer son mâle durant les fois ou il ne lui transmet pas de spermatozoïdes durant son accouplement

on dit aussi que le mâle continue à lui faire passer les spermatozoïdes même après être dévorée

et que c'est pas tout :) .. y a des tributs africaines qui croient que cet insecte est saint .. et que sa visite indique la grossesse d'une femme dans cette maison

merci encore