يا اسمـاعيـل .. راهـو مــوش هـكـّـــه !!!ـ

بربّي علاش هكّه ؟؟؟؟؟ـ

موش في بالي كبرنا على برشه امراض .. من بينها المزايده الفارغة ؟؟؟؟ـ
باش ما نطوّلش .. شوفو مولى المدوّنه هاذي وين بعثنا الناس الكل
انا مانيش باش نبعثو للبلاصه اللي بعثنا هوّ ليها .. موش على حاجه .. امّا على خاطر يبدو انـّـو يعرف يمشيلها وحدو .. و مايستناش اشكون يبعثو
اما.. قبل ما يمشي .. نحب نتوجهلو بشوية ملاحظات و اسئله

واحد : التدوينات الجماعية ظاهرة صحيه في البلوغسفير.. تقليد باهي و يلزمنا نحافظو عليه .. خاطر يلمّنا ساعه ساعه تحت مهمه وحده و تحت قضيه وحدة و هكاكه نتعلمو ننساو خلافاتنا و لو لفتره وقت اللي الموضوع يكون يمسنا الكل .. و هاذا ايجابي موش كان هنا .. في هالعالم الافتراضي .. بل .. حتى في الدنيا

اثنين : هو راهو حتى كي تكون انت مشيت .. و ضربت بالحجر .. و كنت تشي قيفارا في زمانك .. و لميت حولك الجماهير .. و خطبت فيهم ..و حمّستهم... و علمتهم اصول حرب الشوارع .. و كوّنت بيهم خلايا في كل حومه .. وعصابات في كل زنقه .. و اسست خيوط ربط و اتصال بين هالخلايا باش يتمكنو الكل من انجاز نفس المهام في وقت واحد ..قصد ارباك العدو و...و...و هاذا اذا ما رجّعوكش من نص الثنيّه في احدى الدوريات...قلت حتى كان عملت هاذا الكل .. ما يعطيكش الحق باش تسمّع الناس الكلام .. لانّك تـُـو سامبلومون تكون خسرتهم في المعارك الجايّه .. و يظهرلي اللي قاعد يصير ماهوش النهايه .. دونك اذا انت هكّه .. عندك هالروح العملية متاع القياده ..و المبادره .. ما يلزمكش تأيّس منّا .. و يلزمك ديمه تعمل على كسبنا لصفّك ..و تاخذنا على قدّنا...توّ شوي شوي .. ننضويو تحت قيادتك و نعملولك تمثال.. و نطبعو تصويرتك .. نقصد تصويرة مدوّنتك .. في المراول

ثلاثه : المشاكل اللي عايشينها اهالي الحوض المنجمي .. في جانب كبير منها ماهيش خاصة بيهم هوما اكاهو .. بل يعاني منها شبابنا من الشمال للجنوب ..بدرجات متفاوته صحيح .. لكن ما ثماش جهة في بلادنا مافيهاش شباب معطل ..و محروم من ابسط حقوقو..دونك .. انت شقولك تبدا من حومتك .. من عايلتك .. و تلمّهم الكل ..و تفرّجهم عالفيديوات .. وتمشي بيهم لاقرب معتمديه .. يعني في عوض تزايد على الناس بالبطولات الوهميه .. والمتمثّله في هالكلمتين اللي طيشتهم في تدوينه ..و كانّهم طعم رميتو باش تتركّز عليه و تسمّعنا الكلام ..و اللي ناقصك كان باش تستعمرنا بيهم .. و اللي هوما : اشكون يمشي ؟؟؟ أعمل في جيهتك كيما عملو هوما في جيهتهم .. و اصنع نواة متاع احتجاج .. احسن ملّي ترمي كلمتين طايشين .. واللي ما يجاوبكش (ممكن يكون ما قرالكش من اصلو)...تسمّعو الكلام ..لا .. واللي يضحّك .. بصراحه.. انّك تستثني في اللي جاوبوك .. :) واللـّـاهي انا اذا كنت نعرف اللي مجرد تعليق ينجّم يكون بمثابة صكّ غفران .. و يمنّعني .. راني كتبتلك ايّ حاجه

اربعه : انا نتفق معاك في انّو لازم نطوّرو تجربة التدوين .. و نخرجو بيها من ورا الشاشات .. و نترجموها الى ممارسة على ارض الواقع ..لكن زاده كي نتعمّقو شويّه .. راهو اذا ممارستنا ما تكونش ماشيه بالتوازي ، و مدعومه من المنظمات الاخرى .. انسانية كانت او نقابيه او طلابية او حقوقية .. ما نوصلوش لنتيجه كبيره .....بل يمكن يكون الضرر اكثر .. كيما يحصل ديما في التحركات اللي وراها حماس زايد .. من غير دراسه و تبصّر...على خاطر الحماسه وحّدها حتّى في ماتش كوره ما توصّل لحتى نتيجة .. فما بالك بالمحاورالمهمــّه هاذي.

في الاخير .. نحب نشير الى انك يبدو انك دوب ما حليت عينك في هالدنيا .. عملت مدوّنه .. و حاطط فيها آمالك السياسية الكل
لا
الكلام هاذا راهو ما ينطبقش على الناس الكل بنفس الدرجه

على خاطر يلزمك تعرف اللي فينا اشكون قبل ما يعمل مدوّنه .. و قبل ما تدخل الانترنات فرد مرّه للبلاد .. شدّ التجنيد الاجباري في اقصى الجنوب ..فينا اللي شدّ الحبس .. اللي توقّف اكثر من مرّه جراء مساهمتو في المظاهرات المسانده للشعوب ..و اللي واجه الكرتوش و ماتو اصحابو بجنبو ..و اللي كلا الماتراك لين قال يزّي ..و اللي عاش سنوات تحت المراقبة الاداريه .. اللي نتصورك ما تعرفش اش معناها : معناها كل يوم تمشي تصحّح في مركز الشرطه صباح و عشية ...و اللي تحرم من جواز السفر متاعو من اجل قناعاتو...و اللي ... و اللي ... و اللي
بالتالي ناس بالتجارب هاذي ما يصحّـش انّهم ينتظرو منك انت باش تقوللهم : يا تمشو للرديف (هكاكه .. آلا فوقلات) يا تمشو ندرا اش تعملو
عيب عليك
و توّ ... تنجّم انت تمشي .. لوين تحب