mardi 24 février 2009

اسلاموفــوبيا .. مرة اخرى

شوية ملاحظات منهجية و تنظيميه
ميسالش؟
الاكاديمية راهي ماهيش غول ، و راهي تنجّم تلامس التعمّق و الدقّة ، بل لازمها ، لكن ماهيش مرادف و الا مطابق للتعمق و الدقة ،على خاطر ينجّم نفس الخطاب يصدر من الاكاديمي و الا من الأمّي اصلا ، لكن بلغة مختلفة ، و هاذا مرهون بانّو واحد متعلّم و لاخر لا .. لذلك كل خطاب قابل للتفكيك و التأويل و النقد .. سواء كان خطابا اكاديميا و الا حتّى أس.أم.أس
زاده ، من الاحسن نكونو تفاعليين اكثر ، و نتفادوا بعض السلوكيات (حتى اللاشعورية)متاع تقزيم الاأخر و التشكيك في انّو قرا و الا اطّلع على الحاجة اللي انا اطّلعت عليها
راهو تدوينة فلان و الا مقال علّان ، ماهم الا منطلق للحديث ، و موش بالضرورة يكونو هوما موضوع الحديث الرئيسي
زادا :) ... نعطيو شوية الوقت لبعضنا باش نعملو حاجاتنا لخرين خاطي التدوين ، و الا نبطّلو ماعادش نخدمو ؟ و ماعادش نرقدو ؟ و ماعادش نعملو كعباتنا :)خاطر لاحظت اللي اكثر من مدوّن تسرّع شويّة
الحقيقة انا عملت كيف على الموضوع ، و نشّطت بيه دماغي شويّة و من الاحسن نحافظو على هالنسق
*****
نتصوّر ما ثمّاش اجماع على مفهوم شامل ، مطلق و ملزم للناس الكل حول الاسلاموفوبيا يسمح بتخطيء التعريف هذا لصالح التعريف لاخر ، بقدر ما ثمّه برشه عوامل منها التاريخي و السياسي و العقائدي و النفسي .. كلّها ساهمت و قاعدة تساهم في بناء النسيج المفاهيمي لهالظاهرة
انا نرى ضرورة عدم اهمال بعض العوامل الاقتصادية / الجيوسياسية اللي ساهمت بشكل كبير في التأسيس ليه ، خاصة في ما يخصّ السياق المعاصر للمفهوم
ما نّجّموش نتحدّثو على تأجج و تراكم مشاعر متاع خوف / رهاب / عداء/ حذر/ تحييد/ عزل/ رفض/كره للاسلام في اوروبا من غير حديث على المسلمين في اروبا
و المسلمين في اروبا في النهاية ماهم الا المهاجرين الجايين من الشرق المسلم (شمال افريقيا ، المشرق ، تركيا ... الخ)ـ
واللي احصائيا ، أغلبهم ماهمش جايين في إطار رحلات ترفيهية ، بقدر ما هم مدفوعين بسوء الظروف و البطالة و الفقر لتحسين ظروف معيشتهم في بلدانهم
بالاضافة لتداعيات الثورة التكنولوجية اللي شهدتها اروبا ، و اللي اقتضت سعي دؤوب الى ملاءمتها مع قدراتها الصناعية (نحكي هنا مثلا على مفهوم اليد العاملة البخسة كحلّ لازمة البطالة )ـ
وما يترتب على ذلك ، بطبيعة الحال ، من نشاة حالات تصادم ثقافي و حضاري بين مسلمين جايين ، بعقلية تحريمية لكلّ ما يمثـّل احتفال بالحياة ، بل اساس الحياة بالنسبة للبلدان المتقبّلة ليهم
مفارقات كبيرة و خطيرة يعيشوها حتّى على المستوى الشخصي النفسي الضيّق، مدفوعين بموروث ما يخلوش من الجمود و الدوغمائية
كيفاش في بلادي، جارنا الفولاني منعوت بالصّبع و منبوذ و مكروه و محقور لانّو يروّح سكران و يخلـْـوظ و يطـّايح ، بينما الناس هاذومه هنا ،يحطّو الشراب مع الكوفار و المنادل و كورباي الخبز على طاولة العشا ، قدّام بعضهم .. عادي؟؟ ، ويحطّو دبّوزة الشراب بحذا دبّوزة الما في الفريجيدار ، بل ، يصبّو منّو شويّه على الماكلة وهيّ فوق النّار
قدّاش الناس هاذومه أشرار ، و خايبين ، و ما عندهمش حتّى قـِــيَم ، و حتّى ضوابط ، و ما يعملو الا في الحاجات اللي ربّي قال ما تعملوهاش
مخيبهم
كيفاش انا في بلادي، البنيّة اللي يلقى بوها في كرارسها جواب من عند صاحبها تاكل طريحة ، و يبطّل عليها الخروج ، و ماذابيه يقتلها ، ويولّي يمشي مدنكس راسو و ماعادش ينجم يهزّ عينيه في العباد ،حزنا على شرف القبيلة اللي تحطّم بين ثنايا رسالة حب ، بينما هنا ،الناس هاذومه ، وقت توصل بنتهم لعمر معيّن و ما يكونش عندها صديق من الجنس الاخر ، يكون هاذا مصدر قلق بالنسبة لوالديها ، و موضوع نقاش حول الخلل اللي وقع في تربيتها ، و كيفاش انّو مادام ما عندهاش صديق معناها يا معقّدة ويا عندها ميولات مثلية
مخيبهم هالناس ، ديوثين ، ملعونين ، زناة ، خبثاء . ما يحبّوش يفهمو اللي راهو كل ما يتقابلو مرا و راجل ، يجي بيناتهم الشيطان
مخيبهم
شبينا نحنا في بلادنا نسلّمو على بعضنا برشه مرّات في النهار ، و في كلّ مرّه نقعدوا بالدقايق نـْوَشــْــحْـلو، ونسألو عالاحوال متاع الاحوال متاع الاحوال ، وعلى الصحّة و على فلان عرّسشي ؟ و على فلانه ولدتشي ؟ و على فلتان علاش طلّق ؟ و على فلتانة رفعتش صحّتها ؟ و..و..و بينما هوما لهنا بالعكس باردين ، لا حدّ ساءل على حدّ ، لا حدّ حاير على حدّ ، لا حدّ متوحّش حدّ .. ملاّ ناس قدّاش مادّيين و نفعيين و قدّاش حياتهم ناقصة روحانيّات
مخيبهم
شبينا احنا البنيّة عندنا ما "يتكشّف"عليها راجلها كان ليلة "الدّخله" ، و تشرئبّ الاعناق ، اعناق الاطفال و الشيوخ و العجائز .. وحتّى القطاطس للتأكد من بكارتها ، بينما هنا دوب ما الكوبل يتعرّفو على بعضهم ، يخرجو مع بعضهم(منغير ما يخرج معاهم امّها و الا اختو ) و يسهرو، و يرقدو ، وعادي انّهم يبوسو بعضهم في الحديقة العمومية ، و الا متـــّـكّين على حيط الكنيسيّة
مخيبهم و الف مخيبهم
و قدّام كثرة الصدمات اللي تاقع ،خاصة لناس نشؤوا في اوساط منغلقة ، أحادية ، مونوتون ، ما عندهمش من المناعة الثقافية و الرحبة ما يكفي لتقبّل الاخر المختلف ، تولّي ماعادش تكفي كلمة : مخيبهم
و بحثا عن المزيد من الاطمئنان و ترضية النفس و تعزيتها في فقدان قيمها : نولّو نزيدو مع "مخيبهم " كلمة اخرى : ـ"يلزمني نكرههم ، و يلزمهم يكرهوني
خاطر في كرهي ليهم وفاء للقيم اللي جيت بيها من دارنا و من حومتي
و في كررههم ليّ تأكيد انّي مانيش كيفهم

