تراثنا .. بين التنوير و التكفير ، القرامطه نموذجا

عكس ما تحبّ تأكّدو المدونه التاريخية الاسلامية الرسمية ، من انّو تاريخ الدوله/الخلافه الاسلامية لم يكن سوى تاريخ النور و العدل و السماحه و الهدوء الاجتماعي و الطمأنينه ، بشكل اصبح فيه الخليفه او الامير ، بعد ما يسري على جواريه الكل و إماؤو ، و يمكن غلمانو ، يخرج للبلاط باش يلقى ناس ساجدتلو و تبارك في أوامرو اللي هو مستقيها "من "الله"ـ

قلت على عكس هاذا ،وألاللyyh فإنّو المسكوت عليه في هالتراث زاخر بالانتفاضات و الحركات الرافضة رفض كلّي او جزئي ، لاستبداد الدوله الاسلامية سواء فكريا أو اجتماعيا/ اقتصاديا

بطبيعة الحال ، التعتيم هاذا ما ينجّمش يتمّ دون تشويه هالانتفاضات و إفراغها من محتوياتها الـ"دنيوية" و الاكتفاء بتضخيم الجانب التكفيري فيها و نعتها بالزندقه و الالحاد

هيّا ، مع بعضنا ، نحلّو هالباب المسكّر متاع الحركات المنتفضة ضدّ دولة الاسلام ، و نبربشو ، و ننفضو شويّه غبرة على تاريخنا .. و على ارواحنا

في الاطار هاذا ، نحبّ كل مرّه نتناول حركه و الا شخصية و الا تيار من اللي تسمّيهم المؤسسة الاسلامية الرسمية حركات "رافضه" و الا "زنادقه" و الا "باطنية" ÷

في التدوينه هاذي نحبّ نحكي شويّه على دولة القرامطة ، اللي نشات في القرن التاسع ميلادي ، (مابين الثالث و الرابع للهجرة) و كيما تعرفو اللي الفترة هاذيكه عرفت ابرز مظاهر تفكك الخلافه الاسلامية ، عقب استبداد الخلفاء و الولاة و الامراء بالسلطة ، و تنامي الفوارق الاجتماعية الفاحشه مما اوجد حالات من التمرّد السياسي و الاجتماعي على الحكام ،( ثورة الزنج نموذجا) ، و تمرّد فكري و فلسفي على المنظومه الفكرية لدولة الاسلام ، و تشكيك ، بل احيانا ضرب لقاعدتها الايديولوجية و مصادرها التشريعية ، مما يأكّد انّو الفقر و الجوع لا يعترفان بقداسة النصوص

حمدان بن الاشعث ، شــُهر : حمدان قرمط لانّو قصير ، سليل مذهب الاسماعيلية ، اللي هي من ابرز فرق الشيعة ، كان معروف بقوّة شخصيتو و قدرتو على المحاججه و الاقناع و كثرة علاقاتو ، يعني كيما نقولو توّ ، شخصيه كاريزماتيك ، هو مكوّن هالنواة الاولى للحركه الاحتجاجية ضدّ الدولة العباسية (ايام حكم المعتضد) ، اللي بدات تنتشر بالطّريّف بالطّريّف ، بشكل عسكري سرّي ، الى ان كوّنت دولة شاسعة ، انضمّلها عدد كبير من قبائل العرب ، اهمّها و ابرزها : بنو هلال ، و شملت كامل منطقة شرق دول الخليج توّ ، يعنى شرق السعودية و البحرين و الامارات و قطر و اليمن ... و سوريا و جنوب العراق .. و تعدّات لمصر و لشمال افريقيا ، تونس و المغرب .. و اللي كانت من اهم مبادئها : المساواة الاجتماعية ، شيوع ملكية الارض ، الجميع يعمل ، و الدولة تتدخّل في كل شيء ، و لا يحقّ للدوله جمع الضرائب الا بعد ان تكون مساهمة و مشاركة في الاعمال و في الانتاج، القضاء على الفقر، وجوب تساوي الناس في الاموال و الاراضي

و كانت ابرز مظاهر انتعاش دولة القرامطة في البحرين ، بقيادة ابو سعد الجنابي ، اللي الغى الملكية الخاصة ، و ساوى بين المواطنين في العمل و توزيع الثروة ، و تقول مصادر التاريخ انّو طوال فترة حكمو ، ما بناش جوامع ، و ما عملش خطب و صلوات جمعه تدعو و تهتف بحياة الامراء و الخلفاء ، الشي اللي كان معمول بيه في مساجد الدولة العباسية اللي كانوا القرامطه معادينها

