اسلاموفــوبيا .. مرة اخرى

شوية ملاحظات منهجية و تنظيميه

ميسالش؟

الاكاديمية راهي ماهيش غول ، و راهي تنجّم تلامس التعمّق و الدقّة ، بل لازمها ، لكن ماهيش مرادف و الا مطابق للتعمق و الدقة ،على خاطر ينجّم نفس الخطاب يصدر من الاكاديمي و الا من الأمّي اصلا ، لكن بلغة مختلفة ، و هاذا مرهون بانّو واحد متعلّم و لاخر لا .. لذلك كل خطاب قابل للتفكيك و التأويل و النقد .. سواء كان خطابا اكاديميا و الا حتّى أس.أم.أس

زاده ، من الاحسن نكونو تفاعليين اكثر ، و نتفادوا بعض السلوكيات (حتى اللاشعورية)متاع تقزيم الاأخر و التشكيك في انّو قرا و الا اطّلع على الحاجة اللي انا اطّلعت عليها

راهو تدوينة فلان و الا مقال علّان ، ماهم الا منطلق للحديث ، و موش بالضرورة يكونو هوما موضوع الحديث الرئيسي

زادا :) ... نعطيو شوية الوقت لبعضنا باش نعملو حاجاتنا لخرين خاطي التدوين ، و الا نبطّلو ماعادش نخدمو ؟ و ماعادش نرقدو ؟ و ماعادش نعملو كعباتنا :)خاطر لاحظت اللي اكثر من مدوّن تسرّع شويّة

الحقيقة انا عملت كيف على الموضوع ، و نشّطت بيه دماغي شويّة و من الاحسن نحافظو على هالنسق

*****

نتصوّر ما ثمّاش اجماع على مفهوم شامل ، مطلق و ملزم للناس الكل حول الاسلاموفوبيا يسمح بتخطيء التعريف هذا لصالح التعريف لاخر ، بقدر ما ثمّه برشه عوامل منها التاريخي و السياسي و العقائدي و النفسي .. كلّها ساهمت و قاعدة تساهم في بناء النسيج المفاهيمي لهالظاهرة
انا نرى ضرورة عدم اهمال بعض العوامل الاقتصادية / الجيوسياسية اللي ساهمت بشكل كبير في التأسيس ليه ، خاصة في ما يخصّ السياق المعاصر للمفهوم
ما نّجّموش نتحدّثو على تأجج و تراكم مشاعر متاع خوف / رهاب / عداء/ حذر/ تحييد/ عزل/ رفض/كره للاسلام في اوروبا من غير حديث على المسلمين في اروبا
و المسلمين في اروبا في النهاية ماهم الا المهاجرين الجايين من الشرق المسلم (شمال افريقيا ، المشرق ، تركيا ... الخ)ـ
واللي احصائيا ، أغلبهم ماهمش جايين في إطار رحلات ترفيهية ، بقدر ما هم مدفوعين بسوء الظروف و البطالة و الفقر لتحسين ظروف معيشتهم في بلدانهم
بالاضافة لتداعيات الثورة التكنولوجية اللي شهدتها اروبا ، و اللي اقتضت سعي دؤوب الى ملاءمتها مع قدراتها الصناعية (نحكي هنا مثلا على مفهوم اليد العاملة البخسة كحلّ لازمة البطالة )ـ
وما يترتب على ذلك ، بطبيعة الحال ، من نشاة حالات تصادم ثقافي و حضاري بين مسلمين جايين ، بعقلية تحريمية لكلّ ما يمثـّل احتفال بالحياة ، بل اساس الحياة بالنسبة للبلدان المتقبّلة ليهم
مفارقات كبيرة و خطيرة يعيشوها حتّى على المستوى الشخصي النفسي الضيّق، مدفوعين بموروث ما يخلوش من الجمود و الدوغمائية
كيفاش في بلادي، جارنا الفولاني منعوت بالصّبع و منبوذ و مكروه و محقور لانّو يروّح سكران و يخلـْـوظ و يطـّايح ، بينما الناس هاذومه هنا ،يحطّو الشراب مع الكوفار و المنادل و كورباي الخبز على طاولة العشا ، قدّام بعضهم .. عادي؟؟ ، ويحطّو دبّوزة الشراب بحذا دبّوزة الما في الفريجيدار ، بل ، يصبّو منّو شويّه على الماكلة وهيّ فوق النّار
قدّاش الناس هاذومه أشرار ، و خايبين ، و ما عندهمش حتّى قـِــيَم ، و حتّى ضوابط ، و ما يعملو الا في الحاجات اللي ربّي قال ما تعملوهاش

