vendredi 20 février 2009

يا لطيفو .. يا لطيفو .. يا لطيفو .. يالطيفو ..بجاه مبارك...أعف عنّا يا أوباما

بقدر ما نتفهّم الطــّـمع الساذج اللي يصدر من بسطاء الناس في انّو اوباما يسلك سياسة منصفة للعرب و المسلمين ، لانّو فيه جينه متاع مسلمين و الا افارقة و الا اللي هوّ .. هالطّمع هاذا يتفسّر بحالة العجز على صنع الاحداث و على الفعل فيها و التاثير فيها ، عجز مزمن و متوارث عبر اجيال و اجيال ، عجز ناتج على حالة ارادة مسلوبة ، و ثقة مهزوزه بل معدومه في الذات ، و هذا بالطبيعة ، وبعيد على نظرية المؤامرة، هالبهيم القصير متاع المنظّرين لثقافة الانهزام ، ماهوش بمعزل على مخطط محكم متاع تجهيل و تسطيح و تصطيك .. بالشكل اللي عبّر عليه نجم و الشيخ في الكليمتين هاذومه

ما تتعبش عقلك ... قال قال قال
في شغل السياسه ... قال قال قال
و شوف انت شغلك... قال قال قال
بهمّه و حـَماسَه
و عوّد عيالك فـَضيلـْة الرّضـا
لأنّ احنا طبعـًا عبيــد القـــَضا

يعني هالمواطن اللي وقع تشكيل وعيو بالطريقة هاذي .. بالخصوص بعد ما أصابوه في مقتل وقت اللي ذبّحولو آخر "رموزو" .. وآخر " آمالو" مع علّوش العيد.. و جعلوه رغما عنه يتذوّق طعم لحمهم ، عادي جدّا باش يختزل ردّ فعلو تجاه حالة الانحطاط اللي نعيشوها في مجرّد تضرّعات و تمتمات و صلوات في هيكل باراك و الا غيرو .. في مراهنة ساذجة عاجزة مثيرة للشفقه على ريحة جينة

أمّا أن يراهن "المثقّفون" على هذه الجينه... هههه .. و يسجدون حمدا و شكرا و اعترافا بالجميل لهذا المسيح المخلــّص الجديد .. لمجرّد إيذانه باطلاق سراح فرد في بلد كل أفرادو سجناء .. فهذا أمر مخجل أو/و مخزي

مخجل إن كان ينبع عن جهل بالتاريخ ، و بالتصريحات "الافتتاحية " اللي عادة ما يبشّر بيها الزعماء لمريكان في بداياتهم قبل ان تنطلق اللوبيات و الاسهم في تقديم الطبق الرئيسي

و مخزي إن كان ينبع من جماعة التأسيس لـ"ديمقراطية الدبابات" اللي كيما سبق و قلت ، هوما أوّل من يبول عليهم ايّ احتلال بعد الاستقواء بيه

ايّ .. الناس الكل .. صوت واحد

لبّيــك اوبامااااااهـُـمّ .. لبّـــيـْـــك
لبيك لااااااااا شريك لك لبّـيْــك
إنّ الحمد .. و النعمة .. لك و الملك
لاااااااااا شريك لكْ
يا لَــَطيفُ .. يا لــَطيفُ .. يا لطيفُ .. يالطيفُ.. يا لطيفُ .. يا لطيفُ .. يا لطيفُ .. يالطيفُ.. يا لطيفُ .. يا لطيفُ .. يا لطيفُ .. يالطيفُ

5 commentaires:

3amrouch a dit…

انت ضاهر فيك مفهمت شي براستوس
تنويع وتنوع اسموا هذاكة
خبير من هنا خبير من هناك على شوية انتفاضة حراق وهاني نحكي على بلادي ومانيش ديما نلوك في نفس اللوبانة
ارجوك براستوس فند الحجة بالحجة وقارع الفكرة بالفكرة ههههه مااحلها الجملة
عيشك هذاكه من أكثر المدونين غزارة في التدوين
هزلت

brastos a dit…

عمروش
لا علاقة لتدوينتي بما ذكرت
و كنت اتمنى ان تتوجه بما اردت قوله الى المعنيين مباشرة .. عوض استغلال مدونتي للنميمه
:)

