هيّا نتحدّثو في الدّين .. من غير لا تطيّحلي سنّه.. و لا نطمزلك عين:)ـ

انا راني باقي ما أيّستش من انّنا انّجّمو نتناقشو في الدين .. و نكونو هادئين .. من غير ما تطيّحلي سنــّه.. و لا نطمزلك عين

نحبّ نسير على منوال المحاولة الجادة الناجحة اللي بادر بيها سمسوم ..و راهو موش بالضرورة يلزم اللاديني "يتوب" و المتديّن"يكفر" ههه باش يتسمّى نقاش ناجح

المجالات اللي يتحطّ فيها الدين عديدة و متداخلة .. و انا باش ننطلق من اكثر الحجج اللادينية "انتشارا" .. و نّجّمو منها هي نزيدو نتعمّقو

bon

الدين هو مصدر للراحة النفسية و الاطمئنان الوجداني و الهدوء الروحي للكثيرمن المؤمنين ، و نقول للكثير و موش لكل المؤمنين لانّو عدد هائل من المؤمنين يمثّل الدين _كمصدرموش مَرن للضغط الاخلاقي والقيمي _ و بالاضافة الى عوامل اخرى ، سبب لانهياراتهم و امراضهم العصبية و النفسية ، الظاهر منها والباطن

هالراحة النفسية هاذي قد يلقاها البعض الاخر في ممارسة فن من الفنون ، او في حضن دافئ متاع شخص يحبّو ، و الا بكل بساطة في عيشة ممتعة و زاهية و مريحة. لكن المشكلة وقت اللي تولّي هالراحة و هالاطمئنان مرادفات للاغتراب و الاستلاب ، و مساعد ايديولوجي على تأبيد الاوضاع السائده ، و تلهية للناس على مشاكلها الحقيقية لصالح لمّان اكثر ما يمكن من الحسنات و الاجر للفوز بالجنّة
بالطبيعة هنا نحكي بشكل عام ، اما الاستثناءات اللي نشهدو فيها توّ من انّو الدين هو العنوان الكبير للتصدّي للـ"ظلم" و ـ"الاستغلال" فهي مسائل دقيقة و موضوع تحليل و دراسة ، دراسة لمنشأ هالتيارات ، و ربط تطرّفهم و شراستهم هوما في الدفاع على دينهم(وموش على قيم الحرية و العداله ، و هاذا مهم، و هاذاكه علاش حطيت الفوق الظلم و الاستغلال بين ظفرين)بمدى تطرّف و شراسة النظام العالمي الجديد اللي صنعهم

الدين هو احد الاشكال البدائية للمعرفة ، وهو نتيجة لوقفات دهشتنا الاولى امام ذواتنا و امام الطبيعة ، لكن المشكلة وقت اللي يولّي الدين هو اللي يعرقل في المعرفة العلمية و يحيط فيها بموانعو الاخلاقية و بالهالة متاع القداسة اللي تحدّد للعلم مجالات تدخّلو مما يحيل بين الذّات العارفة و الموضوع المراد معرفتو

قد يقال انّ الكثير من العلوم تطوّرت في ظلّ حكم دولة دينية معينه .. هذا صحيح ، و لكن لا ننسى ان تلك العلوم التي ساهم في تطويرها الكثير من العلماء المنحدرين من امم و شعوب و ثقافات واديان اخرى ، لم تكن تشكّل خطرا على امن الدولة ، بل ساهمت في تطويرها و توسّعها .. بينما وقع ضرب علوم اخرى لا تقلّ اهميّة على الفلك و الكيمياء و...و... وهي الفلسفة و علم الكلام مثلا ، لانّو تطويرها يمثّل خطر على ثبوتية مرجعيات الدولة و اطمئنانها و امنها الايديولوجي و قاعدتها النظرية

لو ما وقعش ضرب و عرقلة و اجهاض علم الكلام و الفلسفة ، و تشويه مسار تطوّرهم الطبيعي ، راهو حصل الصدام الضروري بين العلوم الصحيحة :الفلك و الكيمياء و الطبّ من جهة ، و بين الدين من جهة اخرى ، وهو الصدام اللي لازمو يحصل بين اشكال متنافرة ومتناقضة للمعرفة ، و رانا توّ ماناش ازاء علماء ملحدين فقط في المخابر او في قاعات التشريح

الدين هو بالتاكيد احد المصادر البدائية للتشريع ، لكن المشكلة وقت يولّي يعرقل في التشريعات اللي يطّلبها مجتمع حديث ، و علاقات حديثة ، و اوضاع حديثة ، و امراض حديثة
إذا كان توريث المرا النـُّصّ يعتبر إجراء تقدّمي في وقتو منين المرا كان ما عندها ما تعمل بالرزق مادام هيّ بيدها أحدى ممتلكات الزوج ، توّ لا .. الناس الكل ذراعك يا علاف ، و ثمه نسا يخدمو على عايلاتهم ، هي تخدم و هو لا .. مازال يلوّج ، اما يحبّو بعضهم و لاباس ، و لا حدّ قوّام على حد ، و ثمه نسا يخلصو اكثر من رجالهم ، يعني أحد الأركان الهامه لهالقوامه وهو المالي ، في طريقو للتحلّل و الزوال لصالح علاقات متوازنة و ناضجة فيها ميزانية مشتركة و تصرّف حكيم من لثنين، دونك ، ما عادش ثمّه علاش المرا تورث النص

الدين هو النبع متاع "الاخلاق" ، الاخلاق بين ضفرين خاطر ما ثماش اخلاق وحدة ، الاخلاق مرتهنه بالانتماء الطبقي و القومي و العرقي و القبلي والثقافي و النفسي و..و..و، و مرتهنه بالفترة التاريخية اللي نشأت فيها ، وحتّى بالطقس و المناخ

الكرم كقيمه اخلاقية عربية قديمه ما نّجّموش نعزلوه على المناخ الحار الجاف ،و على وضعية اللاإستقرار الاقتصادي متاعهم ، يعني يلزمني نكرم الضيف و نرويه من عطش الصحرا ، باش يكرمني هو نهار اللي انا نرحل من البلاصة هاذي و نمشي بحذاه هو نلوّج على الما و الحشيش للحيوانات متاعي ... وهكذا
الحشمه كان منذ مئات السنين قيمه اخلاقية محبّذة في المرأة ، مما خلّى اللي خدودها و وذانيها يحمارو اكثر و أسرع كي يكلّمها راجل هي المرا المطلوبه :) و هي المرا اللي تستاهل يكتبو عليها المعلقات ، بينما توّ ولّت الحشمه دليل على تربية سيّئة ، على نفسية ماهيش متوازنه ، على شخصية معقّدة و مهزوزة و غير قادرة على مواجهة اللحظة و السيطرة عليها ، و هنا المشكلة ، في انّو الدين ، بصبغتو الاطلاقية ، يعطي قواعد اخلاقية صارمة و موش مرنه و موش متحرّكة و ما تحترمش التفاوت الطبيعي في استعداد الناس لتقبّل هالـ "أوامر الاخلاقية" ، و يراد لها ان تطبّق في كل الامكنه و في كل الازمنه