كلام آخر .. في الحجب

تراوحت حملة "ضد الحجب" بين الشعارات العامة و بين الاندفاعات و بين شويّة اسئلة عميقة و هادئة و تحبّ تقدّم بأشكال التنديد بالحجب و تخرّج هالتقليد من دائرة النمطية السلبية

ثمّه شكون شاف اللي الاهم من الشعار الوجداني الحماسي الخطابي التحريضي هو التفكير في "عقلنة الحجب" يعني ، وهاذا حسب اللي فهمتو من اصحاب الفكرة هاذي ، اللي احنا ماناش ضدّ الحجب في المطلق ، لكن نطالبو بموافاتنا بالخلفية اللي يتمّ على اساسها ، و الخلفية هاذي يشوفو اصحاب الفكرة هاذي اللي يلزمها تكون "معقلنه" ـ

كلام معقول و يحمل في طيّاتو نية إيجابية للخروج من دائرة الاحتجاجية الوجدانية اللي ما تقدّمش بديل ، و الا ترفض لاجل الرفض و الا تخرنن من غير ما تقترح ما خير

اما ، مع الاسف ، ديمه نلقو ارواحنا في زنقه مسكّرة ، خاصة وقت اللي نحطّو الامور في سياقاتها الصحيحه ، يعني وقت اللي نخرّجو التنديد بالحجب من الاحتجاج ضدّ مجرّد مقصّ افتراضي ، الى النظر في سيستام كامل يعمل على تابيد ذاتو عبر طمس الآخر .. ايّ أخر .. سياسي ، ثقافي ...الخ

فـَ هالمقص الافتراضي ماهوش معزول على سلوكات اخرى شبيهة يمليها نفس السيستام : ملاحقة النشيطين الحقوقيين ، التضييق على ايّ نفس ديمقراطي ، الحدّ من حرية الصحافة ، الانفراد بالمنابر الاعلامية ...الخ...الخ... يعني هنا انا شخصيا ما تستقيمليش الامور وقت اللي نطالب تشريكي في عملية حجب معقلنة ، من سيستام هو في داخلو مشوّه ، مهستر ، مهوس بالسلطة ، مكلوب ، مسكون فقط بهاجس واحد و وحيد : مزيد إحكام القبضة على الامور عبر بسط النفوذ بشكل اخطبوطي على كل مصادر الثروة ، و هنا بالضبط تضيع الدساتير و تتلاشى القوانين

وين هيّ الاطراف 'الاخرى" اللي من المفروض تكون فاعلة في تقرير الحجب ؟ و وين هيّ فاعليّتها في ما هوّ اهمّ من تقنين و عقلنة الحجب ، لانّو حبينا و الا كرهنا ،" حق الابحار الافتراضي " ماهوش اهمّ من حقوق اكثر الحاحية للناس المحرومين من اساسيات الحياة ، يعني تبدولي الصورة عرجاء شويّة وقت اللي نشاط المنظمات و الجمعيات الحقوقية مُصادَر ، بل يكاد يكون معدوم ، معارضة شكلية و"اكثر ملكية من الملك" و في جانب منها : مرتزقه ، المنابر الجامعية و النقابية و غيرها من المجالات اللي كانت يمكن تكون متنفس ، تمّ تسطيحها و تبهيمها و بقرطتها .. مع هاذا الكل ، وين بقالنا باش نبسطوه على ارض الواقع هالحلم الوردي الجميل متاع ارساء سلوك "تشاوري" و تشريك كافة "الاطراف" في اخضاع الحجب الالكتروني الى الدساتير و القوانين

احيانا ، الواحد يحاول يكون اكثر عملية و اكثر نجاعه ، يلقى ايديه و ساقيه محشوشين

طيّب ، واحد من الاصدقاء قال يزّينا من انّو التنديد بالحجب ولّى كيما الاعياد ، و فقد بريقو و فقد اثارتو ، و لابدّ من تطويرو و الارتقاء باساليبنا و بطرقنا و لغتنا و الياتنا

صحيح

اما كيفاش ؟ :) و الحاله كيما حكيت لفوق شويّه .. يعني ببساطة ، انا نشوف في زوز حاجات ممكنين ، و اذا كان ثمّه حاجه ثالثه ، راهي فــْـلـُـو .. باهته و ماهيش باينتلي مليح : يا تهرّي صوابعك عالكلافيي و تنقب عينيك بالتنديد بالحجب ، يا تخرج لبرّة تصيح و تهزّ لافتة ، مكتوب فيها : لا للحجب" .. و في الحالة الثانية ، نتخيّل انّو البوليس ما يمسّكش ، خاطر الطريحة باش تاكلها من البطـّاله و الجواعى و المهمّشين ، اللي متوسّمين فيك الخير اكثر من هكّاكه

يعني .. ماهيش فقط حكاية حجب

سيستام متعفّن .. و مقصّ عمار ماهو الا دوده صغيييرة فيه

فمّه نبرة متاع عدميّة سيطرت عليّ في التدوينه و ما حبّيتش نقاومها

اما ما نعرفش عاد ، هالعدميّة مفادها انّو

راهو ما عندنا مانعملو اكثر من هكّه

و الا

راهو اللي يلزمنا نعملوه : اكثر بياااااسر من هكّه