يعني هالاجيال ورا الاجيال اللي تمشي من هنا بقابلية كبيرة لانّهم يكرهو و يتـْـكـَـرهو، هوما الوقود متاع الحركات المتطرّفه ، (اللي ، و للأسف، مستغلّين علمانية الفضاء السياسي اللي عايشين فيه و اللي سامحلهم بممارسة انشطتهم ، باش ينبّهوا الناس من خطر العلمانيةـ!!!!! )ـ قلت حركات التطرّف الديني اللي تستوعبلو مخزونات و شحنات الكره المتبادل ،اللي تزّرّقتلو في المترو و في الاسّانسار، و في الخدمة ، و مع الكونسيارج ... و تعيد انتاجها و ترجّعهالو في شكل تنظيرات تكفيرية
و كترجمة عملية لهالتنظيرات التكفيرية ، ينفّذو اعمال ارهابية ، تلتقطها و تستثمرها التيارات اليمينية المطّرفة ، في اطار تصفية حساباتها مع الحكومات ، و تحميل حكوماتها مسؤولية الازمات الاقتصادية ، و اتّهامها بالالتجاء الى هاليد العاملة المهاجرة هاذي كحلول غير جذرية لتلك الازمات
وتولّي هاك العمليات الارهابية هي اساس الشرعنة الثقافية و الفكرية لكره الآخر و رفضو ، و نتحصّلو في الاخير على موجة عنصرية جديدة اسمها : اسلاموفوبيا
و اكثرها تطرّفا هي الاسلاموفوبيا "الاستئصالية" ، اللي هي الاكثر تطرّفا ، لا يمكن لها ان تقبل "الاخر المسلم" الا وهو متجرّد تماما ، متخلّي كليّا عن اسلامه ، هاذا صحيح ، و موجود ، و خطير و عنصري و اقصائي و عدواني و ما يحترمش حرية المعتقد
لكن بالمقابل ، كيفاش تحبّ واحد يردّ الفعل وقت انت تجيه للفضاء متاعو باش تتبادل انت و اياه الخدمات ضمن صالح مشترك بيناتكم ، ياخي تولّي تسمح لروحك باش تمدّ ايدك تكسّرلو اللـّــَــوْحـَة اللي معلّقها في جدارو منذ سنوات ، و عندها قيمه كبيرة عندو ، يمكن يكون وارثها على اسلافو ، يمكن يكون معتقد في انّها مجلبه للحظ ...الخ... بدعوى انها ما عجباتكش انت ، و ما تتماشاش مع ذوقك ، سوى انّو يقابل عنفك بعنف مضادّ ، ينجم يكون أشدّ ، و يعمل عليك حصار انت و عايلتك و قبيلتك ، و يطلق احكامو المسبّقة على كل من يمتّلك بصـِلة ، على اساس انّو كيفك ، ما يحترمش الاذواق الاخرى
و هاذا طبعا جوهر السلوك العنصري ، اللي ضروري توخي الحذر منّو ، لانّو ينجّم يستهدف اشدّ الملحدين لا لشيء الا لانو ينحدر من اصول مسلمه
لكن
من الجهة المقابلة
ضروري مواصلة دفع الصراعات و مواصلة النقاشات ، باكثر ما يمكن من الصراحة و الجرأة (نسطّر عليها)ـ و الشفافية حول مسائل هامة لها علاقات فرعية بالموضوع
اهمها .. السؤال الكبير هاذا
الى ايّ حد ساهمت
صلة الاسلام/الاسلام السياسي بالعنف
تعارض الاسلام/الاسلام السياسي مع الديمقراطية
معاداة الاسلام/الاسلام السياسي للعلمانية
في نشوء ظاهرة الاسلاموفوبيا
؟