تنجّمو تطّلعو في الموقع هاذا على ملامح و اثار دولة القرامطه في البحرين هنا

و كان وقود هالدولة المختلفة المحتجّه ، الناشئه من رحم دولة استبدادية ، هم الفئات الفقيرة من العبيد ، و الموالي ، و المزارعين الاجراء و الشباب ، يعني الاساس المادي لبنية المجتمع ، و هاذي يحيلنا على اكثر من استنتاج ، و هو انّ الحركه هاذي ما كانتش فقط ردّة فعل عفية مندفعه على تردّي اوضاع اجتماعية في الوقت هاذاكه ، بل كانت لا تخلو من ملامح المشروع السياسي /الاجتماعي المتكامل ، فمّه توجّه مدروس نحو تغييرو تثوير اواصر علاقات الانتاج الاقتصادية السائده و اللي كانت ورا تفاقم الفقر و الاضطهاد

و كيما قلت لفوق شويّه ، اللي القرامطه شافو انّو لابدّ لمشروعهم السياسي من تصوّر ايديولوجي مفاهيمي ، يكون متعارض مع المنظومه السائده ، حتى و لو كانت مقدّسه و تستمدّ في مشروعيتها من السماء ، و لذلك ، تقول مصادر التاريخ (الملل والنحل، للشهرستاني ، مثلا ) اللي قراءة القرامطه للنص القرآني كانت تتميز بإعمال العقل بلا حدّ ، من ذلك نظرتهم للعبادات ، اللي قالو انّها يمكن تسقط اذا نحن ادركنا اليقين ، بمعنى ، اذا انت ادركت معنى العباده ، سقط عنك فرضها ، و ارتكزو في ذلك على الاية التاليه : "واعبد ربّك حتّى يأتيك اليقين"ونتصوّر اللي هاذا ينجّم يكون من الارهاصات الاولى اللي انبنى عليها توجّه كامل داخل المنظومه الفقهية الاسلامية اسمو : فقه المقاصد

بالطبيعه ما كانش ممكن لحركه كيف هاذي انّها ما تتنصبلهاش محاكم دولة الاستبداد باسم الاله ، و ماكانش ممكن لموظّفي الخلافة من فقهاء و مفتيين ، انّهم ما يرميوهاش بالزندقه و الالحاد و الدهرية ، و يتنعتو بانّهم "مذهب ظاهره الرفض باطنه الكفر المحض" كيما قال فيهم ابو حامد الغزالي ، و الا يتحطّو في خانة "الرأي الفاسد" على حدّ قول ابن تيمية هنا

-..."والمقصود ان اولئك المبتدعة من اهل الكلام، لما فتحوا باب القياس الفاسد في العقليات، والتاويل الفاسد في السمعيات،صار ذلك دهليزًا للزنادقة الملحدين إلى ما هو اعظم من ذلك من السفسطة في العقليات، والقرمطة في السمعيات، وصار كل من زاد في ذلك شيئًا دعاه إلى ما هو شر منه،حتى انتهي الامر بالقرامطة إلى ابطال الشرائع المعلومة كلها، كما قال لهم رئيسهم بالشام‏:‏ قد اسقطنا عنكم العبادات، فلا صوم ولا صلاة ولا حج ولا زكاة‏.‏"..ـ

هاذا بالطبيعه فضلا عمّا لصّقوه فيهم من تهمة اشاعة النساء ، و التشجيع على" الشذوذ" و " الزنى" و "الفسق" و "الفساد" و "الانحلال" .. فقط لتغييب الروح الاحتجاجية ، و الهاؤ الناس عن البعد الدنيوي الاجتماعي اللي كانت تتضمّنو حركتهم و اللي كان يزعزع سلطة المقدّس

يعني تصوّرو حركه كاملة ، مأسسه مشروعها، و تقاتل في الاعداء و امتداداتها الجغراسياسية ، و مركّزه برنامجها و تكتيكاتها و استتراتيجياتها علاش ؟؟؟ على "الفسق" و "الفجور" ـ .. اللي هي التهمه الكلاسيكية التّيبيك اللي يترمى بيها كلّ مختلف يتوق للتحليق خارج سّرب الغربان .. غربان الامس و اليوم ، و قطيع النعاج .. نعاج الامس و اليوم

في الختام ، و من غير قراءات انتقائية للتاريخ ، و بعيدا على الاستنتاجات الماكرة ، و الاسقاطات الايديولوجية ، ضروري نفض الغبار على مثل هالتجارب و ضروري إضاءة هالأزقّة المظلمه في تاريخنا ، و دراستها علميا و تنزيلها تاريخيا عوض الاكتفاء ، بكل كسل ذهني، باطلاق التهم الاخلاقية التكفيرية على تجربة هامه كيف هاذي .. اللي انا شخصيا نتشرّف انّي نكون ســـليلها