قــــول آ مـْعمـّــر ... قــــولْ

مانيش باش ننخرط في طــُرح الـ"كـِيك بوكسين" اللي قاعد يرحـِي هالنّهارين ، و اللي هو مؤسف و مقرف في الآن نفسو ، مؤسف موش على خاطر مسخّفني واحد دون الاخر ، لا ، اما على خاطر مازلنا ما وصلناش للمستوى المطلوب من الاختلاف المتحضّر ، و مازالت خلافاتنا ما تبعدش ياسر على عرك النسا في الحمام .. و الشّباط ، و اللــّـطاخ ، و التزغريد على فلانة كي طيّحت فلتانه و نتّشتلها شعرها في بيت السّخون

و الا عرك الحوم ، اللي توصل اقصى مظاهر اهانتهم لبعضهم فيه انّهم النسا يـْـعـَـــرّو ارواحهم على بعضهم في الهواء الطلق ، قدّام المتفرجين الكل ، لكن الغريب و المثير، انّك تلقاهم بعد نهارين والا ثلاثة ، مع بعضهم ، محلــّــقين على كاس تاي أحمر عاقد،ويحكو في حميمياتهم الزوجية لبعضهم ، و يقهقهو ، ممّا يعطيك انطباع قويّ و واضح بعدم جدّية عركتهم

اسف على هالمشاهد اللي جبدتهالكم من الخابية متاع حومتي الشعبية القديمة :)ـ

قلت ما ننخرطش فيه على خاطر اولا خذا حظّو ، ثانيا على خاطر ما نحبّش نشنّعها ياسر ، و الا ندْرامـَاتـِيــزيها على خاطر واحد سمّع واحد كلمة خايبة و الا نعتو بنعت خايب (والخيوبيـّة هنا راهي تنجم تكون اخلاقية كيما تنجم تكون ثقافية )ـ

صحيح ، حدث انّي تصرّفت عكسيا قبل ، لكن السياق كان مختلف

البلوغسفير ماهوش جمهورية فاضلة ، بقدر ماهو لـَـقـْـشة من شارعنا بما فيه ، و راهو غالط اللي يحب يصبغ البلوغسفير بأحلامو الوردية الرومنسية في مجتمع مزيان و فاضل ، ما تقولش فيه الناس لبعضها الكلام "الخايب" ، و هاذا راهو لا صار ، و لا باش يصير ، لا في مجتمع عمر بن الخطاب و لا في مجتمع ماركس و لا حتى في مجتمع فاطمة بوساحة

اما نحبّ في التدوينه هاذي نركّز شويّة مع المعلّقين ، جمهور المعلّقين ، و ثمّه علاش قلت "جمهور" ، خاطر بقيت مدّة ندرس في تعاليقهم ، و اللي في أغلبهم ، أوحولي بانطباع واحد و وحيد : جماعة قاصّين تساكرهم و دايرين على رينغ فيها كائنات حيــّة (بشر .. مدونين .. سرادك)يـْـهـَـنـْـتـْـشـُـو و يريـّـْـشـو و يمرمدو في بعضهم ، و هالجمهور يتفرّجو بكل لهفة لمشاهد التقاتل ، حتى اللفظي ، و بكل تلذذ سادي بالعنف او بالتعنيف

اعتقد انّو من الشرعي ، بالتالي، استنتاج الآتي : هاللهفة و التلذذ الشبقي اللي نلمسوه في تعاليق/هتافات المعلـــّـــقين/المتفرّجين على نقاش/قتال المدوّنين/السرادك في البلوغسفير/الرينغ ، ماهوش معزول على شحنات العنف اللي تـْشـَرجـِينا بيها شهر لتالي في التلافز و المدونات و المواقع و البورطابلوات و الجرايد و السهريات و اللــّـمـِـمْ ، هاذا الكل، كي تــزيدو كبت ايّ صرخة منددة بهالعنف ، نتحصّلو دونك على معلّق كل ما يعمل فيه هو تصعيد للشي اللي حكيت عليه

العديد من المعلّقين ذكّروني بحاجة
منين كنا صغار ، و منين كانت فعلا بلادنا جديرة بأنها تتســمّى عاصمة ثقافية ، لمجرّد انكّ كنت تلقى قاعات السينما حتى في المعتمديات ، و موش "عاصمه" كيما توّ بمعنى

ـ( constipé )ـ

كنــّا نتفرّجو في افلام الوستارن ، و كيف نخرجو من "الصالة" نصنعو فــروده من الكونتربلاكي ، و حزامات من أقفاف البلاستيك مرشّقة بالبيل سواقر زعمه زعمه كرطوش و المظلات متاع جدودنا و ابّيّاتنا .. زعمه زعمه الطربوشه الشيريف، و الا "البّاندي" و نعاودو نمثّلو احداث الفيلم الكل ، و نتخبّو في السطوحات و الخرب و فوق الشجر و نمثّلو صوت الكرطوش بأصواتنا ، مع اضافة سيناريوات من عندنا، بناء على مسحة الخيال اللي تــطّلّبها رغبتنا في التقمّص .