21 commentaires:

الزبراط a dit…

لاول مرة بش نعلق فالميضوع....اللي ولا ميضوع الساعة
براستوس افحمتني....يعتيك الصحة مقالة متميزة....سينون هاني نقاسي فاك الشلاكة زياد طارق بن يوسف عالفايسبوك ملا وبش ترزيت بيه

hatim a dit…

Pour commencer, tu parles de "comportement civique"; regarde le commentaire de ce zabrat! en voila du civisme, on peut pas mieux faire, sinon c'est un tres bon scénario, ce que tu as écrit de ces immigrés illettrés qui faute de ne pouvoir se faire "ASSIMILER" dans cet occdient finissent par devenir de la chaire fraiche pour tous ces integristes terroristes qui pullulent et abusent de l'hospitalité occidentale; un bon producteur et t'es bien parti pour l'Oscar 2010!!
Ils ont tort ces immigrés qui ont fini par encourager une espèce d'islamophobie qui touche en premier lieu Achour et compagnie!!!

الزبراط a dit…

هذا هو نوع مالحثالات اللي كرهوني فاك البلاد
@الحثالة
تحبشي زادة انتي تمشي تعمل هاك القضية توا شمجبدك في عند الناس ماني مرمدتك قبل وهبطت راسك ومشيت كالذليل لواش الدروشة

brastos a dit…

ceux qui ne retiennent de ce qu'ils lisent que ce qu'ils veulent EUX retenir !!!
en voilà un exemple
sinon ce n'est absolument pas ça ce que je voulais dire
je voulais par contre mettre en valeur l'idée que de notre part , nous avons participé à installer et à dresser ce phenomene d'islamophobie , meme sans le vouloir
tu ne vas pas m'apprendre qu.meme que les tendances occidentales racistes en sont également responsables ( faut pas dire comme ça : "occident" .. l'occident n'est pas un corps homogène qui n'encaisse que de la haine et de l'hostilité envers nous ! c'est plutot un ensemble de conceptions,de profits,d'orientations, de points de vue ...