مخيبهم
كيفاش انا في بلادي، البنيّة اللي يلقى بوها في كرارسها جواب من عند صاحبها تاكل طريحة ، و يبطّل عليها الخروج ، و ماذابيه يقتلها ، ويولّي يمشي مدنكس راسو و ماعادش ينجم يهزّ عينيه في العباد ،حزنا على شرف القبيلة اللي تحطّم بين ثنايا رسالة حب ، بينما هنا ،الناس هاذومه ، وقت توصل بنتهم لعمر معيّن و ما يكونش عندها صديق من الجنس الاخر ، يكون هاذا مصدر قلق بالنسبة لوالديها ، و موضوع نقاش حول الخلل اللي وقع في تربيتها ، و كيفاش انّو مادام ما عندهاش صديق معناها يا معقّدة ويا عندها ميولات مثلية
مخيبهم هالناس ، ديوثين ، ملعونين ، زناة ، خبثاء . ما يحبّوش يفهمو اللي راهو كل ما يتقابلو مرا و راجل ، يجي بيناتهم الشيطان

مخيبهم
شبينا نحنا في بلادنا نسلّمو على بعضنا برشه مرّات في النهار ، و في كلّ مرّه نقعدوا بالدقايق نـْوَشــْــحْـلو، ونسألو عالاحوال متاع الاحوال متاع الاحوال ، وعلى الصحّة و على فلان عرّسشي ؟ و على فلانه ولدتشي ؟ و على فلتان علاش طلّق ؟ و على فلتانة رفعتش صحّتها ؟ و..و..و بينما هوما لهنا بالعكس باردين ، لا حدّ ساءل على حدّ ، لا حدّ حاير على حدّ ، لا حدّ متوحّش حدّ .. ملاّ ناس قدّاش مادّيين و نفعيين و قدّاش حياتهم ناقصة روحانيّات

