jeudi 26 février 2009

المناقشات على البلوغسفير : سيناريوات مكرّره ..ممــلّة..ممجوجة...لابدّ من تجاوزها

التكرار ممــلّ .. حتّى في الحاجات المستحبّه
و تكرار الحاجات السيّئة ، يولــّي زيادة على كونو ممل و ماسط ، يبعث على التّساؤل الآتي : ياخي احنا قاعدين نطّوّروا ؟؟
ياخي هالبلوغسفير قاعد يطوّر فينا و نطوّروا فيه ؟؟ و الا قاعدين نضيّعوا في الوقت خاطر قالقين و مكبوتين ؟؟
السيناريو الماسط اللي يتكرر هوّ الآتي
يبادر احدهم بطرح فكرة للنقاش
يتفاعل معه الجميع
كلُّ حسب مرجعياتو ، و اطّلاعاتو ، و تجربتو ، و معارفو ، و تصوّراتو ، و انفعالاتو ، و انطباعاتو
احنا الكلّنا جايين من اتجاهات فكرية مختلفة ، و كل واحد فينا عندو مصادرو اللي يرجعلها و ياثق فيها ، نشالّة حتّى خرافات جدّايتو :) ـ
يا اخي انا هكّاكه ، ما نحسّش روحي مرتاح كي تحطّني في صندوقك مصادر معرفتك انت فقط
قد احترمها
و لكن قد لا اكتفي بها
قد تكون فكرتك واضحة في ذهنك انت قبل ما ننشرها ، لكن قد يحدث أنّها ما تكونش واضحة لغيرك، لايّ سبب من الاسباب غير القصور الذهني على الفهم ، قد تكون فكرتك جيّدة لكن اسلوبك ملتوي و ركيك ، يعني انّي نقول ما فهمتش خير ملّي ندّعي الفهم

يظهرلي ما ثمّاش شكون فينا يملك المعرفة و الحقيقة و الصحّه باش يبدا هوّ قاعد هكّه كيما رمسيس ، و الا رع و منقرع ، في ربوة الصفاء و المطلق المعرفي ، و الناس تحاول منّا و منّا تتسلّق هاك الربوة و هوّ شادد رمح طويييييل ، يلكز بيه في الجماعة ، يخطــّأ في هاذا و يقزّم في لاخر و يتفــّه في الاخرى و يمهزل في هاذاكه و يصنّف في الردود الى انصاف ردود و اشباه ردود ، و هو اللي يقرّر اذا كان هاذا فعلا نقاش و الا لا
و اللي يتهيألو ، ولو لـعشر ثانية ، انّو جدير بالموقع "الرّبـْـوَوِي" هاذا ، فإنّو مدعوّ لانّو يراجع روحو
و كلمة يراجع روحو هنا ، ما قلتهاش جزافا ، بل انا اعيها جيّدا
بمعنى
و بكل صراحة .. و بين قوسين اللي باش نقولو الكلّ عندي فيه روابطو ،امّا مانيش باش نحطّها .. خاطر "ماعنديش وقت" .. و اللي حاجتو برابط يطلبو
موش من قبيل الصدفة انّو ، و في كلّ مرّه ، نفس الملاحظة ، تصدرعلى اكثر من مدوّن ، فيهم حتى اللي هوما بيدهم ما يتّفقوش بالكلّ ، تجاه مدوّن آخر
نركّز هنا على كلمة "فيهم حتى اللي هوما بيدهم ما يتّفقوش" اللي نتصوّر انّها تنفي امكانية لتسرّب عقلية التآمر على ايّ كان
في برشه مناسبات متاع نقاشات في مسائل ذات اهمية فكرية ، توفى بنـَـتـْـنـَه : يا تسحيته من البلوق ، يا اعطاء دروس اورتوغراف بشكل تهكّمي ، في الفرق بين ال شمسية و ال قمرية ، يا نعت الناس بعضها اليعض ، ببعض الامراض النفسية .. زعمه زعمه سبّان "ثقافي" ـ