vaudra mieux aller regler tes comptes avec zabrat et achour chez eux
autrement .. c'est ta premiere visite et je ne peux te dire que: marhba

hatim a dit…
Ce commentaire a été supprimé par l'auteur.
hatim a dit…

Brastos, je me suis un peu précipité dans mon commentaire, comme tu l'as fort bien précisé au debut de ton post, c'était une réaction sur le vif. Sinon ça va de soi que nous sommes pour une partie responsable mais n'oublions pas non plus la responsabilité d'une certaine 5 eme colonne" qui qu'on le veule ou non existe bien". Dernierement il y'a eu une certaine généralisation de part et d'autre et c'est dommage, perso je ne mets pas tous les "Ayyahè lèdini... ds le mm sac" c'est pourquoi, loin de moi l'idée de dire que tout l'occident est pourrit, apres tout je vis dedans. )Sinon c'est tjrs un plaisir de passer chez toi, chez Mani et d'autres mm si on ne partage pas les mm idées..

عياش مالمرسى a dit…

شكرا براستوس، يظهرلي تعرف رأيي في الحكاية و خاصة جواب السؤالات الأخيرة، بالطبيعة الإسلام أو الإسلام السياسي عندهم دور كبير في الإسلاموفوبيا، واحد فرانساوي يسمع لي جماعة مسلمين عاملين بيسين مخصصينها للنساء تحبّو ما يتفجعش؟ واحد نهار نهارين يسمع بمجلود في مريتانيا ولاّ معدوم في إيران اتحبّو يصفق و يغني الإسلام هو الحل؟ المسلمون هم الوحيدون القادرون على قتل الإسلاموفوبيا، و ذلك بتطهير أنفسهم من بعض التصرفات و العقائد التي تقتل الحرية في البيضة و تستأصل كل طموح للتطور..

eddou3aji a dit…

:)) mafhemtech china l'academie elli ennas el Sol ya7kiw 3liha...allahomma ya7kiw 3la star academie :)) el 5itab el acadimi 3andou blayess yetekteb fiha touch nesta3mlouh fi 9aleb 3arka....ou did china el 3elm wa ills el i5tissas elli ja fit hal mostala7 mta3 el islamouloubia hadha... Mahou 9oulounna 5alli nchoufouh haddomaine ejjedid hadha...el 7assel t5alwidh...kid rajol eddine elli i7ebb yahdi 9abila ifri9iyya ou ya7kilehom 3al 3adl ou el 7a99 ou houma i7ebbou yakelouh

hatim a dit…

@Ayyech, faut pas exagerer, les français ne sont pas si "délaicats" que ça pour s'offusquer d'une piscine réservée aux femmes, d'ailleurs ça marche tres bien depuis des mois dans une ville du nord de la France; dans une piscine municipale des musulmans ont demandé un horaire spécial pour les femmes et a priori y'auraient de plus en plus de chrétiennes a venir a cette heure. Et puis le condamné en Iran, a ma connaissance c'est aux Etats Unis qu'il y'ait le plus grand nbre de codamnés a mort! Continuer a évoquer des cas isolés et en faire des généralités c'est improductif, ceci dit oui les musulmans ont interet a évoluer avec leur réligion.

Hnani a dit…

كلام صحيح و واقعي و زيد التطرّف إلّى موجود عند المهاجرين تلقاه خاصة في الحوم الفقيرة، إلّى عايشين ناقمين على بلادها الأصلية إلّى كانت السبب في هجرتهم و على البلاد إلّى يسكنوا فيها على خاطر ما عطاتهمش الشيء إلّى حلموا بيه
معناها يعيشوا اليأس من بلادهم ومن البلاد إلّى هاجرولها "البحر أمامكم والعدو ورائكم" و من ثم الدنيا تكحال في عينيهم

Anonyme a dit…

Brastos, permettez moi de publier un commentaire que j'ai écrit en réaction à la note d'articuler مسلم،علماني،قومي،إنساني،متملح:هذه الاسئلة لابد من الأجابة عليها mais comme j'ai pas de compte, je la publie ici.

