أصل قناة ت7 هو شخصيه اسطورية ملعونه :) ـ

في الاساطير اليونانية القديمه .. مـِــيدُوسّــَا هي بنيّه مزيانه مارست الحب مع صديقها في معبد ، فتغشــّشت عليها الالهة غشّ كبير ، (انا نقول غارت منها هههههه ) و حوّلتها الى مخلوقة بشعة ، مـْـسـُوبـْـعـَه ، ما فيها ما يتشاف و شعرها أفاعي ... و نفتها في كهف في جزيرة من جزر البحر المتوسّط .. و زادت لحـّقتلها لعنه اخرى و هي انّو اللي يلقاها و يشوفلها في عينيها يتحوّل ، في الوقت ، الى تمثال متحجــّر.. لا حراك له

الابحار في عالم الاساطير و الملاحم القديمه ، من قبل ، يمثّلّي متعه كبيرة ، و نتذكّر انّي في مرحلة معيّنه قريب باش نحفظهم الكلّ ، و و لّيت نحكي عليهم كاّنّهم أقاربي :) و الاله الفولاني شكون خذا ، و على شكون غضب ، و بالأماره مرتو الالهة الفولانية كانت تخون فيه مع الاله الفلتاني ، وكيفاش انّو البوقرعون هو دم ادونيس عشيق افروديت بعد ما قتلو راجلها ، و التيليب ، و النرجس و...و...و...و

انا لحد اسبوع لتالي ، كنت نتصوّر اللي هالمخلوقات الاسطورية ماهم الا كائنات من نسيج الخيال البشري ، خلقهم في لحظات الدهشه البشرية الاولى .. دهشة تجاه الطبيعة .. و الذات البشرية بيدها .. باش يفسّر بيهم الصواقع و الزلازل و الوحوش و الهموم اللي دايرة بيه ، و يحمي بيهم ذاتو الضعيفة امام الطبيعه و جبروتها عليه ، هو اللي كان مجرّد كائن بدائي .. زوّالي .. يتعشّى بشوي جيفه ، و يشرب من الغدير المتعفن ، و يستسلم للنوم العميق في مغاور ثلاثة نجوم :) و كيما نعرفو اللي لولا هالاساطير هاذي ، ما كانش ممكن تتوجد فلسفات و علوم .. و لولاها لما كنت انا توّه قاعد نخرّفلكم في هالخرّافه :) على ميدوســّا المسوبعه

اكتشفت حاجة هامّه .. و هاني باش نقولها و نتحمّل فيها مسؤوليتي .. و هي انّو هاك الشخصيات الاسطورية الكلّهم ماهمش وهمييـــن .. لا .. ابدا .. هوما موجودين ، و موجودين بيناتنا زادا و في متناولنا .. متخبّين .. متنكّرين .. متوصّفين .. امّا يكفي انّك تكون تعرف صحيّبك و الا صحيّبتك الاسطورية هاذي ، و قاري و الا حتّى سامع بحكايتو و الا حكايتها ، مع شويّه مجهود في البحث حولك .. راك تلقاه/ها

هاو انا مثلا لوين وصلت

ميدوسا المسوبعه هي بيدها تونس سبعه

اما ماو تعرفو في علم اللسانيات و علم اصول الكلمات ما يسمّى (يظهلرلي) بالانزياح .. مثلا .. تكبسا و لّت قفصه .. سوفيطله و لت سبيطله .. و ميـدوسّـسـا المـْسوبعه .. ولّات تونس سبعه .. و تنجمّو تلاحظو وحّدكم اللي صوتيا قراب لبعضهم برشه .. مما يدعّم اكتشافي

هاذي حاجه

الحاجه لخرى اللي نحبّ ندعّم بيها هالاكتشاف ،هي الحقيقة التاريخية الجيولوجيّة اللي تأكّد بأنّها تونس بكلّها كانت جزيرة .. و هاذا ما يفسّر وجود شط مالح كيما شط الجريد ، في قلب الصحرا ، و هاذا ما يفسّر زادا انّو جبل الشعانبي الموجود بالقصرين ، مليان بــببوش البحر المتكلّس .. و المتحجّر .. الفوســّيل ، يقول القايل اش مجيّب ببوش البحر وبالكميات الضخمه هاذيكه ، للجبل هاذاكه ، لولا انّو البحر كان غادي ؟؟؟ ممّا يأدّي لبرشه استنتاجات و تساؤلات اخرى تنجّم تبعّدنا شويّه على موضوعنا اما ميسالش : لو كان ما وقعتش هاك التغيرات الجيولوجية الكبيرة هاذيكه ، و قعد البحر في القصرين ، راهو الحـَكم ما حرمهاش من ضربة جزاء واضحة في مباراتها لخّرانية ضد الترجي ، و راهو ماصارش اللي صار :) ـ