انا على ما حضرت
ثلاثه مسائل تناقشت و وفات بنتنه من النوع اللي حكيت عليه ، عندها علاقة بالمقدّس
العلمانية
الاسلاموفوبيا
الهوية التونسية/عربية/اسلامية/ايمازيغية
يعني ثبّتو و ركّزو معايا في المعادلات هاذي
اذا نلقاو انّو نفس المدوّن شارك في النقاش في المسائل هاذي ، و الكلّها وفات بنتنه
و اذا نلقاو اللي ، مثلا، اللي شاركو في نقاش العلمانية
موش هوما بالضبط اللي شاركو في نقاش الاسلاموفوبيا
موش هوما بالضبط اللي شاركو في نقاش الهوية التونسية
و فيهم حتّى اللي ما بيناتهمش علاقة (تدوينية بالطبع)و فيهم حتّي اللي كانوا اصحاب و تنابزو
شنيّة ممكن لواحد محايد يستنتج ؟ـ

ثمّه اللي ما شاركوش بالكل في المناقشات الاخيرة ، رغم انّا الكل نشهدولهم بالكفاءة و التجربة و سعة الاطلاع و الاضافة و الطرافة و سلاسة الاسلوب ، و هي في نظري اكثر اهمّيه من انها تكون افكارهم "صحيحه" و الا "غالطة"ـ

زعمه علاش ؟ـ
ما عندهم ما يقولو ؟؟ ـ
ما نتصوّرش

نتصوّر اقرب اجابة للصحّه هي انّهم لم يريدوا تكرار تجربة فاشلة

فاشلة موش بمعنى انّو كل واحد ما اقنعش لاخر بوجهة نظرو ، و انّما فاشلة في انها هالنقاشات ما نجحتش باش تكون مدرسة لقيم حوارية متحضّرة قايمه على قبول الاخر المختلف ، و محاججتو

ديمه نفس المشهد .. بالعمل شي يضحّك : واحد تطغى على لهجتو روح تتفيه و تسذيج و تقزيم الخصم المختلف، مقابل التهليل للصديق المخطيء
ناس، مشتركين في انزعاجهم من اللهجة هاذيكه ، فيهم شكون يولّي يشدّ ببوشتو ، و فيهم شكون يتشنّج و يتوتـــّــر يردّ الفعل بلهجة شبيهة
ولّتش عركه ؟؟؟ اكاهو .. سهم تصفيرة ، القارد كورات تكون حاضرة

نحكيو شويّه توّه عالقاردكورات

السيناريو لاخر اللي تعاود بشكل كاريكاتوري بالجّد ، هو انّو ثمّه بعض المدوّنين اللي ما يفرّقوش بين الصّداقة الناضجة الواعية الحكيمه ، و بين النصرة و الولاء و الحـميـّه او الهبّه القبلية
من الجهات المختلفة

ثمّه ناس ما شاركوش بالنقاش في المسائل الثلاثة اللي ذكرتهم على سبيل المثال ، الا وقت نتنت ، و بدا العرك ، تقولش واقع انتدابهم للغرض هاذاكه

و اللي يذكّروني بسلوك متخلّف كان يتسلك في الجامعة التونسية ، و هو انّو الاطراف السياسية كانت تستقطب بعض الطلبة من ذوي الامكانيات البدنية الهائلة الصالحة للعنف ، و اللي كانو ما يشاركوش في حلقات النقاش و ما يدّخّلوش في الاجتماعات العامة و الاجتماعات الداخلية ، على خاطر القيادات متاعهم ما حاجتهمش بيهم باش يفكّرو حتّى هوما ، حاجتهم بيهم كان باش يحموهم وقت اللي يبدوا هوما يدّخّلو ، يبدعوا ، يخطبوا ... كل مهمتهم هي التدخّل بالعنف

