mardi 9 juin 2009

نرمين ... فيروز ... و الموسيقى


نرمين و فيروز

صديقاتي الجدد توّ قرابة الشهرين و الا ثلاثه

عمرهم سته سنين

نعلّم فيهم في الموسيقى

الحقيقه ، مولاة الحكايه هي نرمين ، اللي اشترطت انّها صديقتها فيروز تكون معاها

و حتى انا استسغت الفكرة ، باش يقوى شويّه عنصر المنافسة بيناتهم ، و باش تلقى كل وحده في لخره ، جدار تتكّى عليه ، و فعلا هاذاكه اللي وقع ، بل اكثر من هاذاكه .. عملوا عليّ زنس تكتّل .. ههه ... ولّيت نسلّك فيها معاهم بالسّيف

نرمين بوها صاحبي ، استاذ رياضيات ، مثقف ، يحب في حياتو اربعه حاجات : بنتو نرمين ، الحياة ، البيرة و الموسيقى

مرتو توفّات اثناء الولاده ، و خلّتلو نرمين بنت ثلاثه سنين ، نرمين بالطبيعة بقى الحدث متاع فقدان امّها و خوها اللي كان جايّ للحياة بشكل كبير

بقات تروماتيزي برشه

بوها أسّس معاها نوع من الصداقة المزيانه برشه

على فكرة ، المرة اللي فاتت ، نرمين كلاتلنا وحيدات الكميه ، انا و بوها ، بدعوى انّنا ما عطيناهاش تشرب من "القازوز المرّ" متاعنا

الحوار بيناتهم رايع ، مافيهش لا عقد ابويّه ، و لا سلط محلّيه ، و لا شعب مهنيّه J ـ

بوها منتبه ياسر لميولاتها الفنية الواضحه فيها ، عندها مواهب في الغناء و التقليد ، تعمل كاراتي ، و شويّه انشطه اخرين ، بوها يحبّها تصعّد القلق اللي بقى مرافقها بعد الحدث هاذاكه ، في انشطه مختلفه رياضية ، فنيّه ... اما وقت اللي حكالي على ميولاتها الموسيقية ، و عبّرلي على الاسف متاعو انّو ما لقاش شكون يعلّمها قواعد الموسيقى ، خاصة بعد فشل التجربة مع احد اساتذة الموسيقى ، اللي مع احترامي ليه ، كان يفتقد للمداخل البيداغوجية اللي تسمح لطفل في السادسه من عمرو ، باش يستوعب مفاهيم مجرده كيما الصولفاج و المسافات الزمنية و المشاله و ذات الشيلتين و السلّم الموسيقي

قتلو : انا نقرّيهالك الموسيقى

باختصار اتفقنا على كلّ شي ، و من بينها اشتراطها وجود صديقتها فيروز معاها

و بدينا

الحصة لولانية بالطبيعه .. شويّة تعارف ، شويّة تكسير للحواجز ، شويّة تألف و تعوّد بالمكان ، و بيّ انا ، اكتساب الثقه اللازمه ، بناء الجسور الحميمية بيناتنا ، و هاذا هام ياسر ، على خاطر مهمّتي صعيبه

اوّل مفهوم حبيت نركّزو معاهم ، هوّ "الصعود" و" النزول" في الاصوات الموسيقية

جوهر الموسيقى ، هو الوعي و الاحساس و التفطّن للحركة الصاعدة و النازله للاصوات ، ثم من بعد ، تجي المسافات و الايقاعات و الذوقيات و الجماليات

صوّرتلهم الدروج هاذي





و تعمّدت انّو يكون عددها على نفس عدد الدرجات الموسيقية المعروفة .. و بدينا نتعرّفوا عليهم درجه درجه ، و كل درجه نتعرّفو عليها نعملولها احتفال و ترحيب و تصفيق ، و نبدا انا نــقــــُود فيهم باش يطلقوا عليها هوما اسم ، الاولى : دو ، و الثانية : ري ... الخ

في النهاية ، الـ : دو ري مي فا صول لا سي ، اصبحو بمثابة صاحباتنا الجدد

بالطبيعة كل درجه نعطوها اسم ، و لون زاده

و على الكلافيي متاع آلة الأورغ ، نفس الدرجة هاذيكه نلصّقو عليها نفس اللون







كيف كيف ، النوتات صوّرتهم في بابيي كارتون ، و لوّنتهم بنفس الوان الدروج و الكلافيي ، و حطّيتهم في نفس الصحفه اللي فيها الشكلاطة و الفواكه الجافة ، ههههه



و قعدت نتابع في ردود الفعل

من خلال الالعاب اللي نلعبوهم صعودا و نزولا على الدروج ، و ما يقابلهم من عزف على درجات الكلافيي اللي بنفس اللون ، حسّيت اللي مفهوم الصعود و النزول و قع تركيزو سمعيا بدرجه كبيرة

