vendredi 31 octobre 2008

محلاها الحـَـياة .. مع بابـّـِـيـّــُـــون

ساعه ساعه .. نبدا هكّه نقول بيني بين روحي : ياخي شبيها مواضيع المدونه الكل متاع واحد ما عاجبو شَــيْ ؟ نهار الكل و هو شادّ المسهولين و يقطّع و يريّش فيهم تقولش قاتلينلو البدري ؟ نهار الكل و هو يخرنن ، هاو فلان قتلوه على خاطر طيقر من البطالة و خرج يطالب بحقّو في الشغل ، هاو فلان عامل اضراب جوع خاطرمسحّتينو من خدمتو قال شنوّة هاو هااااك العام شارك في اضراب قانوني ،هاو فلان حجبولو مدوّنتو ، و يلزمنا نتضامنو معاه على خاطر ينجّم يجي عليك انت الدور من غدوه و تتحجبلك مدونتك ، على حد قول فنانتنا صليحة : "و اللي جْــرى عْـلى الناس يجرَى عْـلـَـيّ" .. و على ذكر صليحه ، باللاهي نستأذنكم واسمحولي ، وحتى كان ما سمحتوليش :):) خليني نفتح قوسين هنا حتّى و لو بعــيد على الموضوع .. اما حابب نقولهم و هوما ما يستاهلوش تدوينه خاصة ، سمعت اللي باش يعملولنا مسلسل خاص على حياة الفنانه الراحلة صليحة ، زعمه زعمه كيما المصاروى و المشارقة عموما كي عملو على ام كلثوم و اسمهان .. براس والديكم اتلهوا في حاجات اهم إعلاميّا و ثقافيّا ، و اخطوها هاك المرا خلّوها رايضة و مرتاحة في قبرها ، و خلّي صوتها يبقى في مسامعنا حنيّن و صافي و دافي و جبالي و يوحي ببساطة مولاتو ، اللي حتى ولو عاشت احداث درامية في حياتها ، راهي تفرضت عليها فرضان ، و مسكينه ما كانتش فاعلة في حتى شى الا في الغنا
عاد
قلت يابراستوس ، علاش ما تعملش ربي في بالك ، و تنظر للنصف المليان من الكاس ، و تنحي هالاهتمام المبالغ فيه بالتجاوزات و الانحرافات و التعدّيات و الانتهاكات ، و يزّي من الشمايت و التّسبيب
ياخي كي بعد قدّااااااش تاقع غلطه ، ما يجيش منك العقل ؟ سايـّـي ؟ تقطعت الرحمه من قلبك ؟؟ ياخي على خاطر عون امن على اعصابو شويّ ، ينجم يكون جيعان نهارتها ، ما كلاش حصّتو الكافية من القــُـرْط و السّدّاري ، مما اثّر على حالتو النفسية ، و خلّاه يغلط و من غير إرادتو قتل مواطن و الا اثنين و الا ثلاثه في مظاهرة . وفات الدنيا ؟؟؟ـ