انا إذ احترم كلّ طاقة فكرية ذكيّة و محترمه و نافذه و ثاقبه و متخصصة ومطّلعة و مواكبة ، فإنّي لا احترم ما يمكن ان يصدر عن هذه الطاقة من لهجة استعلاء و تلقين .. تحدث احيانا بشكل لاشعوري ، او بشكل تعوّدي ،
و ما جدوى الذكاء اذا ما حاولش يسيطر حتى على جزء صغير من اللاشعور
يزّينا من المكر .. الكلّنا .. من نوع : انا ميسالش كي نقول شبيكم ما جاوبتونيش و ما تفاعلتوش مع تدوينتي و الا مع مقالي ، و كيف يقولها واحد اخر ، يتحاكم
من نوع : انا ميسالش كي نهلّل للتدوينة البذيئه كي تصدر من صديقي ، بل نبرّرها و نشرعنها و اكثر من هاذا نعمللها دعاية ، لكن نستنكرها من خصمي ، و من بعد نمشي نمارس وصايتي على الناس و نقوللهم شبيكم تصوّتوا للتدوينات البذيئه
من نوع : انا لبارح حاطّك في ليسته متاع اصدقاء و اشقــّاء ، و كي انت اليوم "تخاصمت" مع صاحبي ، تولّي حثاله
ياخي قدّاش اعمارنا بربّي ؟؟؟ ـ

ياخي لهالدّرجة اختيارك ليّ و تفضيلك ليّ متاع البارح ... البارح بركه ... كان هشّ و مهزوز و ماهوش راكز ؟؟؟ـ
شنيّة اللي وقع بين البارح و اليوم باش انا نعمل هالتنقيزة متاع ميا و ثمانين درجة من صديق/شقيق الى حثاله؟؟ـ

من المفروض ... اذا كنّا فعلا مبدئيين و صادقين مثل ما نؤكّد في المظالم التي تــُرفع هنا و هناك ، اللي حطّيناه في مرتبة "الصديق" و "الشقيق" ، نأسف على ابتعادهم عنا ، حتّى و إن كانوا هم من اختاروا ذلك

وقت تتوجّهلي نفس الملاحظة من طرف برشه ناس .. قدّ ما نكون واثق من "براءتي" و من "نزاهتي" و من "حسن نواياي" لابدّ من شويّة مراجعة
سبحان الله
مرّات الواحد يتخمّر و ما عادش يسيطر على لسانو والا لهجة حديثو
ثمّه حتّى اللي يعملو جرايم .. و هوما راقدين
*******
رجاء .. التفاعل مع التدوينه على اساس انّي نحكي على سلوك للتّجاوز ، و سلوك للإرساء ، و موش على ناس بعينها

15 commentaires:

samsoum a dit…

J'ai déjà parlé de cela sur mon blog, On est tous un peu hypocrite mais le plus dangereux c'est qu'on ne reconsidère jamais une position, JAMAIS.

C'est presque vu comme un déshonneur que de dire "j'ai eu tort" dans notre société du haut de la pyramide (pouvoir) jusqu'au plus bas. Au fait, on n'a que ce qu'on mérite... Dommage

HNANI a dit…

كلام معقول،أنا قاعدة انلاحظ في هالأشياء و قلبي يوجعني، لين اقتنعت بحاجة هي كونو الواحد يصون قدرو و ما يدخلش في حكايات العرك والمعروك خاصة مع الكبارات ههه

و الحقيقة حتا كيف حبيت ما نقراش الحكايات باش ما تأثّرش فيا على مستوي التدوين، ما نجّمتش و التأثير صار مع الأسف
كان لاحظتش يا ميادين فمّا نوعية طريفة متاع كتابات غابت توا مدّة لأن الإبداع ما ينجّمش يتوجد في أجواء متشنجة كيف الأجواء الموجودة والناس تحسب وتعس كأنها الحكاية فيها حرثة ولّا ورثة
يظهرلي كان انعاودوا نقراو مفهوم و ممارسات الديمقراطية في محو الأميّة

brastos a dit…

@ samsoum
ahla
lorsqu'on repete les memes erreurs sans manifester aucune tentative de changer de "caractere" vers le mieux .. c'est dramatique

brastos a dit…

@ hnani
صحيح الجو المشحون موش باهي .. و المدونات ماهيش فقط منابر متاع حوارات "اكاديمية" بربّي خلّيني نحطّها بين ظفرين هالكلمة .. بل ايضا ما فيها باس اننا نمارسو فيها شويّة هبلات ابداعية .. من نوع حكايات هناني و الحاج كلوف .. اللي صدّقني متوحّشهم برشه
:)

ferrrrr a dit…

اهلا براستوس، هذكة تونس متاعنا، ذكرك لايام الجامعة صحيح و ما تغير و كايني البارح خرجت من غادي، هذاكا اللي فمّ، مع الاسف و مع البيرة، هات نحكيو في الموضوع في اقرب فرصة،