تدوينتي مستوحاة من بعض ردود الفعل هنا

http://us.moheet.com/show_files.aspx?fid=224002

3amrouch a dit…

لم افهم عمن تتحدث بالضبط وعن اية تدوينة ولا لن تريدني ان اتوجه بالضبط فلا باس
وكل مافي الامر انني نسيت انه لم تعجبك تدوينة القرد ...صحيح كنت كتبتها من وحي اللحظة فلم اعر الامر اهتماما
على كل لا اعتقد انني قلت شيء خطا فيها اعدت فقط ما قلته انت
ولعلمك فقط الشيء المذكور في حديثك يسمى غيبة او بهتانا ولكن الامر لو فرضنا جدلا انني اتحدث عن شخص معين فالاصل هو الحديث الصحيح : (اذكروا الفاجر بما فيه كي يحذره الناس).فالغيبة إذا في المرء الذي يستر نفسه بينما الفاسق المعلن لفسقه المجاهر بمعصيته لا غيبة له ، أى لا إثم فى اغتيابه
وشكرا

brastos a dit…

عمروش
رجاء و اسمحلي في التغبير اللي باش نستعملو معاك

انت تلعب في حمرا كحله

انت في تعليقك لوّلاني تلمّح لتدوينة عاشور اللي حكى فيها على مظاهرة الحرقه متاع ايطاليا و حكى فيها على ايمن نور و باراك

و هاهيّ التدوينه : http://exmouslem.blogspot.com/2009/02/blog-post_19.html


و زاده تحكي على تعليق ازواو في تدوينة جنّي البوبالة هاذي : http://ejjenni.blogspot.com/2009/02/blog-post_19.html

تعليق ازواو فيه عبارات من نوع فنّد الحجة بالحجة و من نوع اكثر المدونين غزارة في التدوين

و هي نفس العبارات اللي استعملتهم انت في تعليقك لوّلاني

حتّى توارد الخواطر ما يجيش بالدّقة هاذي

هاذاكه علاش انا اعتبرتك "تقطّع و تريّش " في الناس في مدوّنتي انا

بعد هاذا الكل .. تجي تقلّي لم افهم عمن تتحدث بالضبط

!!!!!!!!

في شكون تستغبى عيش وخي ؟؟؟

و هي ليست المرة الاولى التي تستعمل فيها اسلوب غير صادق و غير امين :) من نوع : تلسع .. و كي تتشذّ .. تنكر و تقول : "لا ما نقصدش ، ياخي علاش تحكيو؟

الاسلوت هاذا موش مستحب .. و يظهرلي اه ؟ مانيش متأكد، اما يظهرلي حرام
:)
انا ما نتبلّاش لا عليك لا على غيرك

انت تقصد في عاشور و ازواو .. لا داعي للانكار

مسكلة اذا الواحد ما يتحمّلش مسؤولية مجرد تعليق

لا علاقة لهذا بتدوينة القرد .. هاذيكة مشات على روحها

3amrouch a dit…

براستوس
ت
توة انا مستانس نترجع في كلامي؟
شكون حكالك عليها هاذي؟
من قبل متجي انت وغيرك كنت اول من تصدى لاستفزازت ديانا مغازين وللامراض متاع المدعو عماد ومن بعد الهالك باذن الله
هذا من شيرة ومن شيرة اخرى لم يسبق ان علقت باسم مستعار ولا انونيم ولم اتخفى قط
لي منهاج واضح لم احد عنه يوما ولن احيد عنه باذن الله
افكاري هي بيدها ولم تتغير يوما
ديانا مغازين تحسن عن السابق واصبح يعبر عن افكار ويناقشها بجدية رغم اختلافي معه ،راجع تدوينته الاخيرة وقيمة التعاليق والتبادل الذي تم فيها وهو شيء لم تشهده تن بلوق منذ زمن
لنعد الان للهالك فالكل يعلم وهو اولهم انني اكرهه في الله واكره تصرفاته وافكاره وهذا شيء ليس بجديد ولذا لن اتخفى
واختم بالسيد ازواو الذي والحق يقال وهي فرصة للتوضيح لا احمل ضده اية ضغينة او عداوة صارت نقاشات في افكار وانتهى الامر منذ زمان ولم يلبث له ان تعرض لي شخصيا فلا داعي هنا لتعكير الاجواء الغير المقصود
ماقلته كان مجرد مزاح لا غير ولا اعلم لما اخذت الامور بمثل هذه الجدية واضعت وقتك في البحث عن الادلة واضعت لي وقتي معك في الرد
تنفس براستوس وطيب كعبات فول وشوية كمون كمية وريقل جوك احسن