أنا الـفـــتى النظـيـــف

برشه مواضيع متداوله في فضاءنا التدويني هالمدّه الاخيرة .. و اهمها حملة 15 جوان .. الحجب .. الحوض المنجمي .."البذاءه"..و غيرها

مانيش باش نحكي على حملة 15 جوان لأنها ما تخصّ الا اصحابها ..اللي عملو حملتهم و وفت الحكايه .. رغم انّو ثمه اشكون مازال مكبّش فيها .. يمكنشي في بالو اللي الحمله تبدا نهار 15 جوان و توفى نهار القيامه .. و لذلك نهمسولو.. وأذا لزم نفهّموه بالقـْـمـَـعْ اللي راهو كيما حملة المغرب الكبير .. و التدوينات الحمراء... و البيضاء .. وغيرهم من التدوينات الجماعية .. راهم ياخذو وقتهم و يا من حيا للعام اللي مبعدو .. و دابا دابا .. خرافتنا خشـّـت للغابه و العام الجّاي تجينا صابه :) ـــ

امّا حبيت نعطي شويّ ملاحظات في شكل تساؤلات .. في خصوص تداعيات الحمله (موش الحمله في حد ذاتها)
ياخي كل حد ما شاركش فيها و الا تعرّضلها بالنقد .. هوّ بالضروره ستاليني و لينيني ...؟؟ بالتأكيد لا .. على خاطر عدد كبير و مهم ما شاركوش .. بل نقدو و عطوا اسباب عدم مشاركتهم .. و عدم اخذهم ليها مأخد الجد ..رغم انهم أبعد ما يكون على ستالين و تروتسكي

الوقائع تأكدلنا اللي التطرف الديني .. أو ما يسمّى تلطيفا بـ : "الاسلام السياسي" .. ما يقابلوش بالضروره لينين و ستالين أكاهو .. بل تقابلو كل الانفاس التقدمية و الديمقراطيه و الليبراليه ... و حتّى بعض الاصوات الدينية المعتدله .. و اللي اهمّ من هاذا الكل .. تقابلوشرايح كبيرة من الشعب الكريم اللي عندهم في ديارهم السـّـبِـحْ .. و المصاحف و زرابي الصلاة .. و يصيمو و يشهّدو .. لكن ما يحبّوش شكون يجي يسفـّـهـلهم طريقتهم في التديّن و في التعامل مع الدين و يقوللهم : لا .. انتوما على ضـَـلال .. هاو الدين الصحيح خوذوه من عندنا احنا

و ما أدلّش على هذا من التحالفات اللي صايره توّ ما بين أطراف سياسية على طرفي نقيض من حيث الموقف من الدين .. الا انهم ارتأوا امكانية الالتقاء حول محاور سياسية محددة : الحريات مثلا

..
يعني باختصار .. نرى اللي أحسنلنا نتحرّروا من هالثنائيّة الساذجة التقليدية متاع مؤمن-مسلم/ملحد-كافر .... لانّها ما تبعدش برشه على ثنائيات الخير و الشر في الافلام اسود و ابيض متاع خمسينات القرن الماضي

فالملحد موش ضرورة متسيس /يساري .. راهو ينجم يكون عالم طبيعيات .. و الا كيميائي .. ملحد في اللابوراتوار متاعـو و ما عندو حااااتى علاقه بالسياسه .. و بلينين و ماتو تسي تونغ

كما انّو اليساري..موش ملحد ضرورةً .. بل ينجم يكون مؤمن .. بل مسلم .. اما متبنّي برنامج سياسي تقدمي و تحرري

هذا فيما يخص بعض ردود الافعال على حملة 15 جوان و اللي ريت انّها في حاجه للمراجعه

نحكوا شويّه توّ في ظاهرة الانسحابات و التلويح و التهديد بالانسحاب من تن بلوغ ... هالفضاء اللي اهم ما يميّزو هو الاختلاف... الاختلاف في كل شي .. في المواضيع المطروحه .. المحتويات .. الاساليب.. الاهتمامات .. .. و زادا، وهاذا مهم برشه، الاختلاف في اللغه و اللهجه المستعمله .. و هكّه نضمنو تنوّع و تعدد اتجاهات .. و نعوّدو ارواحنا على التفاعل مع الآخر
ياخي لازم الكلنا نكونو .. فتى نظيف :) مهذّب لطيف :) ـ؟؟ـ
ما اعتقدش ..
هكّاكه وين نتحوّلو من مدونين الى قطعان بهائميه بالحق . وبالمناسبه ، كلمة بهائميّه راهي موجوده في لسان العرب .. يعني كل حد ينجـّم يحطّها وين يحب :) ـ