و بالشويّه بالشويّه ... بدينا نتخلّصو من الدروج الملوّنه .. الملموسه ، و نعوّضو فيها بهاك السلم الموسيقي الكلاسيكي الجاف المجرّد ، متاع الخمسة اسطر

الجوائز ديمه موجوده ، الشكلاطه و الملصقات متاع الكوميك اللي يحبّوهم ، نسجّلهم فيديو و هوما يقرو في التمرين و نفرّجهم عليه في الوقت بشكل مفاجئ ، الخ ... ـ

النتيجه اللي توصّلتلها ، ناجحه جدا ، و مفرحه ، اصبحو يكتبو تمارين نملّها عليهم بالاصوات ، و الا بالعزف ، و هوما يكتبوها بالصولفاج ، بالطبيعه تمارين بسيطه ، كبداية ، كيما تنجمو تشوفو في التصاور هنا





هاذاكه علاش فكّرت باش نكتبها هنا ، باش تكونو شاهدين ، ههه ، شكون يعرف وحده منهم تواصل و تتخصص في الموسيقى ، و تولّي فنانه كبيرة ، و نعني مليييح كلمة "فـنــّـانه" ـ

*****

ملاحظة عابرة : بربّي هاك اللي ماهمش باش يشدّو من الحكاية كان الجملتين متاع "البيرة" .. ماذابيهم يعملو المندبه متاعهم بعيد .. و شكرا على التفهــّم



9 commentaires:

الزبراط a dit…

ملا زهر
حتا انا محسوب استاذ راضيات واللي شواتلي الكبيدة امها اسمها نرمين
ونموت عالحياة والبيرة والموسيقى
:)))))))))))))))

brastos a dit…

زبراطوفيتش

عجبتني عفسة "محسوب استاذ رياضيات" ـ

:)

مفعوص مزمر a dit…

à cet age là , j'ai voulu bien m'inscrire au conservatoire mais au parents ont refusé sous prétexte que la route qui mène au concervatoire est pleine de voiture et qu'il peut avoir des accidents tout le temps !!! 93adt hakeka hata 14 ans bech rdaw 3lia w da5louni ....
mais j'ai apprécié 7keyet drouj elli bel alwéne vraiment tayara ..mochkla mta3 les eleves hya el inti9alette ..il arrive elli ma yousselch ymaiez ma bine do w do 9arar et c'est trés grave ...bonne continuation !!!

Hamadi a dit…

Excellente pédagogie qui dénote d'une maitrise du sujet

ART.ticuler a dit…

كنت نقرا (نسترجع في ذكريات ههه) وكنت الحقيقة متخوف من حاجة ..ياخي لقيتك حكيت عليها في آخر التدوينة :-)) ..

الفرق بينك وبين معلم الموسيقى الاخر تجده فيما قال بيكاسو:فمة شكون من الشمس يعمل دورة صفرة وفمة شكون من دورة صفرة يعمل شمس!

jaccuze a dit…

باهي، إذا واحد كيفي يحب يتعلّم الموسيقى بشرط إللّي عوض الشكلاطه تكون الجايزه بيـــرّرّرّه وكميه......

تقبلو؟؟؟؟؟؟

brastos a dit…

@ jaccuZe

:):):):):
:):):):):):)
:):):):):):):)

ما نضمنلكش نخلّيهالك

باهيشي

لقيناها لرواحنا في هالشّهيلي باش تاخذها انت جايزة ؟؟؟؟؟

ههههههه






@ مفعوص مزمر

t'es finalement musicien !!! :)

الانتقالات كيما تعرف يلزمها تدريب برشه و تنمية للـ
les reflexes sonores

merci



@ hamadi

merci

rien qu'une bonne pedagogie qui assure de bons resultats avec des enfants de cet age



@ art ticuler
فكّرتني في بيكاسّو
اروع ما قال : "عدّيت عمري نحاول نرسم كيما الاطفال ، و لتوّ ما وصلتش"ـ

violette.. a dit…

ena lbnaya ili lebsa l rose hia ili 7assitha 3andha l 7s lfanni elle est douee !! et c sur i7sesk elmorhaf bl fan ili zra3tou fihom bch yathmor un jour ..je vous remercie tmanit law ken 3omri 6 ans..

brastos a dit…

salut violette

:):):)

ما نّجّمش نقلّك شكون فيهم اللي عندها قدرات اكثر من الاخرى
على خاطر باش يجي نهار و يطّلعو عليها

و اللي ما شكرتهاش بالقدا تعملّي مشكله


ههههه


شكرا ليك