Merci Articuler pour cet note.
Je vais te répondre et la réponse est des plus simples. Nous sommes des amazighs comme les égyptiens sont des égyptiens. Nous avons connu l'arrivée de peuples étrangers sous différentes formes surtout celle de la colonisations. Pareil pour l'Égypte. Mais la question est: ourquoi l'égyptien d'aujourdhui s'est approprié l'histoire de l'ancienne egypte alors que le tunisen et nord africain passe son temps à énumérer chaque fois tous les peuples qui nous avaient visité pour arriver à la conclusion que le tunisien n'est qu'un enfant bâtard. Est ce que jouer sur "l'origine carthaginoise de l'identité tunisienne" est la solution? Mais carthage mchet walla jet est un produit et héritage(du moins idéologique et politique) de phéniciens, donc d'un peuple étrangers. Cette identité dilué des tunisiens et des nord africain n'est pas la cause de notre crise identitaire actuelle?

brastos a dit…

@ dou3aji
islamoloubia :):):):):)
باهي
شبيه اسّع الكلافيي متاعك ما يكتبش بالعربي ؟؟
يا خويا ملاّ اس ام اس هاذا كتبتو
ههههههههه

عياش مالمرسى a dit…

لا حاتم غالط لي تقول فيه، البيسين في فرنسا ماهيش مقبولة بالطريقة هاذي و كالنهار بركة في أرتي برنامج كامل عالحكاية ناس مش عاجبها الشي، و زيد ثمة جماعة حبو يمنعوا النسا المسيحيات قالك جسم المرأة المسلمة أمام المرأة الكافرة عورة، و مانيش نخترع.. على حكاية الإعدام، ثمة فرق بين أمريكي يعدموه خاتر جبد متريوز قتل أربعين روح و إيراني يعدموه بسبب المثلية الجنسية... و منّا ولاّ منّا عمرك لا لازمك تنقص من قيمة الأحداث المعزولة كيف ما عملت توّة، على خاتر الآراء و التاريخ بيدو مبني على أحداث هكة، الّي هيّا كيف كرة الثلج تمشي و تكبر مع الهبطة...

brastos a dit…

@ hnani
احيانا تلقى ظواهر مشربكه و خطيرة و متفشّية ، وهي كي تجي تشوف منشأها تلقاه واضح : فقر حرمان بطالة فراغ
كل شي مربوط ببعضو

brastos a dit…

@ hatim
ne pas se mettre d'accord sur une idée n'est pas un drame .
le drame c'est negliger et mepriser l'autre a cause de son idée
pasde probleme

brastos a dit…

@ ayyach
بالاضافة لاتهام "الغرب" بالعداء لينا و لديننا و لدنيتنا الكل .. ضروري اننا نخرجو زادا من بوتقة الضحّية اللي الغرب يكرهها و يحبّ يدمّرها و ينفيلها كيانها الحضاري و مافيها باس كي نفرّكو رمّانتنا و نتلفّتو لخنّارنا
ادبيات الاسلام قايمه على اساس رفض الاخر و تكفيرو ، و هاذا نتصوّر حتّى محاولات "التجديد الديني" و الا "فقه المقاصد" يصعب عليهم مسّانو
ياخي ينجّم التجديد الديني ما يكفّرش المسيحيين و اليهود و الملاحدة
؟؟؟
ما نتصوّرش
و فقه المقاصد و محاولات التجديد الديني ماهي الا تعبير على المأزق اللي تنجم تتحطّ فيه الاصول

Gouverneur de Normalland a dit…

je trouve que ton article et les commentaires en disent beacoup sur l'islamophobie ...

tu commences ton article par une objectivité brillante et puis cela dérappe : tu stériotype les emmigrés en faisant une description approximative d'un shéma particulier ...une vision péjorative frollant un certain racisme

j'en conclus que le probleme est dans les representations ... comment on se voit et comment on voit l'autre ...

nous etions un peuple colonisé et bien que la plus part des civilisations ont su depasser les canons et les represenations coloniales ... nous, ne sommes pas encore prét a le faire ... ni ne pas nous voir dans un miroir sans y cracher dessus.