ثمّه مدونين يحبّو مدونتهم تكون أقرب ما يمكن ليهم ..لحقيقتهم .. لليومي متاعهم .. لاسلوبهم الحقيقي في الحياة .. في النقاش .. في التعبير على مختلف المشاعر .. حزن .. غضب .. فرح .. ما يحبّوش الاقنعه الافتراضية .. و هكاكه يشوف روحو واضح و صادق مع الناس و مع روحو
يبقى انّو اللي ما يساعدوش هالاسلوب و الا هاللغه .. بكل بساطه..ما يمشيلوش .. ما يقرالوش .. ما يصوّتلوش .. يتفاداه .. و الا يقنعو بالعكس .. يحلّ معاه بوليميك جدّي في هالمسأله من غير تحرّش لغوي و عنف لفظي

احنا ماناش قصّر باش كلمه "بذيئه" تعمللنا صدمه نفسيه .. و ماناش عايشين في قبّه بلار باش نحيرو في المعاني المقصوده من الكلام هاذا
هاذيكه لغه .. و معجم .. و سجلّ.. موجود في شارعنا و امخاخنا و دائرتنا السمعيّه .. و ثقافتنا الشعبية .. ما نهربوش منّو بطريقة نعائميّه .. (على وزن بهائميـّـه:)...)و لعلمكم و المعلومه هاذي خذيتها من استاذ لسانيات .. أنّوهالشعب هاذا من اكثرالشعوب استعمالا للكلام "البذيء".ـ

موش موضوع للتفكير و الدرس هاذا ؟؟؟ عوض الاكتفاء بسدّان الوذنين

ياخي كيفاش تطلبو من شعب بعمرو ما اختار حتى شي في تاريخو .. انّو ما يكونش بذيء ؟؟؟؟؟ـ

ثمّ انّو، بصراحه "البذاءه" هي أعمق من مجرّد مفردات ذات أيحاءات جنسيه عدوانية .. مثيرة للضحك احيانا .. و للغضب احيانا اخرى

موش من الاعتباطي انّو التراث الادبي الانساني العالمي زاخر بالمدارس الادبيه الايروتيكيه .. و حبينا و الا كرهنا ... حبّ موروثنا الاخلاقي و الديني و الا ما حبّش .. حبّت تربيتنا النفسيه و الجنسية الغامضه و الا ما حبّتش .. حبّو شيوخ القبايل و حرّاس المعابد و حماة السماء .. و الا ما حبّوش ... هالمدرسه موجوده .. و عندها متتبعيها و قرّاءها و كتبها و هوّاتها و فلاسفتها و منظريها

ياخي كنا انّجّمو نسمعو.. مثلا .. بكتاب برهان العسل متاع احلام نعيمي لولا انّو وقع منع تداولو و نشرو عربيا .. لانّو يسمّي الاشياء بمسمّياتها ..و لانّو مغرق في الجرأة .. ؟؟؟؟

هالمجتمعات اللي تستمد في قداستها الوهمية من انّها مهبط الرسالات السماويّة .. و بالتحديد مهبط الاسلام .. هي نفسها اللي مشهوره بانتشار الشذوذ و اغتصاب الاطفال و البيدوفيلي .. و الجنس مع "المحارم" : الانساست

مجتمعات .. بل مستنقعات البترودولار .. اللي تزايد علينا بالاخلاق و التقوى و الورع و السّبح و البخور و غيرها من اكسسوارات هالمهزله الدينيه اللي فايحة بريحة العفن و القاز مع بعضهم .. هي اللي ممنوع على الاستاذ فيها انّو يبعث زوز تلامذه من نفس الجنس للتوالات في نفس الوقت

هاذاكه علاش قبل ما ننصبو محكمه و مقصله للي يحبّو يخرجو شويّ على المألوف و يحلّقو خارج السرب .. قبل هاذا.. نحدّدو مفهوم البذاءه .. و القباحه .. و السفاهه.. لانّو ما أبذأش ...و ما أقبحش ... وما أسفهش من اللي يحطّ أيدو المعفّنه على وجهك و يقلّك : سكّر فمّك

...و ما أبذأش ...و ما أقبحش ... وما أسفهش من شخص يمصّلك دمّك بالديماغوجيا .. و بخطابات نهار الجمعه

.. و ما أبذأش ...و ما أقبحش ... وما أسفهش من اللي ياخذلك لقمتك من فمّك وكي تشكي يطعنك

.. و ما أبذأش ...و ما أقبحش ... وما أسفهش من اللي يحلالو الدفاع على دينو بعد كعبة البيرة الخامسه

و ما أبذأش ...و ما أقبحش ... وما أسفهش من اللي شادد خنجر وراه و رافع معاك شعار الديمقراطيه .. و على اللفته يقيم عليك الحد

و ما أبذأش ...و ما أقبحش ... وما أسفهش من اللي مطيّش كلابو على القلالـّه و الزواوله يمصّولهم في دمّهم

ما أعتقدش انّو كلمه طايشه .. فيها بعض الايحاء الجنسي .. عبّر بيها مولاها على حالة غضب .. بطريقتو الخاصة .. و ما دعاش الناس الكل باش تولّي تتكلم كيفو و الا تقرالو بالسيف .. باش تكون أكثر بذاءه من هاذا الكل