لاعب النرد a dit…

أنا عاودت قريت الحكايات متع" المعلم القديم" وأنا شايخ ... كشكل من أشكال التعبير على رغبتي في اني نشوف الناس يتجاوزوا بالحق النقاشات اللي تخسرنا أكثر من اللي نربحوه منها...ـ

عياش مالمرسى a dit…

فهمت كل شي يا براستوس، آنا خوك قلت المرة هاذي خاطيني نشد سارترويا و خليهم يشخوا رواحهم..

ART.ticuler a dit…

@لاعب النرد
إنت تدوينة "ذكريات معلم قديم" عجبتك كيما عجبتني لما فيها من صدق ..و أنا اقترح جعلها أحسن تدوينة 2008 !
تقلي الجزء الثالث خرج في 2009 ؟ نقلك، ميسالش، نحسبوه ملحق ثقافي هههه

kacem a dit…

1- سيادتك اتشّعل في النار و إتقول الدخان منين ؟
2- خلّو الناس إتفرّغ قلوبها ...باش تتعدى لحاجة أخرى ...ما تمتش العملية هذه ...زايد ..كان تتحرّكو خطوة ألي الآمام
3- الفو ديبـــا ...الي سيادتك واخو فيها الشطر ...هي ألي باش إتفيقك من سباتك العميق
4- و للحديث بقية ...و مازال الشيئ على قدام

mandela a dit…

ya un mot fo k'on lapprend...
RESTECP...fo savwar se restecper en tunisie paceke sans restecp on ira nulle part...
malla wa7la

Ghoul a dit…

1 حسب رأي المسائل إلي ذكرتها هي مسائل مصريية مانجموش نهربو منها. رفض الخوض فيها هو نفسه اختيار غير حيادي

2 كيفاش ماش نتعلمو الحوار إذا مانحكيو كان في المسائل الثانوية أو إلّي فيها اتفّاق؟

3 الحوار مايهمّش كان طرفي الحوار، بل أيضا المشاهد/القارئ. يعني موش الهدف تغيير رأي الطرف المقابل بل مقارعة الحجج في حدّ ذاتها والحَكم هو هالطرف الثالث، حتى إذا مايعطيش رايو في وقتها

على كلّ ،الإختلاف في حدّ ذاته موش مشكل، المشكل هو إقصاء الرأي المختلف

brastos a dit…

@ kacem
ميسالش تزيد تفسّر فكرتك ؟
خاطر ما فهمتكش .. بصراحة

abu arabi a dit…

بللغت التحية للى قتلك واللا لا

Hamadi a dit…

Je partage avec vous l'esprit de l'analyse. Malheureusement, la conduite des discussions est lamentable et à chaque fois ca dégénère.

@Ghoul: Pour commencer une discussion il y a des points de départ et des points d'arrivée (objectif). Nous ne pouvons pas toujours commencer une discussion sur un sujet aussi vague et commencer à s'entre-tuer bêtement. Je ne pense pas que lesdits sujets "existentiels" le sont vraiment.

Les problèmes viennent des jugements de valeurs sur les personnes et non pas sur les idées et sur ce point une grande majorité des intervenants font de l'excès de zèle.

Ghoul a dit…

Du moment que la religion se présente comme un thème central de la société دين و دنيا ce n'est plus un sujet "existentiel" personnel et abstrait mais un sujet de société qui doit être sur la place publique.

Et comme notre société est en train de "revenir" vers la religion avec l'encouragement des pouvoirs publics, il est plus qu'urgent d'en discuter.