يعني هالجزيرة اللي تنفت فيها ميدوسّا ، هي جزيره تونس ، هاك الوقت

بديناش نقربو ؟؟ ـ

الاسطورة تقول انّو أي واحد يخزر لميدوسّا في عينيها .. يولّي تمثال ما عادش يتحرّك ، و حديثنا قياس

هالنهارين ، وانا نتفرّج على قناة تونس سبعة ، في برنامج ثقيل ، ما اثقل منّو كان المدوّن المجهول اللي باش يربح في المناظرة اللي حكيت عليها هنا ، و اللي ما نعرفش علاش لحد الان ، قاعده توصل فينا في برشه مطالب اما من نفس المصدر، و لذلك نحب نستغل هالفرصة باش نقلّو يزّي من بعثان المطالب ، رانا رشّحناك ، وبكل شفافية ، و نتمنّوولك الفوز ، الفوز على روحك بالطبيعة على خاطر ما ثماش حتى مترشح آخر غيرك
عاد قلت نتفرّج في الكاتابلازمه هاذا

يجي مرّات بعد نصّ النهار، باش يحكي على آخر ما صدر في عالم النات من برمجيات و مواقع ...الخ
قلنا باهي ميسالش .. رغم انّو فمّه برشه ما يتقال في صيغة البرنامج و اخراجو.ـ
عاد هالفطحــل الرقمي اللي يتصوّر في شباب تونس الكل متمسمرين قدّامو باش يـَـنـْهـْــلو من معينوالالكتروني ، كنت نتمنّى لو انّو التزم بحدودو و اكتفى بـْـدَوْرُو كجهاز موجّه مبرمج ، يعني هاو اش تحكي و هاو اش ما تحكيش . هكّاكه ، كنت نّجـّم نسيّبو في حال سبيلو .ـ

امّا كيف يوصل بيه وفاؤؤ الدائم ، و اخلاصو الموصول ، و التزامو المتجذّر بثقافة التجهيل و التسطيح و التبكيش و التخويف و الترهيب من كل ماهو "آخر مختلف" و قيامو بدعاية مضاده ضد مجموعات معينه ، و محترمه ، في فايسبوك ، و تصويرو ليهم على اساس انهم مجموعات خطيرة ، ظاله ، ضد الدين و ضد الوطن ، و اخراجهم في صورة فئات مارقة .. لا فرق بينهم و بين المواقع البورنوغرافية ، و يحذّر في متتبغيه منهم ، هاذا اذا كان عندو متتبعين ، فهاذا هو اللي يخليني نزيد اقتناع اللي قناة تـُـونـسّــبْعَه هي بيدها مـِـيدوسّا المـْــسُوبـْـعَه
اش ممكن ننتظرو من واحد خزر لميدوسّا المسوبعه في عينها عير انّو يولّي تمثال ؟؟؟ـ
و اش ممكن نستنّاو من مدمني الفرجه على قناة تونس سبعه ، الا انّهم يتغذّو بثقافة السلبية والانهزام ، بثقافة الرفض الغبي للآخر المختلف الدّاعي الى التسلّح بشيء من النور ، بثقافة القبول بالموجود و القناعة و الرضى بالقليل ، و بثقافة المقارنات الماكرة من نوع : هانا خير من برشه بلدان بحذانا ، وبثقافة الرداءة و انهيار القيم الفنية و الجمالية ، و بثقافة بناء اجساد مستهلكه ما فيهاش روح النقد و التحليق خارج السرب ، و بثقافة التعتيم الاعلامي ، موش فقط على الاحداث اللي تخص الشان الـ"وطني" و الا العالمي بل زادا على الكوارث الطبيعية ......و القايمه ما توفاش من هالجرعات اللي قاعده تْــرضّع فيهم لمشاهديها قناة تونسّبعه ، ميدوسّا المْـســُــــوبعه ، لعينة الاله زويس ، حتّى يتحوّلو الى اكثر من تماثيل متحجّره .. بل الى قطعان منخرطه لااراديا في سباقات محمومه من اجل الاسراع بذبحها و بْحـَـتـْــفها .. في مختلف الاعياد المباركه .. إضحى .. تغيير .. تحوّل ... اللي هوّ... و كثيرة هي ايّامنا المباركه أم الباركه .. مانيش عارف