مازالت البلاد معبّيه بالمواطنين الاحياء راهو

ما ماتوش الكل راهم ، شويّه تفاؤل يعيّشك
و الا على خاطر استاذ طرّدوه من خدمتو قال شنوه هاو هاااك العام شارك في اضراب قطاعي شرعي و قانوني ، تقوم انت تتنرفز ؟؟ تهاوينهم بقية الاساتذة يخدمو ، ياخي هوما الاساتذه الكل وقع طردهم ؟؟؟ باش انت تاخذ على خاطرك ، ايّ .. صلــّي عالنّبي .. و قول محلاها الحياة مع بابـيـّـــون .. و منّا و هكّه يلزمك تغيّر مواضيعك .. و تحكي على المواضيع المشرفّة اللي تنوّرلنا وجوهنا في المحافل الدولية
علاش مثلا ما تكتبش على الوزير الفولاني اللي بسـْـلامتو ، شدّوه بشـْلامتو سارق ، و حقّقّو معاه ، و حاكموه ، و طبّقو عليه القانون كيفو كيف ايّ مواطن مخالف
علاش ما تكتبش على النقاشات العنيفة و الحادة اللي تسود اجواء المجالس النيابية ، و يتم فيها تبادل التهم و حتى الشتائم بكل شفافية
علاش ما تكتبش على مواطن مثلا دخل لرئيس البلدية و سخسخو على خاطر الاعوان ينظّفولو كان قدّام دارو هو ّ ، و ما ياقع تصليح الفوانيس العمومية الفاسده الا كي تبدا في حيّو هوّ والا...والا...ـ
كي تلوّج تلقى راو
ايّه سيدي انا هكاكه في غمرة فرحة الحياة مع بابيـّون ، و بديت نبتسم انها تونس ، و بديت نخزر للدنيا من جانبها الوردي ، و بديت انّظّف في سـَـريـرْتي من الحقد الاعمى ، و الضغينه و الشماته ، و بديت نندم على كل كلمة جارحة صدرت منّي تجاه هالرّجالات الافذاذ ، و البــَـرَرَرَرَرَهْ ، اللي ما انفكّو يشملونا بعطفهم الخاص ، و يوليونا بعنايتهم الشخصية و لفتاتهم الكريمه
و حسّيت براحة نفسية كبيرة ، كيما نشوف عندكم ، ما ثمّاش احلى من التوبه النصوح ، يكذب عليك
ينعلك يا شيطان
و زعمه بديت نفكّر باش نرجع نقرا مدوّنتي من الاوّل ، و تعاليقي في المدونات الاخرى ، و نراجعها ، و نحذف منها التعاليق الجارحة ، الطايشة ، و نردّها مدونه منسجمه مع هالنور اللي قذفه الله في صدري .. هالنور متاع التسامح .. و التجاوز .. و اللـّــُحمه ، و بداية صفحة جديده مع عمايل المساهيل و المسهولين
وحطيت السي دي متاع غنّاية "معــًا .. معـًا من أجل توووونس معـًا ..ترااراراراارار" و بديت نسمع فيه و نتذوّق في معانيه لأوّل مره ، و انا نادم على الايّامات اللي تعدّوا من عمري من غير ما نسمع ــ بصفة ارادية ــ هالغناية المؤثّرة
بربّي تمعّنو معايا في هالكلمات العميقة ، و هاللحن الثوري : " معــًا .. معـًا من أجل توووونس معـًا ..ترااراراراارار"ـ
الللاااااااه ...ـ
انا هكّاكه ، و التاليفون ينوقس ، في الحقيقه ما حبيتش نجاوب ، خاطرني منسجم مع الغنّايه ، امّا كي لقيتو فلان ، جاوبتو
بين قوسين ، فلان هاذا عامل عامين علم نفس في الجامعة ، و اضطرّاتو ظروف باش يدخل للوظيفه العمومية ، و وين ؟؟؟ في البلدية :) :) :) اما مسكين مازال من هاك النوع المطيقر من كلّ شي ، و مازال مل ذاقش لذّة الحياة مع بابـّـيــّــون :)ـ
ــ وي .. اهلا بالكلوشار .. سافا ؟؟ـ
ــ اهلا .. وينك ؟ اسمع .. حبيت نشنّفلك الآذان متاعك بمعلومه فيها رقم باش تشيخ عليه ، 220 مليون باش تتصب في الكونت متاع البلدية متاعنا ، خاصّة بهاك الاحتفالات
البلدية هاذي من البلديات اللي تحت المتوسطه ، و ـ(متوسّطه هنا بالمعنى المتعارف عليه ، يعني في بلاد ماهيش كبيره و ماهيش صغيرة )ـ
ــ يزّي بلا تمنييك ، تآنا مازلت كي بديت نشيخ مع النّص المليان متاع الكاس ، و انت تقلّي 220 مليون .. و احتفالات ؟؟؟ـ
ــ آمــا كاس ؟؟؟ قاعد تشرب انت توّا ؟؟ .. نجـــي ؟؟؟ :) ؟؟؟ـ
ــ وين تجي ؟؟؟ شدّ بلاصتك .. نقصد انّي ولّيت متفائل و ما عادش نخزر كان للنص الفارغ من الكاس .. يا فلان ، يا خويا ،ما نعرفش هكّه كيفاش رجعلي شاهــد العقل ، و قلت ياخي علاش ما نولّوش عاقــلين ، و محــلانا ، و نـسـْـتـَـعـْـلـْـشــُــــو، و نخرّجو الصّوف في عوض الشعر ، و نبعبعو في عوض نتكلّمو ، و نززّو في عوض نحجــّــمو ؟؟؟ و حتّى كي ننقدو ، ننقدو نقد وخيّان و تبدا وجوهنا حمرا من الحشمه من المسهول اللي ننقدو فيه ؟؟؟ـ
ــ يا بشر ْ .... راهي 220 مليون ، في بلدية بـِـيدُونــَه ، مّاله البلدية الفلتانية قدّاش يصبّولها
ــ انت حقود
ــ احسب 81 بلدية في معدّل 250 مليون
ـ(رغم انّي نتصوّر بلاد البابيّون فيها اكثر من 81 بلدية موش كيما قال هوّ ...)ـ
ــ انت عنصر مشاغب
ــ راهو اكثر من 20 مليار دهن و سيرفاسار و قماشات و علامات و كتيبة لافتات و لوح و تزيين و بقلاوه و امبولات و منصّات و لوح و مكاتب (مكاتب : جمع مكتوب/جيب ، موش جمع مكتب / بيرو) ـ
ــ تحت آنا عنوان هالمبالغ باش تتصب ؟ يا عدوّ البابــيــّـــون
ــ تحت عنوان "التنميه" .. ماو تعرف ، الفلوس اللي تتصب بعنوان "التنميه" ، اكثر اهمية من الفلوس الاخرى متاع ما يسمّى " المصاريف الاعتيادية "ـ
مصاريف "التنمية" تشمل الاناره العمومية ، صيانة المنشآت الرياضية و الثقافية ، الخ ... الخ ... و زادا ، السرفاسار و اللّوح و القماش متاع كرّوسة العروسه ، و من اهمّيتها ، انّو المسؤول البلدي الكبير ، القابض و الا اللي هوّ ، مسموحلو باش يدخل في الروج على حسابها ، قبل ما يصبّوها ، على خاطرها جايّه جايّه ، بل يمكن يتعاقب كي ما يدخلش في الرّوج على حسابها