البعض الاخر من جمهور المعلّقين ذكّرني بحاجة اخرى
منين كنا طلبة ، نتصوّرو اللي الجامعة "منطقة محررة" و كل واحد انطلاقا من صنادق اليقين اللي مكدّس بيهم مخّو ، يشعر بقمّة السعادة وهو يشوف في مشروعو/حلمو الاجتماعي يتحقق قدّام عينيه

و هاذا بالضبط اللي قاعدين يعملو فيه برشه معلّقين ، ما قاعدين كان يصبّو في الزيت على النار ، و هم بذلك ، قاعدين يتقمّصو في شخوص /ابطال وهميين ،وهالابطال موضوع التقمّص ينجّمو يكونو "الاطراف الرئيسية لهالمعركة" كيما ينجّمو يكونو يـُـسـْـقـْـطو في البطل المهزوم داخلهم ، و اللي منعوه من انّو يندد بالعنف في مجالات اخرى

و المؤسف انّو هالسلوك اللامتوازن متاع ناس جايّة تغذّي في عطشها للعنف ، او حرمانها من التعبير على رفض العنف ، ما اقتصرش فقط على العقائديين الجدد .. من نوع الانونيمات ، واللي حالـّين كركاسات متاع مدوّنات ، و داخلينها بزاق و حكّان ..و حتّى كي توجعو وذنو ، يقول : اليسار هوّ السبب ، و لاخر، كي يوجعو راسو ، يقول : من الاسلام

قلت السلوك هاذا اصابت العدوى متاعو مدونين مشهودلهم هكّه بالرصانه و الحكمه و الاعتدال ، رغم انّهم كانتلهم ، و في تدوينات اشوم و اخمج و افرغ من اللي احنا بصددها توّ ، تدخلات و تعاليق مؤيّدة ، و مختلفة تماما على ما اتّسمو بيه توّ من استنكار و شجب و تقوى و ورع ، بحيث اصبح كل من يعلّق تعليق غير منحاز يتحاكم بتهمة الـ"ديبلوماسية" و كأنّو يلزم الناس الكل يشّدو الصف ، ويعملو قالّري من نوع : اهـُــمّ اهــُــمّ ، و الا من نوع : عشــرة ملاين حــــبّيناهاااااااااااا ... ورا هاذا و الا ورا هاذا

فضلا على الهستيريا اللي من الجانب الاخر ، متاع "قول آ معمــّر قول" اللي تهتف بيها مجموعة اخرى عندها مهارة كبيرة في النفخ في صورة الآخرين و تضخيم ذواتهم ، و هوما ، بذلك ، ما يعبّرو الا على ضحالتهم هوما

زعمه هاذا الكل ما عادش ثمّه ما يتقال ؟؟ فرغت الدنيا من المواضيع الجادة والا المزيانة و الا الطريفة والا الجديدة ؟؟؟ موش كان نفكّرو الكل في الارتقاء بمستوانا خير ؟؟ و كان كل حدّ يشرّكنا معاه في قراءاتو الاخيرة ، في أخر ما شاهد من افلام ، اخر ما اكتشف من اصوات شعرية و ادبية ، اخر ما اكتشف من موسيقى ، اخر نكته كان لزم

راني مانيش مع فكرة "وخيّان الناس الكل" ... لا ابدا .. و بالتاكيد ماناش وخيّان الناس الكل .. و فينا شكون ما يهضموش بعضهم ، و ما يتفقوش ، و يكرهو بعضهم ، انا ثمّه مدوّنين كي نبدا نقرالهم ، كأنّو شكون يــ .... يقلـّعلي في ظوافري .. اش نعمل ؟؟ نجي نحطّلو رابط على هامش مدونتي تحت عنوان : ياناس راهو المدوّن هاذا كي نقرالو نحسّ كأنّو شكون يـ ..... يقلّعلي في ظوافري ؟؟؟؟

قطعا لا ، مادام عندي برشه حلول قبل الحل الاستفزازي العدواني هاذا : مناقشتو ، باسلوب متحضّر ، او تبيان خور افكارو بالحجج الهادئه ، و الا ، في الاخير : تجاهلو

ياخي بلا ّهي قولولي ، الهامش اللي موجود على يمين المدونه ، لاش مجعول ؟ للاشهار و الا للتشهير ؟؟؟ نتصوّر لاشهار المواقع و المدونات و اللوقوات ، في حين انّو "التشهير" ، إذا لزم ، عندو مكان آخر ، عاملين فيه ملــّوطة مجال للتعليق ، يعني باش تعطي فرصة للسيد اللي شهّرت بيه انّو يدافع على روحو و يعطي وجهة نظرو

ياخي عادي هالسّلوك متاع واحد شادد شاشه ، و عينيه مرشوقة فيها قريب تتنقب، و فاش قاعد يعمل ؟؟ في عركه . فاش قاعد يضيف ؟؟ في سبّه . فاش قاعد يساهم ؟؟ في تمرميدة مبتذلة .ـ

و ياخي عادي انّو واحد كبير و ناضج و زعمه يحب يعطي صورة باهية على التدوين في بلادو ، تلقاه كيما تلامذة الابتدائي ، و فلالس الروضة : سيدي خاطيني ، سيدي راو هوّ اللي بدا ، ساتي (انستي) راو هوّ اللي ضربني لوّلاني

رجاء ، كلّ حد يحاول من جيهتو يعطي الوقت للوقت .. اعطي رايك ، و خلّي الوقت يلعب دورو .. مع الوقت ينجّم اللي غلط يهدا و يعتذر ، و اللي مظلوم يهدا و تتضمّد جراحو

رجاء ، كل حد يحاول ياخذ مسافة و لو للحظات من هالحـَلـَبة المشومه ، و يحاول يكتب في حاجة اخرى ، يجلب اهتمامنا لحاجة أفيد ..أزْين .. أجمل.. أجـَـدّ .. أطرف .. أذكى .. أقوى .. أعمق .. أنفع .. أريح .. أكبر .. أحمر .. أزرق .. أخضر .. أصفر .. ههههههههههههه