مخيبهم
شبينا احنا البنيّة عندنا ما "يتكشّف"عليها راجلها كان ليلة "الدّخله" ، و تشرئبّ الاعناق ، اعناق الاطفال و الشيوخ و العجائز .. وحتّى القطاطس للتأكد من بكارتها ، بينما هنا دوب ما الكوبل يتعرّفو على بعضهم ، يخرجو مع بعضهم(منغير ما يخرج معاهم امّها و الا اختو ) و يسهرو، و يرقدو ، وعادي انّهم يبوسو بعضهم في الحديقة العمومية ، و الا متـــّـكّين على حيط الكنيسيّة
مخيبهم و الف مخيبهم
و قدّام كثرة الصدمات اللي تاقع ،خاصة لناس نشؤوا في اوساط منغلقة ، أحادية ، مونوتون ، ما عندهمش من المناعة الثقافية و الرحبة ما يكفي لتقبّل الاخر المختلف ، تولّي ماعادش تكفي كلمة : مخيبهم
و بحثا عن المزيد من الاطمئنان و ترضية النفس و تعزيتها في فقدان قيمها : نولّو نزيدو مع "مخيبهم " كلمة اخرى : ـ"يلزمني نكرههم ، و يلزمهم يكرهوني
خاطر في كرهي ليهم وفاء للقيم اللي جيت بيها من دارنا و من حومتي
و في كررههم ليّ تأكيد انّي مانيش كيفهم"ـ
يعني هالاجيال ورا الاجيال اللي تمشي من هنا بقابلية كبيرة لانّهم يكرهو و يتـْـكـَـرهو، هوما الوقود متاع الحركات المتطرّفه ، (اللي ، و للأسف، مستغلّين علمانية الفضاء السياسي اللي عايشين فيه و اللي سامحلهم بممارسة انشطتهم ، باش ينبّهوا الناس من خطر العلمانيةـ!!!!! )ـ قلت حركات التطرّف الديني اللي تستوعبلو مخزونات و شحنات الكره المتبادل ،اللي تزّرّقتلو في المترو و في الاسّانسار، و في الخدمة ، و مع الكونسيارج ... و تعيد انتاجها و ترجّعهالو في شكل تنظيرات تكفيرية
و كترجمة عملية لهالتنظيرات التكفيرية ، ينفّذو اعمال ارهابية ، تلتقطها و تستثمرها التيارات اليمينية المطّرفة ، في اطار تصفية حساباتها مع الحكومات ، و تحميل حكوماتها مسؤولية الازمات الاقتصادية ، و اتّهامها بالالتجاء الى هاليد العاملة المهاجرة هاذي كحلول غير جذرية لتلك الازمات
وتولّي هاك العمليات الارهابية هي اساس الشرعنة الثقافية و الفكرية لكره الآخر و رفضو ، و نتحصّلو في الاخير على موجة عنصرية جديدة اسمها : اسلاموفوبيا
و اكثرها تطرّفا هي الاسلاموفوبيا "الاستئصالية" ، اللي هي الاكثر تطرّفا ، لا يمكن لها ان تقبل "الاخر المسلم" الا وهو متجرّد تماما ، متخلّي كليّا عن اسلامه ، هاذا صحيح ، و موجود ، و خطير و عنصري و اقصائي و عدواني و ما يحترمش حرية المعتقد
لكن بالمقابل ، كيفاش تحبّ واحد يردّ الفعل وقت انت تجيه للفضاء متاعو باش تتبادل انت و اياه الخدمات ضمن صالح مشترك بيناتكم ، ياخي تولّي تسمح لروحك باش تمدّ ايدك تكسّرلو اللـّــَــوْحـَة اللي معلّقها في جدارو منذ سنوات ، و عندها قيمه كبيرة عندو ، يمكن يكون وارثها على اسلافو ، يمكن يكون معتقد في انّها مجلبه للحظ ...الخ... بدعوى انها ما عجباتكش انت ، و ما تتماشاش مع ذوقك ، سوى انّو يقابل عنفك بعنف مضادّ ، ينجم يكون أشدّ ، و يعمل عليك حصار انت و عايلتك و قبيلتك ، و يطلق احكامو المسبّقة على كل من يمتّلك بصـِلة ، على اساس انّو كيفك ، ما يحترمش الاذواق الاخرى

و هاذا طبعا جوهر السلوك العنصري ، اللي ضروري توخي الحذر منّو ، لانّو ينجّم يستهدف اشدّ الملحدين لا لشيء الا لانو ينحدر من اصول مسلمه

لكن

من الجهة المقابلة

ضروري مواصلة دفع الصراعات و مواصلة النقاشات ، باكثر ما يمكن من الصراحة و الجرأة (نسطّر عليها)ـ و الشفافية حول مسائل هامة لها علاقات فرعية بالموضوع

اهمها .. السؤال الكبير هاذا

الى ايّ حد ساهمت

صلة الاسلام/الاسلام السياسي بالعنف

تعارض الاسلام/الاسلام السياسي مع الديمقراطية

معاداة الاسلام/الاسلام السياسي للعلمانية

في نشوء ظاهرة الاسلاموفوبيا

؟