3amrouch a dit…

نعتقد ان نظرتك للمهاجرين ومعلوماتك عنهم توقفت عند حدود عام 80 على الاكثر 90 ولا من مخالطتك للبعض منهم الي هاجروا بعد الحرب وقتلي جابولهم البواخر وقالولهم اطلع اخدمو في البناء
مافيها باس تعمل تحيين لمعلوماتك وتحاول تتطلع على رجال الاعمال الناجحين ولا حتى اساتذة مرموقين يدرسوا في ارقى الجامعات وتحاول تستقى معلوماتك من اماكن اخرى غير اعلام فرنسا الرسمي
تبدلت راهي الوضعية باررررررشة
وانت تعرف انو الطبل الاجوف هو الي يعمل برشة حس بمعنى موش على خاطر سمعت بمشكلة اندماج للبض من ابناء المهاجرين باش تعمم الامر

ART.ticuler a dit…

كلامك فيه الكثير من النقاط إلي في الحقيقة كل نقطة تستاهل تدوينة خاصة.
الصراع التقليدي إلي نعيشوه في الدول متاعنا بين الأصالة والمعاصرة يتعاش في الدول الأوروبية بصيغة أقوى واعنف ..على خاطر إبن وبنت المهاجر وليس المهاجر مباشرة (وهذا موضوع يستحق تدوينة وحدو) يعيش التناقض الكبير بين العائلة ذات الأصول المحافظة عادة والمجتمع الأوروبي بصفة يومية و مباشرة.أي أنه يحتك "بالمعاصرة" ملي يحط ساقو خارج باب الدار.إضافة بطبيعة الحال إلى التهميش الاجتماعي والاقتصادي إلي يتعرضلو
من طرف المجتمع إلي هو وحسب القانون والجنسية ينتمي إليه..
وبالتالي عندنا ككتال مثالي لصنع قنابل موقوتة تنفجر في أول مناسبة كيما إلي صار في ضواحي باريس.
لكن هنالك جملة من التساؤلات المشروعة التي يجب طرحها:
1 - علاش التصادم واقع كان مع المسلمين و العرب منهم تحديدا؟
2- علاش "الجالية" اليهودية رغم أنها تمارس طقوسها الدينية من ذبيحة وطهارة وغير ذلك (حق منصوص عليه في الدستور الألماني فقط لليهود) ولا يوجد أي نقد بل مجرد نقد يوديك في داهية كيما قال المصري ؟؟
3- علاش الماكينة الاعلامية لاهية كان بالعرب والمسلمين؟
وفي المقابل (وليت كيما في الاتجاه المعاكس هههه)
علاش المسلمين إلي يستنفعو من الضمان الاجتماعي ويجيبو في الصغار فقط من أجل الحصول على راتب من الصندوق،باقي يعتبرو رواحهم في "دار الحرب"؟؟
2- علاش في بلاد "الكفار" نسبوهم و نسبو لغتهم و كيف يروحوا لبلدانهم ما يحلالهم الكلام كان بالفرنسي؟ -فرنساوية تكسر الكرايم-
3- علاش من حضارة كاملة نعيشو فيها ما نجيبو منها كان فريجيدار على سطح سيارة باركة والبقية تفش وشوالق؟
والأسئلة ما توفاش..لكن الأكيد أن المسلمين ساهمو بشكل كبير في إعطاء الصورة البشعة إلي يحملها الغرب علينا بل أصبح وصف إنسان ب"عربي" شتيمة كبرى!!!

brastos a dit…

Gouverneur

Le probleme c’est cette culture de haine et de préjugés (takfir par exp) qu’on enracine dans l'homme dés son enfance
bien que je ne pretende pas donner de solutions , mais je suggere qu’il faut comprendre qu'on peut être différent des autres en adoptant une religion ou également en ayant des options politiques, sociales ou culturelles différentes des autres, et meme opposantes à cette religion
Une telle différence ne doit pas être synonyme de haine ni d’hostilité

Il arrive qu’on soit non satisfait de la maniere dont les autres pensent , cela ne doit en aucun cas aboutir à la violence

Ça m’a honoré la visite de Sa Majesté

:)

brastos a dit…

3amrouch
و انت زادة ما فيها باس لو كان تعود تتفادى الاستنتاجات السريعة
:)
انا ما حكيتش على كل المهاجرين ككتلة وحدة و الا كلاسيتهم في سجلّ واحد و ادّعيت انّهم الكلهم تعرّضوا للتأثيرات المطّرفة هاذيكه
ما تتسمّاش اضفت حاجة كبيرة كي تقلّي راهم رجال اعمال و دكاترة و غيرو ..
انا حكيت بالتحديد على اللي تورّطو في الاعمال هاذيكه و حاولت نرجع للبلاتفورم الاقتصادي كمساهم في تشكيل هالمفهوم متاع الاسلامكوفوبيا

ثم اني ما فهمتش اشنوه علاقة تعليقك بالموضوع