السيد ماهوش يبالغ ، و ماهوش يزيد ، الرقم قدّامو ، و مهما كان الرقم ضخم و الا ضئيل ، على خاطر المسألة نسبية هنا ، اللي يعتبر ضخم للجهة هاذي ، هو ضئيل بالنسبة للجهة الاخرى ، و العكس بالعكس ، الا انّو اكيد انّو الناس ماهيش شبعانة و محققة جميع توازناتها ، و متمتعين بجميع حقوقهم الاساسية ، و ما عادش ثمّه وين تتحط الفلوس الا في شويّة الجراتل و الدرابل متاع بوسعديّة اللي ينفخوهملنا بيهم كلّ خريف

تلفّت لهاك الكاس اللي كان منذ لحظات نصّو مليان ، و سبحان مغيّر الاحوال ، لقيتو ولّى نصّو فارغ .. فارغ كيما ايّامنا .. و ليالينا .. و صباحاتنا ..و عشيّاتنا .. و تلافزنا .. و مسارحنا .. و جرايدنا .. و كوادرنا .. و شوارعنا .. و تواريخنا

و نحّيت السّي دي متاع "معـًـا .. معـًـا من اجل تووووونس معـًـا .. تررا تررراتتراا ترا"ـ

و حطّيت سي دي آخر بعد ما نفضتو من الغبرة

دار الفلك من بعد طول العــِـشـــرة

و الدّهر حال بحال .. مرّه بمـــرّه

7 commentaires:

أرابيـكا a dit…

تي هاو ماهواش حال بحال الدهر عندو 21 سنة ما يسكر كان من هنا هههههههههه سامحنوى اصحاب النفوس الرقيقة الله غالب تابعة الاحتفالات هذى صحة ليك براستوس ما شفتش اللافتاتووو ترفرفووووو ومكتوب فيها "صيحة فزع " ...عمال وعاملا معمل الكذاا يناشدون سيادة الاخر هاذاكا للترشح " وراس بيغ تراب بوى بالحق ههههههههههه بالمناسبة عندنا خصة في قلب البلاد كل ما يجى رئيس بلدية يكسرها ويعمل وحدة جديدة ويكتبو لافتة فيها الخصة تكلفت 350 الف دينار في بلاد الماء يا بوقلب هههههه لين ولينا نقولو ما خص المشنوق كان خصة البلدية :))) اى هانى طولت انا هنا

Anonyme a dit…

مادام الكاس نصف فارغ و نصف معبّي مازال برشة أمل ...في بلاد البابيون

brastos a dit…

@ arab
ههههههههه
ياخي كي ما تطوّلش هنا ، عندك بلاصه اخرى تنجّم تطوّل فيها ؟؟؟؟
هههههههه



@ anonyme
يظهرلي الكاس ما ثماش جمله

eddou3aji a dit…

هاذي حكاية غولة هههههه قالّو كاس قالّو نجي ؟ ههههههه و شبيه عون الأمن بقرونو؟؟ هههههه لا لا تكذبي إنّي رأيتكما معًا .............معًا معًا من أجل تونس ههههه

ART.ticuler a dit…

الكأس موجودة و معبية زادة.......................أما مانيش باش نقلك باش معبية هههه!

jaccuze a dit…

وكان ديمه يقوللنا زاده......
الكأس راهو لازم يجيه نهار ويفيّع...الله يرحمو

brastos a dit…

@ eddou3aji

ههههههه
قالّو نجي ..هههه
ما صدّق سمع كلمة كاس
هههه
راني نستنّى في الريبريك اللي بعد جالغ
هههههه




@art ticuler
اش خصّ لوكان تكون معبّيه بـ:"اش يقولولو" ... هههههه
وقتها نولّي نشوف كان للنصّ الفارغ .. باش نمليه
ههههه


@ jaccuZe
خويا .. بربّي خلّيني نسمع نتايج الـجي سي سي
JCC
و من بعد اقتلني
ميسالش .. هيّ موته وحده .. موته وحده :)